„Den pasi fu Yehovah reti”

„Den pasi fu Yehovah reti, èn na den regtfardiki sma sa waka na den tapu.”​—HOSEA 14:9.

1, 2. Fa Yehovah ben yepi den Israelsma na ini a bigin, ma san pasa nanga den?

NA INI a bigin, na a ten fu a profeiti Moses, Yehovah ben yepi den Israelsma fu de opregti. Ma na a bigin fu a di fu aiti yarihondro b.G.T., a situwâsi fu den ben kon so takru taki Gado no ben feni den bun srefisrefi. Disi de krin fu si na ini Hosea kapitel 10 te nanga 14.

² Den Israelsma ben tron sma di ben e hoigri. Den sma fu a tin-lo kownukondre dati ben „plugu ogridu” èn den ben koti onregtfardikifasi (Hosea 10:1, 13). „Di Israel ben de wan boi ete, mi ben lobi en”, na so Yehovah taki, „èn fu Egepte mi ben kari mi manpikin kon” (Hosea 11:1). Aladi Gado ben fri den Israelsma fu katibo na ini Egepte, toku den ben lei èn den ben bedrigi en (Hosea 11:12). Dati meki Yehovah ben gi den a rai disi: „Yu musu drai go baka na yu Gado, èn yu musu tan sori lobi bun-ati nanga retidu.”​—Hosea 12:6.

3. San ben o pasa nanga den tranga-ede Samariasma, ma fa den Israelsma ben kan meki taki Gado abi sari-ati nanga den?

³ Den tranga-ede Samariasma nanga a kownu fu den, ben o kon na wan kaba na wan tumusi ogri fasi (Hosea 13:11, 16). Ma na ini a lasti kapitel fu a profeititori fu Hosea a e begi den taki: „Drai kon baka na Yehovah, yu Gado, o Israel.” Efu den Israelsma ben abi berow èn efu den ben aksi Gado pardon, dan Gado ben o abi sari-ati nanga den. A no de fu taki dati den ben o abi fu sori taki den ben e bribi taki „den pasi fu Yehovah reti” èn den ben musu waka na tapu den pasi dati.—Hosea 14:1-6, 9.

4. Sortu gronprakseri wi sa ondrosuku na ini a profeititori fu Hosea?

⁴ A pisi disi fu a profeititori fu Hosea abi furu gronprakseri di kan yepi wi fu waka nanga Gado. Wi sa taki fu den gronprakseri disi: (1) Yehovah wani taki en pipel musu anbegi en sondro fu hoigri, (2) Gado e tan sori a pipel fu en taki a lobi den, (3) wi musu tan howpu tapu Yehovah, (4) ala ten den pasi fu Yehovah reti, èn (5) sondari kan drai kon baka na Yehovah.

Yehovah wani taki en pipel musu anbegi en sondro fu hoigri

5. Na sortu fasi Gado wani taki wi musu dini en?

⁵ Yehovah wani taki wi musu dini en na wan krin fasi, sondro fu hoigri. Ma Israel ben kon tron leki wan „droifibon di no ben e gro bun moro” èn di no ben e meki froktu. Den Israelsma ben ’meki furu altari’ fu gebroiki den na ini falsi anbegi. Den sma disi di ben fadon komoto na bribi, ben meki ston pilari srefi kande fu gebroiki dati na ini falsi anbegi. Yehovah ben o broko den altari nanga den pilari disi puru.​—Hosea 10:1, 2.

6. Efu wi wani waka nanga Gado, dan sortu fasi wi no musu abi?

⁶ Yehovah no wani taki den futuboi fu en e hoigri. Ma san ben pasa nanga den Israelsma? Iya, ’den ben tron sma di ben e hoigri’! Aladi a ben de so taki na ini a ten di pasa den ben meki wan frubontu nanga Yehovah leki wan pipel di gi densrefi abra na en, toku Yehovah ben taki dati den ben e hoigri. San wi kan leri fu disi? Te wi gi wisrefi abra na Gado, dan wi no musu hoigri. Odo 3:32 e warskow: „A sma di abi triki, na wan tegu sani gi Yehovah, ma A de wan bun mati fu den opregtiwan.” Efu wi wani waka nanga Gado, dan wi musu sori lobi nanga „wan krin ati, wan bun konsensi èn wan trutru bribi sondro fu hoigri”.​—1 Timoteyus 1:5.

