Waka nanga bribi, èn no nanga san yu e si!
Waka nanga bribi, èn no nanga san yu e si!
„Wi e waka nanga bribi, èn no nanga san wi e si.”—2 KORENTESMA 5:7.
1. San e sori taki na apostel Paulus ben e waka nanga bribi, èn no nanga san a ben e si?
A DE a yari 55 G.T. Sowan 20 yari pasa sensi wan man di nen Saulus na a ten dati èn di ben e frufolgu Kresten, teki a Kresten bribi. Ala den 20 yari dati, a no meki a bribi di a e bribi na ini Gado, kon swaki. Aladi a no man si den sani na ini hemel nanga en trutru ai, toku a bribi fu en tranga. Fu dati ede, di na apostel Paulus skrifi den salfu Kresten di ben abi a howpu fu go na hemel, dan a taki: „Wi e waka nanga bribi, èn no nanga san wi e si.”—2 Korentesma 5:7.
2, 3. (a) Fa wi e sori taki wi e waka nanga bribi? (b) Fa wan sma e sori taki a e poti prakseri na sani di a man si nanga ai?
2 Te wi wani waka nanga bribi, dan wi musu frutrow dorodoro taki Gado man tiri a libi fu wi. Wi musu abi na overtoigi taki a sabi trutru san bun gi wi (Psalm 119:66). Te wi e teki bosroiti na ini a libi èn wi e du san wi bosroiti, dan wi musu hori na prakseri san na „den sani di wi no e si” (Hebrewsma 11:1, The New English Bible). Wan fu den sani disi na den „nyun hemel nanga wan nyun grontapu” (2 Petrus 3:13). Ma na a tra sei, te wi e waka nanga san wi e si, dan disi e sori taki wi e poti den sani di wi man si nanga wi ai, èn den sani di wi man yere, smeri, noso tesi, na a fosi presi na ini wi libi. Disi kan abi takru bakapisi gi wi fu di a kan meki taki wi no e du a wani fu Gado kwetikweti moro.—Psalm 81:12; Preikiman 11:9.
3 A no abi trobi efu wi na fu a „pikin ipi” di abi a howpu fu libi na hemel, noso efu wi na fu „den tra skapu” di abi a howpu fu libi na grontapu; wi alamala musu poti prakseri na a frumane fu waka nanga bribi èn fu no poti prakseri na sani di wi man si nanga ai (Lukas 12:32; Yohanes 10:16). Kon meki wi go luku fa a rai disi di Gado gi, kan yepi wi fu no du ’sondu di e gi sma prisiri fu wan syatu pisi ten’. Wi o luku sosrefi fa a rai disi kan yepi wi fu no feti baka gudu, èn fa wi kan tan hori a kaba fu a grontapu sistema disi na prakseri. Wi wani go luku tu san kan pasa nanga wi te wi e poti prakseri na sani di wi man si nanga ai.—Hebrewsma 11:25.
Weigri fu ’prisiri nanga sondu fu wan syatu pisi ten’
4. Sortu bosroiti Moses teki, èn fu san ede?
4 Prakseri sortu libi Moses, wan manpikin fu Amram, ben kan abi. Moses di gro kon bigi na mindri den pikin fu a kownu fu owruten Egepte, ben abi na okasi fu kisi makti, fu kon gudu èn fu kisi bigi nen. Moses ben kan prakseri na ensrefi: ’Mi kon leri san na a bigi koni fu Egepte, èn den sani di mi e taki èn e du abi bun furu krakti tapu sma. Efu mi tan de wan memre fu na osofamiri fu a kownu, dan mi kan gebroiki a makti di mi abi fu yepi den Hebrew brada fu mi di e kisi kwinsi!’ (Tori fu den Apostel 7:22) Ma Moses no du dati; na presi fu dati a teki a bosroiti fu „nyan pina makandra nanga a pipel fu Gado”. Fu san ede? San meki Moses ben weigri ala den sani di Egepte ben kan gi en? Bijbel e piki: „Na fu di a ben abi bribi, meki a gowe libi Egepte, ma a no ben frede na atibron fu a kownu, bika a ben tan tanapu kánkan leki a ben e si a Sma di wi no man si nanga ai” (Hebrewsma 11:24-27). Fu di Moses ben e bribi taki Yehovah e blesi regtfardikisma trutru, meki a ben man kakafutu gi sondu èn gi den lostu fu a skin, sani di e gi sma prisiri fu wan syatu pisi ten nomo.
