Ondrofenitori

Na eksempre fu mi papa nanga mama gi mi krakti

SOLEKI FA JANEZ REKELJ FRUTERI

A ben de a yari 1958. Mi nanga mi wefi Stanka ben de te na den Alpenbergi fu Karawanken, pe Yugoslafia nanga Oostenrijk e miti. Wi ben e pruberi fu lowe go na Oostenrijk. Wi ben kan kisi problema efu wi ben o du disi, fu di den srudati fu Yugoslafia ben de na a lanki fu a kondre èn den ben o du ala san den man fu tapu iniwan sma di ben wani kon na ini Oostenrijk. Baka di wi waka wan pisi ten, dan wi kon doro na a lanki fu wan hei bergi di ben e saka go na ondro wantronso. Noiti mi nanga Stanka ben kon na a sei disi fu den Alpenbergi na ini Oostenrijk. Wi tan waka go na owstusei, teleki wi doro na wan pisi kontren di ben e saka skoinsi go na ondro èn di ben lai nanga ston. Wi ben tyari wan tapu-oli, sobun di wi doro na a pisi kontren disi, dan wi tai a tapu-oli na wi lontu èn wi grati go na ondrosei, aladi wi no ben sabi san ben o miti wi drape.

MEKI mi fruteri unu fa wi ben kon na ini a situwâsi disi èn fa a getrow eksempre fu mi papa nanga mama gi mi deki-ati fu tan loyaal na Yehovah na ini muilek ten.

Mi gro kon bigi na ini Slofeinia, di de wan pikin kondre now na mindrisei fu Europa. A de na mindri den Alpenbergi fu Europa; Oostenrijk de na noordsei, Italiakondre de na westsei, Krowâsia de na zuidsei, èn Hongaria de na owstusei. Ma na a ten di mi papa nanga mama, Franc nanga Rozalija Rekelj gebore, Slofeinia ben de wan pisi fu a Gran Kownukondre Oostenrijk-Hongaria. Na a kaba fu a Fosi Grontapufeti, Slofeinia ben tron wan pisi fu wan nyun kondre di den ben e kari a Kownukondre fu den Serfiasma, den Krowâsiasma, nanga den Slofeiniasma. Na ini 1929, a nen fu a kondre kenki tron Yugoslafia, san wani taki „Zuid-Slafia”. Mi gebore tapu 9 yanuari fu a srefi yari dati, na a lanki fu a dorpu Podhom, krosibei fu wan moi pisi watra di den e kari Lake Bled.

 Mi mama kweki na ini wan osofamiri di ben e hori densrefi finifini na den wet fu Lomsu Kerki. Wan omu fu en ben de wan priester èn dri tanta fu en ben de non. Ala ten a ben e angri fu abi en eigi Bijbel, fu leisi en, èn fu frustan san skrifi na ini. Ma mi papa no ben lobi sani di abi fu du nanga kerki. A ben e tegu gi den sani di kerki du na ini a Grontapufeti di ben de fu 1914 te go miti 1918.

Den e leri sabi a waarheid

Wan pisi ten baka a feti, Janez Brajec nanga en wefi Ančka, tron Bijbel Ondrosukuman, dati na fa den ben e kari den Kotoigi fu Yehovah na a ten dati. Janez ben de wan famiri fu mi mama en papa, èn na a ten dati en nanga en wefi ben e libi na ini Oostenrijk. Sensi a ten fu 1936, Ančka ben kon luku mi mama wan tu leisi. Ančka ben gi Mama wan Bijbel, èn sosrefi wan tu Waktitoren nanga tra Bijbel publikâsi na ini Slofeiniatongo. Esi-esi Mama ben kaba leisi a heri Bijbel. Baka wan pisi ten, Janez nanga Ančka froisi go baka na Slofeinia fu di Hitler ben teki Oostenrijk abra na ini 1938. Mi e memre ete taki den ben de wan trowpaar di ben kisi bun skoroleri, di ben e frustan sani bunbun, èn di ben lobi Yehovah trutru. Furu tron den ben e taki nanga Mama fu den tru tori fu Bijbel, èn disi ben meki taki a gi ensrefi abra na Yehovah. A ben teki dopu na ini 1938.

