Kon kisi trutru sakafasi

„Yu sa frulusu den sakafasi sma.”​—2 SAMUEL 22:28.

1, 2. Sortu sani furu tiriman no ben abi?

DEN piramide fu Egepte e poti wi prakseri na den man di ben e tiri a kondre disi na ini owruten. Tra prenspari man na ini historia ben de Sanherib fu Asiria, Aleksander a Bigiwan fu Grikikondre, nanga Julius Caesar fu Rome. Te wi luku ala den tiriman disi, dan wi e si taki wán sani ben de di nowan fu den ben abi. Sma no ben sabi den leki man di abi trutru sakafasi.​—Mateyus 20:25, 26.

² Yu denki taki iniwan fu den tiriman di wi kari dya, ben abi a gwenti fu waka a heri kondre fu den fu feni mofina sma di ben abi trowstu fanowdu? Kwetikweti! Noso yu denki taki den ben o go na pôtisma oso fu gi deki-ati na den wan di ben e firi brokosaka? A fasi fa den ben e handri nanga mofina libisma, e difrenti krinkrin fu a fasi fa a Moro Hei Tiriman fu hemel nanga grontapu, Yehovah Gado, e handri nanga libisma!

A moro moi fasi fa wan sma sori sakafasi

3. Fa a Moro Hei Tiriman e handri nanga a pipel fu en?

³ Yehovah bigi èn hei pasa marki, ma toku „den ai fu en e luku a heri grontapu lontu fu gebroiki a krakti fu en fu a bun fu den sma di lobi en  nanga den heri ati” (2 Kroniki 16:9). We, san Yehovah e du te a e si taki mofina anbegiman e firi brokosaka fu di den e kisi difrenti tesi? Yu kan taki dati a „e tan” nanga den sma disi fu di a santa yeye fu en e „gi a yeye fu den sakafasiwan krakti baka èn [a e] gi na ati fu den sma di brokosaka krakti baka” (Yesaya 57:15). Na so fasi, den anbegiman fu en di kisi krakti baka, man dini en baka nanga moro prisiri. Iya, Gado abi sakafasi trutru!

4, 5. (a) San a psalm skrifiman ben denki fu a fasi fa Gado e tiri? (b) San a wani taki dati Gado „e saka ensrefi” fu yepi „a mofinawan”?

⁴ Nowan sma na hemel noso na grontapu saka ensrefi soleki fa a Moro Hei Tiriman saka ensrefi fu yepi sondu libisma. A psalm skrifiman ben kan skrifi: „Yehovah hei moro ala pipel; a glori fu en hei moro hemel. Suma de leki Yehovah wi Gado, En di e meki en tanpresi na loktu? A e saka ensrefi fu luku hemel nanga grontapu, e opo a mofinawan puru na doti srefi; èn fu na asisi peti srefi, a e opo a pôtiwan puru.”​—Psalm 113:4-7.

⁵ Fu di Yehovah no abi fowtu èn fu di a santa, meki a no abi „bigimemre” kwetikweti (Markus 7:22, 23). Den wortu „saka ensrefi” kan abi fu du nanga wan sma di e gowe libi a hei posisi noso a grani fu en, fu kan de nanga wan tra sma di abi wan moro lagi posisi leki en na ini a libimakandra, noso fu kan du wan sani gi wan sma di lagi moro en. Psalm 113:6 e sori na wan heri moi fasi fa wi Gado di abi sakafasi nanga lobi, e poti prakseri na den sani di sondu libisma di e anbegi en, abi fanowdu.​—2 Samuel 22:36.

Fu san ede Yesus ben abi sakafasi

6. San ben de a moro moi fasi fa Yehovah sori sakafasi?

⁶ A moro bigi sani di Gado du fu sori taki a abi sakafasi nanga lobi, na taki a seni en fosi Manpikin, a wan di a lobi, kon na grontapu, so taki a ben kan gebore leki wan libisma èn kisi wan opobaka; na so fasi a libisma famiri ben kan kisi frulusu (Yohanes 3:16). Yesus leri wi tru tori fu en hemel Tata, èn baka dati a dede leki wan volmaakti libisma fu puru „a sondu fu grontapu” (Yohanes 1:29; 18:37). Yesus di e du sani soifri leki en Tata, abi den srefi fasi di Yehovah abi, soleki sakafasi, èn fu dati ede a ben de klariklari fu du san Gado ben aksi fu en. Disi ben de a moro moi fasi fa wan sma di Gado meki, oiti sori sakafasi nanga lobi. A no ala sma ben warderi a sakafasi fu Yesus, èn den feanti fu en ben si en srefi leki „a moro lagi libisma” (Danièl 4:17). Toku na apostel Paulus ben sabi taki den Kresten brada nanga sisa fu en ben musu teki na eksempre fu Yesus, èn fu dati ede den ben musu abi sakafasi te den ben e handri nanga makandra (1 Korentesma 11:1; Filipisma 2:3, 4). Paulus, di ben poti prakseri na a tumusi moi eksempre fu Yesus, ben skrifi:

