Wan sma de di man kenki grontapu trutru?

„Pôtisma e taigi wi taki a moro prenspari sani di den wani, na vrede nanga a dyaranti taki sani sa waka bun nanga den, èn baka dati den wani kisi okasi fu meki a libi fu den kon moro betre. Den wani taki den tirimakti fu den eigi kondre èn fu tra kondre e teki reti bosroiti, so taki a bigi makti fu gudu kondre nanga gudu organisâsi no sa meki taki a muiti fu den de fu soso.”

DATI na san wan driktoro fu wan organisâsi di e yepi pôtisma na tra kondre ben taki fu den winsi nanga den fruwakti di pôtisma abi. Fu taki en leti, den wortu fu na driktoro disi e sori krin san na a tranga winsi fu ala den sma di e pina leki bakapisi fu den rampu nanga den kruktudu na grontapu. Ala den sma disi e angri fu libi na ini wan grontapu pe trutru vrede de, èn pe den abi a dyaranti taki sani sa waka bun nanga den. Oiti so wan grontapu sa de? Wan sma  de di trutru abi a makti nanga a koni fu kenki a grontapu disi di no prati nanga leti?

A muiti di sma du fu tyari kenki kon

Furu sma pruberi fu tyari kenki kon. Fu gi wan eksempre, Florence Nightingale, wan uma di ben e libi na ini Ingrisikondre na ini a di fu 19 yarihondro, ben e gebroiki ala en ten nanga krakti fu meki taki sma sorgu gi sikiwan na wan krin fasi èn na wan lobi-ati fasi. Na ini a ten fu na uma disi, sma no ben sabi dresi nanga tra sani ete di e kiri bacteria, èn fu dati ede, a yepi di sma ben e kisi na ati-oso ben difrenti fu a yepi di sma gwenti fu kisi na ini a ten disi. „Sma di ben abi a wroko fu sorgu gi sikiwan, ben de sma di no ben kisi bun leri, den ben morsu, èn sma ben sabi den leki drunguman nanga huruman”, na so wan buku e taki. Florence Nightingale ben abi bun bakapisi di a ben pruberi fu kenki a fasi fa sma ben e sorgu gi sikiwan? Iya, a ben abi bun bakapisi. Na so a de tu taki furu sma di e broko den ede nanga trawan èn di no e denki densrefi nomo, ben abi bun bakapisi tapu furu kontren fu a libi. Iya, den ben abi bun bakapisi tapu a kontren fu a leri di sma e leri leisi nanga skrifi, skoroleri, datrayepi, a sorgu di sma e sorgu taki trawan abi wan presi fu tan, a seti di sma e seti programa fu gi trawan nyanyan, èn so moro fara. Den sani disi yepi milyunmilyun pôtisma fu abi wan moro bun libi.

Toku wi musu poti prakseri na wan sani di no bun srefisrefi: Hondrohondro sma e pina ete, leki bakapisi fu orloku, ogridu, siki, angriten, nanga tra rampu di e pasa. Wan organisâsi di e yepi sma di de na nowtu e taki: „Pôtifasi e meki taki 30.000 sma e dede ibri dei.” Srefi katibo, wan sani di furu sma pruberi fu puru na pasi na ini den hondrohondro yari di pasa, e pasa ete. Wan buku e taki: „Na ini a ten disi, a nomru fu srafu di de, bigi moro leki a nomru fu ala den sma di trawan fufuru fu Afrika na ini a ten di sma ben e abra na Atlantis Se fu bai èn fu seri srafu” (Disposable People​—New Slavery in the Global Economy).

San meki taki a muiti di sma du fu tyari kenki kon fu ala ten, no ben abi bun bakapisi? A de so nomo taki na a bigi makti di den guduwan nanga den maktiwan abi e meki taki dati de so, noso moro sani de ete?

Sani di e meki taki kenki no man kon

Soleki fa Gado Wortu e taki, dan a moro prenspari sma di e gens a muiti di libisma e du fu meki taki sani na grontapu waka na wan leti fasi trutru, na Satan Didibri. Na apostel Yohanes e taigi wi taki „heri grontapu de na ini a makti fu na ogriwan” (1 Yohanes 5:19). Fu taki en leti, nownowde, Satan „e kori sma na heri grontapu” (Openbaring 12:9). Solanga wan kaba no kon na a takru krakti di a abi tapu sma, sma sa tan ondrofeni ogridu nanga kruktudu. Fa a sari situwâsi disi du kon?