Den birtisma no ben lobi en srefisrefi di mi mama tapu nanga gwenti noso fesa di no e kruderi nanga Bijbel. Fu eksempre, a no ben e hori Kresneti moro, èn a no ben e nyan brudu-worst moro. Ma san meki den atibron trutru, na di a bron ala den popki di wi ben abi. Heri esi sma bigin gens en. Den tanta fu mi mama di ben de non, du ala muiti fu skrifi brifi gi en fu pruberi fu overtoigi en taki a ben musu drai go baka na Mama Maria èn na a Lomsu Kerki. Ma di mi mama skrifi aksi den fu gi en piki tapu wan tu aksi fu Bijbel, dan nowan fu den skrifi en baka. Mi granpapa ben e gens en hebi tu. A no ben de wan ogri man, ma den famiri fu wi èn den birtisma ben abi furu krakti na en tapu. Fu dati ede, a ben pori den Bijbel publikâsi fu mi mama wan tu leisi, ma noiti a ben fasi a Bijbel fu en. A ben saka kindi begi mi mama fu drai kon baka na a kerki. A ben hari wan nefi srefi taki a ben o du mi mama ogri. Ma dan mi papa sori en krin taki a no musu du so wan sani noiti moro.

Mi papa ben tan horibaka gi mi mama, fu di a ben feni taki mi mama abi a reti fu leisi Bijbel èn fu bosroiti gi ensrefi sortu bribi a ben wani teki. Na ini 1946, mi papa ben teki dopu tu. Di mi si fa Yehovah ben e gi mi mama krakti nanga deki-ati fu opo taki gi a waarheid aladi sma ben e gens en, èn di mi si fa Yehovah blesi en fu a tranga bribi di a ben abi, dan misrefi ben wani abi wan banti nanga Gado tu. Mi ben kisi wini tu fu a gwenti di mi  mama ben abi fu leisi a Bijbel nanga den Bijbel publikâsi gi mi, nanga wan tranga sten.

Mama ben abi langa takimakandra tu nanga en sisa Marija Repe, èn baka wan pisi ten mi nanga Tante Marija teki dopu na a srefi dei, na mindri fu a mun yuli na ini 1942. Wan brada ben kon hori wan syatu lezing, èn wi teki dopu na oso na ini wan bigi tobo fu udu.

Den e dwengi mi fu wroko na a pisi ten fu a di fu Tu Grontapufeti

Na ini 1942, di a di fu Tu Grontapufeti ben de fayafaya, dan Doisrikondre nanga Italiakondre teki Slofeinia abra èn den ben prati en gi densrefi èn gi Hongaria. Mi papa nanga mama ben weigri fu tron memre fu a Volksbund, wan organisâsi fu den Nazisma. Na skoro, mi no ben wani taki „Heil Hitler” fu gi Hitler grani. Soleki fa a sori, dan a leriman fu mi taigi den lantiman taki mi no ben wani du a sani disi.

Ne den poti wi na ini wan loko di tyari wi go na wan palèisi, krosibei fu a dorpu Hüttenbach na ini Bavaria; drape den ben e dwengi sma fu wroko. Mi papa ben seti sani so taki mi ben kan wroko èn libi na wan bakriman nanga en osofamiri. Na ini a pisi ten dati, mi leri a bakriwroko, di ben de wan bigi yepi gi mi bakaten. Baka wan pisi ten, den tyari ala den tra famiri fu wi (sosrefi Tante Marija nanga en osofamiri) go na a strafuman-kampu na ini Gunzenhausen.

Na a kaba fu a feti, mi ben o waka nanga wan grupu sma go na a presi pe mi papa nanga mama ben de. Ma na a neti fosi mi ben o gowe, mi papa kon na mi sondro fu mi fruwakti dati. Mi no sabi san ben o pasa nanga mi efu mi ben go nanga a grupu, bika den sma no ben de fu frutrow. Agen mi ben si fa Yehovah e broko en ede nanga mi trutru, fu di a gebroiki mi papa nanga mama fu kibri mi èn fu gi mi leri. Mi nanga mi papa waka dri dei fu doro den tra famiri fu wi. Na ini yuni 1945, wi alamala ben de na oso baka.

