„Tan na ai”​—A yuru fu krutu doro!

Den bodoi na ini a studie-artikel disi abi fu du nanga a brochure Tan na ai! di tyari kon na doro na den distrikt kongres di hori na heri grontapu na ini 2004 te go miti 2005.

„Tan na ai, bika unu no sabi sortu dei un Masra o kon.”​—MATEYUS 24:42.

1, 2. Sortu moi agersitori Yesus ben gi fu sori fa a ben o kon?

SAN yu ben o du efu yu ben sabi taki wan fufuruman ben e waka lontu na ini a birti e suku wan okasi fu fufuru sani na ini sma oso? Fu di yu wani kibri den lobiwan fu yu èn sosrefi den gudu fu yu, meki yu ben o tan na ai. Iya, na dati yu ben o du, bika wan fufuruman no e seni wan brifi gi sma fu taigi den o ten a o kon fufuru sani. Na presi fu dati, a e kon na wan kibri fasi, èn te yu no e fruwakti dati.

² Na moro leki wán okasi, Yesus ben gi wan agersitori di e sori fa wan fufuruman e wroko (Lukas 10:30; Yohanes 10:10). Di a ben taki fu sani di ben o pasa na ini a ten fu a kaba èn fu sani di ben o pasa fosi a ben o kon fu krutu libisma, dan a gi sma a warskow disi: „Fu dati ede, tan na ai, bika unu no sabi sortu dei un Masra o kon. Ma wán sani un musu sabi, taki efu a masra fu na oso ben sabi sortu yuru a fufuruman ben o kon, dan a ben o tan na ai èn a no ben o meki sma broko kon na ini en oso” (Mateyus 24:42, 43). We, na so Yesus agersi a kon di a o kon nanga a kon di wan fufuruman e kon fufuru sani. Iya, a o kon te sma no e fruwakti dati.

3, 4. (a) San a wani taki fu gi yesi na a warskow fu Yesus di abi fu du nanga a kon di a o kon? (b) Sortu aksi e opo kon?

³ Na agersitori dati ben fiti, bika nowan sma ben o sabi soifri o ten Yesus ben o kon. Na ini a srefi profeititori, Yesus ben taki na fesi: „Nowan sma sabi a dei nanga a yuru dati, iya, srefi den engel fu hemel nanga a Manpikin no sabi, ma soso a Tata sabi” (Mateyus 24:36). Fu dati ede, Yesus ben gi den arkiman fu en a deki-ati disi: „Un musu de srekasreka” (Mateyus 24:44). Den sma di e gi yesi na a warskow fu Yesus ben o de srekasreka, èn den ben o tyari densrefi na wan fasi di fiti, awansi o ten a ben o kon fu krutu sma soleki fa Yehovah ben taigi en fu du.

⁴ Wan tu prenspari aksi e opo kon: A de so taki a warskow fu Yesus de soso gi grontapusma, noso a de so taki tru Kresten sosrefi musu „tan na ai”? Fu san ede a de tumusi prenspari fu „tan na ai”, èn fa wi kan du dati?

Suma e kisi wan warskow?

5. Fa wi sabi taki a warskow di Yesus ben gi fu „tan na ai”, na gi tru Kresten?

⁵ A de so trutru taki gi grontapusma di e tapu den yesi gi a warskow fu a bigi rampu di o pasa heri esi, Masra o kon sondro taki den fruwakti dati, iya, a o kon leki wan fufuruman (2 Petrus 3:3-7). Ma fa a de nanga tru Kresten? Na apostel Paulus ben skrifi disi gi den Kresten brada fu en: „Unsrefi sabi heri bun taki a dei fu Yehovah e kon leki wan fufuruman na neti” (1 Tesalonikasma 5:2). Wi no e tweifri kwetikweti taki „a dei fu Yehovah e kon”. Ma a sani dati wani taki dati wi no abi fu tan na ai? Luku san Yesus ben taki: „A Manpikin fu libisma o kon na wan yuru di unu no ben prakseri” (Mateyus 24:44). Den sma di a ben taigi a sani disi, no ben de grontapusma, ma den ben de en  disipel. Wan pisi ten na fesi di Yesus ben e gi den disipel fu en deki-ati fu tan suku a Kownukondre, dan a gi den a warskow disi: „De srekasreka, bika a Manpikin fu libisma e kon na wan yuru di unu no ben prakseri” (Lukas 12:31, 40). A no krin fu si taki Yesus ben abi den bakaman fu en na prakseri di a gi a warskow fu „tan na ai”?

