A de wan seryusu sani fu kon sabi san den marki wani taki!

„Na ini a bigin mi ben denki taki Andreas, a boi fu wi, ben abi ede-ati nomo. Ma te fu kaba, a no ben wani nyan moro èn a ben kisi hebi korsu. Na ede-ati fu en ben kon moro hebi, èn mi ben e bigin frede. Di mi masra doro na oso, wi tyari Andreas go na datra. A datra luku fa Andreas ben e firi èn a seni en go na ati-oso wantewante. A no ben de wan ede-ati nomo. Andreas ben abi wan seryusu siki na a edetonton fu en, wan siki di sma e kari meningitis. Den ben yepi Andreas na ati-oso, èn heri esi a ben kon betre baka.”​—Gertrud, wan mama na ini Doisrikondre.

KANDE furu papa nanga mama ondrofeni wan srefi sortu sani neleki Getrud. Den e si sani di e sori den taki kande a pikin fu den siki. Aladi a no ala siki de so seryusu, toku papa nanga mama no kan tapu den ai gi den sani di e sori taki den pikin fu den siki. Te den e si taki wan sani no bun èn te den e handri na a yoisti fasi, dan dati kan meki taki sani waka heri tra fasi. A de wan seryusu sani.

Na so a de na ini tra afersi tu. Wan eksempre fu disi, na a tsunami di ben tyari bigi rampu kon gi den sma di e libi na ini a kontren fu na Indisch Se, na ini december 2004. Difrenti organisâsi na ini kondre soleki Australia nanga Hawai ben kon sabi taki wan bigi gronseki ben de na a noordsei fu Sumatra èn den ben si na fesi sortu takru bakapisi dati ben o abi. Ma nowan fasi ben de fu warskow den sma na ini den kontren pe a rampu ben o feni presi, so taki den ben kan lowe biten. Leki bakapisi fu dati, moro leki 220.000 sma lasi den libi.

Marki di abi fu du nanga moro prenspari sani

Di Yesus Krestes ben de na grontapu, a ben leri den arkiman fu en fa fu poti prakseri na den marki di den ben e si èn san fu du te den ben e si den marki dati. A ben e taki fu wan tumusi prenspari tori. Bijbel e taki: „Den Fariseiman nanga den Saduseiman kon na en fu tesi en, dati meki den aksi en fu a sori den wan marki fu hemel. A piki den, taki: ’Te a e kon dungru, dan unu gwenti taki: „A o de wan moi neti, bika hemel redi”; na mamanten unu e taki: „Tide a sa de wan kowru dei èn alen o fadon, bika hemel redi, ma a dungrudungru.”  Unu sabi fruklari fu san ede a loktu tan wan fasi, ma unu no sabi fruklari san den marki fu a ten disi wani taki.’”​—Mateyus 16:1-3.

Di Yesus ben e taki fu „den marki fu a ten disi”, dan a ben wani sori den Dyu fu a fosi yarihondro di ben e arki en, taki den ben musu sabi na ini sortu tumusi prenspari ten den ben e libi. Bigi rampu ben o miti a Dyu sistema, èn dati ben o abi krakti tapu den alamala. Wan tu dei bifo Yesus dede, a ben taki nanga den disipel fu en fu wan tra marki, namku a marki fu a denoya fu en. Den sani di a taki na a okasi dati, de tumusi prenspari gi ibri sma na ini a ten disi.