Papa nanga mama, sortu libi unu wani gi den pikin fu unu?

„Un yonkuman nanga un nyunwenke tu . . . Meki den prèise a nen fu Yehovah.”​—PSALM 148:12, 13.

1. Sortu broko-ede papa nanga mama abi te a abi fu du nanga den pikin fu den?

IBRI papa nanga mama e broko den ede nanga a fasi fa a libi fu den pikin fu den o waka na ini a ten di e kon. A momenti di wan beibi gebore, srefi bifo a beibi gebore, a papa nanga mama e bigin broko den ede kaba efu sani o waka bun nanga en. A sa de gosontu? A sa gro kon bigi sondro problema? Te a pikin e gro kon moro bigi, dan tra broko-ede e kon. Nofo tron, a de so taki papa nanga mama wani soso bun gi den pikin fu den.​—1 Samuel 1:11, 27, 28; Psalm 127:3-5.

2. Fu san ede furu papa nanga mama na ini a ten disi feni taki den musu du ala san den man fu sorgu taki den pikin fu den abi wan bun libi te den kon bigi?

² Ma na ini a grontapu fu tide, a muilek gi papa nanga mama fu sorgu taki sani e waka bun nanga den pikin fu den. Furu papa nanga mama pasa muilek ten, soleki orloku, dyugudyugu na ini politiek, nanga problema na ekonomia sei, noso a kan taki den kisi bigi mankeri noso bigi sari, èn so moro fara. A no de fu taki dati den no wani den pikin fu den fu ondrofeni den srefi sani disi kwetikweti. Na ini gudu kondre, papa nanga mama e si kande taki den manpikin nanga den umapikin fu den mati nanga famiriman fu den abi bun bakapisi na ini a wroko di den abi leki sma di teki spesrutu leri, èn a sori leki a libi fu den e waka bun. Sobun, den papa nanga mama disi feni taki den musu du ala san den man fu sorgu taki den pikin fu den sosrefi sa man abi wan libi sondro tumusi furu broko-ede, èn taki sani sa waka bun gi den. Iya, den wani den pikin fu den fu abi wan bun libi te den kon bigi.​—Preikiman 3:13.

Fa fu abi wan bun libi

3. Sortu bosroiti Kresten teki?

³ Leki bakaman fu Yesus Krestes, Kresten teki a bosroiti fu gi den libi abra na Yehovah. Den gi yesi na den wortu fu Yesus: „Efu wan sma wani kon na mi baka, dan a no musu teri ensrefi moro, ma meki a teki en pina-postu ibri dei baka èn meki a tan waka na mi baka” (Lukas 9:23; 14:27). Iya, a de so trutru taki wan Kresten musu libi sondro fu prakseri ensrefi nomo. Toku dati no wani taki dati en libi lai pina nanga sari. Tra fasi leki dati, a e libi wan koloku libi di e gi en prisiri, iya, a abi wan bun libi, fu di a de klariklari fu gi sani, èn soleki fa Yesus ben taki, dan „wan sma sa de moro koloku te a e gi sani, leki te a e kisi sani”.​—Tori fu den Apostel 20:35.

4. Sortu rai Yesus ben gi den bakaman fu en?

⁴ Sma na ini a ten fu Yesus ben e libi na ini tumusi muilek situwâsi. Boiti taki den ben musu wroko  fu man abi moni, den ben musu horidoro na ondro na ogri-ati tiri fu den Romesma, èn den kerki fesiman na ini a ten fu den ben e fruwakti taki den ben e hori densrefi finifini na wan lo wet di ben de wan hebi gi den (Mateyus 23:2-4). Toku furu sma di ben yere fu Yesus, ben de klariklari fu tapu nanga den eigi sani, srefi nanga den grontapuwroko fu den, èn den tron bakaman fu en (Mateyus 4:18-22; 9:9; Kolosesma 4:14). A de so taki a bosroiti di den disipel dati ben teki, ben o meki taki a libi fu den no waka bun te fu kaba? Luku san Yesus ben taki: „Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati, èn a sma dati o kisi têgo libi leki gudu” (Mateyus 19:29). Yesus ben gi den bakaman fu en a dyaranti taki a hemel Tata ben sabi san den ben abi fanowdu. Dati meki a ben gi den a rai disi: „Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu.”​—Mateyus 6:31-33.