Gado e tan sori taki a lobi en pipel

7, 8. (a) San wi musu du efu wi wani taki Gado tan lobi wi? (b) San wi musu du efu wi du wan seryusu sondu?

⁷ Te wi e anbegi Yehovah sondro fu hoigri èn na  wan opregtifasi, dan a sa tan lobi wi. A ben taigi den tranga-ede Israelsma: „Sai siri gi yusrefi na ini regtfardikifasi; koti lobi bun-atifasi. Wroko a gron, now di ten de ete fu suku Yehovah, teleki a sma e kon di e leri unu regtfardikifasi.”​—Hosea 10:12.

⁸ Sani ben o waka moro bun gi den Israelsma te den ben o abi berow èn te den ben o suku Yehovah! Efu den ben o du dati, dan nanga prisiri a ben o ’leri den regtfardikifasi’. Efu wi du wan seryusu sondu, dan meki wi suku yepi na Yehovah èn begi en fu a gi wi pardon, èn meki wi suku a yepi di den Kresten owruman e gi wi na yeye fasi (Yakobus 5:13-16). Meki wi suku a tiri fu Gado en santa yeye tu, bika „a sma di e du san a sondu skin wani, sa koti takru bakapisi di e tyari dede kon, ma a sma di e du san a yeye wani, sa kisi têgo libi fu a yeye” (Galasiasma 6:8). Efu wi „e du san a yeye wani”, dan Gado sa tan lobi wi.

9, 10. San Hosea 11:1-4 abi fu du nanga den Israelsma?

⁹ Wi kan abi a frutrow taki ala ten Yehovah e handri na wan lobi fasi nanga en pipel. Wi e si buweisi fu disi na ini Hosea 11:1-4, pe wi e leisi: „Di Israel ben de wan boi, mi ben lobi en, èn fu Egepte mi ben kari mi manpikin kon. . . . Den ben tyari ofrandi gi den Bâal popki, èn den ben tyari ofrandi smoko gi den popki di sma anu meki. Ma fu mi sei, mi ben leri Efraim [noso, den Israelsma] fu waka, èn mi ben opo den; èn den no ben wani si taki mi ben meki den kon betre. Mi ben tan hari den kon na mi nanga den titei fu sma fu grontapu, nanga den titei fu lobi, so taki mi ben tron gi den leki den sma di e opo wan tyatyari puru na den kakumbe fu den, èn na wan switifasi mi ben tyari nyanyan go na ibriwan fu den.”

¹⁰ Na ini den vers disi den e teki Israel gersi nanga wan yongu pikin. Na wan lobi fasi Yehovah ben e leri den Israelsma fu waka fu di a ben opo den. A ben e tan hari den kon na en nanga „den titei fu lobi”. Disi ben de trutru wan moi sani fu si! Kon meki wi taki dati yu na wan papa noso mama di e yepi en pikin fu leri waka. Kande yu e langa yu anu fu hori en meki a no fadon. We, na so Yehovah e sori tu taki a lobi yu trutru. A e prisiri fu yepi yu nanga „a titei fu lobi”.

11. Na sortu fasi Gado ’ben tron wan sma di ben e puru wan tyatyari’?

¹¹ Te Yehovah ben e handri nanga den Israelsma, dan a ’ben tron gi den leki den sma di ben e opo wan tyatyari puru na den kakumbe fu den, èn na wan switifasi [a] ben e tyari nyanyan go na ibriwan fu den’. Gado ben handri leki wan sma di e puru wan tyatyari na wan meti tapu, noso di e skoifi a tyatyari go na baka, so taki a meti kan nyan moro makriki. Soso te a pipel fu Israel no ben saka densrefi na Yehovah ondro, dan den ben o kon ondro a hebi kwinsi fu den feanti fu den (Deuteronomium 28:45, 48; Yeremia 28:14). Meki wi no fadon na ini na anu fu wi bigi feanti Satan, so taki a hebi tyatyari fu en no sa pina wi. Na presi fu dati, meki wi tan waka na wan loyaal fasi nanga wi lobi Gado.

