Kon kisi a koni fu arki na wan lobi-ati fasi

„GRANTANGI taki yu teki ten fu arki mi.” Oiti wan sma taigi yu dati? A e meki yu firi bun te wan sma taigi yu so wan sani, a no so? Te wan sma abi a gwenti fu arki bun te trawan e taki, dan pikinmoro ala sma lobi en. Efu wi e arki bun te tra sma e taki, dan wi kan yepi den fu kisi nyun krakti te den de na ini banawtu, noso te den abi problema di e meki den firi brokosaka. Te wi e du muiti fu de wan bun arkiman, dan dati e gi wi na okasi tu fu abi switi demakandra nanga tra sma, a no so? Na ini a Kresten gemeente, a de wan tumusi prenspari sani fu arki trawan na wan lobi-ati fasi, fu di na a fasi dati wi e sori taki wi e ’poti prakseri na makandra, so taki wi kan gi makandra deki-ati fu abi lobi èn fu du bun wroko’.​—Hebrewsma 10:24.

Ma furu sma no e arki bun te yu e taki nanga den. Den lobi fu gi sma rai, fu fruteri san densrefi ben ondrofeni, noso fu taki fa den e si wan tori, na presi fu arki bun san trawan abi fu taki. Sobun, a de wan koni trutru fu sabi fa fu arki te trawan e taki. Fa wi kan leri fu arki na wan lobi-ati fasi?

Wan sani di de tumusi prenspari

Yehovah na wi „Gran Leriman” (Yesaya 30:20). A kan leri wi furu sani di kan yepi wi fu arki trawan moro bun. Prakseri fa Yehovah ben yepi a profeiti Elia. Fu di Elia ben frede taki na Umakownu Iseibel ben o du en ogri, meki a lon gowe na a gran sabana. A ben taki srefi dati a wani dede. Na ini a gran sabana na engel fu Gado go taki nanga en. Di a profeiti Elia ben e fruteri nanga sortu sani a e broko en ede, dan Yehovah arki en, èn baka dati a sori a profeiti a bigi makti di A abi. San ben de a bakapisi? We, fu di Elia no ben frede moro, meki a drai go baka fu du a wroko di a ben kisi fu du (1 Kownu 19:2-15). Fu san ede Yehovah e teki a ten fu arki den problema fu den futuboi fu en? We, na fu di a e broko en ede nanga den (1 Petrus 5:7). Iya, disi na wan prenspari sani di kan yepi wan sma fu tron wan bun arkiman: Hori a bun fu trawan na prakseri, èn sori taki yu e broko yu ede nanga den trutru.

Di wan man na ini Bolifia du wan seryusu sondu, dan a ben breiti srefisrefi di wan tra bribiman sori taki a e broko en ede nanga en trutru. A man e fruteri: „Dati ben de wan fu den moro sari momenti na ini mi libi. Efu a no ben de so taki wan brada ben teki a ten fu arki mi, dan kande mi no ben o du muiti moro fu dini Yehovah. A brada no ben taki furu, ma fu di mi ben sabi taki a ben e broko en ede nanga mi èn taki a ben wani arki mi, meki dati ben gi mi krakti trutru. A no ben de fanowdu fu a taigi mi fa mi ben musu lusu mi problema, bika mi ben sabi san mi ben musu du. Mi ben wani sabi nomo taki wan sma e broko en ede nanga a fasi fa mi ben e firi. Na arki di a arki mi ben yepi mi fu no tan nanga a denki taki howpu no de gi mi.”

Wan sma di ben sabi trutru fa fu arki trawan na wan lobi-ati fasi, ben de Yesus Krestes. Syatu baka di Yesus dede, tu fu den disipel fu en ben e waka komoto fu Yerusalem go na wan tra foto sowan 11 kilometer moro fara. A no de fu taki dati den ben lasi-ati. Sobun, Yesus di ben kisi wan opobaka, bigin waka nanga den. Na wan koni fasi èn nanga den yoisti wortu a poti aksi gi den disipel fu meki den taki san ben de na tapu den ati. Ne den bigin fruteri en san na den sani di den ben e fruwakti  èn fa den lasi-ati fu di sani no waka leki fa den ben prakseri. Den no ben sabi san fu du now. Yesus ben e broko en ede nanga den, èn fu di a teki ten fu arki den tu disipel disi na wan lobi-ati fasi, meki den ben de klariklari now fu arki san en ben abi fu taki. Dan Yesus „tyari kon na krin gi den san na den sani di skrifi fu en na ini Gado Buku”.​—Lukas 24:13-27.

