Yehovah na wi Skapuman

„Yehovah na mi Skapuman. Mi no sa mankeri noti.”​—PSALM 23:1.

1-3. Fu san ede a no musu fruwondru wi taki David ben agersi Yehovah nanga wan skapuman?

EFU wan sma ben o aksi yu fu fruteri na sortu fasi Yehovah e sorgu gi a pipel fu en, dan san yu ben o taki? Sortu agersitori yu ben o gebroiki fu sori fa a e sorgu gi den getrow futuboi fu en na wan lobi-ati fasi? Moro leki 3000 yari pasa, Kownu David di ben de wan psalm skrifiman, skrifi wan moi sani fu Yehovah. David ben gebroiki wan agersitori di abi fu du nanga a wroko di a ben du fosi.

² Di David ben de wan yonguman, a ben de wan skapuman, èn fu dati ede a ben sabi fa fu sorgu skapu. A ben sabi heri bun taki efu skapu no abi wan sma di e luku den, dan a kan pasa makriki taki den e lasi èn taki sma e fufuru den, noso taki ogri meti e kiri den (1 Samuel 17:34-36). Efu den skapu no abi wan skapuman di e sorgu den, dan den no sa man feni wei pe den kan nyan grasi. Di David kon moro owru, dan a no de fu taki dati a ben prisiri te a ben e prakseri a ten di a ben de nanga den skapu èn fa a ben e tiri den, e kibri den, èn e gi den nyanyan.

³ A no musu fruwondru wi, taki di Yehovah ben meki David skrifi fa A e sorgu a pipel fu en, dan David ben e prakseri a wroko fu wan skapuman. Psalm 23 di David skrifi, e bigin nanga den wortu: „Yehovah na mi Skapuman. Mi no sa mankeri noti.” Kon meki wi luku fu san ede den wortu disi e fiti. Te wi o luku Psalm 23, dan wi o si na sortu fasi Yehovah e sorgu gi den anbegiman fu en, soleki fa wan skapuman e sorgu gi den skapu fu en.​—1 Petrus 2:25.

Wan agersitori di fiti

4, 5. Fa skapu de, soleki fa Bijbel e sori?

⁴ Na ini Bijbel, Yehovah abi furu nen, ma „Skapuman” na wan fu den nen di e sori na a moro moi fasi taki Gado abi safu-ati (Psalm 80:1). Fu man frustan moro bun fu san ede a fiti fu kari Yehovah wan Skapuman, dan a bun fu sabi tu sani: a fosi sani abi fu du nanga a fasi fa skapu de, èn a di fu tu sani abi fu du nanga a wroko nanga den fasi fu wan bun skapuman.

⁵ Nofo tron, te Bijbel e taki fu a fasi fa skapu de, dan a e sori taki den skapu de klariklari fu arki a skapuman te a sori taki a lobi den (2 Samuel 12:3). Bijbel e sori tu taki skapu no e du trawan ogri (Yesaya 53:7), èn taki den no man feti gi densrefi (Mika 5:8). Wan skrifiman di kweki skapu furu yari langa, ben skrifi: „Skapu no man sorgu gi densrefi kwetikweti, soleki fa son sma e denki kande. Moro leki iniwan meti di sma gwenti kweki, skapu abi wan sma fanowdu di musu luku den doronomo èn di musu sorgu den bun.” Fu  tan na libi, den meti disi abi wan skapuman fanowdu di e sorgu den, fu di den no man yepi densrefi.​—Esekièl 34:5.