Tan howpu tapu Yehovah

12. San wi musu du fu man tan waka nanga Gado, soleki fa Hosea 12:6 e sori?

¹² Wi musu tan howpu tapu Gado efu wi wani tan waka nanga en. Gado ben taigi den Israelsma: „Ma yu fu yu sei, na yu Gado yu musu drai go baka, fu di yu musu sori lobi bun-ati nanga  retidu; èn yu musu tan howpu tapu yu Gado” (Hosea 12:6). Efu den Israelsma ben wani buweisi taki den abi berow èn taki den ben wani drai go baka na Yehovah, dan den ben musu sori lobi bun-ati, den ben musu handri na wan retifasi, èn den ben musu „tan howpu doronomo tapu Gado”. Awansi o langa wi e waka kaba nanga Gado, toku wi musu teki a fasti bosroiti fu sori lobi bun-ati, fu du retidu, èn fu tan howpu tapu Gado.​—Psalm 27:14.

13, 14. Fa Paulus ben gebroiki Hosea 13:14, èn fu san ede dati e meki taki wi kan howpu tapu Yehovah?

¹³ A profeititori fu Hosea di e taki fu den Israelsma, e sori wi fu san ede wi musu howpu tapu Gado. „Fu na anu fu Syeol mi sa frulusu den”, na so Yehovah taki. „Fu dede mi sa puru den. Dede, pe yu maka de? Syeol, pe a krakti fu yu de di e pori sani?” (Hosea 13:14) Yehovah no ben o meki taki den Israelsma no dede na a ten dati, ma te fu kaba a ben o swari dede fu têgo èn a ben o meki dede lasi a feti.

¹⁴ Di Paulus ben skrifi den salfu Kresten, dan a ben teki wortu fu a profeititori fu Hosea. A ben taki: „Te a skin di man pori, e tron wan skin di no man pori moro, èn a skin di kan dede e tron wan skin di no man dede moro, dan a sani di skrifi na ini Gado Buku o kon tru: ’A swari dede fu têgo.’ ’Dede, yu a no winiman moro. Dede, pe yu maka de?’ A maka di e meki sma dede, na sondu, ma a Wet e gi krakti na sondu. Ma tangi fu Gado, bika a meki wi tron winiman nanga yepi fu wi Masra Yesus Krestes!” (1 Korentesma 15:54-57) Yehovah ben opo Yesus baka na dede, èn na so fasi a gi a dyaranti taki den wan di de na ini a prakseri fu Gado, sa kisi wan opobaka (Yohanes 5:28, 29). Disi na trutru wan moi sani fu san ede wi kan howpu tapu Yehovah! Ma boiti a howpu fu na opobaka, wan tra sani de tu di e sori wi fu san ede wi musu waka nanga Gado.

Ala ten den pasi fu Yehovah reti

15, 16. San ben o pasa nanga Samaria soleki fa a profeititori ben taki na fesi, èn fa disi ben kon tru?

¹⁵ A bribi di wi e bribi taki „den pasi fu Yehovah reti”, e yepi wi fu tan waka nanga Gado. Den sma di ben e libi na ini Samaria no ben e hori densrefi na den regtfardiki markitiki fu Gado. Fu dati ede, den ben o abi fu kisi den bakapisi fu di den ben du ogri èn fu di den no ben bribi na ini Yehovah. Gado ben taki na fesi taki: „Samaria sa kisi krutu bika a ben opo ensrefi teige a Gado fu en. A feti-owru sa kiri den. Sma sa masi den pikin fu den kiri, èn den sa priti den bere opo, fu den uma di de nanga bere” (Hosea 13:16). Historia e sori taki den Asiriasma di ben wini Samaria, ben du den tumusi ogri sani disi.

¹⁶ Samaria ben de a mamafoto fu a tin-lo kownukondre Israel. Ma dyaso a nen Samaria abi fu du kande nanga a heri kownukondre dati (1 Kownu 21:1). A Kownu fu Asiria, Kownu Salmaneser V ben go feti nanga a foto Samaria na ini a yari 742 b.G.T. Di a teki Samaria abra na ini a yari 740 b.G.T., dan a tyari furu fu den prenspari sma fu a foto go na katibo na ini den kondre Mesopotamia nanga Media. A no de seiker efu na Salmaneser V noso a tiriman di ben kon na en baka, Sargon II, ben wini Samaria (2 Kownu 17:1-6, 22, 23; 18:9-12). Ma toku den tori fu Sargon e fruteri wi taki sowan 27.290 Israelsma ben seni go na presi di de na a mofo fu na Eufraatliba èn na Media.