5. Fa son papa nanga mama e denki fu a dyaranti di Yesus ben gi taki Gado sa sorgu gi den futuboi fu en?

⁵ A situwâsi de a srefi na ini a ten disi. Yehovah sabi san wi abi fanowdu, èn den wan di e poti Kownukondre afersi na a fosi presi na ini den libi, spesrutu den wan di e du furuten diniwroko, abi a srefi dyaranti taki a sa sorgu gi den (Maleaki 3:6, 16; 1 Petrus 5:7). Ma son papa nanga mama no de so seiker fu a tori dati. Na a wan sei, den wani den pikin fu den fu go na fesi na ini a diniwroko fu Yehovah, èn kande wan dei den sa go na ini a furuten diniwroko. Ma na a tra sei, a de so taki te den papa nanga mama disi e luku fa a de nanga na ekonomia fu a kondre fu den na ini a ten disi, èn fa a muilek fu feni bun wroko, dan den feni taki a de prenspari gi yonguwan fu kisi bun skoro fosi, so taki den sa abi den koni di de fanowdu fu man feni wan bun wroko. Awansi fa a no fa, na so den papa nanga mama e denki, den pikin sa abi wan diploma efu oiti den o abi dati fanowdu. Den sortu papa nanga mama dati ben kan feni en fanowdu taki den pikin fu den e go na heiskoro.

Fa fu sreka sani gi a ten di e kon

6. San a wortu „heiskoro-leri” wani taki na ini na artikel disi?

⁶ Ala kondre abi den eigi sortu skoro-sistema. Fu gi wan eksempre, na ini Amerkankondre, lanti-skoro e gi yonguwan skoroleri 12 yari langa. Baka dati, studenti kan bosroiti fu go teki leri na wan universiteit noso heiskoro fo yari langa, noso moro langa leki dati, so taki den kan kisi wan diploma. Te den kisi a diploma dati, dan den kan bosroiti tu fu studeri moro fara fu tron datra, afkati, sabiman di e du koni bow-wroko, èn so moro fara. Te na artikel disi e taki fu ’heiskoro-leri’, dan dati abi fu du nanga den sortu leri disi. Na a tra sei, yu abi skoro tu pe sma kan leri fu wroko nanga spesrutu masyin nanga tra wrokosani, èn skoro pe den kan leri fa fu du wan spesrutu sortu wroko. Na den skoro disi, sma e kisi leri fu wan syatu pisi ten, èn te fu kaba den e kisi wan papira, noso wan diploma di e sori taki den man du wan spesrutu sortu bisnis noso wroko.

7. San sma na den middelbaar skoro wani den studenti fu du nomonomo?

⁷ Na ini a ten disi, furu middelbaar skoro e sreka den studenti fu den fu go na moro hei skoro. Fu dati ede, furu middelbaar skoro no e leri den studenti sani di sa sreka den fu feni wan wroko, ma na presi fu dati, den skoro disi e leri den sani di sa yepi den fu kisi bun cijfer gi den eksamen di den musu meki fu man go na wan heiskoro. Na den middelbaar skoro, leriman, raiman, nanga tra studenti de nomonomo na den yonguwan baka, fu di den wani den fu kisi okasi fu go na den moro bun heiskoro, pe kande den sa kisi diploma di sa yepi den fu feni bun wroko di e pai wan lo moni.

