A Wortu fu Yehovah de libilibi

Edepenti fu a buku Wan Kroniki

A DE sowan 77 yari kaba taki den Dyu komoto na ini katibo na Babilon, go na den mamakondre. A tempel di Granman Serubabel ben bow baka, de now sowan 55 yari kaba. A moro prenspari reide fu san ede den Dyu drai kon baka na den kondre, na fu seti a tru anbegi kon bun baka na ini Yerusalem. Ma a pipel no abi faya gi na anbegi fu Yehovah. A de tumusi prenspari taki den kisi deki-ati, èn dati na soifri san a buku Wan Kroniki e gi den.

Boiti taki a buku Wan Kroniki e taki fu den difrenti famirilin, dan a e taki tu fu sani di pasa na ini wan pisi ten fu sowan 40 yari, sensi a ten di Kownu Saul dede te go miti a ten di Kownu David dede. Sma e bribi taki na a priester Esra skrifi a buku disi na ini a yari 460 b.G.T. A buku Wan Kroniki prenspari gi wi fu di a e taki finifini fa sma ben e anbegi Gado na ini a tempel èn a e taki sosrefi fu finifini tori di abi fu du nanga a famirilin fu a Mesias. Leki wan pisi fu a Wortu fu Gado, a boskopu na ini Wan Kroniki e tranga wi bribi èn a e yepi wi fu frustan Bijbel moro bun.​—Hebrewsma 4:12.

A E TAKI FU PRENSPARI NEN

(1 Kroniki 1:1–9:44)

Dri reide de fu san ede den finifini tori di Esra skrifi fu den difrenti famirilin, de prenspari: fu sorgu taki ala den man di e dini leki priester, na man di kisi a frantwortu dati, fu yepi den Israelsma sabi sortu gudu den difrenti lo ben musu kisi, èn fu no meki den nen fu den afo fu a Mesias lasi gowe. Wan Kroniki e kari den nen fu den afo fu den Dyu, fu sensi a ten fu a fosi man, Adam. Fu Adam te go miti Noa yu abi tin afo, èn fu Noa te go miti Abraham yu abi tin afo sosrefi. Baka te Wan Kroniki e taki fu den manpikin fu Ismael, den manpikin fu Ketura, wan wefi fu Abraham, èn den manpikin fu Esau, dan a buku e poti prakseri na den famirilin fu den 12 manpikin fu Israel.—1 Kroniki 2:1.

Esra e poti moro prakseri na a famirilin fu Yuda, fu di den sma fu a famirilin dati ben o de den afo fu Kownu David. Fu Abraham te go miti David wi e teri 14 afo, èn fu David te go miti a ten di sma ben tyari den Dyu go na Babilon, wi e teri 14 afo (1 Kroniki 1:27, 34; 2:1-15; 3:1-17; Mateyus 1:17). Baka dati, Esra e kari den nen fu den bakapikin fu den lo di de na a owstusei fu Yordanliba, èn baka dati a e taki fu famirilin fu den manpikin fu Leifi (1 Kroniki 5:1-24; 6:1). Baka dati, Esra skrifi syatu fu wan tu fu den tra lo di de na a west-sei fu Yordanliba èn a e taki finifini fu a famirilin fu Benyamin (1 Kroniki 8:1). Esra ben skrifi den nen tu fu den fosi Dyu di ben e libi na ini Yerusalem, baka di den komoto na ini katibo na Babilon.​—1 Kroniki 9:1-16.

Piki tapu den aksi fu Bijbel:

1:18​—Suma ben de a papa fu Sela: Kainan, noso Arpaksad? (Lukas 3:35, 36) Arpaksad ben de a papa fu Sela (Genesis 10:24; 11:12). A kan taki na ini Lukas 3:36, sma kenki a wortu  „Kaldeasma” kon tron „Kainan”. Efu dati de so, dan a kan taki di Lukas skrifi a tori, a ben skrifi „a manpikin fu a Kaldeasma Arpaksad”. Noso a kan tu taki den nen Kainan nanga Arpaksad e sori go na a srefi sma. A bun fu hori na prakseri taki den wortu „manpikin fu Kainan” no skrifi na ini wan tu fu den fosi Bijbel dokumenti.​—Lukas 3:36.

2:15​—David ben de a di fu seibi manpikin fu Isai? Nôno. Isai ben abi aiti manpikin, èn David ben de a moro yonguwan (1 Samuel 16:10, 11; 17:12). Soleki fa a sori, dan wan fu den manpikin fu Isai kon dede sondro fu meki pikin. Fu di a manpikin dati no ben abi pikin, meki a no ben o abi krakti tapu a famirilin. Dati meki Esra no skrifi a nen fu en.

