Yu sa waka nanga Gado?
Yu sa waka nanga Gado?
„Sori sakafasi te yu e waka nanga yu Gado.”—MIKA 6:8.
1, 2. Fa wi kan agersi den firi di Yehovah abi gi wi, nanga den firi di papa noso mama abi te den e leri a pikin fu den fu waka?
WAN beibi e tanapu na tapu en futu, èn a e degedege. A e langa en anu go na en papa, noso na en mama èn a e bigin waka fu a fosi leisi. Kande a gersi wan pikin sani, ma gi a mama nanga papa, a de wan tumusi prenspari momenti fu di den e prakseri a moi tamara fu a pikin. A papa nanga mama no man wakti a ten te den o hori a pikin fu den na en anu, èn te den o waka makandra nanga en. Den e howpu taki den o man gi a pikin tiri èn taki den o man horibaka gi en na furu fasi, srefi te a kon bigi kaba.
2 Yehovah Gado abi den srefi firi gi den pikin fu en na grontapu. Wan leisi a ben taki fu en pipel Israel, noso Efraim: „Mi ben leri Efraim fu waka, èn mi ben opo den . . . Nanga den titei fu sma fu grontapu mi ben tan hari den, nanga den titei fu lobi” (Hosea 11:3, 4). Dyaso Yehovah e agersi ensrefi nanga wan lobi-ati papa di abi a pasensi fu leri en pikin fu waka, èn kande fu hori a pikin te a e fadon. Yehovah na a moro bun Papa di de, èn a e angri fu leri wi fa fu waka. A e prisiri tu fu waka na wi sei te wi e tan meki muiti fu go na fesi. Soleki fa a tekst na a bigin fu na artikel e sori, dan wi kan waka nanga Gado! (Mika 6:8) Ma san a wani taki fu waka nanga Gado? Fu san ede wi musu du disi? Fa wi kan waka nanga en? Sortu blesi wi e kisi te wi e waka nanga Gado? Kon meki wi luku ibriwan fu den fo aksi disi.
San a wani taki fu waka nanga Gado?
3, 4. (a) San na wan tumusi moi fasi fa Bijbel e sori taki libisma e waka nanga Gado? (b) San a wani taki fu waka nanga Gado?
3 A no de fu taki dati libisma no man waka nanga Yehovah trutru, bika a de wan yeye (Exodus 33:20; Yohanes 4:24). Sobun, te Bijbel e taki dati libisma e waka nanga Gado, dan a e taki fu disi na wan agersi fasi. A fasi fa Bijbel e agersi a tori disi, moi srefisrefi fu di ala sma man frustan en, awinsi fu sortu kondre den komopo noso sortu kulturu den abi, noso srefi awinsi na ini sortu ten den ben e libi. Iya, na ala presi noso na ini ala pisi ten, sma ben o man frustan te yu ben o taki dati wan sma e waka nanga wan trawan. Yu no feni taki Bijbel e sori wi na wan moi fasi taki sma kan abi switifasi gi makandra èn taki den kan abi wan tranga banti nanga makandra? Den firi disi e meki wi kon frustan pikinso san a wani taki fu waka nanga Gado. Ma kon meki wi luku a tori moro fini.
4 Memre den getrow man Heinok nanga Noa. Fu san ede Bijbel e taki dati den ben e waka nanga Gado? (Genesis 5:24; 6:9) Te Bijbel e gebroiki a wortu „waka”, dan nofo tron a abi fu du nanga wan spesrutu fasi fa wan sma e tyari ensrefi. Heinok nanga Noa ben teki a bosroiti fu libi na wan fasi di ben sori taki den ben e du a wani fu Yehovah Gado. Den ben de tra fasi leki den sma na den lontu, fu di den ben si Yehovah leki a sma di ben e tyari den èn den ben gi yesi na a tiri di a ben e gi den. Den ben e frutrow tapu Yehovah. Disi wani taki dati na Yehovah ben e teki bosroiti gi den? Nôno. Yehovah gi libisma wan fri wani. A wani taki wi musu gebroiki a fri wani dati èn taki wi musu gebroiki wi „frustan” tu (Romesma 12:1). Ma te wi e teki bosroiti, dan wi musu sori sakafasi èn wi musu meki Yehovah tiri a frustan fu wi, bika a koni moro wi (Odo 3:5, 6; Yesaya 55:8, 9). Sobun, wi heri libi wi kan sori taki wi e waka krosibei fu Yehovah.