5. Fa na eksempre fu Moses e gi wi deki-ati?
5 Nofo tron, wi musu teki muilek bosroiti tu di abi fu du nanga aksi soleki: ’Mi musu tapu nanga son sani di mi e du, noso nanga gwenti di no e kruderi trutru nanga Bijbel markitiki? Mi musu teki wan wroko di kan gi mi na okasi fu wroko furu moni, ma di o tapu mi fu go na fesi na yeye fasi?’ Na eksempre fu Moses e gi wi deki-ati fu no teki bosroiti neleki den grontapusma, di no e sidon prakseri fa a tamara o waka. Na presi fu dati, wi musu poti bribi na ini a koni fu „a Sma di wi no man si nanga ai”, namku Yehovah Gado di man si langa ten na fesi kaba fa sani o waka. Neleki Moses, meki wi si a banti di wi abi nanga Yehovah leki wan sani di warti moro ala sani di grontapu ben sa kan gi wi.
6, 7. (a) Fa Esau ben sori taki a ben poti prakseri na sani di a ben man si nanga ai? (b) Fa na eksempre fu Esau de wan warskow gi wi?
6 Luku a difrenti na mindri Moses nanga Esau, wan manpikin fu a famiri-edeman Isak. Esau ben suku fu kisi prisiri wantewante (Genesis 25:30-34). Fu di Esau ’no ben warderi santa sani’, meki a gi wan tra sma a reti di a ben abi leki a fosi pikin, „soso fu kan kisi wán preti nyanyan” nomo (Hebrewsma 12:16). A no ben man si taki te a ben o teki a bosroiti fu seri a reti di a ben abi leki fosi pikin, dan dati ben o pori a banti di a ben abi nanga Yehovah. A no ben prakseri tu sortu bakapisi a sani di a ben o du, ben o abi gi den bakapikin fu en. A no ben man si sani soleki fa Gado e si en. Fu di Esau ben si den pramisi fu Gado leki sani di no warti furu, meki a no ben si o moi den pramisi disi ben de trutru. A ben poti prakseri na sani di a ben man si nanga ai, a no ben waka nanga bribi.
7 Na eksempre fu Esau na wan warskow gi wi na ini a ten disi (1 Korentesma 10:11). Efu wi musu teki bosroiti, awansi na bigi noso pikin bosroiti, dan wi no musu meki a denki fu a grontapu fu Satan kori wi; sma fu grontapu e taki dati yu musu teki san yu wani nownowde. A bun fu aksi wisrefi: ’Den bosroiti di mi e teki e sori taki mi e denki leki fa Esau ben e denki? A de so taki mi e poti yeye afersi na a fosi presi ete, te mi e feti fu kisi sani wantewante? Den bosroiti di mi e teki kan meki taki mi no abi wan bun banti moro nanga Gado? Den o tapu mi fu kisi blesi na ini a ten di e kon? Sortu eksempre mi e gi trawan?’ Efu den bosroiti di wi e teki e sori taki wi abi warderi gi santa sani, dan Yehovah o blesi wi.—Odo 10:22.
No feti baka gudu, bika dati na wan trapu
8. Sortu warskow den Kresten fu Laodisea ben kisi, èn fu san ede a sani disi de prenspari gi wi?
8 Na a kaba fu a fosi yarihondro, Yesus Krestes di kisi glori, ben e sori na apostel Yohanes wan openbaring pe a ben gi en wan boskopu gi a gemeente di ben de na Laodisea, na ini Pikin Asia. A ben de wan boskopu di ben e warskow den gi a feti di den ben e feti baka gudu. Aladi den Kresten fu Laodisea ben gudu, toku den ben pôti na yeye fasi. Na presi taki den ben e tan waka nanga bribi, den ben meki grontapu gudu breni den na yeye fasi (Openbaring 3:14-18). Te wi e feti baka gudu, dan disi kan pasa tu nanga wi. A kan meki a bribi fu wi kon swaki èn a kan tapu wi fu ’horidoro na ini a streilon’ fu libi (Hebrewsma 12:1). Efu wi no luku bun, dan den „prisiri fu a libi” kan meki taki wi no e du wi Kresten diniwroko nanga faya moro, èn den prisiri sani dati kan ’tyokro a diniwroko kiri’; sobun wi kan tapu fu du den sani disi srefi.—Lukas 8:14.