8. Sortu bosroiti Kresten papa nanga mama musu teki na ini a ten disi?

⁸ Sobun, san Kresten papa nanga mama musu du? A no de fu taki, dati den wani den pikin fu leri bun na skoro èn fu kon abi den koni di de fanowdu fu man sorgu densrefi na ini a ten di e kon (Odo 22:29). Ma a de so taki den musu libi den pikin fu den meki den strei nanga trawan fu kan abi wan moro gudu libi èn fu kan abi biginen? Te yu e luku den sani di den papa nanga mama disi e taki, èn na eksempre di den e gi, dan sortu marki den wani taki den pikin fu den musu poti gi densrefi? Son papa nanga mama e wroko bun tranga, èn den e poti moni na wan sei fu man seni den pikin fu den fu go teki leri na heiskoro te a ten doro. Tra papa nanga mama e bosroiti fu meki paiman fu man seni den pikin fu den go na den heiskoro disi. Ma a no e kostu moni wawan fu man meki wan yongu sma teki  leri na wan heiskoro. San a e kostu fu de na wan heiskoro na ini a ten disi?​—Lukas 14:28-33.

San a e kostu fu de na wan heiskoro

9. San wi kan taki fu a moni di sma musu pai na ini a ten disi fu man kisi heiskoro-leri?

⁹ Te wi e prakseri kostu, dan furu tron wi e prakseri a moni di wi musu pai gi wan sani. Na ini son kondre, lanti e yepi fu tapu den kostu fu heiskoro-leri, èn studenti di doro den markitiki fu man go na den heiskoro disi, no abi fu pai noti. Ma na furu presi, a diri fu teki leri na wan heiskoro, èn a e kon diri moro nanga moro. Wan artikel na ini wan koranti e taki disi: „Fosi, sma ben e si heiskoro-leri leki wan sani di ben o gi den na okasi fu go du a wroko di den wani du. Na ini a ten disi, heiskoro-leri na wan sani di e sori taki trutru wan bigi difrenti de na mindri gudusma nanga sma di no abi so furu moni” (New York Times). Fu taki en tra fasi, moro nanga moro a e kon de so taki bun heiskoro-leri e tron wan sani di soso gudusma nanga makti sma man pai, èn den sma disi e meki den pikin fu den teki a heiskoro-leri disi fu sorgu taki den sosrefi tron gudusma nanga makti sma na ini a grontapu disi. Kresten papa nanga mama musu meki den pikin fu den teki heiskoro-leri?​—Filipisma 3:7, 8; Yakobus 4:4.

10. Fa heiskoro-leri abi furu fu du nanga a pruberi di sma e pruberi fu meki a disiten sistema go na fesi?

¹⁰ Srefi na ini kondre pe yongusma no abi fu pai fu kisi heiskoro leri, a kan taki sma sa fruwakti wan tu fruferi sani fu den studenti disi. Fu gi wan eksempre, wan tijdschrift e taki dati na ini wan kondre na a zuid-owstusei fu Asia, lanti e wroko nanga „wan skoro-sistema di seti nanga a marki fu meki den moro bun studenti kisi na okasi fu studeri moro fara” (The Wall Street Journal). Te fu kaba den sortu studenti disi kan go na den moro bun heiskoro na grontapu, namku na Oxford heiskoro nanga a Cambridge heiskoro na ini Ingrisikondre, sosrefi na den moro bun heiskoro na ini Amerkankondre, èn na trawan. Fu san ede a de so taki lanti e bigin sreka den studenti so fruku kaba? „Fu man meki na ekonomia fu a kondre go na fesi”, na so na artikel e taki. Kande a de so taki den studenti disi pikinmoro no abi fu pai noti fu teki leri na den heiskoro disi, ma den sa abi fu gebroiki ala den ten nanga krakti fu pruberi fu meki a disiten sistema go na fesi. A tru taki furu sma na ini a ten disi wani so wan libi. Ma na a libi disi Kresten papa nanga mama wani gi den pikin fu den?​—Yohanes 15:19; 1 Yohanes 2:15-17.