17. San wi musu du, na presi fu no abi lespeki gi den markitiki fu Gado?

 ¹⁷ Den sma fu Samaria ben kisi den kefalek takru bakapisi fu di den no ben wani hori densrefi na den regtfardiki markitiki tu Yehovah. Wi leki Kresten di gi densrefi abra na Gado, ben o ondrofeni den takru bakapisi tu efu wi ben o tron sma di gwenti du sondu, noso di no abi lespeki gi den regtfardiki markitiki fu Gado. Noiti wi musu tyari wisrefi na a ogri fasi disi! Na presi fu dati, meki ibriwan fu wi du san na apostel Petrus e gi leki rai: „No meki nowan fu unu pina fu di a de wan kiriman, wan fufuruman, wan ogriman, noso wan sma di e bumui na ini tra sma tori. Ma efu wan sma e pina fu di a de wan Kresten, dan meki a no firi syen, ma meki a tan gi Gado glori aladi a e tyari a nen disi.”​—1 Petrus 4:15, 16.

18. Fa wi kan „tan gi Gado glori”?

¹⁸ Wi „e tan gi Gado glori” te wi e hori wisrefi na den regtfardiki markitiki fu en, na presi fu du san wisrefi wani. Kain ben kiri en brada fu di Kain ben wani du sani soleki fa ensrefi wani, èn a no ben arki a warskow di Yehovah ben gi en taki esi-esi a ben o go du wan ogri (Genesis 4:1-8). Bileam ben teki a moni di a kownu fu Moab ben wani pai en, ma a no ben man tyari fluku kon tapu den Israelsma (Numeri 24:10). Èn Gado ben kiri a Leifisma Korak nanga den trawan di ben de nanga en, fu di den ben opo densrefi teige a tirimakti fu Moses nanga Aron (Numeri 16:1-3, 31-33). Iya, wi no wani kiri sma èn „waka a pasi fu Kain”. Wi no wani lon go „du den ogri fu Bileam”, èn wi no wani lasi wi libi ’neleki Korak di ben taki na wan fasi di e sori taki a no ben saka ensrefi na ondro tirimakti’ (Yudas 11). Ma efu wi ben o meki wan fowtu, dan a profeititori fu Hosea e gi wi trowstu.

Sma di du wan ogri, kan drai go baka na Yehovah

19, 20. Sortu srakti-ofrandi den Israelsma di ben abi berow, ben kan gi?

¹⁹ Srefi den wan di du wan seryusu sondu kan drai go baka na Yehovah. Na ini Hosea 14:1, 2, wi e feni a begi disi: „Drai kon baka na Yehovah, yu Gado, o Israel, bika yu sondu. Sori taki un abi berow èn drai go baka na Yehovah. Un alamala musu taigi en: ’Meki a de so taki yu e gi wi pardon fu den fowtu fu wi; teki den bun sani fu wi, èn wi fu wi sei sa gi yu den yongu mankaw fu wi mofobuba leki ofrandi.’”

²⁰ Den Israelsma di ben abi berow, ben man gi Gado ’den yongu mankaw fu den mofobuba’ leki ofrandi. Den ofrandi disi ben de a prèise di den ben e prèise Gado na wan opregtifasi. Paulus ben taki fu a profeititori disi di a ben gi den Kresten a deki-ati fu „gi Gado wan srakti-ofrandi fu prèise ala ten, namku den froktu fu a mofo di e meki en nen bekènti na trawan” (Hebrewsma 13:15). A de wan bigi grani fu waka nanga Gado èn fu gi en den sortu srakti-ofrandi disi na ini a ten disi!

21, 22. Na sortu fasi den Israelsma di ben abi berow, ben o kon bun baka?