6. Fu san ede wi musu „tan na ai”?

⁶ Fu san ede wi musu „tan na ai” èn fu san ede wi „musu de srekasreka”? Yesus ben fruklari: „Tu man o de na ini a gron: a wan den o teki tyari gowe, a trawan den o libi na baka; tu uma o mara nanga na anumiri: a wan den o teki tyari gowe èn a trawan den o libi na baka” (Mateyus 24:40, 41). Den wan di de srekasreka, sma o „teki tyari gowe”, noso den sa kisi frulusu, te na ogri grontapu disi o kisi pori. Trawan fu den, sma o „libi na baka” fu den kisi pori, bika den e suku den eigi bun nomo. A kan taki disi sa de sma di ben sabi san ben o pasa, ma di no tan na ai.

7. Sortu okasi wi abi fu di wi no sabi o ten a kaba o kon?

⁷ Fu di wi no sabi soifri sortu dei a kaba fu na owru sistema disi o kon, meki wi abi na okasi fu sori taki wi e dini Gado nanga a yoisti denki. Fu san ede wi kan taki dati? A kan gersi leki a e teki langa fosi a kaba doro. A sari fu taki dati son Kresten di abi a denki disi, gi pasi taki a faya di den ben abi gi a diniwroko fu Yehovah, kon dede. Ma toku a de so, taki di wi gi wisrefi abra, dan nanga dati wi sori taki wi ben de klariklari fu dini Yehovah. Den wan di sabi Yehovah, e frustan taki te wi e sori syatu bifo a kaba kon taki wi de fayafaya, dan dati no sa naki en ati. A e si san de na ini wi ati.​—1 Samuel 16:7.

8. Fa a lobi di wi abi gi Yehovah e meki wi tan na ai?

⁸ Fu di wi lobi Yehovah trutru, meki wi e prisiri srefisrefi fu du a wani fu en (Psalm 40:8; Mateyus 26:39). Èn wi wani dini Yehovah fu têgo. A howpu dati no e lasi gowe, soso fu di wi musu wakti pikinso moro langa leki san wi ben fruwakti. San moro prenspari, na taki wi e tan na ai fu di wi sabi taki a dei fu Yehovah sa de wan fu den prenspari sani di o pasa fu meki a wani fu en kon tru. Fu di wi wani plisi Gado trutru, meki wi e teki a rai fu a Wortu fu en, èn wi e poti a Kownukondre fu en na a fosi presi na ini wi libi (Mateyus 6:33; 1 Yohanes 5:3). Meki wi luku fa a tan di wi e tan na ai musu abi krakti tapu den bosroiti di wi e teki èn tapu a fasi fa wi e libi ibri dei.

San yu e du nanga yu libi?

9. Fu san ede a de prenspari taki grontapusma e kon frustan san a ten fu wi wani taki?

⁹ Furu sma na ini a ten disi e si taki bigi problema kon de wan aladei sani èn taki sani e pasa di e seki sma. A kan tu taki den sma disi no lobi a fasi fa den libi e waka. Ma a de so taki den sabi san den sani di e pasa na grontapu wani taki trutru? Den e frustan taki wi e libi na ini „a kaba fu a grontapu sistema disi”? (Mateyus 24:3) Den sabi taki a prakseri di furu sma e prakseri densrefi nomo, a lobi di sma lobi ogridu, èn a tyari di sma e tyari densrefi na wan fasi di no fiti, na sani di e sori taki wi e libi na ini „den lasti dei”? (2 Timoteyus 3:1-5) A de prenspari trutru taki den sma disi e kon frustan san ala den sani disi wani taki, èn taki den e luku san den e du nanga den libi.