11. San son tijdschrift e taki fu a gwenti di studenti fu heiskoro abi fu dringi tumusi furu sopi èn fu du hurudu?

¹¹ Dan yu abi sosrefi den sani di e pasa na den heiskoro disi. Furu sma sabi taki studenti na den heiskoro gwenti fu tyari densrefi na wan fasi di no fiti, iya, den e gebroiki drugs èn den e dringi tumusi furu sopi, den e du hurudu, den e kori sma, den e kwinsi nyun studenti di wani tron wan memre fu wan spesrutu grupu na skoro, fu di den e meki den du muilek sani noso syen sani, èn den e du furu tra sani ete. Luku a dringi di studenti e dringi tumusi furu sopi. Disi na san a tijdschrift New Scientist e taki fu a dringi di studenti e dringi tumusi furu sopi soso fu kon drungu: „Pikinmoro 44 procent fu [den studenti na den heiskoro na ini Amerkankondre] e dringi tumusi furu sopi awansi wán leisi nomo ibri tu wiki.” A srefi problema disi de fu si na mindri yongusma na ini Australia, Ingrisikondre, Rosiakondre, nanga tra presi. Soleki fa wi sabi kaba, dan den studenti e du hurudu tu. Iya, den abi a gwenti fu abi seks demakandra nanga difrenti sma. Soleki fa a tijdschrift Newsweek e taki, dan den studenti disi abi seks demakandra wán leisi nomo nanga sma di den no sabi bun srefi. Efu na bosi den e bosi, noso efu na trutru seks den abi, den no abi a denki srefi fu bumui moro nanga makandra baka  dati. Ondrosuku e sori taki 60 te go miti 80 procent fu den studenti e du den sortu sani disi. Wan ondrosukuman e taki: „Efu yu na wan studenti na wan heiskoro èn yu no e du den sani disi, dan wan sani no bun nanga yu.”​—1 Korentesma 5:11; 6:9, 10.

12. Sortu hebi frantwortu e kon na tapu den studenti fu heiskoro?

¹² Boiti den takru sani di e pasa na den heiskoro, den studenti abi furu skorowroko èn den musu meki furu eksamen. A no de fu taki, dati studenti musu studeri èn taki den musu du den skorowroko fu man pasa den eksamen nanga bun bakapisi. A kan tu taki sonwan fu den musu wroko wan tu dei na ini a wiki, aladi den e go na skoro. Ala den sani disi e teki bun furu ten nanga krakti fu den studenti. Omeni ten nanga krakti den sa abi ete dan fu poti prakseri na yeye afersi? Te ala den frantwortu disi e kon hebi gi den, dan sortuwan den sa puru na den tapu? A de so taki den sa tan poti Kownukondre afersi na a fosi presi, noso den sa poti den na wan sei? (Mateyus 6:33) Bijbel e gi Kresten a deki-ati disi: „Luku bun taki unu no e waka leki don sma, ma taki unu e waka leki koni sma; fu man du disi, un musu gebroiki ibri okasi bun, bika den dei ogri” (Efeisesma 5:15, 16). A sari trutru fu si taki son yonguwan gowe libi a bribi, fu di den gebroiki ala den ten nanga krakti gi sani di abi fu du nanga a heiskoro-leri fu den, noso fu di den go tyari densrefi na wan fasi di no e kruderi nanga Bijbel!

13. Na sortu aksi Kresten papa nanga mama musu poti prakseri?

 ¹³ A no de fu taki, dati den heiskoro a no den wan-enkri presi pe sma e du hurudu, pe sma e tyari densrefi na wan takru fasi, èn pe sma e kisi hebi frantwortu na den tapu. Ma furu yonguwan fu grontapu feni taki den sani disi na aladei sani na heiskoro, èn den no e si den sani dati leki wan problema. A bun taki Kresten papa nanga mama e meki den pikin fu den go na den skoro disi fo yari langa, noso moro langa leki dati, aladi den sabi san e pasa na den skoro disi? (Odo 22:3; 2 Timoteyus 2:22) A de so taki den wini di den yonguwan kan kisi prenspari so te, taki a no de fanowdu fu poti prakseri na den takru bakapisi di ben kan miti den? Èn a moro prenspari aksi na disi: Den yonguwan e leri na den heiskoro san den musu poti na a fosi presi na ini den libi? * (Filipisma 1:10; 1 Tesalonikasma 5:21) Papa nanga mama musu poti seryusu prakseri na den aksi disi, èn na den problema di kan miti den pikin fu den te den e seni den go na wan skoro na ini wan tra foto noso na wan tra kondre. Boiti dati, den musu begi Gado fu yepi den fu teki a yoisti bosroiti na ini a tori disi.