²¹ Den Israelsma di ben tapu nanga a tranga-ede fasi fu den èn di ben drai go baka na Gado, ben gi en ’den yongu mankaw fu den mofobuba’ leki ofrandi. Na so den ben kon bun baka na yeye fasi, soleki fa Gado ben pramisi. Hosea 14:4-7 e taki: „Mi [Yehovah] sa puru a bedrigifasi fu den. Na fu di misrefi wani, meki mi sa lobi den, bika mi no e atibron nanga en moro. Mi sa tron leki dow gi Israel. A sa gi bromki leki a leili, èn sa abi rutu leki wan bon fu Libanon. Den pikin taki fu en sa gro, èn a moi fu en sa de leki di fu na olèifbon, èn a smeri fu en sa de leki  wan bon fu Libanon. Den sa kon tan baka na ini a skaduw fu en. Den sa prani aleisi, èn den sa gi bromki leki a droifibon. Sma sa memre en leki a win fu Libanon.”

²² Den Israelsma di ben o abi berow, ben o kon betre na yeye fasi èn Yehovah ben o lobi den baka. Yehovah ben o tron leki dow di e meki wan sma firi bun baka, fu di a ben o blesi den bogobogo. A pipel fu en di ben kon bun baka, ben o moi ’leki na olèifbon’, èn den ben o waka den pasi fu Gado. San wi musu du fu di wisrefi abi a fasti bosroiti fu waka nanga Yehovah Gado?

Tan waka den reti pasi fu Yehovah

23, 24. Nanga sortu profeititori di e gi deki-ati, a buku Hosea e tapu, èn fa disi abi krakti na wi tapu?

²³ Efu wi wani tan waka nanga Gado, dan wi musu sori taki wi abi „a koni fu Gado” èn ala ten wi musu hori wisrefi na den regtfardiki markitiki fu en (Yakobus 3:17, 18). A lasti vers fu a profeititori fu Hosea e taki: „Suma koni so, taki a kan frustan den sani disi? Suma abi someni frustan, taki a kan sabi den? Bika den pasi fu Yehovah reti, èn na den regtfardikisma sa waka na den tapu; ma den wan di e du ogri, sa fadon te den e waka den pasi disi.”​—Hosea 14:9.

²⁴ Meki wi abi a fasti bosroiti fu waka na tapu den reti pasi fu Gado, na presi fu meki a koni nanga den markitiki fu a grontapu disi tiri wi (Deuteronomium 32:4). Hosea du dati 59 yari langa, noso moro langa srefi. A tyari den boskopu fu Gado go na sma na wan getrow fasi, fu di a ben sabi taki den sma di koni èn di abi frustan, ben o frustan den wortu dati. Fa a de nanga wi? Solanga Yehovah e gi wi na okasi fu gi kotoigi, wi musu tan suku den sma di sa handri na wan koni fasi èn di sa teki a bun-ati fu Gado. Wi e prisiri tu fu du dati makandra nanga „a getrow èn koni srafu”.​—Mateyus 24:45-47.

25. Now di wi ondrosuku a profeititori fu Hosea, dan san dati musu yepi wi fu du?

²⁵ Now di wi ondrosuku a profeititori fu Hosea, dan dati musu yepi wi fu tan waka nanga Gado. Èn wi e du disi nanga a howpu taki wi o libi fu têgo na ini a nyun grontapu di a pramisi wi (2 Petrus 3:13; Yudas 20, 21). Dati na wan kefalek moi howpu! Ibriwan fu wi sa si fa a howpu dati o kon tru, te wi e sori nanga den sani di wi e taki èn di wi e du, taki wi e agri nanga disi taki: „Den pasi fu Yehovah reti.”

San yu ben sa piki?

• Fa Gado sa handri nanga wi, te wi e anbegi en na wan krin fasi?

• Fu san ede wi musu tan howpu tapu Yehovah?

• Fu san ede yu e bribi taki den pasi fu Yehovah reti?

• Fa wi kan tan waka na tapu den reti pasi fu Yehovah?

[Aksi fu a tori disi]

[Prenki na tapu bladzijde 28]

Teki a yepi di Kresten owruman e gi wi na yeye fasi

[Prenki na tapu bladzijde 29]

A profeititori fu Hosea e sori wi fu san ede wi kan howpu tapu den pramisi fu Yehovah taki a sa gi sma wan opobaka

[Prenki na tapu bladzijde 31]

Tan waka nanga Gado aladi yu e howpu fu libi fu têgo