9. Fa wi kan kisi kibri na yeye fasi te wi de tevrede nanga yeye nyanyan èn te wi e warderi a nyanyan disi?
9 Wan fasi fa wi kan kibri wisrefi na yeye fasi, na fu de tevrede nanga san wi abi, na presi fu gebroiki den sani fu grontapu dorodoro èn fu kon gudu (1 Korentesma 7:31; 1 Timoteyus 6:6-8). Te wi no e poti prakseri na sani di wi man si nanga ai, ma wi e waka nanga bribi, dan wi sa prisiri nanga a yeye paradijs pe wi de na ini now. Te wi e teki a yeye nyanyan di bun gi wi, dan dati e pusu wi fu „bari fu prisiri bika na ati e firi bun” (Yesaya 65:13, 14). Boiti dati, wi e prisiri fu di wi abi demakandra nanga sma di abi den froktu fu a yeye fu Gado (Galasiasma 5:22, 23). A de tumusi prenspari taki wi de tevrede nanga den sani di Yehovah e gi wi na yeye fasi èn taki den e gi wi nyun krakti baka!
10. Sortu sani wi musu aksi wisrefi?
10 A bun fu aksi wisrefi wan tu sani, soleki: ’O prenspari gudu de na ini mi libi? Mi e gebroiki den gudu fu mi fu prisiri fu a libi nomo, noso mi e gebroiki den fu horibaka gi a tru anbegi? Sortu sani e gi mi trutru prisiri? Mi e prisiri fu studeri Bijbel èn fu de makandra nanga den brada nanga sisa na den Kresten konmakandra, noso mi e prisiri taki mi kan gowe na tapu satra nanga sonde, na wan ten te mi ben o abi fu poti prakseri na den frantwortu di mi abi leki Kresten? Mi e gebroiki pikinmoro ala den satra nanga sonde fu du prisiri sani, na presi fu gebroiki a ten dati fu go na ini a preikiwroko noso fu du tra sani di abi fu du nanga a soifri anbegi?’ Fu waka nanga bribi, wani taki dati wi musu tan wroko tranga na ini a Kownukondre wroko, aladi wi abi ala frutrow na ini den pramisi fu Yehovah.—1 Korentesma 15:58.
Hori a kaba na prakseri
11. Fa wi sa man tan hori a kaba na prakseri efu wi e waka nanga bribi?
11 Te wi e waka nanga bribi, dan dati sa yepi wi fu no abi a denki di libisma abi taki a kaba de fara ete noso taki a no sa kon kwetikweti. Wi no de leki den sma di e spotu nanga Bijbel profeititori, ma wi e si krin fa den sani di e pasa na grontapu e kruderi nanga san Gado Wortu ben taki na fesi fu a ten fu wi (2 Petrus 3:3, 4). Fu eksempre, a no de so taki a fasi fa moro furu sma e denki èn e du sani, e sori taki wi e libi na ini „den lasti dei”? (2 Timoteyus 3:1-5) A bribi fu wi e meki wi si taki den sani di e pasa na grontapu na ini a ten disi, a no sani nomo di ben pasa wan leisi kaba na ini historia. Na presi fu dati, den na „a marki fu [Krestes en] denoya èn fu a kaba fu a grontapu sistema disi”.—Mateyus 24:1-14.
12. Fa den sani di Yesus taki na ini Lukas 21:20, 21, kon tru na ini a fosi yarihondro?
12 Luku wan sani di pasa na ini a fosi yarihondro fu wi Gewoon Teri di wi kan agersi nanga a ten fu wi. Di Yesus Krestes ben de na grontapu, dan a ben warskow den bakaman fu en: „Te unu e si taki legre seti kampu lontu Yerusalem, dan un musu sabi taki a ten doro taki a foto o kisi pori. Dan meki den sma di de na Yudea, bigin lowe go na den bergi, èn den sma di de na ini a foto srefi musu hari gowe fu drape” (Lukas 21:20, 21). A profeititori disi kon tru di den legre fu Rome na ondro a tiri fu legre-edeman Cestius Gallus, lontu Yerusalem na ini a yari 66 G.T. Ma sondro fu wan sma fruwakti disi den legre disi hari densrefi puru wantronso, èn dati ben de wan marki gi den Kresten taki den ben kan „lowe go na den bergi”. Di den legre fu Rome drai kon baka na ini 70 G.T., den broko kon na ini a foto Yerusalem èn den pori a tempel fu a foto disi. Josephus e skrifi taki moro leki wán milyun Dyu dede, èn den tyari 97.000 Dyu go na ini katibo. Gado ben krutu a Dyu sistema dati. Den sma di ben e waka nanga bribi èn di ben poti prakseri na a warskow fu Yesus, ben man lowe gi a rampu disi.