Na sortu tra fasi yonguwan kan kisi wan bun libi?

14, 15. (a) Sortu Bijbel rai wi musu teki na ini a ten disi, aladi furu sma e denki tra fasi? (b) Sortu sani yonguwan kan aksi densrefi?

¹⁴ Na ini a ten disi, furu sma feni taki yonguwan kan kisi wan bun libi soso te den go na wan heiskoro. Ma Kresten no e du san furu trawan e du, ma na presi fu dati, den e gi yesi na a rai disi di Bijbel e gi: „No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kon sabi san na Gado en wani di bun, di e plisi en èn di de volmaakti” (Romesma 12:2). San Gado wani fu a pipel fu en, iya, fu den yonguwan nanga den owruwan, now di wi de na a lasti pisi fu a kaba fu a sistema disi? Paulus ben taigi Timoteyus: „Yu musu de nanga krin frustan ala ten; nyan pina, du a wroko fu wan sma di musu preiki a bun nyunsu, du a diniwroko fu yu dorodoro.” A no de fu taki dati den wortu disi abi fu du nanga wi alamala na ini a ten disi.​—2 Timoteyus 4:5.

¹⁵ Na presi taki wi de leki den grontapusma di e feti fu kon gudu, wi alamala musu de ’nanga wi krin frustan’, iya, wi musu tan luku na sortu presi wi e poti yeye afersi na ini wi libi. Efu yu na wan yongu sma, dan aksi yusrefi: ’Mi e du ala san mi man fu „du a diniwroko fu mi”, so taki mi kan tron wan bun preikiman fu Gado Wortu? Fa mi o pruberi fu du a diniwroko fu mi „dorodoro”? Mi prakseri fu go na ini a furuten diniwroko?’ Den aksi disi muilek, spesrutu te yu e si fa tra yonguwan di e feti baka den eigi sani nomo, e „suku bigi sani” fu di den denki taki den sani dati sa meki den abi wan gudu libi na ini a ten di e kon (Yeremia 45:5). Fu dati ede, a de wan koni sani te Kresten papa nanga mama e gi den pikin fu den leri fu sensi pikin-nengreten, èn te den e du sani makandra di bun gi a yeyefasi fu den pikin.​—Odo 22:6; Preikiman 12:1; 2 Timoteyus 3:14, 15.

16. Sortu bun sani Kresten papa nanga mama kan du fu a bun fu a yeyefasi fu den pikin fu den?

¹⁶ „Mi mama ben e luku bun nanga suma wi ben abi demakandra”, na so a moro owruwan fu dri brada e taki. A mama fu den boi disi na wan furuten dinari furu yari langa kaba. „Wi no ben abi krosibei demakandra nanga den pikin fu wi skoro, ma soso nanga den wan na ini a gemeente di ben abi bun gwenti na yeye fasi. Mi mama ben gwenti tu fu kari dinari na ini a furuten diniwroko kon na wi oso, so taki wi ben kan abi demakandra nanga den, èn dati ben de sma soleki zendeling, kring-opziener, sma fu Bethel, nanga pionier. Wi ben e arki den ondrofenitori fu den, èn wi ben e si fa den ben koloku, èn a sani dati meki taki wi kisi a tranga winsi fu du furuten diniwroko.” A e gi prisiri trutru fu si now taki ala dri manpikin e du furuten diniwroko, iya, wán fu den e dini na Bethel, wán go na a Dinariskoro, èn a trawan e pionier!