5. Fu san ede Yesus ben taki dati wan sma ben sa wani meki en libi kon pikinso [noso, sowan afu meter] moro langa?
5 Nofo tron Bijbel e agersi a libi, nanga a waka di wan sma e teki fu go na wan farawe kondre. Son leisi, wi kan si wantewante te Bijbel e gebroiki na agersitori disi, ma tra leisi baka wi no man si en so krin. Fu eksempre, Yesus ben taki: „Suma fu unu di e broko en ede nanga sani, kan meki en libi kon pikinso [noso, sowan afu meter] moro langa?” (Mateyus 6:27) Fu san ede Yesus ben e taki dati wan sma ben sa wani meki en „libi kon pikinso [noso, sowan afu meter] moro langa”? * Nofo tron wan sma e gebroiki a wortu ’meter’ fu marki o langa, noso o fara wan sani de, ma te a wani marki en libi, dan a e gebroiki den wortu ’mun’, noso ’yari’. Soleki fa a sori, dan Yesus ben e agersi a libi nanga wan waka di wan sma e teki fu go na wan farawe presi. Fu taki en leti, a ben e leri taki te yu e broko yu ede nanga sani, dan dati no sa yepi yu kwetikweti fu meki yu libi kon pikinso moro langa. Ma wi musu denki dan, taki wi no man bosroiti srefi o langa wi wani waka nanga Gado? Kwetikweti! A sani disi e meki taki wi musu go luku a di fu tu aksi: Fu san ede wi musu waka nanga Gado?
Fu san ede wi musu waka nanga Gado?
6, 7. San sondu libisma abi tranga fanowdu, èn fu san ede a bun fu suku a tiri fu Yehovah efu wi wani kisi san wi abi fanowdu?
6 Wán sani fu san ede wi musu waka nanga Yehovah Gado, e kon na krin na ini Yeremia 10:23: „Mi sabi heri bun o Yehovah, taki a no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu.” Sobun, wi libisma no man taki fa wi libi sa waka, èn wi no abi a reti tu fu du dati. A de tumusi prenspari taki wan sma e tiri wi. Den sma di poti na den ede taki den wani waka den eigi pasi sondro a tiri fu Gado, e meki a srefi fowtu di Adam nanga Eva meki. A fosi man nanga uma ben prakseri taki den ben abi a reti fu bosroiti gi densrefi san bun èn san no bun (Genesis 3:1-6). A „no de na wi” fu du disi, bika wi no abi a reti kwetikweti.
7 Yu no abi a firi taki wan sma musu tiri yu na ini a libi? Ibri dei, wi musu teki bigi nanga pikin bosroiti. Sonwan fu den na muilek bosroiti èn den kan abi krakti tapu a tamara fu wi, èn tapu a tamara fu den lobiwan fu wi. Ma prakseri nomo taki wan sma de di owru èn koni moro wi, èn a breiti fu tiri wi na wan lobi-ati fasi te wi musu teki den bosroiti disi! Na wan sari sani, taki furu sma na ini a ten disi wani frutrow na tapu den eigi koni èn taki densrefi wani taki fa den musu waka. Den no wani poti prakseri na a tru tori di skrifi na ini Odo 28:26: „A sma di e frutrow tapu en eigi ati, don, ma a sma di e waka nanga koni, na a sma di sa man lon komoto.” Yehovah wani taki wi musu wai pasi gi den ogri di kan miti wi te wi e frutrow tumusi tapu wi ati di kan kori wi (Yeremia 17:9). A wani taki wi musu waka nanga koni, èn taki wi musu frutrow na en tapu leki a koni Tyariman nanga Leriman fu wi. Te wi e du disi, dan wi sa abi wan koloku libi di e waka bun èn di e gi wi prisiri.
8. Pe ala libisma kan fruwakti fu go fu di den na sondu sma, ma san Yehovah wani gi wi?
8 Wan tra sani fu san ede wi musu waka nanga Gado, abi fu du nanga o fara wi wani waka. Bijbel e taki fu wan seryusu tru tori. Yu ben sa kan taki dati ala sondu libisma e waka go na a srefi presi. Te Preikiman 12:5 e fruteri san na den tesi di libisma e kisi te den e kon owru, dan a e taki: „Libisma e waka go na en oso pe a sa tan wan langa ten èn den kragiman waka lontu na tapu strati.” San na a ’oso disi pe libisma sa tan wan langa ten’? Na oso disi na a grebi, pe wi alamala kan fruwakti fu go fu di wi na sondusma èn fu di wi no de volmaakti (Romesma 6:23). Ma Yehovah wani moro gi wi leki fu libi wan syatu libi nomo, di lai nanga problema fu sensi a momenti di wi gebore teleki wi dede (Yob 14:1). Soso te wi e waka nanga Gado, wi kan abi a howpu fu waka solanga leki a ben wani taki wi musu waka, namku fu têgo. A no disi yu wani? We, dan a de krin taki yu musu waka nanga yu Tata.
