Tan waka neleki fa Yesus Krestes ben waka
Tan waka neleki fa Yesus Krestes ben waka
„Efu wan sma e taki dati a e tan de wán nanga [Gado], dan ensrefi musu tan waka tu neleki fa [Yesus] ben waka.”—1 YOHANES 2:6.
1, 2. San a wani taki fu poti ala wi prakseri na Yesus?
„MEKI wi horidoro te wi e lon a streilon di de na wi fesi,” na so na apostel Paulus ben skrifi; „meki wi poti ala wi prakseri na a Moro Prenspari Fesiman èn a Sma di meki a bribi fu wi kon de volmaakti, namku Yesus” (Hebrewsma 12:1, 2). Efu wi wani tan de getrow, dan wi musu poti ala wi prakseri na Yesus Krestes.
2 A Griki wortu di den gebroiki na ini den Kresten Griki Buku fu Bijbel gi „poti ala prakseri na wan sani”, wani taki „fu puru yu ai na wan sani so taki yu kan luku wan tra sani”, noso „fu tan luku wan sani doronomo”. Wan buku e taki: „A momenti di wan Griki lonman na ini a stadion no e poti en prakseri moro na a streilon èn na a kaba fu a strei, ma a e poti en prakseri na den sma di e tanapu e luku, dan a no sa man lon so esi moro. Na so a de tu nanga wan Kresten.” Sani di e puru wi prakseri kan tapu wi fu go na fesi na yeye fasi. Wi musu poti ala wi prakseri na Yesus Krestes. Sortu sma a Moro Prenspari Fesiman musu de gi wi? A Griki wortu gi „prenspari fesiman” wani taki „tiriman, noso wan sma di e teki fesi na ini ala sani èn di de wan eksempre gi trawan”. Te wi e poti ala wi prakseri na Yesus, dan disi wani taki dati wi musu waka baka na eksempre fu en.
3, 4. (a) San wi musu du efu wi wani waka soleki fa Yesus Krestes ben waka? (b) Sortu aksi wi musu go luku?
3 Bijbel e taki dati „efu wan sma e taki dati a e tan de wán nanga [Gado], dan ensrefi musu tan waka tu neleki fa Krestes ben waka” (1 Yohanes 2:6). Wi musu tan de wán nanga Gado, noso wi musu tan lobi en, fu di wi e hori wisrefi na den komando fu Yesus, neleki fa en ben e hori ensrefi na den komando fu en Tata.—Yohanes 15:10.
4 Fu dati ede, te wi wani waka soleki fa Yesus ben waka, dan wi musu poti prakseri na san en leki a Moro Prenspari Fesiman ben du, èn wi musu waka soifri soleki fa en ben waka. Den prenspari aksi di wi musu go luku now na: Fa Krestes e tiri wi na ini a ten disi? Sortu krakti a sa abi na wi tapu efu wi e waka neleki fa en ben waka? Sortu wini wi e kisi te wi e waka baka na eksempre fu Yesus Krestes?
Fa Krestes e tiri den bakaman fu en
5. Sortu sani Yesus ben pramisi den bakaman fu en, fosi a opo go na hemel?
5 Fosi Yesus Krestes opo go na hemel, baka di a kisi wan opobaka, a sori ensrefi na den disipel fu en èn a gi den wan prenspari wroko fu du. A ben taki: „Fu dati ede, go na sma fu ala kondre èn meki den tron disipel.” Na a okasi dati, a Moro Prenspari Fesiman ben pramisi den tu taki a ben o de nanga den te den ben o du a wroko disi. A taigi den: „Unu o si taki mi sa de nanga unu ala dei te na a kaba fu a grontapu sistema” (Mateyus 28:19, 20). Fa Yesus Krestes de nanga den bakaman fu en na ini a ten disi fu a kaba fu a grontapu sistema?
6, 7. Fa Yesus e gebroiki a santa yeye fu tiri wi?