17. Sortu rai papa nanga mama kan gi yonguwan te den e bosroiti sortu skoroleri den wani èn sortu marki den wani poti gi densrefi? (Luku a faki na tapu bladzijde 29.)

¹⁷ Boiti taki Kresten papa nanga mama e du ala san den man fu sorgu taki den pikin fu den abi wan bun yeyefasi, a de prenspari tu taki frukufruku kaba den e gi den pikin a yoisti rai te den musu bosroiti sortu leri den wani kisi na skoro èn sortu wroko den wani du. Wan tra yonkuman di e dini na  Bethel now, e taki: „Mi papa nanga mi mama ben e pionier fosi den trow, èn sosrefi baka di den trow. Den du ala san den ben man fu meki a heri famiri kisi a winsi fu tron pionier. Te wi ben musu luku sortu skoroleri wi ben wani, noso te wi ben musu teki bosroiti di ben o abi krakti tapu a libi fu wi, dan ala ten den ben gi wi a deki-ati fu teki wan bosroiti di ben o gi wi moro okasi fu feni wroko gi wan tu dei na ini a wiki, so taki wi ben kan pionier na a srefi ten.” Na presi fu bosroiti fu leri sani di de fanowdu fu man go na heiskoro bakaten, a de fanowdu taki papa nanga mama èn sosrefi den pikin fu den e poti prakseri na skoroleri di sa gi den na okasi fu du furuten diniwroko. *

18. Sortu wroko yonguwan ben kan prakseri fu du?

¹⁸ Ondrosuku e sori taki na ini furu kondre, wrokoman de tranga fanowdu, ma sma no e suku wrokoman di abi heiskoro diploma, ma wrokoman di man wroko nanga den anu, noso di man du spesrutu wroko fu yepi trawan. Wan koranti e taki dati „na ini den someni tenti yari di e kon, 70 procent fu den wrokoman no sa abi wan diploma fanowdu fu wan heiskoro di e teki fo yari fu klari, ma na presi fu dati, den sa abi wan diploma fanowdu fu wan heiskoro pe den leri fa fu du wan spesrutu wroko, noso fa fu wroko nanga spesrutu wrokosani” (USA Today). Furu fu den sortu skoro dati e gi sma leri fu wan syatu pisi ten fa fu du kantorowroko, fa fu meki oto, fa fu meki computer, fa fu meki èn seti sani soleki watrapeipi fu wasi-oso nanga toilet, fa fu seti sma wiwiri, èn fa fu du furu tra sortu wroko. Den wroko disi na bun wroko? Iya seiker! Kande den wroko disi no de so kefalek leki fa son sma e denki, ma disi e gi den wan di e si a diniwroko fu Yehovah leki a trutru wroko fu den, na okasi fu sorgu densrefi, èn den kan bosroiti gi densrefi tu omeni wroko den o teki èn na sortu ten den o du dati.​—2 Tesalonikasma 3:8.

19. San e gi wi a moro bigi dyaranti taki wi sa abi wan koloku libi èn taki wi sa de nanga prisiri?

¹⁹ Bijbel e gi yongusma a deki-ati disi: „Un yonkuman nanga un nyunwenke tu . . . Meki den prèise a nen fu Yehovah, bika en nen wawan hei srefisrefi. A wartifasi fu en hei moro grontapu nanga hemel” (Psalm 148:12, 13). Te wi e luku den posisi nanga den wini di wan sma kan kisi na ini grontapu, èn te wi e agersi den nanga a furuten diniwroko di wan sma e bosroiti fu du gi Yehovah, dan tweifri no de taki a diniwroko dati e gi wi a moro bigi dyaranti taki wi sa abi wan koloku libi èn taki wi sa de nanga prisiri. Tan hori a dyaranti disi na prakseri di Bijbel e gi: „A blesi fu Yehovah — dati na san e meki sma kon gudu, èn a no e meki wi firi sari.”​—Odo 10:22.

[Futuwortu]

Yu kan tyari disi kon na krin?

• Tapu sortu sani Kresten e poti den frutrow fu kan abi wan bun libi?

