Wan grontapu di no prati nanga leti

YU NO feni taki wi e libi na ini wan grontapu di no prati nanga leti? A no de fu taki dati yu e agri nanga a tori dati. Fu taki en leti, awansi sortu koni wi abi, èn awansi o bun wi e seti sani gi a tamara fu wi, wi no abi a dyaranti taki wi sa kon gudu, taki wi sa abi bun bakapisi na ini a libi, noso taki wi sa abi nyanyan srefi. Nofo tron sani e waka soleki fa a koni Kownu Salomo fu owruten ben taki: „A no den koniwan abi a nyanyan, èn a no den wan di abi frustan abi a gudu, èn srefi den wan di abi sabi, a no den wan di trawan feni bun.” Fu san ede dati de so? Na fu di, soleki fa Salomo e taki moro fara: „Ten nanga sani di e pasa sondro fu sma fruwakti dati, e miti den alamala.”​—Preikiman 9:11.

’Te wan ten fu rampu e kon na sma tapu wantronso’

Iya, „ten nanga sani di e pasa sondro fu sma fruwakti dati”, furu tron wani taki dati wan sma de na wan presi soifri na wan momenti di a no ben musu de drape. A sani disi e meki taki furu tron den sani di wi ben sreka so finifini no e waka soleki fa wi wani, èn a e meki sosrefi taki den tranga winsi di wi ben abi, no e kon tru. Soleki fa Salomo e taki, dan wi de „neleki fisi di sma e kisi na ini wan ogri srepi, èn neleki fowru di sma e kisi na ini wan trapu, . . . na ini wan ten fu rampu, te a e kon na den tapu wantronso” (Preikiman 9:12). Fu gi wan eksempre, milyunmilyun sma e wroko bun tranga fu prani nyanyan gi na osofamiri fu den, ma wantronso „wan ten fu rampu” e miti den fu di alen no e fadon, èn dreiten e pori den sani di den prani.

Trawan e pruberi fu yepi, ma srefi te grontapusma e gi yepi na den sma di ondrofeni „wan ten fu rampu”, dan furu tron den no e du dati na wan leti fasi. Fu gi wan eksempre, na ini wan fu den yari di pasa, sma du muiti fu yepi trawan di de nanga angribere, ma „a yepi di heri [Afrika] kisi, na wan di fu feifi pisi nomo fu ala a moni di sma gebroiki fu feti a Golf orloku”. Den gudu kondre dati gebroiki feifi leisi so furu moni gi wan orloku, leki a moni di den gebroiki fu tyari wan frulekti kon gi wan heri pisi fu grontapu, pe angribere e meki taki sma e pina èn e sari. Den ben abi leti fu du dati? Èn a de wan reti sani taki aladi bun furu sma gudu, toku wán fu ibri fo sma na grontapu e libi wan trutru pôti libi ete? A de wan reti sani sosrefi, taki milyunmilyun pikin e dede ibri yari fu di den abi siki di den no ben abi fu kisi efu sma ben du wan sani? Kwetikweti!

A no de fu taki dati te ’wan ten fu rampu e kon na  sma tapu wantronso’, dan „ten nanga sani di e pasa sondro fu sma fruwakti dati”, a no a wan-enkri reide fu san ede a sani dati e pasa. Bigi krakti di wi no man basi srefisrefi e tiri wi libi tu, èn den abi krakti tapu a fasi fa wi libi e waka. Na dati pasa na ini a foto Beslan, na ini Alania, na a bakayari fu 2004. Na a ten dati, hondrohondro sma lasi den libi fu di ogri-ati sma di ben opo densrefi teige a tirimakti, feti na wan ogri-ati fasi nanga skowtu. Furu fu den sma di lasi den libi ben de yongu pikin di ben e go na skoro a fosi dei fu a skoroyari. A no de fu taki, dati den sma di dede noso di tan na libi di a sari sani disi pasa, no ben fruwakti taki a sani dati ben o miti den. Ma toku a de so taki a moro prenspari sani di tyari a „ten fu rampu” disi kon, na a feti di libisma ben e feti nanga makandra.

Sani o tan so fu ala ten?

„Ma na so a libi de”, son sma e taki, te den e taki fu den kruktudu di e pasa. „Na so a ben de ala ten kaba, èn na so a sa tan.” Den sma disi feni taki ala ten den trangawan sa kwinsi den swakiwan, èn taki ala ten den guduwan sa kwinsi den pôtiwan. Den sma disi e taki dati a sani dati, makandra nanga „ten nanga sani di e pasa sondro fu sma fruwakti dati”, sa abi krakti na wi tapu solanga leki libisma de na grontapu.

Ma a de fanowdu trutru taki sani waka so? Oiti den wan di e gebroiki den koni fu den na wan frantwortu fasi sa man kisi pai na wan leti fasi gi ala tranga wroko di den e du? Wan sma de di kan du wan sani fu tyari kenki kon fu ala ten na ini wan grontapu di no prati nanga leti? Luku san na artikel di e kon e taki fu a tori disi.

 [Sma di abi a reti fu a prenki na tapu a kafti]

COVER: Man with a child: UN PHOTO 148426/McCurry/Stockbower

[Sma di abi a reti fu a prenki na tapu bladzijde 3]

MAXIM MARMUR/AFP/Getty Images