3:17​—Fu san ede Lukas 3:27 e taki dati Sealtièl, a manpikin fu Yekonya, ben de a manpikin fu Neri? Yekonya ben de a papa fu Sealtièl. Ma soleki fa a sori, dan Neri ben meki na umapikin fu en trow nanga Sealtièl. Lukas e kari a masra fu na umapikin fu Neri, a manpikin fu Neri, neleki fa a du nanga Yosef. Lukas ben taki dati Yosef na a manpikin fu Eli, a papa fu Maria.—Lukas 3:23.

3:17-19​—Fa Serubabel, Pedaya, nanga Sealtièl ben de famiri fu makandra? Serubabel ben de wan manpikin fu Pedaya, èn Pedaya ben de wan brada fu Sealtièl. Ma son leisi Bijbel e kari Serubabel a manpikin fu Sealtièl (Mateyus 1:12; Lukas 3:27). Kande disi de so fu di na Sealtièl ben kweki Serubabel baka di Pedaya dede. Noso a kan taki Pedaya ben trow nanga a wefi fu Sealtièl fu meki bakapikin gi en, fu di Sealtièl dede sondro fu meki pikin. A kan taki a fosi pikin di den kisi, ben de Serubabel.​—Deuteronomium 25:5-10.

5:1, 2​—San a ben wani taki dati Yosef kisi a reti fu a fosi geborewan? A ben wani taki dati Yosef kisi tu tron moro furu fu a famirigudu leki den tra brada fu en (Deuteronomium 21:17). Fu dati ede a ben tron papa fu tu lo, namku a lo fu Efraim nanga a lo fu Manase. Den tra manpikin fu Israel ben tron papa fu wán lo nomo.

Sani di wi kan leri:

1:1–9:44. Den famirilin fu sma di ben e libi trutru, e buweisi taki a heri seti fu a tru anbegi a no wan anansitori, ma sani di pasa trutru.

4:9, 10. Yabes ben begi Yehovah fayafaya fu meki a kontren fu en kon moro bigi sondro taki a ben abi fu feti. Na so fasi, moro sma di ben abi frede gi Gado, ben o man libi na ini a kontren fu en. Yehovah ben piki a begi fu en. Wi sosrefi musu begi fayafaya fu aksi Gado fu meki moro sma kon dini en, aladi wi e wroko fayafaya fu meki disipel.

5:10, 18-22. Na ini den dei fu Kownu Saul, den lo di ben de na a owstusei fu Yordanliba ben wini den Hagritsma di den ben feti nanga den, aladi den Hagritsma ben abi tu tron moro furu fetiman leki den lo disi. Den deki-ati man fu den lo disi ben wini a feti, fu di den ben frutrow tapu Yehovah èn fu di den ben e suku yepi na en. Meki wi frutrow dorodoro tapu Yehovah aladi wi e tan feti na yeye fasi, teige feanti di tranga omeni tron moro wi.​—Efeisesma 6:10-17.

9:26, 27. Den waktiman fu a lo fu Leifi di ben tanapu na den portu, ben kisi wan bigi frantwortu. Den ben kisi a sroto fu den portu fu den difrenti santa presi fu a tempel. Ibri dei, den ben e opo den portu na wan getrowfasi. Wi kisi a frantwortu fu suku sma na ini a kontren fu wi èn fu yepi den fu bigin anbegi Yehovah. Wi musu du a wroko disi na wan getrowfasi,  neleki den waktiman fu a lo fu Leifi di ben e tanapu na den portu, a no so?

DAVID E TIRI LEKI KOWNU

(1 Kroniki 10:1–29:30)

A tori e bigin nanga a ten di Kownu Saul èn den dri manpikin fu en dede na ini a feti teige den Filistiasma na Gilboabergi. David, a manpikin fu Isai, e tron kownu fu a lo fu Yuda. Man fu ala den lo e kon na Hebron èn den e meki David tron kownu fu heri Israel (1 Kroniki 11:1-3). Syatu baka dati, a e teki Yerusalem abra. Bakaten, den Israelsma e tyari na ark fu a frubontu go na Yerusalem „aladi den ben e bari fu prisiri èn den ben e bro na tapu a tutu èn . . . ben e prei tranga poku na tapu pokusani di abi titei èn na tapu harpu”.​—1 Kroniki 15:28.

