Den e fruteri den dofusma a bun nyunsu

„DEN e leri yu furu sani fu Gado!” Dati na san wan man ben taki no so langa pasa fu Yehovah Kotoigi di e kon na a presi pe a man disi e wroko leki driktoro. A presi disi pe owrusma e tan, de na Navalcarnero, na ini a foto Madrid, Spanyorokondre. San meki a driktoro taki disi?

Na a presi disi di nen Rosas del Camino, yu abi wan tu dofusma. Ma fu di den Kotoigi du muiti fu leri a dofusma-tongo fu Spanyorokondre, meki den man taki nanga den sma disi. A driktoro ben prèise den Kotoigi taki sondro fu aksi moni, den ben teki ten fu leri sma di ben abi spesrutu yepi fanowdu, fu kon sabi Bijbel. A ben si taki di den sma leri a bun nyunsu fu a Kownukondre, a ben abi bun bakapisi gi den. Den sma srefi, spesrutu den wan di no man yere noso si so bun, e warderi en trutru taki den Kotoigi e kon na den.

Eulogio, wan fu den sma di e libi drape, breni èn a dofu. Now a e studeri Bijbel nanga Yehovah Kotoigi. Wán dei, di wan Kotoigi ben e studeri nanga en, wan owru man kon drape èn a leisi wan puwema gi a Kotoigi. Den sma fu a presi ben skrifi a puwema fu sori a warderi fu den. A puwema ben nen: „Fu de wan Kotoigi.” Wan pisi fu a puwema ben taki: „Den e libi wan bun libi, èn den e tyari densrefi na wan fasi di e sori taki den e hori densrefi na markitiki. Na fu Yehovah den e kisi a koni di e meki taki den firi prisiri. Ibri leisi den e go na den oso fu sma fu di den e frutrow tapu Yehovah.”

Iya, fu di Kotoigi e frutrow tapu Yehovah, meki furu fu den na heri grontapu leri a dofusma-tongo fu man taki nanga dofusma na ini a kondre fu den. Na so fasi, den e fruteri den sortu sma disi a moi boskopu fu Bijbel di e gi sma deki-ati nanga howpu.