7, 8. (a) Fa Yesus leri fu abi sakafasi? (b) Di Yesus ben taki nanga den sma di ben kan tron disipel fu en, dan sortu deki-ati a ben gi den?

⁷ „Tan abi a srefi denki disi di Krestes Yesus ben abi tu; aladi a ben abi a srefi sortu skin leki Gado, toku a no prakseri fu teki sani abra nanga tranga, namku fu kan de a srefi leki Gado. Nôno, ma a gowe libi ala san a ben abi, a tron leki wan srafu èn a ben tron leki libisma. Ma a du moro leki dati srefi, bika di a ben de wan libisma, a saka ensrefi èn a gi yesi te na dede, iya, a dede na wan pina-postu.”​—Filipisma 2:5-8.

⁸ Son sma ben sa kan aksi densrefi: ’Fa Yesus leri fu abi sakafasi?’ Dati ben kon fu di a ben de nanga en hemel Tata dusundusun yari langa. Na ini a pisi ten disi, a ben de a „tumusi bun wrokoman” di Gado ben gebroiki fu meki ala  sani (Odo 8:30). Baka di libisma na ini Eden opo densrefi teige Gado, dan a Fosi Manpikin fu Gado ben abi na okasi fu si fa en Tata ben sori sakafasi te a ben e handri nanga sondu libisma. Fu dati ede, di Yesus ben de na grontapu, a ben sori a srefi sakafasi di en Tata ben abi, èn a ben gi sma deki-ati fu du a sani disi: „Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka.”​—Mateyus 11:29; Yohanes 14:9.

9. (a) San Yesus ben lobi fu pikin-nengre? (b) Fa Yesus gebroiki wan yongu pikin fu leri den bakaman fu en wan sani?

⁹ Yesus ben abi trutru sakafasi, èn dati meki pikin-nengre no ben frede en. Na presi fu dati, den ben e prisiri fu kon na en. En fu en sei, ben sori taki a ben lobi pikin-nengre èn a ben poti prakseri na den (Markus 10:13-16). San Yesus ben lobi so fu pikin-nengre? A no de fu taki dati den ben abi fasi di wan tu fu en disipel di ben de bigisma kaba, no ben e sori ala ten. Ala sma sabi taki yongu pikin e si bigisma leki sma di koni moro den. Yu kan si disi na den furu aksi di den e poti. Iya, te yu e teki pikin-nengre gersi nanga furu bigisma, dan yu e si taki a de moro makriki fu leri pikin-nengre wan sani èn yu e si sosrefi taki den no abi bigifasi soleki fa a de nofo tron nanga bigisma. Wán leisi, Yesus kari wan yongu pikin kon na en, dan a taigi den bakaman fu En: „Efu unu no kenki a fasi fa unu e libi èn unu no tron leki yongu pikin, dan unu no sa go na ini a kownukondre fu hemel kwetikweti.” Baka dati a taki: „Efu wan sma abi sakafasi neleki a yongu pikin disi, dan a sma dati na a moro bigiwan na ini a kownukondre fu hemel” (Mateyus 18:3, 4). Yesus leri den: „Efu wan sma e hei ensrefi, dan den o saka en èn a sma di e saka ensrefi, den o hei en.”​—Lukas 14:11; 18:14; Mateyus 23:12.

10. Sortu aksi wi o go luku now?

¹⁰ A tru tori disi e meki wan tu prenspari aksi opo kon. Wan fu den sani di wi musu du fu kisi têgo libi, na taki wi musu kon kisi trutru sakafasi. Ma fu san ede a muilek gi Kresten son leisi fu abi sakafasi? Fu san ede a muilek gi wi fu basi heimemre, èn fu abi sakafasi te wi e kisi tesi? San sa yepi wi fu kon kisi trutru sakafasi te fu kaba?​—Yakobus 4:6, 10.