• Sortu tyalensi e miti Kresten papa nanga mama te a abi fu du nanga a fasi fa a libi fu den pikin fu den o waka?

• San wi musu hori na prakseri te wi luku den winimarki nanga den takru bakapisi fu heiskoro-leri?

• Fa papa nanga mama kan yepi den pikin fu den fu bosroiti fu du furuten diniwroko gi Yehovah?

[Aksi fu a tori disi]

[Faki na tapu bladzijde 29]

O prenspari a de fu teki heiskoro-leri?

Furu sma di e go na wan heiskoro e fruwakti fu kisi wan diploma di sa gi den na okasi fu feni wan wroko di den no sa lasi makriki èn di e pai bun moni. Ma ondrosuku di lanti du, e sori taki wan di fu fo pisi nomo fu ala den sma di e go na heiskoro, e kisi wan diploma baka siksi yari, èn dati a no furu sma kwetikweti. Ma disi wani taki dati a pikin grupu fu sma disi man feni wan bun wroko makriki? Luku san nyun ondrosuku e sori.

„A no fu di wan sma go na Harvard heiskoro noso na Duke heiskoro (tu fu den moro prenspari heiskoro na Amerkankondre), meki a musu denki taki a o feni wan moro bun wroko èn taki a o meki moro moni. . . . Den bigi bisnis no sabi ala sani fu den yongusma di e suku wroko. Wan kefalek diploma fu wan fu den moro bun heiskoro kan de wan moi sani. Ma bakaten, san de moro prenspari gi wrokobasi, na san wan sma man du noso san a no man du.”​—A tijdschrift Newsweek, 1 november 1999.

„A tru taki na ini a ten disi, wan sma musu kisi moro bun leri leki bifo fu man feni wan wroko . . . , ma toku a de so taki a leri di de fanowdu fu man du den wroko disi, a no heiskoro-leri, ma leri di sma e kisi tapu Mulo skoro; den musu sabi wiskunde, den musu sabi leisi, èn den musu sabi skrifi leki wan sma di de na derde Mulo. . . . Studenti no abi fu go na wan heiskoro fu man feni wan bun wroko, ma den musu sabi den sani bun di den e leri na Mulo skoro.”​—A tijdschrift American Educator, Spring 2004.

„Furu heiskoro di e sreka studenti fu feni wan wroko te den klari a heiskoro, no e leri den kwetikweti fa a de trutru fu wroko na ini grontapu. Nownowde, den heiskoro pe sma kan go leri fu du wan spesrutu wroko, kon pôpi wantronso. Fu 1996 te go miti 2000, a nomru fu studenti di e go na den skoro dati, kren nanga 48%. . . . Na a srefi ten, den heiskoro diploma di e kostu so furu moni èn di e teki so furu ten fu kisi, no warti so furu moro leki bifo.”​—A tijdschrift Time, 24 yanuari 2005.

„A Kantoro fu Wroko Afersi na ini Amerkankondre, du ondrosuku gi a heri yari 2005, èn den kon si taki pikinmoro wan di fu dri pisi fu ala den studenti di klari wan heiskoro baka fo yari, no sa feni wroko di e fiti a diploma fu den. A sani disi na wan sari sani trutru.”​—A tijdschrift The Futurist, yuli/augustus 2000.

Na fu den sani disi ede, meki moro nanga moro leriman e tweifri seryusu efu heiskoro-leri trutru de so prenspari na ini a ten disi. „Wi e leri sma sani di den no sa man gebroiki na ini a ten di e kon”, na so a tijdschrift The Futurist e taki. Tra fasi leki dati, luku san Bijbel e taki fu Gado: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka. O efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se.”​—Yesaya 48:17, 18.

[Prenki na tapu bladzijde 26]

Den poti den eigi sani na wan sei èn den go waka baka Yesus

[Prenki na tapu bladzijde 31]

A de wan koni sani te Kresten papa nanga mama e bigin frukufruku kaba fu du sani makandra fu a bun fu a yeyefasi fu den pikin