David e sori taki a abi na angri trutru fu bow wan oso gi a tru Gado. Ma Yehovah e libi a grani dati gi Salomo, èn A e sroto wan frubontu nanga David gi wan Kownukondre. Te David e feti teige den feanti fu Israel, Yehovah e yepi en fu wini furu feti baka makandra. David ben meki sma teri a pipel, ma fu di a no ben mag du dati, meki sowan 70.000 sma dede. Baka di wan engel taigi David fu bow wan altari gi Yehovah, David bai wan pisi gron fu Ornan, a Yebus man. David e bigin „sreka bun furu sani” fu bow wan „kefalek moi” oso gi Yehovah na a presi dati (1 Kroniki 22:5). David e orga den difrenti wroko di den Leifisma ben e du; nowan tra buku na ini Bijbel e taki so fini fu a tori disi leki Wan Kroniki. A kownu nanga a pipel e gi furu sani leki bijdrage fu horibaka gi a tempel. Baka te David tiri 40 yari langa, a e dede aladi a ben „libi langa, èn a ben abi furu gudu nanga glori; èn en manpikin Salomo, bigin tiri na presi fu en”.​—1 Kroniki 29:28.

Piki tapu den aksi fu Bijbel:

11:11​—Fu san ede Wan Kroniki e taki dati 300 man ben lasi den libi, aladi 2 Samuel 23:8 di e taki fu a srefi tori, e taki dati 800 man ben lasi den libi? Na edeman fu den dri moro deki-ati fetiman fu David, ben de Yasobam, noso Yosheb-Basheibet. Den tu tra tranga man ben de Eleasar nanga Sama (2 Samuel 23:8-11). A kan taki den tu difrenti nomru di kari na ini den tu buku disi, e sori go na tu difrenti sani di a srefi man ben du.

11:20, 21​—Sortu posisi Abisai ben abi na mindri den dri prenspari tranga man fu David? Abisai no ben de wán fu den moro tranga man di ben e dini David. Ma soleki fa 2 Samuel 23:18, 19 e taki, dan a ben de na edeman fu 30 fetiman èn a ben de a moro prenspariwan fu den man dati. Abisai ben kisi barinen neleki den dri prenspari tranga man, fu di a ben handri na a srefi deki-ati fasi leki Yasobam.

12:8​—Na sortu fasi den fesi fu den fetiman fu Gad ben gersi „fesi fu lew”? Den deki-ati man disi ben de nanga David na ini a gran sabana. A wiwiri fu den ben gro kon langa. A bigi wiwiri na tapu den ede èn a bigi barba fu den, ben meki den gersi lew.

13:5​—San na „a liba fu Egepte”? Son sma e denki taki den wortu disi e sori go na wan fu den kriki fu a Nijl-liba. Ma furu sma e taki dati den wortu disi e sori go na „a lagi presi fu Egepte”; wan langa liba na mindri tu bergi, di e sori pe a zuid-west lanki fu a Pramisi Kondre de.​—Numeri 34:2, 5; Genesis 15:18.

16:30​—San a wani taki fu abi „hebi skin-ati” fu Yehovah ede? A wortu „skin-ati” di gebroiki dyaso na wan agersi fasi, wani taki dati wan sma musu abi wan yoisti frede gi Yehovah èn taki a musu abi dipi lespeki gi En.

 16:1, 37-40; 21:29, 30; 22:19​—Sortu seti na ini na anbegi ben de na ini Israel sensi a ten di den ben tyari na Ark go na Yerusalem te na a ten di a tempel ben bow? Di David ben tyari na Ark go na Yerusalem èn di a poti en na ini a tenti di a ben meki, dan na Ark no ben de na ini a tabernakel omeni yari kaba. Baka di den ben froisi na Ark, dan den ben libi en na ini a tenti dati na ini Yerusalem. A tabernakel ben de na ini Gibeon, pe Granpriester Sadok nanga den brada fu en ben e tyari srakti-ofrandi soleki fa a Wet ben e taki. A seti disi ben tan teleki den kaba bow a tempel na ini Yerusalem. Di a tempel ben kaba bow, den ben tyari a tabernakel komoto fu Gibeon go na Yerusalem, èn den ben poti na Ark na ini a Moro Santa presi fu a tempel.​—1 Kownu 8:4, 6.

Sani di wi kan leri:

13:11. Na presi taki wi e atibron nanga Yehovah èn e gi en a fowtu te wi no abi bun bakapisi aladi wi meki muiti fu du wan sani, dan wi musu ondrosuku a situwâsi èn wi musu pruberi fu si fa a du kon taki sani no waka bun. A no de fu taki dati David du dati. A ben leri fu a fowtu di a ben meki èn bakaten a ben abi bun bakapisi di a tyari na Ark go na Yerusalem na a yoisti fasi. *

14:10, 13-16; 22:17-19. Ala ten wi musu begi Yehovah èn suku yepi na en, fosi wi bosroiti fu du iniwan sani di kan abi krakti na wi tapu na yeye fasi.