Fu san ede a muilek fu abi sakafasi

11. Fu san ede wi no musu fruwondru te wi e si taki wi abi problema fu sori sakafasi?

¹¹ Efu yu si taki yu musu feti fu sori sakafasi, dan a bun fu sabi taki a no yu wawan abi a problema disi. Na ini 1920, a tijdschrift disi ben taki fu a Bijbel rai di e sori taki a de fanowdu fu abi sakafasi. A tijdschrift ben taki: „Sobun, now di wi e si taki Masra feni en tumusi prenspari fu abi sakafasi, dan disi musu gi ala tru disipel deki-ati fu leri fu sori a fasi disi ibri dei.” Ma baka dati a tijdschrift e taki krin: „Aladi Bijbel e gi wi ala den rai disi, toku a gersi leki a sondu fu libisma bigi so te, taki den sma di e tron a pipel fu Masra èn di teki a bosroiti fu waka a pasi fu En, musu meki moro muiti fu abi sakafasi, iya, den musu feti moro tranga fu abi a fasi disi, leki te den musu feti fu abi iniwan tra fasi.” Disi e sori wi wán sani di e meki taki tru Kresten musu meki so furu muiti fu sori sakafasi: wi leki sondu libisma e angri fu kisi glori di wi no abi reti na tapu. Disi de so, fu di wi na pikin fu wan sondu man nanga uma, Adam nanga Eva, di ben e suku den eigi wini nomo.​—Romesma 5:12.

12, 13. (a) Fa grontapu kan tapu wan Kresten fu abi sakafasi? (b) Suma e meki en moro muilek gi wi fu kon kisi sakafasi?

 ¹² Wan tra sani di kan meki taki wi e feni en muilek fu sori sakafasi, na taki wi e libi na ini wan grontapu di e gi sma deki-ati fu pruberi fu de moro hei leki trawan. Wan fu den sani di sma fu a grontapu disi wani, na fu plisi densrefi, fu di den e poti prakseri na „a lostu fu a [sondu] skin, a lostu fu den ai, èn a prodo di wan sma e prodo nanga den gudu di a abi” (1 Yohanes 2:16). Den disipel fu Yesus no musu meki den lostu disi fu grontapu basi den, ma den musu tan hori den ai krin èn den musu tan poti prakseri na a wani fu Gado.​—Mateyus 6:22-24, 31-33; 1 Yohanes 2:17.

¹³ Ete wan sani di e meki taki a muilek fu kon kisi sakafasi èn fu sori a fasi dati, na taki Satan Didibri, a fosi sma di ben abi heimemre, e tiri a grontapu disi (2 Korentesma 4:4; 1 Timoteyus 3:6). Satan e gi sma deki-ati fu abi den takru fasi fu en. Fu eksempre, a ben wani taki Yesus anbegi en. Efu Yesus ben o du dati, dan a ben o gi Yesus „ala den kownukondre fu grontapu nanga a moi fu den”. Fu di Yesus abi sakafasi ala ten, meki a taigi Didibri krin taki a no ben wani den sani di Didibri ben wani gi en (Mateyus 4:8, 10). Na a srefi fasi Satan e pruberi fu kori Kresten fu suku glori gi densrefi. Ma Kresten di abi sakafasi, e pruberi fu waka baka na eksempre fu Yesus fu di den e meki Gado kisi prèise nanga glori.​—Markus 10:17, 18.

Kon kisi trutru sakafasi èn sori a fasi disi na ini yu libi

14. Te wan sma „e du neleki a abi sakafasi”, dan san dati e sori?

¹⁴ Na ini a brifi di na apostel Paulus ben skrifi gi den Kolosesma, a ben warskow den taki den no ben musu meki leki den abi sakafasi soso fu plisi libisma. Paulus ben taki fu sma di ben o ’du neleki den abi sakafasi’. Den sma di e du nomo leki den abi sakafasi, no de sma di tranga na yeye fasi. Na presi fu dati, den e sori taki den na „bigimemre” sma trutru (Kolosesma 2:18, 23). Yesus ben gi wan tu eksempre fu sma di ben e du leki den abi sakafasi. A ben krutu den Fariseiman fu di den ben meki wan lo opo-opo te den ben e begi. Sosrefi, te den Fariseiman ben e faste, dan den ben poti wan sari fesi èn den ben e masi den fesi soso fu sma si taki den ben e faste. Ma efu wi wani taki den begi fu wi musu de wan warti sani gi Gado, dan wi musu begi nanga sakafasi.​—Mateyus 6:5, 6, 16.