6. Fa wan buku di e tyari wortu fu Bijbel kon na krin, e sori fa wan dei fu wan skapuman fu owruten ben e waka?

⁶ Fa wan dei fu wan skapuman fu owruten ben e waka? Wan buku di e tyari wortu fu Bijbel kon na krin, e taki: „Fruku mamanten kaba, a ben e opo a skapupen fu meki den skapu go na doro, dan a ben e waka na den fesi fu tyari den go na a wei fu nyan grasi. Drape a ben e luku den heri dei, èn a ben e sorgu taki nowan fu den skapu go lasi; efu a ben pasa wan leisi taki a skapuman lasi wan fu den skapu na ai so taki a skapu waka gowe fu na ipi, dan a ben e du ala muiti fu suku a skapu teleki a feni en èn a ben tyari en kon baka na a ipi. . . . Te neti a ben e tyari na ipi kon baka na a skapupen, èn a ben e teri den te den ben e pasa na ondro a tiki di a ben hori na a doro, so taki a ben kan de seiker taki nowan fu den skapu ben e misi. . . . Nofo tron, a ben abi fu hori wakti na a ipi heri neti, so taki ogri meti no ben kan du noti nanga den skapu, noso so taki fufuruman no ben kan gebroiki triki fu pruberi fu kisi den.” *

7. Fu san ede a ben de so taki son leisi wan skapuman ben musu abi furu pasensi nanga safu-ati?

⁷ Ten ben de taki a skapuman ben musu abi furu pasensi nanga den skapu èn taki a ben musu sori den furu safu-ati; spesrutu te a ben abi pikin skapu, nanga uma-skapu di ben de nanga bere, dan a ben musu abi a pasensi nanga a sari-ati disi (Genesis 33:13). Wan buku di abi fu du nanga Bijbel, e fruteri: „Te wan skapu musu kisi wan pikin, dan a no e du dati krosibei fu na ipi, ma farawe na tapu wan bergi. Fu di a mama no man yepi ensrefi na a pisi ten dati, meki a skapuman e du ala san a man fu gi a mama kibri, èn a e opo a pikin skapu, tyari en go na a skapupen. Wan tu dei langa, a sa opo a pikin skapu noso poti en na ini den ploi fu en dyakti, teleki a pikin skapu man waka ensrefi” (Yesaya 40:10, 11). A de krin taki wan bun skapuman ben musu tranga èn taki a ben musu abi safu-ati.

8. Sortu sani David e kari fu sori fu san ede a e frutrow tapu Yehovah?

⁸ „Yehovah na mi Skapuman.” A no wan moi fasi fu taki fu wi hemel Tata? Te wi e go luku Psalm 23, dan wi o si fa Gado e sorgu wi nanga a krakti èn nanga safu-ati fu wan skapuman. Na ini vers 1, David e sori taki a abi a frutrow taki Gado o gi den skapu fu En ala sani di den abi fanowdu, so taki den ’no sa mankeri noti’. Na ini den tra vers, David e kari dri sani di e sori fu san ede a abi a frutrow disi: Yehovah e tyari den skapu fu En, a e kibri den, èn a e gi den nyanyan. Kon meki wi taki fu ibriwan fu den sani disi.

„A e tyari mi”

9. Fu sortu situwâsi di e sori taki nowan sani e trobi den skapu, David e taki? Fa skapu ben sa kan kon na ini so wan situwâsi?

⁹ Na a fosi presi, a de so taki Yehovah e tyari a pipel fu en. David e skrifi: „Na ini wei di furu nanga grasi a e meki mi didon; na presi fu rostu pe furu watra e lon, a e tyari mi go. A e meki mi sili kisi krakti baka. A e tyari mi na tapu den pasi fu regtfardikifasi fu en nen ede” (Psalm 23:2, 3). David e taki fu skapu di e didon na mindri furu grasi, èn nowan sani e trobi den. Dyaso a e taki fu wan situwâsi di e sori taki den skapu de tevrede, taki den e kisi krakti baka, èn taki den no e frede fu di den e kisi kibri. A Hebrew wortu di vertaal nanga „wei”, kan abi fu du nanga wan „switi presi”. Efu skapu ben sa musu sorgu gi densrefi, dan kande den no ben o feni wan switi presi fu didon sondro taki wan sani trobi den. A skapuman fu den musu tyari den go na so wan „switi presi”.