Fa wi kan waka nanga Gado?
9. Fu san ede Yehovah ben e go kibri gi en pipel son leisi, ma sortu dyaranti a ben gi wi soleki fa a skrifi na ini Yesaya 30:20?
9 Wi musu poti furu prakseri na a di fu dri aksi di wi o go luku. Na aksi disi na: Fa wi kan waka nanga Gado? Wi e feni a piki na ini Yesaya 30:20, 21: „Un Gran Leriman no sa kibri ensrefi moro, èn un eigi ai musu tron ai di sa si un Gran Leriman. Èn un eigi yesi sa yere wan wortu na un baka di e taki: ’Disi na a pasi. Waka na en tapu’, efu unu musu go na un reti-anusei noso efu unu musu go na un kruktu-anusei.” A pisi disi di e gi wi deki-ati trutru. Te yu luku en bun, dan den wortu fu Yehovah di skrifi na ini vers 20, ben memre a pipel fu en taki di den opo densrefi teige en, a ben go kibri gi den (Yesaya 1:15; 59:2). Ma a tekst disi no e taki dati Yehovah go kibri, ma taki a e tanapu leti na fesi en getrow pipel. Disi e meki wi prakseri fu wan leriman di e tanapu na fesi den studenti fu en, aladi a e sori den san a wani taki den musu leri.
10. Fu san ede yu kan taki dati yu „e yere wan wortu na yu baka” di e kon fu yu Gran Leriman?
10 Vers 21 e taki fu Yehovah na wan heri tra fasi. A vers disi e taki dati Yehovah e waka na baka en pipel, èn taki a e sori den san den musu du fu waka na tapu a reti pasi. Bijbel sabiman taki dati den wortu disi kan abi fu du nanga a fasi fa wan skapuman e waka na baka den skapu fu en son leisi. Te a e du disi, dan a e bari kari den fu sori den pe den musu waka, so taki den no e go waka wan pasi di den no musu teki. San den wortu disi abi fu du nanga wi? We, te wi e suku tiri na ini Gado Wortu, dan wi e leisi wortu di sma ben skrifi dusundusun yari pasa kaba. Yu kan taki dati wi man yere fa wan sma di e tanapu na wi baka, e taki den wortu disi di ben skrifi langa ten pasa kaba. Ma toku den e fiti ete na ini a ten disi, neleki fa den ben e fiti na ini a ten di sma ben skrifi den. A rai fu Bijbel kan tiri wi ibri dei te wi musu teki bosroiti, èn a kan yepi wi fu luku fa wi wani taki a libi fu wi musu waka na ini a ten di e kon (Psalm 119:105). Te wi e meki muiti fu suku a rai dati èn wi e gebroiki en, dan wi kan taki dati Yehovah na a Sma di e tyari wi. Na so fasi wi e waka nanga Gado.
11. Sortu moi kari Yehovah ben gi a pipel fu en, soleki fa Yeremia 6:16 e sori, ma san den du?
11 Wi e meki Gado Wortu tiri wi na ini ala sani trutru? Son leisi a bun fu sidon prakseri fu sani èn fu ondrosuku wisrefi na wan opregti fasi. Luku wan vers di sa yepi wi fu du disi: „Disi na san Yehovah taki: ’Un tan tanapu na tapu den pasi èn luku; aksi sma pe den pasi fu fositen de; aksi den pe a bun pasi de, èn waka na en tapu èn feni rostu gi yu sili’” (Yeremia 6:16). Den wortu disi kan meki wi prakseri wan sma di e teki wan waka. Te a doro na wan presi pe tu pasi e miti makandra, dan a e tan tanapu fu di a wani aksi sma sortu pasi a musu teki. Na yeye fasi, yu kan taki dati Yehovah en pipel na ini Israel di ben opo densrefi teige en, ben musu du wan srefi sortu sani. Den ben musu feni „den pasi fu fositen” baka. „A bun pasi” dati, ben de a pasi pe den getrow afo fu den ben e waka na tapu fosi, ma a pipel ben teki a don bosroiti fu no waka na tapu a pasi disi moro. Na wan sari sani, taki Israel no ben wani gi yesi na a lobi-ati rai di Yehovah ben e gi den. A srefi vers e taki moro fara: „Ma den ben tan taki: ’Wi no sa waka.’” Ma na ini a ten disi, a pipel fu Gado du wan heri tra sani nanga a rai disi.