13, 14. (a) Sortu sani o pasa dyonsro? (b) Fu san ede wi musu tan poti prakseri na a kontru fu den Bijbel profeititori?
13 Wan srefi sortu sani o pasa na ini a ten fu wi. Te Gado o tyari wan krutu kon, dan a o gebroiki wan tu grupu na ini den Verenigde Nâsi fu du disi. Neleki fa sma ben poti den legre fu Rome na ini a fosi yarihondro fu sorgu gi a Pax Romana (noso a vrede fu Rome), na so sma seti den Verenigde Nâsi na ini a ten disi fu sorgu taki vrede de. Aladi den legre fu Rome ben pruberi fu meki vrede de na ini a grontapu sistema fu a ten dati, toku na den srefi legre disi pori Yerusalem. Na so a sa pasa tu na ini a ten disi. Bijbel profeititori e sori taki kondre di abi bigi legre èn di de wan memre fu den Verenigde Nâsi, o si kerki leki wan sani di e tyari bruya kon, èn den o pori a disiten Yerusalem, namku den falsi Kresten bribi, èn sosrefi a tra pisi fu Babilon a Bigiwan (Openbaring 17:12-17). Iya, a ten doro taki a heri grontapu tirimakti fu falsi bribi o kisi pori.
14 Te den falsi bribi o kon na wan kaba, dan dati o de a bigin fu a bigi banawtu. Na ini a lasti pisi fu a bigi banawtu, den tra pisi fu na ogri grontapu sistema disi o kisi pori (Mateyus 24:29, 30; Openbaring 16:14, 16). Te wi e waka nanga bribi, dan disi e yepi wi fu hori a kontru fu Bijbel profeititori na prakseri. Sma no man kori wi fu denki taki wan organisâsi fu libisma soleki den Verenigde Nâsi, na a wrokosani di Gado sa gebroiki fu tyari trutru vrede nanga seikerfasi kon. Fu dati ede dan, a fasi fa wi e libi musu sori taki wi e bribi taki „a bigi dei fu Yehovah de krosibei”, a no so?—Sefanya 1:14.
Sortu takru bakapisi a kan abi gi wi te wi e poti prakseri na sani di wi man si nanga ai?
15. Na ini sortu trapu a pipel Israel fadon aladi den si fa Gado ben blesi den?
15 Den sani di Israel fu owruten ondrofeni, e sori san kan pasa te wi e meki wi bribi kon swaki fu di wi e poti prakseri na sani di wi man si nanga ai. Aladi den Israelsma si den tin plaag di ben soso den falsi gado fu Egepte èn aladi den ondrofeni fa Gado frulusu den na ini a Redi Se na wan tumusi aparti fasi, toku den trangayesi Gado èn den meki wan gowtu pikin kaw di den bigin anbegi. Den no ben abi pasensi èn den ben kon weri fu wakti tapu Moses, di „ben tan langa fu saka komopo na a bergi” (Exodus 32:1-4). Fu di den no ben abi pasensi, meki den go anbegi wan popki di den ben man si nanga den trutru ai. Fu di den poti prakseri na san den ben e si nanga ai, meki Yehovah kisi atibron èn a kiri „sowan dri dusun man” (Exodus 32:25-29). A de wan sari sani trutru te wan anbegiman fu Yehovah na ini a ten disi e teki bosroiti di e sori taki a no e frutrow tapu Yehovah, èn taki a no e bribi dati A man du san a pramisi!
16. Sortu krakti a ben abi tapu den Israelsma di den poti prakseri na sani di den ben man si nanga ai?
16 Fu di den Israelsma ben poti prakseri na sani di den ben man si nanga ai, meki dati ben abi tra takru bakapisi gi den. Wán takru bakapisi ben de, taki den ben frede den feanti fu den fu di den ben e waka nanga san den ben si (Numeri 13:28, 32; Deuteronomium 1:28). Disi meki taki den ben opo densrefi teige a makti di Gado ben gi Moses èn den ben kragi fu a fasi fa a libi fu den ben e waka. Fu di den no ben abi nofo bribi, meki den ben wani go baka na Egepte di ben de na ini a makti fu ogri yeye, na presi taki den ben wani libi na ini a Pramisi Kondre (Numeri 14:1-4; Psalm 106:24). A ben musu fu hati Yehovah trutru di a si taki a pipel fu en no ben abi nowan dropu lespeki gi a Kownu fu den di den no ben man si nanga ai!