10. San wi musu du fu man tan na ai?

¹⁰ Fa a de nanga wi? Ibri dei wi musu teki bosroiti di abi fu du nanga a wroko fu wi, a gosontu fu wi, na osofamiri fu wi, èn na anbegi fu wi. Wi sabi san Bijbel e taki, èn wi e meki muiti fu gi yesi na den sani dati. Fu dati ede a bun fu aksi wisrefi: ’Mi gi pasi taki den broko-ede fu a libi puru mi prakseri na den yeye marki fu mi? Mi e gi pasi taki grontapu leri nanga grontapu denki abi krakti tapu den bosroiti di mi e teki?’ (Lukas 21:34-36; Kolosesma 2:8) Wi musu tan sori taki wi e frutrow tapu Yehovah nanga wi heri ati, èn wi no musu frutrow tapu wi eigi frustan (Odo 3:5). Na so fasi wi sa tan „grabu a trutru libi hori bun steifi”, namku têgo libi na ini a nyun grontapu fu Gado.​—1 Timoteyus 6:12, 19.

11-13. San wi kan leri fu den eksempre di e sori san pasa (a) na ini a ten fu Noa? (b) na ini a ten fu Lot?

 ¹¹ Bijbel abi furu eksempre di de leki wan warskow, èn den eksempre disi kan yepi wi fu tan na ai. Luku san pasa na ini a ten fu Noa. Bun langa na fesi, Gado ben sorgu taki den sma kisi warskow. Ma boiti Noa nanga en osofamiri, nowan enkri tra sma gi yesi na a warskow dati (2 Petrus 2:5). Disi na san Yesus ben taki fu a tori dati: „Neleki fa sani ben de na ini a ten fu Noa, na so a denoya fu a Manpikin fu libisma o de. Bika na ini a ten dati bifo a frudu, sma ben nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark; ma den no ben poti prakseri na san ben e pasa, teleki a frudu kon èn a wai den alamala puru; na so a denoya fu a Manpikin fu libisma o de tu” (Mateyus 24:37-39). San wi kan leri fu a sani dati? Kande wi e gi pasi taki grontapu afersi, iya, srefi den aladei sani fu a libi, e teki a presi fu den yeye afersi di Gado e gi wi deki-ati fu tan poti na a fosi presi na ini wi libi. Efu dati de so, dan wi musu denki bun san wi e du nanga wi libi.​—Romesma 14:17.

¹² Prakseri sosrefi a ten fu Lot. A foto Sodom pe Lot nanga en osofamiri ben e libi, ben de wan gudu foto, ma sma no ben e tyari densrefi na wan bun fasi kwetikweti. Yehovah seni den engel fu en fu go pori a presi drape. Den engel gi Lot nanga en osofamiri deki-ati fu lowe komoto na Sodom  èn fu no drai luku go na baka. Den gowe libi a foto, baka di den engel gi den deki-ati fu du dati. Ma a ben de krin fu si taki a wefi fu Lot ben e tan prakseri en oso na ini Sodom. Fu di a ben trangayesi, meki a drai luku go na baka, èn a sani dati meki taki a lasi en libi (Genesis 19:15-26). Yesus ben warskow wi gi a ten di e kon, di a taki: „Memre a wefi fu Lot.” Wi e gi yesi na a warskow dati?​—Lukas 17:32.

¹³ Den wan di ben e gi yesi na den warskow fu Gado ben feni kibri. Na dati ben pasa nanga Noa nanga en osofamiri èn nanga Lot nanga den umapikin fu en (2 Petrus 2:9). Te wi e denki dipi fu den eksempre disi di de leki wan warskow gi wi, dan wi e kisi deki-ati tu fu di den e sori taki den wan di lobi regtfardikifasi, sa kisi frulusu. A sani dati e gi wi a tranga bribi taki a pramisi fu Gado sa kon tru, namku taki „nyun hemel nanga wan nyun grontapu”, sa de pe „regtfardikifasi o tan”.​—2 Petrus 3:13.

’A yuru doro taki Gado o krutu sma’!

14, 15. (a  San o pasa na ini „a yuru” fu krutu? (b) San a wani taki fu ’frede Gado èn fu gi en glori’?

