„Den wan di e go na se na ini sipi”

WAN kopro popki e tanapu e luku go na a lanpe fu Gloucester, Massachussetts, Amerkankondre. A popki e prenki wan man di e du ala muiti fu tyari a boto fu en pasa wan bigi winti di e wai na se. A popki e memre sma na den dusundusun fisiman fu Gloucester di dede na se. Na a futu fu a popki èn na tapu wan plata ston di de krosibei fu a popki, den skrifi den wortu fu Psalm 107:23, 24: „Den wan di e go na se na ini sipi, di e du bisnis na tapu den bigi watra; den sma disi si a wroko fu Masra, nanga den wondru di a du na ini den dipi watra.”​—King James Version.

Sma kan lasi den libi te den e go fanga fisi na ini den pisi fu na Atlantis Se pe fisi lai srefisrefi. Gloucester na wan foto di abi sowan 30.000 sma, èn soleki fa sma denki, dan na ini den yari di pasa, sowan 5368 man fu a foto disi lasi den libi di den go kisi fisi na se. A popki nanga a plata ston di den meki fu memre den sma disi, e taki: „Sonwan fu den lasi libi fu di bigi skwala nanga tranga winti fu noord-owstusei wai kon na den tapu wantronso. Sonwan fu den dede di den ben lasi na se fu di a pikin fisiboto fu den lusu komoto fu a bigi sipi di ben e tyari den go na a presi pe den fisi ben de. Son sipi naki broko fu di bigi winti ben e wai na se, èn a sari bakapisi ben de taki den sipi sungu. Tra boto go naki nanga bun bigi sipi, fu di den teki a srefi pasi di den bigi sipi disi ben e teki.”

A popki nanga a plata ston e sori na wan sari fasi o tranga den fisiman ben musu wroko èn sortu takru situwâsi miti den na ini den hondrohondro yari di pasa. Prakseri nomo fa sma ben e krei fu di den ben sari taki den masra, den papa, den brada, nanga den manpikin fu den lasi den libi. Toku Yehovah Gado no e frigiti den uma di lasi den masra na ini dede, den pikin di no abi papa moro, noso den wan di lasi den libi na se. Na apostel Yohanes ben sori san o pasa na ini a ten di e kon. A ben taki: „Dan a se lusu den dedesma di ben de na ini en, èn dede nanga Hades lusu den dedesma di ben de na ini den” (Openbaring 20:13). Te den sma di ben „go na se na ini sipi”, o kisi wan opobaka, dan den o si den tumusi moi „wroko fu Masra” trutru.