Te wi e teki ten fu arki trawan, fosi wisrefi taki wan sani, dan dati na wan lobi-ati fasi fa wi kan gi den deki-ati fu arki wi. „Mi eigi papa nanga mama èn sosrefi a papa nanga mama fu mi masra, ben e bigin krutu a fasi fa mi ben e kweki mi pikin”, na so wan uma fu Bolifia e taki. „Mi ben e atibron fu den sani di den ben e taki, ma leki mama mi ben e tweifri na misrefi tu. Na a ten dati, wan Yehovah Kotoigi naki na mi doro. A bigin fruteri mi fu den pramisi fu Gado. Ma a fasi fa a ben e aksi mi fa mi ben denki fu son tori, meki mi si taki na uma disi ben wani arki mi trutru. Mi kari en kon na inisei èn fosi yu denki mi ben e sidon fruteri en a problema fu mi. Nanga pasensi a sidon arki mi. A aksi mi sortu libi mi ben wani gi den pikin fu mi èn fa mi masra ben e prakseri fu a tori dati. Mi ben breiti srefisrefi taki mi ben kan taki nanga wan sma di ben wani meki muiti fu frustan mi. Di a bigin fruteri mi san Bijbel e taki fu na osofamiri-libi, dan mi ben de seiker taki mi ben e taki nanga wan sma di ben wani taki sani go bun gi mi.”

„Lobi . . . no e suku en eigi bun”, na so Bijbel e taki (1 Korentesma 13:4, 5). Sobun, fu man arki trawan na wan lobi-ati fasi, wi musu poti wi eigi afersi na wan sei. Disi wani taki kande, taki wi e kiri a telefisi, taki wi e fow a koranti poti na wan sei, noso taki wi e kiri a cellulair telefon fu wi te trawan e taki nanga wi fu wan seryusu tori. Fu arki na wan lobi-ati fasi, wani taki dati wi e teki a ten trutru fu kon sabi fa a tra sma e prakseri. Disi wani taki tu dati wi no sa bigin fruteri wi eigi tori. Sobun, wi no o taki: „A tori disi e meki mi prakseri wan sani di pasa nanga mi wan pisi ten pasa.” A sani disi ben o fiti kande te wi e taki switi tori nanga trawan, ma te wan sma e taki nanga wi fu wan seryusu problema, dan wi musu poti wi eigi afersi na wan sei. Ma ete wan tra fasi de fa wi kan sori taki wi e poti prakseri trutru na trawan.

Arki a sma fu kon frustan fa a e firi

Den mati fu a man Yob ben sidon arki sowan tin fu den takimakandra fu en. Toku Yob ben bari: „O efu mi ben abi wan sma nomo di ben e arki mi!” (Yob 31:35) Fu san ede a ben taki dati? Fu di den no ben de wan trowstu gi en, aladi den ben yere san a taki. Den no ben e broko den ede nanga Yob kwetikweti èn den no ben wani frustan fa a e firi. A de krin taki den no ben e firi gi Yob, fu di den no ben e arki en nanga ala den prakseri. Ma na apostel Petrus e gi wi a rai: „Un alamala musu abi a srefi denki, sori taki unu e firi gi tra sma, lobi den brada fu unu, de klariklari fu sori sari-ati gi trawan, èn abi sakafasi” (1 Petrus 3:8). Fa wi kan sori taki wi e firi gi trawan? Wan fasi fa wi kan du dati, na fu sori taki wi wani sabi fa a tra sma e firi èn taki wi e pruberi fu frustan fu san ede a e firi so. Te wi e taki sani soleki „a sani dati ben musu fu hati yu”, noso „seiker yu ben e firi leki sma no e frustan yu”, dan na a fasi dati wi kan sori taki wi e broko wi ede nanga san a sma e taki. Wan tra fasi na fu taki syatu nanga wi eigi wortu san a sma ben taki. Na a fasi dati wi e sori taki wi frustan san a sma ben taki. Te wi e arki wan sma na wan lobi-ati fasi, dan dati no wani taki dati wi e poti prakseri soso na den sani di a e taki, ma taki wi e pruberi fu frustan tu fa a sma e firi te a e taki den sani disi.