10. Fa Gado e sori taki a e frutrow wi?

¹⁰ Fa Yehovah e tyari wi na ini a ten disi? Wan fasi fa a e du disi, na taki a e gi wi na eksempre. En Wortu e gi wi deki-ati fu „waka baka na eksempre fu Gado” (Efeisesma 5:1). Den tekst di e kon fosi èn na baka a wan disi e taki fa wi musu sori sari-ati, fa wi musu gi makandra pardon, èn fa wi musu sori lobi (Efeisesma 4:32; 5:2). Fu tru, Yehovah de a moro bun eksempre di e sori wi fa fu abi den moi fasi disi. A e fruwakti tumusi furu fu wi, te a aksi wi fu waka baka na eksempre fu en?  Nôno. Te yu luku en bun, dan a rai disi di a meki sma skrifi nanga yepi fu santa yeye, e sori na wan heri moi fasi taki a e frutrow wi. Fa so? Gado meki wi na a prenki fu en, so taki wi man tyari wisrefi na wan fasi di fiti èn so taki wi kan frustan sani di abi fu du nanga Gado (Genesis 1:26). Fu dati ede, Yehovah sabi taki aladi wi na sondusma, toku wi man leri fu abi den srefi fasi leki en. Prakseri nomo, wi lobi-ati Gado abi a frutrow taki wi kan de leki en. Efu wi e waka baka na eksempre fu en, dan na wan agersi fasi, a sa tyari wi go na wan switi presi „fu rostu”. Na ini a grontapu disi pe sma e du soso ogri-ati sani, wi o „tan na ini seikerfasi”, èn wi o firi bun fu di wi sabi taki Gado feni wi bun.​—Psalm 4:8; 29:11.

11. Sortu sani Yehovah e hori na prakseri te a e tyari den skapu fu en, èn fa disi de fu si na den sani di a e aksi fu wi?

¹¹ Te Yehovah e tyari wi, dan a e du dati na wan safu-ati fasi èn nanga pasensi. Wan skapuman e hori na prakseri taki den skapu fu en no man du ala sani, èn fu dati ede te a e tyari den, a e fiti ensrefi ’na a fasi fa den meti man waka’ (Genesis 33:14). Na so a de tu, taki te Yehovah e tyari den skapu fu en, dan a e fiti ensrefi ’na a fasi fa den man waka’. A e hori na prakseri san wi man du èn san wi no man du, èn a luku tu na ini sortu situwâsi wi de. Fu taki en leti, a e fiti ensrefi na a fasi fa wi man waka, èn noiti a e aksi moro fu wi leki san wi man gi. San a e aksi fu wi, na taki wi e dini en nanga wi heri ati (Kolosesma 3:23). Ma fa a de te yu kon owru kaba èn yu no man du moro san yu ben gwenti du fosi? Noso fa a de te wan seryusu siki meki taki yu no man du ala sani moro? Spesrutu na ini den sortu situwâsi disi, a de wan moi sani taki wi kan dini Gado nanga wi heri ati. Nowan sma de a srefi. Fu dini Gado nanga yu heri ati wani taki dati yu e gebroiki ala yu krakti so bun leki yu man na ini a diniwroko fu en. Aladi swakifasi kan meki taki wi no man du so furu moro, toku Yehovah e warderi en taki wi e anbegi en nanga wi heri ati.​—Markus 12:29, 30.

12. Sortu eksempre na ini a Wet fu Moses e sori taki te Yehovah e tyari den skapu fu en, dan a e fiti ensrefi ’na a fasi fa den man waka’?