¹⁴ San wi kan fruwakti aladi wi e tan na ai? A buku Openbaring e sori fa safrisafri a wani fu Gado o kon tru. Wi musu du san a buku disi e taki efu wi wani sori taki wi de srekasreka. A profeititori e taki krin fu den sani di ben o pasa na ini „a dei fu Masra”, di bigin na ini 1914, a ten di Yesus ben poti leki kownu na ini hemel (Openbaring 1:10). Openbaring e meki wi poti prakseri na wan engel di ben abi „têgo bun nyunsu di a ben musu meki bekènti”. Na engel dati e meki bekènti nanga wan tranga sten: „Un frede Gado èn gi en glori, bika a yuru doro kaba taki a o krutu sma” (Openbaring 14:6, 7). A „yuru” dati te sma o kisi krutu, na wan syatu pisi ten; na ini a pisi ten dati, Gado sa meki den krutubosroiti bekènti èn a sa krutu sma sosrefi soleki fa a profeititori e taki. Wi e libi now na ini a pisi ten dati.

 ¹⁵ Nownowde, fosi a yuru fu krutu kon na wan kaba, wi e kisi a deki-ati disi: „Frede Gado èn gi en glori.” San disi wani taki? Te wi abi wan yoisti frede gi Gado, dan dati musu meki wi drai baka gi ogridu (Odo 8:13). Te wi e frede Gado, dan wi sa arki en nanga bigi lespeki. A no sa de so taki wi e poti so furu prakseri na tra sani, taki wi no abi ten fu leisi en Wortu, Bijbel, doronomo. Wi sa teki a rai di a e gi wi fu go na den Kresten konmakandra (Hebrewsma 10:24, 25). Wi sa warderi a grani di wi abi fu meki a bun nyunsu fu Gado en Mesias Kownukondre bekènti, èn wi sa du a wroko dati fayafaya. Wi sa frutrow tapu Yehovah ala ten, èn wi sa du dati nanga wi heri ati (Psalm 62:8). Fu di wi e frustan taki Yehovah na a Moro Hei Tiriman, meki wi e gi en grani fu di wi de klariklari fu saka wisrefi na en ondro fu tiri wi na ini wi libi. Yu e frede Gado trutru èn yu e gi en glori na ala den fasi disi?

16. Fu san ede wi kan taki dati a krutu di Babilon a Bigiwan o kisi, soleki fa Openbaring 14:8 e taki, pasa kaba?

¹⁶ Openbaring kapitel 14 e taki moro fara fu tra sani di o pasa na ini a yuru te sma o kisi krutu. A kapitel disi e taki fosi fu Babilon a Bigiwan, a grontapumakti fu falsi bribi: „Wan tra engel kon, a di fu tu; a taki: ’A fadon! Babilon a Bigiwan fadon!’” (Openbaring 14:8) Iya, gi Gado, Babilon a Bigiwan fadon kaba. Na ini 1919, den salfu futuboi fu Yehovah ben kon fri fu den leri nanga den gwenti fu Babilon, di abi krakti tapu furu pipel nanga kondre dusundusun yari kaba (Openbaring 17:1, 15). Baka dati, den salfuwan ben kan gi densrefi dorodoro fu panya a tru anbegi go na ala sei. Sensi a ten dati, a bun nyunsu fu Gado en Kownukondre e preiki na heri grontapu.​—Mateyus 24:14.

17. San a wani taki fu komoto na ini Babilon a Bigiwan?

¹⁷ Moro sani de di Gado o du nanga Babilon a Bigiwan te a o krutu en. Heri esi a sa kisi pori dorodoro (Openbaring 18:21). Bijbel abi leti fu gi sma na ala sei a deki-ati disi: „Komoto drape [fu Babilon a Bigiwan] . . . efu unu no wani abi prati nanga en na den sondu fu en” (Openbaring 18:4, 5). Fa wi e komoto na ini Babilon a Bigiwan? Wi sa abi fu du moro leki fu tapu nomo nanga falsi anbegi. A krakti fu Babilon de fu si na ini furu pôpi fesa nanga gwenti, na ini a denki di grontapusma abi taki hurudu a no wan ogri sani, na ini den afkodrei felem nanga buku di e kon pôpi moro nanga moro, èn na ini bun furu tra sani. Fu man tan na ai, a de prenspari taki den sani di wi e du èn den sani di wi e winsi, e sori taki trutru wi no abi noti fu du nanga Babilon a Bigiwan.

