Aksi fu leisiman

Wan Kresten kan tan hori wan bun konsensi efu a e teki wan wroko pe a musu tyari wan gon noso wan tra fetisani?

Na heri grontapu, Yehovah Kotoigi e si a frantwortu di Gado gi den fu sorgu na osofamiri fu den, leki wan seryusu sani (1 Timoteyus 5:8). Ma son wroko no e kruderi srefisrefi nanga Bijbel markitiki, èn fu dati ede wan Kresten no kan du den sortu wroko disi. Disi kan de wroko pe sma e gi trawan deki-ati fu dòbel, fu gebroiki brudu na wan fasi di no fiti, noso fu smoko tabaka (Yesaya 65:11; Tori fu den Apostel 15:29; 2 Korentesma 7:1; Kolosesma 3:5). Tra wroko de di Bijbel no e krutu krinkrin, ma di kan trobi a konsensi fu wan Kresten, noso a konsensi fu tra sma.

Wan sma srefi musu teki a bosroiti efu a wani du grontapuwroko pe a musu tyari wan gon noso wan tra fetisani. Ma wan sma di e du so wan wroko, kan kisi brudu-paiman na en tapu te a e kisi a komando fu gebroiki a gon noso a fetisani fu en. Fu dati ede, wan Kresten musu begi Gado fu yepi en prakseri bun efu a de klariklari fu teki a hebi frantwortu disi, bika a kan kon na ini wan situwâsi pe a musu bosroiti wantewante efu a o gebroiki a gon noso a fetisani fu en di kan meki sma lasi libi. Te wan sma e tyari wan fetisani, dan ensrefi kan kisi mankeri tu, noso a kan dede fu di wan sma sutu kon na en tapu, noso fu di wan sma wani du en wan ogri baka.

Te wan Kresten e teki so wan bosroiti, dan disi kan abi krakti tu tapu tra sma. Fu eksempre, a moro prenspari frantwortu fu wan Kresten, na fu preiki a bun nyunsu fu Gado Kownukondre (Mateyus 24:14). Fa wan Kresten sa man leri trawan taki den musu „libi na ini vrede nanga ala sma”, efu ensrefi e du wan wroko pe a e tyari wan fetisani? (Romesma 12:18) Fa a de nanga pikin, noso tra sma na ini na osofamiri? Efu wan gon de na ini na oso, dan disi ben sa kan meki den kisi so wan bigi mankeri taki den lasi den libi? Boiti dati, a de so taki tra sma o naki futu te wan Kresten e teki so wan bosroiti?​—Filipisma 1:10.

Na ini den „lasti dei” disi, moro nanga moro sma de di e ’du sani nanga trawan na wan ogri-ati fasi, èn di no lobi san bun’ (2 Timoteyus 3:1, 3). Efu wan Kresten sabi disi, dan wi kan taki ete dati „nowan fowtu de fu feni na en tapu” te a e teki wan wroko pe a musu tyari wan gon èn pe a kan kisi trobi nanga den sortu sma disi? (1 Timoteyus 3:10) Kwetikweti. Fu dati ede, efu wan Kresten ben o tan tyari wan fetisani, awinsi sma gi en rai fu Bijbel na wan switi fasi, dan a gemeente no ben o si en leki wan sma di „de sondro fowtu” (1 Timoteyus 3:2; Titus 1:5, 6). Sobun, so wan man noso uma no man kisi spesrutu grani na ini a gemeente.

Yesus ben gi den disipel fu en a dyaranti taki efu a Kownukondre ben o de a moro prenspari sani na ini den libi, dan den no ben abi fu broko den ede tumusi nanga den sani di den ben o abi fanowdu fu tan na libi (Mateyus 6:25, 33). Iya, efu wi e frutrow dorodoro tapu Yehovah, dan „ensrefi sa horibaka gi [wi]. Noiti a sa meki taki a regtfardikiwan e degedege”.​—Psalm 55:22.