Yesus ben de wan Gado noso wan libisma?

„MI NA a leti fu grontapu. A sma di e waka na mi baka, no sa waka na ini a dungru kwetikweti, ma a sa abi a leti di e gi libi” (Yohanes 8:12). A sma di taki a sani disi, na Yesus Krestes. Wan koniman fu a fosi yarihondro skrifi fu Yesus: „Ala den gudu fu koni èn fu sabi kibri bun na ini en” (Kolosesma 2:3). Bijbel e taki tu: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Efu wi e angri fu abi wan banti nanga Gado, dan a de prenspari taki wi abi soifri sabi fu Yesus.

Furu sma na heri grontapu yere kaba fu Yesus Krestes. A no de fu taki dati a du furu sani di abi krakti tapu a historia fu libisma. Fu taki en leti, a kalender di furu sma na grontapu e gebroiki, e bigin na ini a yari di sma denki taki Yesus gebore. The World Book Encyclopedia e taki: „Furu tron a de so, dati te sma e taki fu wan sani di pasa bifo a yari dati, dan den e taki B.K., noso bifo Krestes.” „Den e gebroiki A.D., noso anno Domini (na ini a yari fu wi Masra), gi wan sani di pasa baka a yari di Yesus gebore.”

Ma toku, furu difrenti fasi de fa sma e denki fu Yesus. Son sma feni taki a ben de noti moro leki wan prenspari man di du bun furu na ini a historia. Ma trawan e anbegi en fu di den e si en leki na Almakti Gado. Son sma di teki a Hindu bribi, agersi Yesus Krestes nanga a Hindu gado Krishna; furu sma e taki dati en na wan gado di tron wan libisma. A de so taki Yesus ben de soso wan libisma, noso taki a ben de wan sma di trawan musu anbegi? Suma Yesus ben de trutru? Fu pe a komoto? Sortu sma a ben de? Pe a de now? Na ini na artikel di e kon now, wi o si taki a buku di e fruteri wi furu sani fu Yesus, e gi wan yoisti piki tapu den aksi disi.