Robert * na wan furuten dinari fu Yehovah Kotoigi, di abi furu ondrofeni. A e fruteri: „Wan  ten ben de taki mi ben lasi-ati trutru na ini a diniwroko fu mi. Sobun, mi aksi a kring-opziener efu mi ben kan taki nanga en. A arki mi trutru èn a du muiti fu kon frustan fa mi ben e firi. A ben e frustan srefi taki mi ben frede taki a ben o krutu mi gi a fasi fa mi ben e denki. A brada sori mi taki a ben man frustan taki mi ben e firi so, fu di ensrefi ben kisi den sortu firi dati. Disi ben yepi mi trutru fu horidoro.”

Ma te wi e arki wan sma, dan disi wani taki dati wi abi fu agri nanga ala san a e taki? A fiti fu taigi wan sma taki wi breiti dati a fruteri wi fa a e firi? Iya, seiker. Fu eksempre, san wan papa noso mama musu du efu a pikin boi fu den feti nanga wan trawan na skoro? San den musu du efu a tini meisje fu den e kon na oso èn e fruteri den taki a lobi wan boi? Yu no denki taki a ben o moro bun efu a papa noso a mama ben sa arki a pikin èn pruberi fu frustan fa a pikin e prakseri, bifo den bigin taigi en san fiti èn san no fiti?

„Rai na ini na ati fu wan man de leki dipi watra”, na so Odo 20:5 e taki, „ma a man di abi a koni fu si sani krin, na a wan di sa hari en kon na tapu.” Wan sma di abi koni nanga ondrofeni no gwenti kande fu gi rai sondro taki sma aksi en. Fu man kisi rai fu so wan sma, wi sa abi fu aksi en a rai dati. Na so a de tu te wi e arki trawan na wan lobi-ati fasi. Wi musu wroko nanga koni efu wi wani taki wan sma fruteri wi fa a e prakseri. A bun fu poti aksi, ma wi musu luku bun taki wi no poti aksi na wan fasi di e meki a sma firi leki wi e bumui na ini en libi. Kande a ben o bun fu aksi a sma efu a no wani bigin taki fosi fu sani di no hebi tumusi gi en fu taki. Fu eksempre, efu wan uma wani taki nanga yu fu problema di a abi na ini en trowlibi, dan kande a o moro makriki gi en fu bigin taki fu a fasi fa en nanga en masra miti èn fa den trow nanga makandra. Wan sma di no e teki prati moro na a Kresten diniwroko kan firi moro switi te a e bigin taki fu a fasi fa a kon sabi a waarheid.

A no makriki fu arki trawan na wan lobi-ati fasi

A no makriki fu arki wan sma te a e atibron nanga wi, fu di furu tron wi e suku fu sori a sma taki wi no abi fowtu. San wi kan du na ini a muilek situwâsi dati? „Wan safri piki e kowru atibron”, na so Odo 15:1 e taki. Wan fasi fa wi kan du dati, na te wi e aksi a sma na wan switi fasi fu taki san a abi tapu en ati, èn te wi e arki nanga pasensi te a e fruteri wi san e trobi en.

Te wan bigi yo-hari-yo-trusu de na mindri tu sma, dan nofo tron a de so taki den e tan taki nomo san den ben taki kaba. Ibriwan fu den feni taki a trawan no e arki en. A ben o bun srefisrefi efu wan fu den ben sa tan tiri fu arki san a trawan e taki! A no de fu taki dati a de prenspari fu dwengi yusrefi èn fu taki na wan koni èn lobi-ati fasi. Bijbel e fruteri wi: „A sma di e dwengi en mofobuba, e handri nanga koni.”​—Odo 10:19.

Nowan sma e gebore nanga a koni fu arki trawan na wan lobi-ati fasi. Toku disi na wan sani di wi kan leri efu wi e du muiti èn efu wi e dwengi wisrefi fu du dati. A no de fu taki dati a de wan bun sani fu kon abi a koni disi. Efu wi e arki trutru te trawan e taki, dan dati na wan fasi fu sori taki wi lobi den èn a de wan sani di e gi wi prisiri. Fu dati ede a de wan koni sani fu leri fa fu arki trawan na wan lobi-ati fasi!

[Futuwortu]

[Prenki na tapu bladzijde 11]

Te wi e arki trawan, dan wi musu poti wi eigi afersi na wan sei

[Prenki na tapu bladzijde 12]

A kan de wan tyalensi fu arki wan sma di e atibron