15. (a) San wi kan du fu tan abi sakafasi? (b) San na wan tu moi eksempre fu sma di ben abi sakafasi?

¹⁵ Wan sani di sa yepi Kresten fu tan abi trutru sakafasi, na te den e poti prakseri na Yehovah Gado nanga Yesus Krestes di ben sori na a moro bun fasi fa fu abi sakafasi. Fu man du disi, wi musu tan studeri Bijbel nanga den buku di „a getrow èn koni srafu” e gi wi fu studeri Bijbel (Mateyus 24:45). A de tumusi prenspari gi Kresten opziener fu studeri na a fasi disi, ’so taki na ati fu den no meki den firi densrefi moro hei leki den brada fu den’ (Deuteronomium 17:19, 20; 1 Petrus 5:1-3). Luku den furu eksempre fu sma di Gado blesi fu di den ben abi sakafasi, sma soleki Rut, Hana, Elisabet, èn furu trawan (Rut 1:16, 17; 1 Samuel 1:11, 20; Lukas 1:41-43). Prakseri sosrefi fu den furu moi eksempre fu man di ben abi biginen, ma di ben tan dini Yehovah nanga sakafasi, man soleki David, Yosia, Yohanes a Dopuman, nanga na apostel Paulus (2 Kroniki  34:1, 2, 19, 26-28; Psalm 131:1; Yohanes 1:26, 27; 3:26-30; Tori fu den Apostel 21:20-26; 1 Korentesma 15:9). Fa a de nanga den furu sma na ini a Kresten gemeente na ini a ten disi di e sori na wan moi fasi taki den abi sakafasi? Te tru Kresten e prakseri dipi fu den eksempre disi, dan den sa man ’abi sakafasi, te den e handri nanga makandra’.​—1 Petrus 5:5.

16. Fa a Kresten diniwroko e yepi wi fu abi sakafasi?

¹⁶ Te wi e teki prati na a preikiwroko doronomo, dan dati kan yepi wi sosrefi fu abi sakafasi. Te wi e taki nanga freimdesma di wi e miti oso fu oso èn na tra presi, dan sakafasi kan meki taki wi sa abi bun bakapisi. Disi de spesrutu so, te ososma no wani arki a Kownukondre boskopu, noso te den e taki grofu a fosi leisi te wi e miti nanga den. Furu sma e tweifri na den sani di wi e bribi, èn sakafasi kan yepi wan Kresten fu tan gi piki tapu den aksi fu sma „na wan safri fasi èn nanga bigi lespeki” (1 Petrus 3:15). Futuboi fu Gado di abi sakafasi, froisi go na nyun kontren, èn den yepi sma di abi wan heri tra kulturu èn di abi wan tra sortu fasi fu libi. A kan taki den dinari disi abi sakafasi fanowdu fu man du a muilek sani fu leri wan nyun tongo, so taki den kan yepi sma moro bun te den e preiki a bun nyunsu gi den. A moi srefisrefi taki den e du disi!​—Mateyus 28:19, 20.

17. Gi sortu Kresten frantwortu wi abi sakafasi fanowdu?

¹⁷ Furu brada nanga sisa ben sori sakafasi te den ben musu du den frantwortu di den leki Kresten abi, fu di den ben feni a bun fu trawan moro prenspari leki di fu den. Fu eksempre, wan Kresten papa musu abi sakafasi fu poti en eigi sani na wan sei, so taki a kan abi a ten fu sreka ensrefi èn fu studeri Bijbel nanga den pikin fu en na wan bun fasi. Sosrefi, efu pikin abi sakafasi, dan dati e yepi den fu gi grani èn fu gi yesi na a papa nanga mama fu den di no de volmaakti (Efeisesma 6:1-4). Nofo tron a de so taki wefi di abi wan masra di no de na bribi, e kon na ini situwâsi pe den musu sori sakafasi, aladi den e pruberi fu wini a masra fu den nanga a ’krin fasi fa den e tyari densrefi èn nanga a bigi lespeki di den e sori’ (1 Petrus 3:1, 2). Sosrefi, efu wi e sorgu wi papa nanga mama di siki èn di kon owru, dan a de wan bigi yepi te wi abi sakafasi èn te wi e sori lobi sondro fu prakseri wi eigi bun nomo.​—1 Timoteyus 5:4.