6 Yesus taigi den: „A yepiman, a santa yeye, di a Tata o seni kon na ini mi nen, o leri unu ala sani èn a o meki unu memre ala den sani di mi taigi unu” (Yohanes 14:26). A santa yeye, di Gado seni kon na ini a nen fu Yesus, e tiri wi èn e tranga wi na ini a ten disi. A e leri wi sani di abi fu du nanga Gado èn a e yepi wi fu kon frustan „srefi den dipi sani fu Gado” (1 Korentesma 2:10). Boiti dati, den fasi fu Gado soleki ’lobi, prisiri, vrede, langa pasensi, bun-ati, bunfasi, bribi, safri-ati, a dwengi di wan sma man dwengi ensrefi’ na „den froktu fu a yeye” (Galasiasma 5:22, 23). Nanga a yepi fu a santa yeye, wi kan kisi den fasi disi tu.
7 Te wi e studeri Bijbel èn e pruberi fu du san wi e leri, dan a yeye fu Yehovah o yepi wi fu kisi moro koni, fu abi a koni fu man si sani moro krin, fu kon frustan sani moro bun, fu kisi moro sabi, fu man teki moro bun bosroiti, èn fu man gebroiki wi frustan moro bun (Odo 2:1-11). A santa yeye e yepi wi tu fu horidoro te wi e kisi tesi nanga problema (1 Korentesma 10:13; 2 Korentesma 4:7; Filipisma 4:13). Kresten e kisi a deki-ati fu ’krin densrefi fu ibri sani di kan doti a skin nanga a denki fu den, èn fu kon santa dorodoro’ (2 Korentesma 7:1). Wi kan de santa noso krin trutru soleki fa Gado wani, sondro a yepi fu a santa yeye? Wan fu den sani di Yesus e gebroiki na ini a ten disi fu tiri wi, na a santa yeye di a Manpikin fu Yehovah Gado kan gebroiki fu di Gado gi en primisi fu dati.—Mateyus 28:18.
8, 9. Fa Krestes e gebroiki „a getrow èn koni srafu” fu tiri wi?
8 Luku wan tra sani di Krestes e gebroiki fu tiri a gemeente na ini a ten disi. Di Yesus ben taki fu en denoya èn fu a kaba fu a grontapu sistema, dan a taki: „Suma na trutru a getrow èn koni srafu di en masra poti fu luku den futuboi fu en, fu kan gi den nyanyan na a reti ten? Koloku fu a srafu te en masra doro èn a si taki a srafu e du dati! Fu tru mi e taigi unu: A sa poti a srafu fu luku ala den sani di a abi.”—Mateyus 24:3, 45-47.
9 A „masra” na Yesus Krestes. A „srafu” na a grupu fu salfu Kresten na grontapu. A srafu-grupu disi kisi a wroko fu sorgu gi den gudu di Yesus abi dyaso na grontapu èn fu gi den nyanyan na yeye fasi na a reti ten. Wan pikin grupu fu lepi opziener teki puru na mindri ala den wan di de fu a „getrow èn koni srafu”, èn den na den wan di de na ini a Tiri Skin; a Tiri Skin disi e teki presi gi a srafu-grupu. Den e tiri a Kownukondre preikiwroko di e du na heri grontapu èn den e gi yeye nyanyan na a reti ten. Na so fasi, Krestes e gebroiki a „getrow èn koni srafu” di salfu nanga santa yeye fu tiri a gemeente, èn a e gebroiki sosrefi a Tiri Skin.
10. Fa wi musu si den owruman, èn fu san ede?
10 Ete wan fasi fa wi kan si taki Krestes e tiri wi, na den ’libisma di a gi wi leki presenti’, namku den Kresten owruman, noso opziener. A gi wi den opziener disi „fu poti den santawan na tapu a reti pasi baka, fu du diniwroko, èn fu meki a skin fu Krestes kon tranga” (Efeisesma 4:8, 11, 12). Hebrewsma 13:7 e taki fu den: „Memre den wan di e teki fesi na un mindri, di fruteri unu a wortu fu Gado, èn un musu waka baka a bribi fu den, aladi unu e luku finifini fa a libi fu den e waka.” Den owruman e teki fesi na ini a gemeente. Fu di den e waka baka Krestes Yesus, meki wi kan waka baka a bribi fu den tu (1 Korentesma 11:1). Te wi e gi yesi na den ’libisma disi di a gi wi leki presenti’ èn wi e saka wisrefi na den ondro, dan wi kan sori taki wi e warderi a seti disi fu owruman.—Hebrewsma 13:17.