¹² Eksempre di e sori taki te Yehovah tyari den skapu fu en, dan a e fiti ensrefi ’na a fasi fa den man waka’. Luku san a Wet fu Moses e taki fu wan tu sondu-ofrandi di sma ben musu tyari. Yehovah ben wani taki sma ben musu tyari bun ofrandi gi en fu sori taki den ben de nanga tangi. Ma a ben de so tu taki sma ben kan gi ofrandi soleki fa den ben man. A wet ben taki: „Efu a no abi a moni fu bai wan skapu, dan a musu tyari tu stondoifi noso tu yongu doifi kon.” Ma efu a no ben man pai gi tu doifi srefi? Dan a ben kan tyari pikinso „fini blon” kon (Lefitikus 5:7, 11). Disi e sori taki Gado no ben aksi wan sma fu tyari wan ofrandi di a no ben man pai. Fu di Gado no e kenki, meki wi kan kisi trowstu, bika wi sabi taki noiti a e aksi moro leki san wi man gi. Na presi fu dati, a e prisiri fu teki iniwan sani di wi man gi en (Maleaki 3:6). A de wan prisiri sani taki a Skapuman disi di e tyari wi, e frustan wi trutru!

„Mi no e frede nowan ogri, bika yu de nanga mi”

13. Fa David e taki nanga moro firi na ini Psalm 23:4, èn fu san ede disi no musu fruwondru wi?

¹³ David e sori san na wan di fu tu sani fu san ede a e frutrow tapu Gado: Yehovah e kibri den skapu fu en. Wi e leisi: „Awansi mi e waka na ini  a lagi presi pe furu dungru de, toku mi no e frede nowan ogri, bika yu de nanga mi; yu tiki nanga yu tiritiki, na den sani di e trowstu mi” (Psalm 23:4). Na ini den tra vers David ben e gebroiki a wortu „a” te a ben e taki fu Yehovah. Ma now a e taki nanga moro firi fu di a e gebroiki a wortu „yu”. Disi no musu fruwondru wi, fu di David e sori fa Gado ben yepi en fu horidoro te a ben kisi fu du nanga feanti. Na wan agersi fasi David waka na ini furu dungru lagipresi, sobun furu momenti ben de pe a ben kan lasi en libi. Ma David no ben meki frede basi en, fu di a ben si taki Gado ben de klariklari fu gebroiki En „tiki” fu gi en kibri. Fu di David ben sabi taki Gado ben kibri en na a fasi disi, meki a ben kisi trowstu èn a no de fu taki dati a ben kisi wan moro tranga banti nanga Yehovah. *

14. Sortu dyaranti Bijbel e gi wi taki Yehovah sa kibri wi, ma san disi no wani taki?

¹⁴ Fa Yehovah e gi den skapu fu en kibri na ini a ten disi? Bijbel e gi wi a dyaranti taki nowan gensman, awansi a de wan ogri yeye noso wan libisma, sa man kiri ala den skapu fu en na grontapu. Noiti Yehovah no sa gi pasi taki disi pasa (Yesaya 54:17; 2 Petrus 2:9). Ma disi no wani taki dati a Skapuman fu wi sa kibri wi gi ibri rampu. Wi e kisi fu du nanga den problema di libisma gwenti kisi, èn fu di sma e gens ala tru Kresten, meki den e gens wi tu (2 Timoteyus 3:12; Yakobus 1:2). Son leisi a kan pasa taki na agersi fasi wi „e waka na ini a lagipresi pe furu dungru de”. Fu eksempre, frufolgu noso wan hebi siki kan meki taki pikinmoro wi lasi wi libi. Noso a kan taki pikinmoro wan lobiwan fu wi lasi libi, noso kande a e dede trutru. A ten dati kan gersi a moro dungru pisi ten na ini wi libi, ma wi Skapuman de nanga wi, èn a sa kibri wi. Fa a sa du dati?

15, 16. (a) Na sortu fasi Yehovah e yepi wi fu kakafutu gi problema di kan miti wi? (b) Fruteri wan ondrofenitori di e sori fa Yehovah e yepi wi te wi e kisi tesi.