12, 13. (a) San den salfu bakaman fu Krestes du di den leisi a rai na ini Yeremia 6:16? (b) Fa wi kan ondrosuku wisrefi efu wi wani sabi fa wi libi e waka na ini a ten disi?
12 Sensi a lasti pisi fu a di fu 18 yarihondro, den salfu bakaman fu Krestes waka baka a rai fu Yeremia 6:16. Leki grupu, den na den fosiwan di bigin fu waka baka na tapu „den pasi fu fositen” nanga den heri ati. A grupu disi no ben du leki Krestenhèit di ben drai baka gi a tru bribi. Ma na wan getrow fasi den hori densrefi na ’a eksempre di e sori wi den bun sani’ soleki fa Yesus Krestes leri sma, èn di den getrow bakaman fu en ben waka na baka na ini a fosi yarihondro G.T. (2 Timoteyus 1:13). Te na a dei fu tide, den salfuwan e yepi makandra èn sosrefi den „tra skapu” di de kompe fu den, so taki den kan libi a bun èn koloku libi di Krestenhèit no ben wani.—Yohanes 10:16.
13 A getrow srafu-grupu di e sreka yeye nyanyan na a reti ten, yepi milyunmilyun sma fu feni „den pasi fu fositen” èn fu waka nanga Gado (Mateyus 24:45-47). Yu na wan fu den milyunmilyun sma disi? Efu dati de so, dan san yu kan du fu no gowe libi a pasi, èn fu no waka yu eigi pasi? A bun fu sidon prakseri wanwan leisi fa a libi fu yu e waka. Efu yu abi a gwenti fu leisi Bijbel, nanga den buku nanga tijdschrift di abi fu du nanga Bijbel, èn yu e go na den konmakandra doronomo pe yu kan teki prati na a leri di den salfuwan e gi wi na ini a ten disi, dan na so yu e leri fu waka nanga Gado. Efu yu abi sakafasi èn yu e waka baka a rai di yu e kisi, dan yu e waka nanga Gado trutru, èn na so fasi yu e waka „den pasi fu fositen”.
Waka neleki yu „e si a Sma di wi no man si nanga ai”
14. Fa den bosroiti di wi e teki, o sori taki Yehovah na wan trutru sma gi wi?
14 Efu wi wani waka nanga Yehovah, dan a musu de wan trutru sma gi wi. Memre taki Yehovah ben taigi den getrow sma fu owruten Israel taki a no ben go kibri gi den. Na ini ten disi, a e meki a pipel fu en kon sabi en tu leki a Gran Leriman. Yehovah na wan trutru sma gi yu? A de leki a e tanapu leti na yu fesi fu gi yu leri? Dati na a bribi di wi musu abi efu wi wani waka nanga Gado. Moses ben abi a bribi dati „bika a ben tan tanapu kánkan leki a ben e si a Sma di wi no man si nanga ai” (Hebrewsma 11:27). Efu Yehovah na wan trutru sma gi wi, dan wi o hori den firi fu en na prakseri te wi e teki bosroiti. Fu eksempre, efu wi du wan ogri, dan wi no ben o pruberi fu kibri den sondu fu wi gi den Kresten owruman noso gi famiriman, a no so? Nôno, wi no ben o prakseri srefi fu du so wan sani! Na presi fu dati, wi e pruberi fu waka nanga Gado, srefi te nowan libisma kan si wi. Neleki Kownu David fu owruten, wi e teki a bosroiti disi: „Mi sa waka ini a soifri retifasi fu mi ati na ini mi oso.”—Psalm 101:2.
15. Fa wi kan leri fu si Yehovah leki wan trutru sma te wi abi demakandra nanga wi Kresten brada nanga sisa?
15 Yehovah e frustan taki wi no de volmaakti èn taki wi na sondusma. A e frustan tu taki son leisi a muilek gi wi fu bribi na ini wan sani di wi no man si nanga wi ai (Psalm 103:14). A e du furu sani fu di a wani yepi wi fu kakafutu gi a swakifasi dati. Fu eksempre, a tyari sma fu ala kondre na grontapu kon na wán fu de ’wan pipel di musu tyari en nen’ (Tori fu den Apostel 15:14). Te wi e dini en leki wán man, dan wi e tranga makandra. Te wi yere fa Yehovah yepi wan Kresten brada noso sisa fu kakafutu gi wan swakifasi noso fu lusu wan bigi problema, dan a Gado fu wi e kon de wan trutru sma gi wi moro nanga moro.—1 Petrus 5:9.