11. Fa Krestes e tiri den bakaman fu en na ini a ten disi èn san a wani taki fu waka neleki fa en ben waka?
11 Iya, Yesus Krestes e gebroiki a santa yeye, „a getrow èn koni srafu”, nanga den gemeente owruman fu tiri den bakaman fu en na ini a ten disi. Efu wi wani waka soleki fa Krestes ben waka, dan wi musu frustan na sortu fasi a e tiri wi èn wi musu saka wisrefi na ondro a tiri disi. Disi wani taki sosrefi dati wi musu waka soleki fa en e waka. „Gado kari unu fu tyari unsrefi na a fasi disi, bika srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Sortu krakti a musu abi na wi tapu te wi e waka baka a volmaakti eksempre fu Yesus?
De klariklari fu fiti yusrefi te yu e teki fesi
12. Sortu sani di Krestes du de tumusi prenspari gi den owruman na ini a gemeente?
12 Aladi a Tata fu Yesus ben gi en moro makti leki iniwan sma, toku Yesus ben de klariklari fu fiti ensrefi te a ben e gebroiki a makti disi. Ala sma na ini a gemeente, èn spesrutu den opziener, musu ’meki ala sma kon sabi taki den de klariklari fu fiti densrefi’ (Filipisma 4:5; 1 Timoteyus 3:2, 3). Fu di owruman kisi bigi frantwortu na ini a gemeente, meki a de tumusi prenspari taki den e waka baka na eksempre fu Krestes te den e gebroiki a makti disi.
13, 14. Fa owruman kan waka baka Krestes te den e gi trawan deki-ati fu dini Gado?
13 Yesus ben hori na prakseri taki den disipel fu en no ben man du ala sani. A no ben e fruwakti taki den ben musu du moro leki san den ben man (Yohanes 16:12). Yesus no ben dwengi den bakaman fu en te a ben e gi den deki-ati fu „du ala muiti” fu du a wani fu Gado (Lukas 13:24). Disi a ben du fu di a ben e teki fesi èn a ben taigi den sani di ben e naki den ati. Na so Kresten owruman na ini a ten disi no e tapu skreki gi trawan so taki den sma disi e go dini Gado fu di den e firi syen noso fu di den abi konsensi fonfon. Na presi fu dati, den owruman e gi sma deki-ati fu dini Yehovah fu di den lobi en nanga Yesus sosrefi, èn fu di den lobi tra sma tu.—Mateyus 22:37-39.
14 Yesus no ben gebroiki a makti fu en fu basi a libi fu trawan. Sosrefi, a no ben e poti markitiki di sma no ben man doro, èn a no ben meki wan lo wet gi den tu. A fasi fa a ben e du sani, ben e gi sma deki-ati. Disi a ben e du fu di a ben sori den sortu gronprakseri ben de na ini den wet di Moses ben gi den, èn na so fasi a ben doro den ati (Mateyus 5:27, 28). Den owruman di e waka baka na eksempre fu Yesus Krestes, no e meki wet di e sori taki den e du sani soleki fa den wani noso soleki fa den e si sani. Efu wan sma musu kisi rai di abi fu du nanga den krosi di a e weri, a fasi fa a e sorgu en skin, noso na sortu fasi a e meki prisiri, dan owruman e pruberi fu doro en ati fu di den e gebroiki den gronprakseri di skrifi na ini Gado Wortu, soleki den wan di de na ini Mika 6:8; 1 Korentesma 10:31-33, nanga 1 Timoteyus 2:9, 10.
Hori a firi fu sma na prakseri èn gi trawan pardon
15. Fa Yesus ben handri te den disipel fu en ben meki fowtu?
15 A fasi fa Krestes ben e handri te den disipel fu en ben meki fowtu, e sori wi fa wisrefi musu handri. Luku tu sani di pasa na a lasti neti di a ben de na grontapu leki libisma. Baka di den doro na Getseimanei, dan Yesus „meki Petrus, Yakobus, nanga Yohanes kon nanga en” èn a taigi den fu „tan na ai”. Baka dati, „a waka go pikinso moro fara, dan a saka kindi èn a bigin begi Gado”. Di a drai kon baka, dan „a si taki den ben e sribi”. San Yesus du? A taki: „A tru taki a yeye wani, ma a skin swaki” (Markus 14:32-38). Na presi fu piri-ai gi Petrus, Yakobus, nanga Yohanes na wan grofu fasi, a sori taki a ben e hori den firi fu den na prakseri! A srefi neti dati, Petrus ben taki dri leisi taki a no sabi Yesus (Markus 14:66-72). Fa Yesus ben handri nanga Petrus baka dati? „Masra opo baka . . . , èn a sori ensrefi na Simon [Petrus]” (Lukas 24:34). Bijbel e taki: „A sori ensrefi na Seifas, èn baka dati na den twarfu apostel” (1 Korentesma 15:5). Yesus no ben atibron nanga na apostel di ben abi berow, ma a gi Petrus pardon èn a tranga en. Bakaten, Yesus gi Petrus furu frantwortu.—Tori fu den Apostel 2:14; 8:14-17; 10:44, 45.