Baka a feti, den Komunistsma ondro a tiri fu President Josip Broz Tito bigin tiri Yugoslafia. Fu dati ede, a situwâsi fu Yehovah Kotoigi ben tan a srefi.

Na ini 1948, wan brada fu Oostenrijk ben kon nyan nanga wi. Ala presi pe a ben e go, skowtu ben de na en baka, èn den ben grabu ala den brada pe a ben e go. Na so den grabu mi papa tu fu di a ben teki en na ini oso èn fu di a no ben kari skowtu gi en. Fu a sani disi ede, mi papa ben abi fu koti strafu tu yari langa. Disi ben de wan tumusi muilek ten gi mi mama, a no soso fu di mi papa no ben de, ma sosrefi fu di a ben sabi taki heri esi mi nanga mi pikin brada ben o kisi tesi fu di lanti ben o kari wi fu go wroko leki srudati.

A pisi ten di mi ben de na strafu-oso na ini Masedonia

Na ini november 1949, lanti seni kari mi fu go du srudatiwroko. Mi go na den fu fruteri taki mi konsensi no e gi mi pasi fu du a wroko disi. Den lantiman no ben wani arki mi, ne den poti mi na ini wan loko makandra nanga den sma di ben o go du srudatiwroko, èn wi go na Masedonia, di ben de na a tra sei fu Yugoslafia.

Dri yari langa mi no ben yere noti fu mi famiri èn fu tra Kresten brada nanga sisa, èn mi no ben abi nowan sani fu leisi; mi no ben abi wan Bijbel srefi. A ben muilek gi mi srefisrefi. Mi ben man horidoro fu di mi ben e denki dipi fu Yehovah èn fu na eksempre fu en Manpikin, Yesus Krestes. Na eksempre fu mi papa nanga mi mama ben e gi mi krakti tu. Boiti dati, a begi di mi ben e begi Yehovah doronomo fu gi mi krakti, ben yepi mi tu fu no lasi-ati.

Baka wan pisi ten, den seni mi go na wan strafu-oso na ini Idrizovo, krosibei fu a foto Skopje. Na ini a strafu-oso disi, den strafuman ben e du  difrenti sortu wroko. Biginbigin, mi ben e krin a presi èn mi ben e tyari sani go na den difrenti kantoro. Wan fu den strafuman di ben de wan sikrit skowtu fosi, ben e muilek mi furu tron, ma mi ben e wroko switi nanga ala tra sma, dati na den waktiman, den tra strafuman, èn srefi a fesiman fu a fabriki pe den strafuman ben e wroko.

Bakaten, mi yere taki den ben abi wan bakriman fanowdu na ini a bakri-oso pe strafuman ben e wroko. Baka wan tu dei, a fesiman bigin kari ala den nen fu wi fu luku efu wi alamala ben de. Ne a waka pasa a lin pe mi ben e tanapu, a stop leti na mi fesi, èn a aksi: „Yu na wan bakriman?” „Iya, meneer”, mi piki. „Tamara yu musu go na a bakri-oso”, a taigi mi. A strafuman di ben e muilek mi, ben e pasa na a bakri-oso furu tron, ma a no ben man du mi noti moro. Mi ben e wroko drape fu februari teleki yuli 1950.

Ne den tyari mi go na wan kampu di ben nen Volkoderi, na a zuidsei fu Masedonia, krosibei fu a pisi watra di den e kari Lake Prespa. A foto Otešovo ben de na ini a birti, èn drape mi ben kan seni brifi gi den sma fu mi na ososei. Mi ben de na ini a grupu wrokoman di ben e meki pasi, ma moro furu mi ben musu go wroko na ini a bakri-oso, pe sani ben moro bun gi mi. Den lusu mi na ini november 1952.