¹⁵ Yehovah no e pramisi taki a sa du wondru fu yepi wi. * Ma wi kan de seiker fu a sani disi: Yehovah sa yepi wi fu kakafutu gi iniwan problema di sa miti wi. A kan gi wi a koni fu kakafutu gi den ’difrenti tesi di e miti wi’ (Yakobus 1:2-5). Wan skapuman no e gebroiki en tiki nomo fu yagi ogri meti di wani nyan den skapu fu en, ma a e gebroiki a tiki fu en tu fu pusu den skapu fu en safri go na a yoisti sei. Yehovah kan gebroiki wan Kresten brada noso sisa fu ’pusu wi safri’, noso fu gi wi deki-ati fu waka baka a rai di skrifi na ini Bijbel. Disi kan yepi wi trutru te wi de na ini wan muilek situwâsi. Boiti dati, Yehovah kan gi wi krakti fu horidoro (Filipisma 4:13). Nanga yepi fu en santa yeye, a kan gi wi a „krakti di bigi pasa marki” (2 Korentesma 4:7). A yeye fu Gado kan yepi wi fu kakafutu gi iniwan tesi di Satan ben sa wani tyari kon na wi tapu (1 Korentesma 10:13). A no de wan trowstu fu sabi taki Yehovah de klariklari ala ten fu yepi wi?

¹⁶ Iya, awansi wi de na dungru, wi no abi fu waka pasa na ini a dungru disi wi wawan. Wi Skapuman de nanga wi, èn a e yepi wi na fasi di kande wi no ben e si so krin biginbigin. Luku na ondrofenitori fu wan Kresten owruman di ben kisi fu yere fu datra taki wan kundu ben e gro na ini en ede-tonton di ben kan kiri en. „Mi musu taki, dati di mi yere a sani disi, mi aksi misrefi efu Yehovah ben mandi na mi tapu noso srefi efu a ben lobi mi. Ma mi ben teki a bosroiti fu no drai baka gi Yehovah. Na presi fu dati, mi taki nanga en fu den sani di ben e moro mi. Yehovah yepi mi trutru, èn nofo tron a ben gebroiki den Kresten brada nanga sisa fu mi fu trowstu mi. Furu fu den sori mi sani di ben kan yepi mi fu di densrefi ben ondrofeni so wan sani tu di den kisi fu du nanga wan seryusu siki. Den moi sani di den ben taigi mi, ben memre mi taki a no mi wawan e kisi fu du nanga den sortu sani disi. Den ben yepi mi te dati ben de fanowdu, èn son leisi den ben sori mi na wan switifasi taki den ben wani horibaka gi mi, wan sani di ben naki mi ati trutru. Disi ben gi mi a firi taki Yehovah ben lobi mi ete. A no de fu taki, dati mi musu tan feti nanga a siki fu mi, èn mi no sabi fa sani o waka gi mi. Ma mi sabi seiker  taki Yehovah de nanga mi èn taki a sa tan yepi mi fu kakafutu gi a tesi disi.”

„Yu seti wan tafra gi mi”

17. San David e taki fu Yehovah na ini Psalm 23:5, èn fu san ede disi e kruderi heri bun nanga na agersitori fu wan skapuman?

¹⁷ Now David e taki fu wan di fu dri sani fu san ede a e frutrow tapu en Skapuman: Yehovah e gi den skapu fu en nyanyan, èn a e gi den a nyanyan disi bogobogo. David e skrifi: „Yu e seti wan tafra gi mi na fesi fu den sma di e sori feantifasi gi mi. Nanga oli yu frifi mi ede; mi beker furu srefisrefi” (Psalm 23:5). Na ini a vers disi, David e taki dati a Skapuman fu en de wan sma di lobi fu gi trawan nyanyan nanga dringi bogobogo. Den tu agersitori, a wan fu wan skapuman di e sorgu gi den skapu fu en èn a trawan fu wan sma di lobi fu gi trawan sani bogobogo, e kruderi heri bun nanga makandra. Iya, wan bun skapuman musu sabi pe a man feni wei di abi furu grasi èn pe a kan feni watra fu den skapu fu en man dringi, so taki „den no sa mankeri noti”.​—Psalm 23:1, 2.