16. Fa wi kan waka baka Yesus te den brada nanga sisa fu wi e meki wi firi sari, noso te den e du wan sani di e hati wi?
16 Te wi brada nanga sisa e meki wi firi sari, noso den e du wan sani di e hati wi fu di den na sondu libisma, dan a no de so taki wi musu hori a firi fu den na prakseri tu èn gi den pardon soleki fa Yesus ben e du dati? Petrus ben gi den brada fu en a deki-ati disi: „Un alamala musu abi a srefi denki, sori taki unu e firi gi tra sma, lobi den brada fu unu, de klariklari fu sori sari-ati gi trawan, èn abi sakafasi; no pai ogri nanga ogri, noso no kosi sma te den e kosi unu, ma na presi fu dati un musu blesi den” (1 Petrus 3:8, 9). Kon meki wi taki dati wan tra sma no e handri nanga wi soleki fa Yesus ben o du, èn taki a sma disi no wani hori den firi fu wi na prakseri noso a no wani gi wi pardon? Toku wi de fruplekti fu pruberi fu waka baka Yesus èn du san en ben o du.—1 Yohanes 3:16.
Poti a Kownukondre na a fosi presi
17. San e sori taki Yesus ben si a wani fu Gado leki a moro prenspari sani na ini en libi?
17 Ete wan fasi de fa wi musu waka neleki fa Yesus Krestes ben waka. A moro prenspari sani na ini Yesus libi, ben de a wroko fu preiki a bun nyunsu fu Gado Kownukondre. Baka di Yesus preiki gi a Samaria uma krosibei fu a foto Sikar na Samaria, dan a taigi den disipel fu en: „Mi nyanyan na taki mi musu du a wani fu a sma di seni mi kon èn fu klari a wroko fu en” (Yohanes 4:34). Te Yesus ben e du a wani fu en Tata, dan dati ben tranga en; a wani disi ben de neleki nyanyan di ben bun gi en, di ben meki en firi prisiri èn di ben gi en krakti. A no de so taki wi sa abi wan trutru koloku libi te wi e waka baka Yesus èn te wi e tan du ala muiti fu du a wani fu Gado?
18. Sortu blesi papa nanga mama kan kisi te den e gi den pikin fu den deki-ati fu go na ini a furuten diniwroko?
18 Te papa nanga mama e gi den pikin fu den deki-ati fu go na ini a furuten diniwroko, dan den nanga den pikin fu den sosrefi e kisi furu blesi. Wan papa fu tu boi di de twelengi, ben meki den boi fu en poti a pionierwroko leki wan marki na ini den libi sensi di den ben de pikin-nengre ete. Baka di a twelengi klari a skoro fu den, den tron pionier trutru. Te a papa disi e prakseri a prisiri di disi e gi en, dan a e skrifi: „Den boi fu wi no meki wi firi sari. Nanga furu tangi wi kan taki dati ’manpikin na wan gudu di e kon fu Yehovah’” (Psalm 127:3). Sortu wini pikin e kisi te den e du muiti fu go na ini a furuten diniwroko? Wan mama di abi feifi pikin, e taki: „A pionierwroko yepi ala den pikin fu mi fu kisi wan moro tranga banti nanga Yehovah, èn fu tron sma di man studeri moro bun; a pionierwroko yepi den tu fu gebroiki a ten fu den na wan koni fasi, èn a yepi den fu si yeye afersi leki a moro prenspari sani na ini den libi. Aladi den alamala ben abi fu kenki furu sani na ini den libi, toku nowan fu den e sari taki den teki a bosroiti disi.”