Wi fosi papa nanga mama, Adam nanga Eva, ben kisi wan grontapu di ben meki fu tron wan volmaakti paradijs tanpresi gi a heri libisma famiri, iya, a grontapu dati ben de „heri bun” (Genesis 1:31). Fa a du kon taki sani kenki? Na Satan du dati. A krutu a reti di Yehovah abi fu poti wet gi uma nanga man fu sori den fa den musu libi. A ben wani meki sma denki taki a fasi fa Gado e tiri, no bun. A ben man kori Adam nanga Eva fu go libi wan libi sondro Gado, so taki den ben kan bosroiti gi densrefi san bun èn san ogri (Genesis 3:1-6). A sani disi meki taki wan tra problema opo kon di ben e gens a muiti di libisma du fu tyari wan grontapu kon pe sani e waka na wan leti fasi, èn dati na sondu nanga onvolmaaktifasi.​—Romesma 5:12.

 Fu san ede Gado gi pasi taki dati pasa?

Son sma ben kan aksi: ’Ma fu san ede Gado gi pasi taki sondu nanga onvolmaaktifasi kon de?’ Fu san ede a no gebroiki a bun bigi makti fu en fu puru den opruruman na pasi, èn fu san ede a no meki tu nyun libisma?’ A gersi leki dati ben o de wan makriki fasi fu lusu a problema. Ma a fasi fa sma gwenti gebroiki a makti fu den, e meki taki seryusu aksi e opo kon. Wan fu den prenspari sani di e meki taki den pôtiwan nanga den wan di e kisi kwinsi na grontapu, e pina, na fu di sma no e gebroiki a makti fu den na wan yoisti fasi, a no so? Ma te wan ogri-ati tiriman e gebroiki a makti fu en fu puru iniwan sma na pasi di no e agri nanga a fasi fa a e tiri, dan dati e meki taki sma e bigin tweifri, a no so?

Fu di Gado wani gi reti-ati sma a dyaranti taki En a no wan sma di e gebroiki a makti fu en na wan ogri-ati fasi, meki a bosroiti fu gi pasi taki Satan nanga den libisma di opo densrefi teige en, e libi soleki fa densrefi wani, sondro fu hori densrefi na den wet nanga den gronprakseri fu Gado. Ma dati ben o de fu wan syatu pisi ten nomo. A ten ben o sori taki a fasi fa Gado e tiri na a wan-enkri bun fasi. A ten ben o sori taki iniwan wet di Gado poti gi wi, na fu wi eigi bun. Fu taki en leti, den takru bakapisi fu na opo di sma opo densrefi teige a tiri fu Gado, sori kaba taki te Gado poti wet gi wi, dan dati de fu wi eigi bun. Den sori tu taki Gado abi ala reti fu gebroiki a bigi makti fu en fu puru ogridu na grontapu, te a wani dati. Dati o pasa heri esi.​—Genesis 18:23-32; Deuteronomium 32:4; Psalm 37:9, 10, 38.

Solanga Gado no handri, wi fasi na ini wan sistema pe sani no e waka na wan leti fasi, iya, wi e ’geme èn wi alamala abi pen’ (Romesma 8:22). Awansi san wi e du fu tyari kenki kon, wi no man puru Satan na pasi, èn wi no man puru onvolmaaktifasi dorodoro, a sani di de a rutu fu ala a pina di wi e ondrofeni. Soleki fa wi e si, dan wi no man tyari wan kaba kon na a krakti di a sondu di wi kisi fu Adam abi na wi tapu.​—Psalm 49:7-9.

Yesus Krestes sa tyari wan kaba kon fu ala ten

A sani disi wani taki dati noiti wan kenki sa kon na ini a situwâsi disi? Kwetikweti. Wan sma di makti omeni tron moro leki libisma di man dede, kisi a frantwortu fu tyari wan kenki kon fu ala ten. Suma na a sma dati? A sma dati na Yesus Krestes. Bijbel e taki dati en na a Moro Prenspari Fesiman fu Gado di o frulusu a libisma famiri.​—Tori fu den Apostel 5:31.

Nownowde a e wakti teleki Gado en „reti ten doro”, so taki a kan handri (Openbaring 11:18). San a o du? A o sorgu taki „ala sani meki kon bun baka, soleki fa Gado ben taki nanga yepi fu den santa profeiti fu en fu owruten” (Tori fu den Apostel 3:21). Fu gi wan eksempre, Yesus o „ frulusu a pôtiwan di e bari fu kisi yepi, sosrefi a sma di e kisi kwinsi èn ibri sma di no abi yepiman. . . . Fu kwinsi èn fu ogri di e du nanga tranga a sa frulusu a sili fu den” (Psalm 72:12-16). Nanga yepi fu Yesus Krestes, Gado e pramisi wi taki a o meki „feti kon na wan kaba te na a moro farawe presi fu grontapu” (Psalm 46:9). „Nowan sma di e libi drape sa taki: ’Mi e siki’”, na so a e pramisi. Den breniwan, den dofuwan, den malengriwan, iya, ala den sma di e siki, sa kon betre baka èn den sa de gosontu dorodoro (Yesaya 33:24; 35:5, 6; Openbaring 21:3, 4). Srefi den wan di dede na ini den hondrohondro yari di pasa, sa kisi wini fu a pramisi disi. A e pramisi fu gi wan opobaka na den wan di dede leki bakapisi fu kruktudu nanga kwinsi.​—Yohanes 5:28, 29.

