Sortu leri kan meki taki yu libi waka bun?

OITI yu ben abi so furu problema taki a ben gersi leki yu e sungu na ini wan draiwatra? Prakseri pikinso o furu takru bakapisi a ben o tyari kon te yu ben o meki wan fowtu aladi yu e pruberi fu lusu wán noso moro fu den problema dati! Nowan sma gebore nanga a koni fu lusu ala problema na wan bun fasi, èn nowan sma man teki bun bosroiti ibri leisi. Na fu dati ede leri de fanowdu. Pe yu kan kisi leri di kan sreka yu fu man lusu den problema di yu sa kisi na ini a libi?

Furu sma, yonguwan nanga owruwan, feni taki heiskoro na wan universiteit de tumusi prenspari. Son sabiman e taki srefi taki den „de seiker taki yu no sa man feni wan bun wroko noiti sondro fu teki hei skoroleri na wan universiteit”. Ma toku wan tu sani de di libisma abi fanowdu èn di den no man kisi nanga yepi fu gudu. Fu eksempre, yu denki taki hei skoroleri e yepi yu fu tron wan bun papa, wan bun patna, noso wan bun mati? Kwetikweti, bika furu tron a kan pasa so, taki sma di trawan e lespeki gi a koni fu den, e kisi takru maniri, sani no e waka bun gi den na ini den osofamiri libi, èn sonwan fu den e kiri densrefi.

Son sma e go suku tiri na kerki pe den kan kisi leri, ma den e lasi-ati fu di den no e kisi yepi trutru fu lusu den problema di den abi. Fu buweisi disi, luku san Emilia * fu Meksikow e taki: „Sowan tinafeifi yari pasa, mi ben feni taki mi nanga mi masra no ben o man libi nanga makandra moro. Ala yuru wi ben e meki trobi. Mi no ben man meki a libi a sopi. Nofo tron mi ben musu libi den yongu pikin fu mi na oso den wawan, fu go suku mi masra. Mi no ben man tyari en moro. Someni leisi mi go na kerki fu suku lusu gi den problema fu mi. Aladi den ben e gebroiki Bijbel wanwan leisi, toku noiti mi no yere rai di ben abi fu du langalanga nanga a situwâsi fu mi; èn noiti wan sma kon na mi fu taigi mi san fu du. A no ben e yepi mi tu fu sidon wan pisi ten na ini kerki èn fu taki densrefi sortu begi ibri tron baka.” Kande trawan e lasi-ati te den e si taki den kerki fesiman fu den no de wan bun eksempre gi den kwetikweti. A bakapisi na taki furu sma no e frutrow moro tapu kerki leki wan presi pe den kan kisi leri di den abi fanowdu fu kan abi wan bun libi.

Dati meki kande yu e aksi yusrefi: ’Sortu leri mi musu kisi, so taki mi libi kan waka bun?’ Yu denki taki a tru Kresten bribi abi a piki tapu a prenspari aksi disi? Wi sa taki fu disi na ini a tra artikel.

[Futuwortu]