Sakafasi e yepi fu lusu problema

18. Fa sakafasi kan yepi wi fu lusu problema?

¹⁸ Ala den futuboi fu Gado na grontapu, abi sondu (Yakobus 3:2). Son leisi, tu Kresten kan abi wan kesekese, noso wan trobi. A kan taki wan Kresten abi leti trutru fu kragi fu wan sani di wan brada noso sisa du. Nofo tron, wi kan lusu den sortu problema disi, te wi e gi yesi na a rai disi: „Tan frudrage makandra èn gi makandra pardon nanga un heri ati te wan sma feni  taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu” (Kolosesma 3:13). A tru taki a no makriki fu gi yesi na a rai disi, ma sakafasi sa yepi wan sma fu du dati.

19. Sortu sani wi musu hori na prakseri te wi e taki nanga wan sma di meki wi atibron?

¹⁹ Son leisi wan Kresten kan feni taki a sani di a trawan du, seryusu tumusi fu libi en leki fa a de. We, te a feni taki wan sma hati en, dan sakafasi o yepi en fu go taki nanga a sma dati fu di a wani meki vrede (Mateyus 18:15). Wan sani di e meki taki problema e tan na mindri Kresten son leisi, na taki wan fu den, noso kande ala tu sma e firi densrefi tumusi hei fu taki dati den fowtu. Noso te wan Kresten e go fu taki nanga wan tra brada, dan kande a e taki na so wan fasi taki a e krutu a brada fu di a feni taki a brada abi a fowtu. Na a tra sei, a de so taki te wan sma abi trutru sakafasi, dan a sa man lusu furu problema.

20, 21. San na wan fu den moro bun sani di e yepi wi fu abi sakafasi?

²⁰ Wan prenspari sani di kan yepi wi fu kon kisi sakafasi, na fu begi Gado meki a yepi wi èn gi wi a yeye fu en. Ma hori na prakseri taki „Gado . . . e sori no-frudini bun-ati [sosrefi nanga yepi fu en santa yeye] na sma di abi sakafasi” (Yakobus 4:6). Fu dati ede, efu yu nanga wan Kresten brada noso sisa abi wan trobi, dan begi Yehovah meki a yepi yu fu abi a sakafasi fu taigi a sma taki yu sosrefi meki fowtu, awansi a fowtu pikin noso bigi. Efu wan sma hati yu èn a sma disi e aksi yu na wan opregti fasi fu gi en pardon, dan sori sakafasi èn gi a sma pardon. Efu a muilek gi yu fu du disi, dan begi Yehovah meki a yepi yu fu puru iniwan fasi fu heimemre di ben sa kan de na ini yu ati.

²¹ Te wi e frustan omeni wini wi kan kisi te wi abi sakafasi, dan dati musu pusu wi fu kon kisi a moi fasi disi èn fu tan sori en doronomo. Den tumusi moi eksempre fu Yehovah Gado nanga Yesus Krestes e yepi wi fu du a sani disi! Noiti no frigiti a dyaranti di Gado e gi wi: „A bakapisi fu sakafasi nanga a frede gi Yehovah, na gudu nanga glori nanga libi.”​—Odo 22:4.

Sani di wi kan prakseri dipi fu den

• Suma na den moro bun eksempre di e sori wi fa fu abi sakafasi?

• Fu san ede a muilek fu kon kisi sakafasi?

• San kan yepi wi fu abi sakafasi?

• Fu san ede a de so prenspari fu tan abi sakafasi?

[Aksi fu a tori disi]

[Prenki na tapu bladzijde 26]

Yesus ben abi trutru sakafasi

[Prenki na tapu bladzijde 28]

A grontapu e gi sma deki-ati fu pruberi fu de moro hei leki trawan

[Sma di abi a reti fu a prenki]

WHO photo by L. Almasi/​K. Hemzǒ

[Prenki na tapu bladzijde 29]

Sakafasi e yepi wi fu taki nanga freimdesma di wi e miti na ini a preikiwroko

[Prenki na tapu bladzijde 30]

Nofo tron wi kan lusu trobi te wi e sori lobi nanga sakafasi, èn te wi e libi a tori leki fa a de

[Prenki na tapu bladzijde 31]

Furu fasi de fa Kresten kan sori sakafasi