16:23-29. Na anbegi fu Yehovah musu de a moro prenspari sani na ini wi libi.

18:3. Ala ten Yehovah e du san a pramisi. Nanga yepi fu David, a du san a ben pramisi Abraham, namku taki a ben o gi den bakapikin fu en a heri kondre Kanan, „fu a liba fu Egepte te go miti a bigi liba, na Eufraat liba”.​—Genesis 15:18; 1 Kroniki 13:5.

21:13-15. Yehovah ben gi na engel a komando fu no kiri moro sma nanga a pestsiki, fu di a e sari te a pipel fu En e pina. Fu tru, „a abi bun furu sari-ati”. *

22:5, 9; 29:3-5, 14-16. Aladi David no ben kisi a wroko fu bow a tempel fu Yehovah, toku a ben e sori taki a ben lobi fu gi sani. Fu san ede? Fu di a ben e frustan taki ala den sani di a ben kisi ben kon fu di Yehovah sori en bunfasi. A srefi warderi dati musu pusu wi fu de klariklari fu gi sani.

24:7-18. Den 24 priestergrupu di David ben seti, ben de ete di na engel fu Yehovah ben kon na Sakaria, a papa fu Yohanes a Dopuman, fu fruteri en taki Yohanes ben o gebore. Leki wan memre fu „a priestergrupu fu Abia”, Sakaria ben e dini na ini a tempel na a ten dati (Lukas 1:5, 8, 9). A tru anbegi abi fu du nanga sma di ben e libi trutru na ini a historia, a no abi fu du nanga sma fu wan anansitori. Wi e kisi blesi te wi e wroko makandra na wan loyaal fasi nanga a „getrow èn koni srafu” na ini a ten disi, fu anbegi Yehovah na wan fasi di orga bun.​—Mateyus 24:45.

Dini Yehovah „nanga wan prisiri sili”

Wan Kroniki no e taki nomo fu den difrenti famirilin. A e taki tu fu a pisi ten di David ben tyari na ark fu a frubontu go na Yerusalem, fu den bigi feti di a wini, fu den sani di a sreka fu bow a tempel, èn fu a seti di a seti a priestergrupu fu Leifi di ben e du diniwroko. A no de fu taki dati ala den sani di Esra skrifi na ini Wan Kroniki tyari furu wini gi den Israelsma, fu di a ben e yepi den fu kisi nyun krakti so taki den ben kan de fayafaya baka fu go anbegi Yehovah na a tempel.

David gi wan tumusi moi eksempre fu di a ben poti na anbegi fu Yehovah na a fosi presi na ini en libi! Na presi taki a ben e suku grani gi ensrefi, David ben e suku fu du a wani fu Gado. Wi e kisi deki-ati fu du san a taki, namku fu dini Yehovah ’nanga wi heri ati èn nanga wan prisiri sili’.​—1 Kroniki 28:9.

[Futuwortu]

[Karta/​Prenki na tapu bladzijde 8-11

(Efu yu wani si pe den sani disi skrifi, luku a tijdschrift)

Den afo, fu Adam te go miti Noa (1056 yari)

4026 b.G.T. Adam

130 yari ⇩

Set

105 ⇩

Enos

90 ⇩

Kenan

70 ⇩

Mahalalel

65 ⇩

Yared

162 ⇩

Heinok

65 ⇩

Metusala

187 ⇩

Lamek

182 ⇩

2970 b.G.T. NOA gebore

Den afo, fu Noa te go miti Abraham (952 yari)

2970 b.G.T. Noa

502 yari ⇩

Sem

100 ⇩

A FRUDU 2370 b.G.T.

Arpaksad

35 ⇩

Selah

30 ⇩

Heiber

34 ⇩

Peleg

30 ⇩

Rehu

32 ⇩

Serug

30 ⇩

Nahor

29 ⇩

Tera

130 ⇩

2018 b.G.T. ABRAHAM gebore

Fu Abraham te go miti David: 14 afo (911 yari)

2018 b.G.T. Abraham

100 yari

Isak

60 ⇩

Jakob

sowan 88 yari ⇩

Yuda

⇩

Peres

⇩

Hesron

⇩

Ram

⇩

Aminadab

⇩

Naheson

⇩

Salmon

⇩

Boas

⇩

Obed

⇩

Isai

⇩

1107 b.G.T. DAVID gebore