18. San e sori wi taki Yehovah na wan sma di lobi fu gi trawan sani bogobogo?

¹⁸ A de so taki a Skapuman fu wi na wan sma tu di lobi fu gi trawan sani bogobogo? Wi kan de seiker taki a de so wan sma! Prakseri nomo fu a yeye nyanyan di wi e kisi now: a bun, a furu, èn wi e kisi difrenti sortu nyanyan. Yehovah e gebroiki a getrow èn koni srafu fu gi wi buku nanga tijdschrift di musu yepi wi, èn a seti gemeente konmakandra, bigi konmakandra, nanga kongres gi wi pe wi kan leri furu sani. Ala den sani disi e gi wi san wi abi fanowdu na yeye fasi (Mateyus 24:45-47). Iya, yeye nyanyan de bogobogo. „A getrow èn koni srafu” meki milyunmilyun Bijbel nanga buku di e yepi wi fu studeri Bijbel, èn den sortu publikâsi disi de now na ini 413 tongo. Yehovah gi wi difrenti sortu yeye nyanyan, iya, a gi wi „merki”, namku den fosi sani di wi ben leri na ini Bijbel, ma a gi wi „tranga nyanyan” tu, namku den moro dipi tori di de fu feni na ini Bijbel (Hebrewsma 5:11-14). A bakapisi de taki te wi e kisi fu du nanga problema noso te wi musu teki bosroiti, dan nofo tron wi kan feni soifri san wi abi fanowdu. San ben o pasa nanga wi efu wi no ben abi a yeye nyanyan disi? Fu tru, a Skapuman fu wi na wan sma di lobi fu gi trawan sani bogobogo!​—Yesaya 25:6; 65:13.

„Mi sa tan na ini na oso fu Yehovah”

19, 20. (a) Fa David e sori na ini Psalm 23:6 taki a abi frutrow, èn fa wi kan abi a srefi frutrow dati? (b) Fu sortu sani wi o taki na ini a tra artikel?

¹⁹ Baka di David prakseri dipi fu a fasi fa en Skapuman de, a Sma di e sorgu en, dan a e taki: „Fu tru, soso bun-ati nanga lobi bun-ati sa waka na mi baka ala den dei fu mi libi; èn mi sa tan na ini na oso fu Yehovah fu ala ten” (Psalm 23:6). David e taki disi fu di en ati furu nanga tangi èn nanga bribi: en ati furu nanga tangi te a e prakseri a ten di pasa èn a furu nanga bribi sosrefi te a e prakseri a ten di e kon. David di ben de wan skapuman fosi, no e frede fu di a sabi taki solanga a e tan krosibei na en hemel Skapuman, a de neleki a e tan na ini En oso. Na so fasi Yehovah sa tan sorgu en na wan lobi-ati fasi ala ten.

²⁰ Wi de nanga tangi trutru taki den moi wortu disi skrifi na ini Psalm 23! David no ben kan feni wan moro moi fasi fu sori fa Yehovah e tiri den skapu fu en, fa a e gi den kibri èn fa a e gi den nyanyan. Den moi wortu fu David skrifi na ini Bijbel so taki wi abi a dyaranti taki wi sosrefi kan poti wi frutrow tapu Yehovah leki wi Skapuman. Iya, solanga wi e tan krosibei na Yehovah, a sa sorgu gi wi leki wan lobi-ati Skapuman „fu ala ten”, iya, fu têgo. Ma wi leki skapu fu en, abi a frantwortu fu waka nanga wi bigi Skapuman, Yehovah. Na ini a tra artikel wi o luku san disi wani taki.

[Futuwortu]

Yu e memre disi ete?

• Fu san ede a fiti taki David ben agersi Yehovah nanga wan skapuman?

• Fa Yehovah e sori taki a e frustan wi te a e tyari wi?

• Na sortu fasi Yehovah e yepi wi fu horidoro te wi e kisi tesi?

• San e sori wi taki Yehovah na wan sma di lobi fu gi trawan sani bogobogo?

[Aksi fu a tori disi]

[Prenki na tapu bladzijde 18]

Neleki fa wan skapuman fu Israel ben e tyari den skapu fu en, na so Yehovah e tyari den skapu fu en tu