17. San ben meki taki den Israelsma no ben wani a tiri fu Yehovah na ini a ten fu Samuel?
17 Wan tra leisi baka na ini a ten fu a profeiti Samuel, a pipel Israel di Gado ben lobi so, ben fadon na ini wan trapu fu di den ben poti prakseri na sani di den ben man si nanga ai. A pipel ben wani wan kownu di den ben man si. Aladi Yehovah ben sori taki a ben de a Kownu fu den, toku disi no ben sari fu meki den waka nanga bribi (1 Samuel 8:4-9). Na a don fu den, meki den no ben wani a volmaakti tiri fu Yehovah, ma na presi fu dati den ben wani de leki den tra kondre na den lontu, èn disi ben abi takru bakapisi gi den.—1 Samuel 8:19, 20.
18. San wi kan leri fu den takru bakapisi di kan miti wan sma te a e poti prakseri na sani di a man si nanga ai?
18 Wi leki futuboi fu Yehovah na ini a ten disi, e si a banti di wi abi nanga Gado leki wan warti sani. Wi e angri fu leri wan bun sani fu den sani di pasa na ini owruten èn wi wani gebroiki dati na ini a libi fu wi (Romesma 15:4). Te den Israelsma ben e poti prakseri na sani di den ben man si nanga ai, dan den ben frigiti taki Gado ben e gebroiki Moses fu tiri den. Efu wi no e luku bun, dan wisrefi kan frigiti taki Yehovah Gado nanga a Moro Bigi Moses, namku Yesus Krestes, e tiri a Kresten gemeente na ini a ten disi (Openbaring 1:12-16). Wi musu luku bun taki wi no e si na organisâsi fu Yehovah dyaso na grontapu, soleki fa libisma e si en. Efu wi e du dati, dan wi kan tron sma di abi a gwenti fu kragi fu sani èn wi no sa abi warderi moro gi den sma di e teki presi gi Yehovah. Sosrefi, wi no sa abi warderi moro gi a yeye nyanyan di „a getrow èn koni srafu” e gi wi.—Mateyus 24:45.
Teki a fasti bosroiti fu waka nanga bribi
19, 20. Sortu fasti bosroiti yu teki, èn fu san ede?
19 Bijbel e taki: „Wi no e feti nanga libisma, ma nanga den tirimakti, nanga den wan di abi makti èn nanga den tiriman fu a dungru disi, nanga den ogri yeye na hemel” (Efeisesma 6:12). A moro bigi feanti fu wi na Satan Didibri. A wani pori a bribi di wi e bribi na ini Yehovah. A sa gebroiki ibri fasi di kan puru wi prakseri fu a bosroiti di wi teki fu dini Gado (1 Petrus 5:8). San sa kibri wi fu no meki den sani di wi e si na ini a grontapu sistema fu Satan, kori wi? Te wi no e poti prakseri na sani di wi man si nanga ai, ma wi e waka nanga bribi, dan wi sa kisi kibri! Te wi e frutrow tapu Yehovah èn wi e bribi den sani di a pramisi, dan dati sa kibri wi so taki ’a bribi fu wi no sa kon lasi, neleki wan sipi di sungu’ (1 Timoteyus 1:19). Fu dati ede, meki wi abi a fasti bosroiti fu tan waka nanga bribi, èn fu frutrow dorodoro na ini den blesi fu Yehovah. Meki wi tan begi tu taki wi man lon komoto gi ala den sani di o pasa na ini a ten di e kon.—Lukas 21:36.
20 Efu wi e waka nanga bribi èn wi no e poti prakseri na sani di wi man si nanga ai, dan wi abi wan tumusi bun Eksempre di wi kan waka na en baka. Bijbel e taki: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Na ini a tra artikel, wi o luku fa wi kan tan waka soleki fa en ben waka.
Yu e memre disi ete?
• Fa den eksempre fu Moses nanga Esau leri yu taki yu no musu poti prakseri na sani di yu man si nanga ai, ma taki yu musu waka nanga bribi?
• San kan yepi wi fu no feti baka gudu?
• Te wi e waka nanga bribi, dan fa dati kan yepi wi fu no prakseri taki a kaba de fara ete?
• Fu san ede a kan abi takru bakapisi gi wi te wi e poti prakseri na sani di wi man si nanga ai?
[Aksi fu a tori disi]
[Prenki na tapu bladzijde 17]
Moses ben waka nanga bribi
[Prenki na tapu bladzijde 18]
A de so taki den prisiri sani di yu e du, e tapu yu nofo tron fu du den sani di wi leki Kresten musu du?
[Prenki na tapu bladzijde 20]
Fa yu kan kisi kibri te yu e poti prakseri na a Wortu fu Gado?