Yu „gudu na ini Gado ai”?

WAN fu den furu agersitori di Yesus Krestes fruteri sma fu poti den na prakseri-broki, na a wan fu a guduman di ben abi furu gron. Fu di a guduman disi ben wani taki sani waka bun gi en na ini a ten di ben o kon, meki a kon nanga a prakseri fu meki moro bigi maksin fu poti sani na ini. Ma toku, na agersitori fu Yesus e sori taki a man disi na wan „donman” (Lukas 12:16-21). Son Bijbel e kari en wan „lawman” srefi. Fu san ede den e taki so takru fu en?

Soleki fa a sori, dan a guduman disi no ben prakseri Gado srefisrefi di a ben e seti den afersi fu en; a no ben gi Gado a grani tu taki na En meki a gron gi so furu nyanyan (Mateyus 5:45). Na presi fu dati, a ben e meki bigi gi ensrefi, di a taki: „We, yu poti wan lo bun sani na wan sei gi furu yari; teki en safrisafri, nyan, dringi èn meki prisiri.” Iya, a ben denki taki den sani di a ben o kisi leki bakapisi fu den muiti di a du, ben o de leki „wan skotu di e kibri en”.​—Odo 18:11.

A disipel Yakobus ben warskow wi gi so wan heimemre fasi fu denki, di a skrifi: „We dan, unu e taki: ’Tide noso tamara wi sa go na a foto disi, wi sa tan wan yari drape, wi sa du bisnis, èn wi sa meki moni’, ma unu no sabi fa a libi fu unu sa de tamara. Bika unu de leki dow di de fu si fu wan syatu pisi ten nomo, èn baka dati a no de fu si moro.”​—Yakobus 4:13, 14.

Na dati pasa trutru nanga a guduman na ini na agersitori fu Yesus, bika Gado taigi a guduman: „Yu donman, a neti disi srefi yu o lasi yu libi. Dan suma o kisi den sani di yu tyari kon na wan?” Neleki fa dow no de moro baka wan pisi ten, na so a guduman no ben o de moro, fu si den prakseri fu en kon tru. Wi e frustan san a tori disi e leri wi? Yesus ben taki: „Na so a sa waka nanga a sma di wani moro nanga moro gudu, ma di no gudu na ini Gado ai.” Yu „gudu na ini Gado ai”?