Yesus Krestes no sa tyari wan afu-afu kenki kon di de fu wan pisi ten nomo. A sa puru ala sani na pasi di e meki taki grontapu no prati nanga leti trutru. A sa tyari wan kaba kon na sondu nanga onvolmaaktifasi, èn a sa pori Satan Didibri èn sosrefi ala den wan di e opo densrefi teige Gado, neleki en (Openbaring 19:19, 20; 20:1-3, 10). A sari nanga a pina di Gado gi pasi fu de fu wan syatu pisi ten, „no sa opo kon wan di fu tu tron” (Nahum 1:9). Na disi Yesus ben abi na prakseri di a leri wi fu begi taki Gado en Kownukondre kon èn taki Gado en wani pasa „na grontapu soleki fa a e pasa na hemel”.​—Mateyus 6:10.

Kande yu o taki: ’Iya, ma a no Yesus srefi ben taki dati ’den pôtisma sa de nanga wi ala ten? A sani dati no wani taki dati ala ten kruktudu nanga pôtifasi sa de?’ (Mateyus 26:11) Iya, a tru taki Yesus ben taki dati pôtisma ben o de ala ten. Ma te yu e luku san Yesus ben taki, makandra nanga den pramisi di Gado Wortu e gi, dan wi e si taki  Yesus ben e sori taki pôtisma ben o de ala ten, solanga a disiten sistema de. A ben sabi taki nowan libisma ben o man puru pôtifasi nanga kruktudu oiti na grontapu. A ben sabi tu taki a ben o tyari wan kaba kon na ala den sani dati. Heri esi a sa tyari wan heri nyun sistema kon, iya, „wan nyun hemel nanga wan nyun grontapu” pe pen, siki, pôtifasi, nanga dede no sa de moro.​—2 Petrus 3:13; Openbaring 21:1.

„No frigiti fu du bun”

A sani disi wani taki dati awansi san wi e du fu yepi tra sma, den sani dati sa de fu soso? Kwetikweti. Bijbel e gi wi deki-ati fu yepi trawan te tesi nanga banawtu e miti den. „No tapu yusrefi fu du bun gi den wan di abi yepi fanowdu, efu a de so taki yu anu abi a makti fu du dati”, na so Kownu Salomo fu owruten e skrifi (Odo 3:27). Na apostel Paulus e taki: „No frigiti fu du bun èn fu prati sani nanga trawan.”​—Hebrewsma 13:16.

Yesus Krestes srefi ben gi wi deki-ati fu du ala san wi man fu yepi trawan. A ben fruteri na agersitori fu wan Samariasma di ben miti wan man di sma ben fon èn di den ben fufuru sani fu en. Yesus ben taki dati a Samariaman ben „firi sari” gi a man dati èn fu dati ede a Samariaman gebroiki en eigi sani fu tai den soro fu a man di sma ben fon, èn a yepi en sosrefi fu kon betre baka (Lukas 10:29-37). A Samariaman dati di ben sori lobi-ati fasi, no ben kenki grontapu, ma a sani di a du ben de wan bigi yepi gi wan tra sma. Wi kan du dati tu.

Ma boiti taki Yesus Krestes kan yepi sma, a kan du moro ete. A kan tyari kenki kon trutru, èn heri esi a sa du dati tu. Te a du dati, dan den sma di e pina leki bakapisi fu a kruktudu di de na ini a ten disi, sa man abi wan moro bun libi, èn den sa abi trutru vrede èn sosrefi a dyaranti taki sani sa waka bun nanga den.​—Psalm 4:8; 37:10, 11.

Aladi wi e wakti den sani dati fu pasa, meki wi no draidrai noiti fu du iniwan sani di wi man fu gi sma a yepi di den abi fanowdu na yeye fasi èn na materia sei. Iya, meki wi „du san bun” gi ala den sma di e pina fu di den e libi na ini wan grontapu di no prati nanga leti.​—Galasiasma 6:10.

[Prenki na tapu bladzijde 5]

Florence Nightingale tyari bigi kenki kon fu ala ten na ini a fasi fa sma e dresi sikiwan

[Sma di abi a reti fu a prenki]

Courtesy National Library of Medicine

[Prenki na tapu bladzijde 7]

Den bakaman fu Krestes e du bun gi trawan

[Sma di abi a reti fu a prenki na tapu bladzijde 4]

The Star, Johannesburg, S.A.