Na ini a pisi ten di mi no ben de na ini Podhom, wan gemeente ben seti na ini a kontren dati. Biginbigin, a gemeente ben e hori konmakandra na ini wan pikin hotel na ini Spodnje Gorje. Bakaten, mi papa sreka wan kamra na ini na oso fu wi, so taki a gemeente ben kan hori konmakandra drape. Mi ben breiti fu kon makandra nanga den, di mi drai kon baka fu Masedonia. Boiti dati, mi ben miti Stanka baka, di mi ben sabi kaba fosi mi ben go na strafu-oso. Wi trow tapu 24 april 1954. Ma a no langa baka dati, muilek ten ben o kon baka.

A pisi ten di mi ben de na strafu-oso na ini Maribor

Na ini september 1954, lanti seni kari mi baka fu go du srudatiwroko. Disi leisi, mi ben abi fu koti strafu moro leki dri nanga afu yari na ini wan strafu-oso na Maribor, di de na a owstusei fu Slofeinia. A fosi okasi di mi feni, mi bai papira nanga potlood fu man skrifi sani. Mi bigin skrifi ala san mi ben kan memre, soleki bijbeltekst, wan tu pisi fu A Waktitoren, èn sosrefi sani di ben skrifi na ini tra Kresten publikâsi fu wi. Mi ben e leisi den sani disi èn solanga mi ben e memre wan tra sani, mi ben e skrifi en poti na ini a buku di misrefi ben meki nanga den papira di mi ben bai. Na ini a heri pisi ten di mi ben de na strafu-oso, mi tan skrifi sani na ini a buku teleki a no ben abi presi moro, èn disi yepi mi fu tan poti prakseri na a waarheid èn fu tan tranga na yeye fasi. A begi di mi ben e begi èn a denki di mi ben e denki dipi fu den sani disi, ben de wan bigi yepi gi mi tu fu tan tranga na yeye fasi, so taki mi ben kan kisi moro deki-ati fu prati a waarheid nanga tra sma.

Na a pisi ten dati, mi ben kisi primisi fu kisi wán brifi ibri mun, èn wán leisi wan mun sma ben kan kon luku mi 15 miniti langa. Stanka ben e sidon na ini wan loko heri neti langa fu kon luku mi frukufruku, so taki a ben kan drai go na oso baka a srefi dei. Disi ben gi mi furu deki-ati. Ne mi prakseri fu wan fasi fa mi ben kan kisi wan Bijbel. Mi nanga Stanka ben e sidon abrasei fu makandra na wan tafra, èn den ben poti wan waktiman fu luku wi. Na wan momenti di a waktiman no ben e luku wi, mi poti wan brifi na ini a tas fu Stanka, èn na ini a brifi mi ben aksi en fu poti wan Bijbel na ini en tas, a tra leisi te a ben o kon luku mi.

Stanka, mi papa, nanga mi mama ben feni taki disi ben kan tyari problema kon, sobun den priti wan tu pisi fu den Kresten Griki Buku fu Bijbel èn den kibri den na ini wan tu brede. Na so fasi mi ben kisi a Bijbel di mi ben abi fanowdu. Na a srefi  fasi mi ben kisi wan tu pisi fu A Waktitoren, di Stanka ben skrifi poti na tapu papira. Te mi ben kisi den, dan mi ben e skrifi den abra wantewante na tapu wan tra papira èn mi ben e priti den di fu Stanka, so taki efu wan sma ben o feni den, den no ben o sabi fu suma mi kisi den.

Fu di mi ben tan preiki go doro, meki furu strafuman ben e taki dati mi ben o kisi problema nomonomo. Wan leisi, mi ben abi wan fayafaya takimakandra fu Bijbel nanga wan tra strafuman. Ne wi yere wan sma e opo a sroto fu a doro, èn wan waktiman waka kon na inisei. Wantewante mi denki taki a ben o sroto mi wawan na ini wan kamra. Ma a waktiman no ben wani du dati. A ben yere fu san wi ben e taki èn a ben wani teki prati na a takimakandra fu wi. Di mi piki den aksi fu en, a waka gowe nanga prisiri èn a sroto a doro baka.