18. Te wi e luku san Openbaring 14:9, 10 e taki, dan nanga sortu sani Kresten di de na ai musu luku bun?

¹⁸ Openbaring 14:9, 10 e taki moro fara san o pasa na ini ’a yuru te Gado o krutu sma’. Wan tra engel e taki: „Efu wan sma e anbegi na ogri meti, nanga a popki di den meki fu en, èn a sma e kisi wan marki na tapu en fesi-ede, noso na tapu en anu, dan a sma dati o dringi sosrefi a win fu na atibron fu Gado.” Fu san ede dati o pasa? „Na ogri meti, nanga a popki di den meki fu en” e prenki libisma tirimakti di no e si Yehovah leki a Moro Hei Tiriman. Kresten di de na ai, e luku bun fu no gi pasi taki  a meti disi abi krakti na den tapu, noso taki den e kisi a marki. Iya, noiti den sa wani tron sma di e denki noso e tyari densrefi na wan fasi di e sori taki den na srafu fu den wan di e weigri fu si Yehovah, a tru Gado, leki a wan-enkri sma di abi a reti fu tiri. Kresten sabi taki Gado en Kownukondre seti kaba na ini hemel, taki a sa tyari wan kaba kon na ala libisma tiri, èn taki a sa tan fu têgo.​—Danièl 2:44.

Tan fruwakti taki a kaba o kon heri esi!

19, 20. (a) Now di a kaba fu den lasti dei e kon moro krosibei, dan san Satan o pruberi fu du? (b) Sortu fasti bosroiti wi musu abi?

¹⁹ Now di a kaba fu den lasti dei e kon moro krosibei, dan a de sondro tweifri taki wi sa kisi moro nanga moro kwinsi nanga tesi. Solanga wi e libi na ini na owru sistema disi èn solanga wi abi sondu, wi sa kisi fu du nanga wan swaki gosontu, owrudei, a dede di lobiwan fu wi e dede, a hati di sma e hati den firi fu wi, a sari di wi e sari fu di sma no e arki te wi e meki muiti fu preiki Gado Wortu, èn furu tra sani ete. Noiti frigiti taki Satan lobi fu gebroiki den problema fu wi, fu meki wi gi abra, iya, fu meki wi tapu fu preiki a bun nyunsu, noso fu meki wi tapu fu libi akruderi den markitiki fu Gado (Efeisesma 6:11-13). Disi a no wan ten fu lasi a howpu di wi abi taki a kaba o kon heri esi!

²⁰ Yesus ben sabi taki wi ben o kisi bun furu kwinsi fu gi abra, èn fu dati ede a gi wi a rai disi: „Tan na ai . . . bika unu no sabi sortu dei un Masra o kon” (Mateyus 24:42). Fu dati ede, meki wi tan hori na prakseri moro leki oiti bifo, na ini sortu ten wi e libi. Meki wi luku bun nanga den triki fu Satan di kan meki taki wi e du en moro safri na ini a waarheid, noso taki wi e tapu fu dini Gado. Meki wi abi a fasti bosroiti fu preiki a bun nyunsu fu Gado en Kownukondre fayafaya moro leki oiti bifo, èn fu no meki nowan sani tapu wi fu du dati. Awansi fa a no fa, meki wi hori na prakseri taki a kaba o kon heri esi, aladi wi e gi yesi na a warskow di Yesus ben gi fu: „Tan na ai.” Te wi e du dati, dan wi sa gi Yehovah grani, èn wi sa de wan fu den sma di sa kisi den têgo blesi fu en.

San yu ben sa piki?

• Fa wi du sabi taki a warskow di Yesus ben gi fu „tan na ai”, na gi tru Kresten?

• Sortu eksempre na ini Bijbel de leki warskow di kan yepi wi fu „tan na ai”?

• San na a yuru fu krutu, èn san wi musu du fosi a yuru dati doro?

[Aksi fu a tori disi]

[Prenki na tapu bladzijde 23]

Yesus ben agersi a kon di a o kon nanga a kon di wan fufuruman e kon fufuru sani

[Prenki na tapu bladzijde 24]

Heri esi Babilon a Bigiwan o kisi pori

[Prenki na tapu bladzijde 25]

Moro leki oiti bifo, meki wi abi a fasti bosroiti fu preiki nanga moro faya, èn fu no meki nowan sani tapu wi fu du dati