16. Fa wi sa man waka nanga Gado te wi e leri sani fu Yesus?
16 Ma a moro prenspari sani, na taki Yehovah gi wi na eksempre fu en Manpikin. Yesus ben taki: „Mi na a pasi, a waarheid nanga a libi. Nowan sma kan kon na a Tata, efu mi no yepi en” (Yohanes 14:6). Wan fu den moro bun fasi fu meki Yehovah tron wan trutru sma gi wi, na fu ondrosuku a fasi fa Yesus ben e libi di a ben de na grontapu. Ala sani di Yesus taki noso du, ben sori heri bun sortu sma a Tata fu en de èn na sortu fasi A e handri (Yohanes 14:9). Te wi e teki bosroiti, dan wi musu prakseri bun san Yesus ben o du. Te den bosroiti di wi e teki, e sori taki wi prakseri bun fu sani èn taki wi begi fu en, dan wi e waka soleki fa Krestes ben e waka (1 Petrus 2:21). A bakapisi de, taki wi o waka nanga Gado.
Sortu blesi wi o kisi?
17. Sortu „rostu” wi sa feni gi wi sili, efu wi e waka a pasi fu Yehovah?
17 Te wi e waka nanga Yehovah Gado, dan wi sa libi wan koloku libi pe wi e kisi furu blesi. Memre san Yehovah ben pramisi a pipel fu en te den ben o suku „a bun pasi”. A ben taki: „Waka na en tapu, èn feni rostu gi yu sili” (Yeremia 6:16). San na a „rostu” disi? A de so taki a abi fu du nanga wan libi sondro problema? Noso a abi fu du nanga wan libi pe wan sma e meki wan lo prisiri èn e bai wan lo diridiri sani? Nôno. Yehovah e gi wi wan sani di de moro bun, wan sani di den moro gudu sma fu grontapu nofo tron no man feni. Fu feni rostu gi yu sili wani taki fu abi wan korostu firi, fu prisiri, fu firi koloku, èn fu abi wan bun banti nanga Gado. A rostu disi wani taki dati yu kan de seiker taki yu teki a moro bun pasi na ini a libi. Furu sma na ini a grontapu disi di lai nanga problema, no abi a korostu firi dati!
18. Sortu blesi Yehovah wani gi yu, èn sortu bosroiti yu teki?
18 A no de fu taki dati a libi srefi na wan bigi blesi. Srefi wan syatu libi, betre moro leki fu no libi kwetikweti. Ma noiti Yehovah ben wani taki yu musu libi soso wan syatu pisi ten nomo. A no ben wani taki yu musu kon owru, ma taki yu musu gro kon tron wan tranga yongusma. Na presi fu dati, Yehovah wani taki yu musu kisi a moro bigi blesi di de. A wani taki yu musu waka nanga en fu têgo! Mika 4:5 e taki fu disi na wan heri moi fasi: „Ala pipel, fu den sei, sa waka ibriwan fu den na ini a nen fu en gado; ma wi, fu wi sei, sa waka na ini a nen fu Yehovah, wi Gado, te ten di no skotu, iya fu têgo.” Yu wani a blesi disi? Yu wani a switi libi di Yehovah e kari „a trutru libi”? (1 Timoteyus 6:19) We, dan teki a bosroiti fu waka nanga Yehovah tide, tamara, èn ibri dei di e kon baka dati, iya, fu ala ten!
[Futuwortu]
^ paragraaf 5 Son Bijbel no e gebroiki den wortu „sowan afu meter” na ini a vers disi, ma den e gebroiki wortu di abi fu du nanga ten, soleki „wan momenti” (The Emphatic Diaglott), noso „wan miniti nomo” (A Translation in the Language of the People, by Charles B. Williams). Ma a de seiker taki a wortu di gebroiki na ini Grikitongo, wani taki „sowan afu meter”, èn disi na wan sani fu 45 centimeter.
San yu ben o piki?
• San a wani taki fu waka nanga Gado?
• Fu san ede yu abi a firi taki yu musu waka nanga Gado?
• San o yepi yu fu waka nanga Gado?
• Sortu blesi den sma sa kisi di e waka nanga Gado?
[Aksi fu a tori disi]
[Prenki na tapu bladzijde 23]
Nanga yepi fu Bijbel, wi e yere fa Yehovah e tanapu na wi baka e taki: „Disi na a pasi”
[Prenki na tapu bladzijde 25]
Na den konmakandra wi e kisi yeye nyanyan na a reti ten