Na ini a lasti mun di mi ben e koti strafu, a man di ben abi a frantwortu fu leri den strafuman fu tyari densrefi na wan bun fasi, prèise mi fu a fasti bosroiti di mi ben abi fu opo taki gi a waarheid. Mi ben si disi leki wan bigi blesi gi a muiti di mi ben du fu meki sma kon sabi a nen fu Yehovah. Na ini mei 1958, den lusu mi baka fu strafu-oso.

Wi lowe go na Oostenrijk, èn baka dati wi go na Australia

Mi mama dede na ini augustus 1958. Wan pisi ten kaba a ben e siki. Ne na ini september 1958, lanti seni kari mi fu a di fu dri leisi. Na a neti dati, mi nanga Stanka teki a prenspari bosroiti fu abra go na Oostenrijk, èn na so wi kon ondrofeni a span sani di mi ben fruteri na a bigin. Sondro fu taigi wan sma, wi teki wan tu sani poti na ini den tas di wi ben tyari na tapu wi baka, wi teki wan tapu-oli, ne wi abra a fensre, èn wi bigin waka go na a lanki fu Oostenrijk di ben de pikinso go na a westsei fu Stolbergi. A gersi leki Yehovah ben seti sani fu yepi wi fu di a ben sabi taki wi ben abi pikinso rostu fanowdu.

Na ini Oostenrijk, den lantiman seni wi go na wan loweman kampu krosibei fu Salzburg. Na ini den siksi mun di wi ben de drape, ala ten wi ben e miti nanga den Kotoigi fu a birti drape, èn fu dati ede wi no ben de na ini a kampu nofo tron. Den tra sma na ini a kampu ben e fruwondru taki wi meki mati so esi. A ben de na a pisi ten dati, di wi go na wan bigi konmakandra fu a fosi leisi. Wan tra sani di wi ben kan du fosi leisi tu, na fu preiki oso fu oso sondro taki wan sma tapu wi. A ben muilek gi wi srefisrefi fu libi den bun mati fu wi na baka, di a ten doro taki wi ben musu gowe.

Den lantiman fu Oostenrijk ben gi wi na okasi fu go libi na Australia. Noiti wi ben denki taki wi ben o go so farawe. Nanga loko wi go na Genua, na ini Italiakondre, dan wi go na tapu wan sipi di ben o tyari wi go na Australia. Te fu kaba, wi go tan na ini a foto Wollongong, na ini New South Wales. Dyaso a manpikin fu wi, Philip, gebore tapu 30 maart 1965.

Na ini Australia wi kisi furu okasi fu du wi diniwroko na difrenti fasi; na so wi ben abi na okasi tu fu preiki gi sma di komoto fu a pisi kontren di ben nen Yugoslafia fosi. Wi e taki Yehovah tangi fu den blesi di a gi wi, sosrefi taki wi ben man dini en makandra leki wán osofamiri. Philip nanga en wefi, Susie, abi a grani fu wroko na a bijkantoro fu Yehovah Kotoigi na ini Australia, èn den ben abi na okasi srefi fu go wroko na a bijkantoro fu Slofeinia tu yari langa.

Aladi owrudei meki taki wi abi wan tu problema nanga a gosontu fu wi, toku mi nanga mi wefi e prisiri ete nanga a diniwroko di wi e du gi Yehovah. Mi de nanga tangi trutru taki mi papa nanga mi mama gi mi so wan moi eksempre! Disi e tan gi mi krakti, èn a e tan yepi mi fu du san na apostel Paulus ben taki, namku: „Prisiri nanga a howpu di unu abi. Horidoro te unu de na ini banawtu. Tan begi.”​—Romesma 12:12.

[Prenki na tapu bladzijde 16, 17]

Mi papa nanga mi mama, wan tu yari fosi 1930

[Prenki na tapu bladzijde 17]

Mi mama te na a reti-anusei, nanga Ančka, di ben leri en a waarheid

[Prenki na tapu bladzijde 18]

Mi nanga mi wefi, Stanka, syatu baka di wi trow

[Prenki na tapu bladzijde 19]

A gemeente di ben e hori konmakandra na ini wi oso na ini 1955

[Prenki na tapu bladzijde 20]

Mi nanga mi wefi, mi manpikin Philip, èn en wefi Susie