19. Fu sortu sani di abi fu du nanga a tamara, yongusma musu go prakseri èn fu san ede a de wan koni sani fu du dati?
19 Yonguwan, san unu wani go du na ini a ten di e kon? Unu wani poti ala un prakseri na wan grontapu wroko? Noso unu e du muiti fu go na ini a furuten diniwroko? Paulus e frumane wi: „Luku bun taki unu no e waka leki don sma, ma taki unu e waka leki koni sma; fu man du disi, un musu gebroiki ibri okasi bun, bika den dei ogri.” A e taki moro fara: „Fu dati ede, un no musu de sma moro di no e gebroiki den frustan, ma tan si krin san na a wani fu Yehovah.”—Efeisesma 5:15-17.
De loyaal
20, 21. Fa Yesus ben sori taki a ben de loyaal, èn fa wi kan de loyaal neleki en?
20 Te wi wani waka soleki fa Yesus ben waka, dan wi musu de loyaal neleki fa en ben de loyaal. Bijbel e taki fu a loyaalfasi fu Yesus: „Aladi a ben abi a srefi sortu skin leki Gado, toku a no prakseri fu teki sani abra nanga tranga, namku fu kan de a srefi leki Gado. Nôno, ma a gowe libi ala san a ben abi, a tron leki wan srafu èn a ben tron leki libisma. Ma a du moro leki dati srefi, bika di a ben de wan libisma, a saka ensrefi èn a gi yesi te na dede, iya, a dede na wan pina-postu.” Na wan loyaal fasi Yesus ben e horibaka gi a reti di Yehovah abi fu tiri wi, èn a ben e du san Gado ben wani en fu du. Fu di a ben gi yesi na Gado, meki a go so fara taki a dede srefi na wan pina-postu. Wi musu „abi a srefi denki disi” èn wi musu du a wani fu Gado na wan loyaal fasi.—Filipisma 2:5-8.
21 Yesus ben sori tu taki a ben de loyaal na den getrow apostel fu en. Aladi den ben abi swakifasi èn den ben abi fowtu, toku Yesus ben lobi den „te na a kaba” (Yohanes 13:1). Na so wi tu no musu krutukrutu fu di den brada nanga sisa fu wi abi fowtu.
Tan waka baka na eksempre fu Yesus
22, 23. Sortu wini wi e kisi te wi e tan waka baka na eksempre fu Yesus?
22 A no de fu taki, dati wi leki sondu libisma no kan waka soifri soleki fa wi volmaakti Eksempre ben waka. Ma wi kan du ala muiti fu waka soleki fa en ben waka. Efu wi wani du disi, dan wi musu frustan fa Krestes e tiri wi, èn wi musu saka wisrefi na en ondro èn tan waka baka na eksempre fu en.
23 Te wi e waka baka Krestes, dan wi o kisi furu blesi. Wi o prisiri moro nanga a libi èn wi e firi moro koloku fu di wi e poti ala wi prakseri na a wani fu Gado, na presi fu poti prakseri na wi eigi wani (Yohanes 5:30; 6:38). Wi abi wan bun konsensi. A fasi fa wi e waka noso a fasi fa wi e tyari wisrefi, sa de wan bun eksempre gi trawan. Yesus ben gi ala sma di ben musu wroko tranga èn di ben musu tyari hebi lai, fu kon na en èn fu kisi krakti baka (Mateyus 11:28-30). Te wi e waka baka na eksempre fu Yesus, dan wi sosrefi kan meki trawan kisi krakti baka fu di wi abi demakandra nanga den. Fu dati ede, kon meki wi tan waka soleki fa Yesus ben waka.
Yu e memre disi ete?
• Fa Krestes e tiri den bakaman fu en na ini a ten disi?
• Fa owruman kan waka baka a fasi fa Krestes e tiri wi, te den e gebroiki a frantwortu di Gado gi den?
• Fa wi kan waka baka na eksempre fu Yesus te wi e kisi fu du nanga den swakifasi fu trawan?
• Fa yonguwan kan poti a Kownukondre na a fosi presi?
[Aksi fu a tori disi]
[Prenki na tapu bladzijde 23]
Kresten owruman e yepi wi fu waka baka a tiri fu Krestes
[Prenki na tapu bladzijde 24, 25]
Yonguwan, san unu wani du fu kan libi wan koloku libi leki Kresten?