Waka nanga Gado, èn ondrofeni den bun bakapisi
Waka nanga Gado, èn ondrofeni den bun bakapisi
„Na winti den e tan sai, èn wan bigi winti na san den sa koti.”—HOSEA 8:7.
1. Fa wi kan waka nanga Yehovah?
TE WI ben o koiri na ini wan kontren pe ogri kan miti wi, dan a ben o moro bun te wan sma di sabi a kontren bun, e sori wi a pasi di wi musu waka. A ben o de wan koni sani fu waka nanga a sma dati, na presi taki wi e waka wi wawan. Wan tu sani fu na eksempre disi, e sori na ini sortu situwâsi wi de. Yu ben sa kan taki dati Yehovah wani tyari wi pasa na ogri grontapu disi di wi kan agersi nanga wan bigi sabana. Na wan koni sani te wi e waka nanga en, na presi fu waka wi eigi pasi. Fa wi kan waka nanga Gado? Wi kan waka nanga Gado te wi e poti prakseri na den tiri di a e gi na ini en Wortu.
2. Fu san wi sa taki na ini na artikel disi?
2 A fosi artikel ben taki fu na agersitori di de na ini Hosea kapitel 1 te nanga 5. Soleki fa wi si, dan na agersitori dati e leri wi sani di kan yepi wi fu waka nanga Gado. Kon meki wi taki now fu wan tu edepenti fu kapitel 6 te nanga 9. A ben o bun fu luku syatu fosi san den fo kapitel disi e taki.
Luku syatu san den kapitel e taki
3. Fruteri syatu san Hosea kapitel 6 te nanga 9 e taki.
3 Yehovah seni Hosea fu taki profeititori spesrutu gi a tin-lo kownukondre fu Israel na noordsei. A kondre dati di sma sabi sosrefi leki Efraim, a moro prenspari lo fu Israel, no ben e dini Gado. Hosea kapitel 6 te nanga 9 e sori taki a pipel no ben de loyaal di den no ben hori densrefi na a frubontu di den ben abi nanga Yehovah èn di den ben go du ogri (Hosea 6:7). Den go frutrow tapu den grontapusma nanga suma den ben meki wan frubontu, na presi fu drai go baka na Yehovah. Fu di den ben tan du ogri, meki sani no ben waka bun gi den. Nanga tra wortu, den ben o kisi strafu. Ma a profeititori fu Hosea abi wan moi boskopu tu. A pipel ben kisi a dyaranti taki den ben kan drai go baka na Yehovah, èn taki a ben o abi sari-ati nanga den efu den ben abi trutru berow.
4. Sortu sani di wi kan leri èn gebroiki fu a profeititori fu Hosea, wi o go ondrosuku?
4 Den fo kapitel disi fu a profeititori fu Hosea, sa sori wi moro sani di sa yepi wi fu waka nanga Gado. Kon meki wi go luku fo sani di wi kan leri èn gebroiki: (1) A no nanga mofo wawan, ma nanga den sani di wan sma e du, a e sori taki a abi trutru berow; (2) srakti-ofrandi wawan no e plisi Gado; (3) a e hati Yehovah te den anbegiman fu en e drai baka gi en; èn (4) wi musu du bun sani, efu wi wani taki sani waka bun nanga wi.
Fa wan sma e sori taki a abi trutru berow
5. San na a moro prenspari sani di Hosea 6:1-3 e taki?
5 A profeititori fu Hosea e leri wi furu sani di abi fu du nanga a berow di wan sma musu abi èn di abi fu du nanga a sari-ati fu Gado. Wi e leisi na ini Hosea 6:1-3: „Kon, un pipel, èn meki wi drai go baka na Yehovah, bika ensrefi ben priti sani na pisipisi, ma ensrefi sa meki wi kon betre tu. A ben e tan naki wi, ma a sa dresi wi. Baka tu dei, a sa meki wi kon na libi baka. Na a di fu dri dei a sa meki wi opo baka, èn wi sa libi na en fesi. Wi sa abi sabi, wi sa du muiti fu kon sabi Yehovah. Leki fa dei e broko, na so a sa kon seiker tu. A sa kon leki wan bigi alen na wi tapu; leki wan alen di e fadon bakayari èn di e nati a doti.”
6-8. Fu san ede a fasi fa Israel ben sori berow no ben bun?
6 Suma taki den sani di skrifi na ini den vers disi? Son sma e taki dati na den Israelsma di no ben de getrow taki den wortu disi. Den sma disi e taki tu dati a trangayesi pipel ben e du neleki den abi berow, èn taki den ben wani meki Gado abi sari-ati nanga den. Ma tra sma e taki dati na a profeiti Hosea ben e taki drape, èn taki a ben e begi a pipel fu kon baka na Yehovah. Awansi suma ben taki den wortu disi, toku a tumusi prenspari aksi na: A de so taki a moro bigi pisi fu a tin-lo kownukondre fu Israel ben drai go baka na Yehovah, èn ben sori trutru berow? A piki na, nôno. Yehovah e taki nanga yepi fu Hosea: „San mi sa du nanga yu, o Efraim? San mi sa du nanga yu, o Yuda, te a bun-ati fu unu de leki wan mamanten wolku, èn leki a dow di gowe frukufruku kaba?” (Hosea 6:4) Disi na wan trutru buweisi di e sori wi na ini sortu takru situwâsi a pipel fu Gado ben de na yeye fasi! Sma no ben sori bun-ati moro. Den sani disi ben de leki a mamanten dow di e gowe esi-esi te a son opo kon. Soleki fa a sori dan a pipel ben du neleki den ben abi berow, ma toku Yehovah no ben feni nowan reide fu abi sari-ati nanga den. San ben de a problema?
7 Israel no ben abi trutru berow. Hosea 7:14 e taki fu san ede Yehovah no ben prisiri nanga en pipel: „A no nanga den heri ati den ben aksi mi fu yepi den, aladi den ben e tan krei na tapu a bedi fu den.” Vers 16 e taki tu: „Den ben drai kon baka, ma den no ben drai kon baka na wan moro hei sani.” Disi wani taki „dati den no ben drai kon baka na wan moro bun fasi fu anbegi” (futuwortu). A pipel no ben wani drai go baka na a moro bun anbegi fu Yehovah, fu di den no ben wani kenki a libi fu den. Disi ben de fanowdu efu den ben wani tron mati baka nanga en. Iya, den no ben wani waka nanga Gado trutru.
8 Ete wan sani ben de di no ben bun na a fasi fa Israel ben sori berow. A pipel ben e tan du sondu. Fu taki en leti, den ben du furu sortu sondu, soleki bedrigi, kiri, fufuru, afkodrei, èn den ben meki don frubontu nanga tra kondre. Hosea 7:4 e agersi a pipel nanga „wan onfu” fu wan bakriman, kande fu di den ben angri fu du takru sani, iya, a ben gersi leki wan faya ben e bron na ini den. Yu denki taki Gado ben musu abi sari-ati nanga a pipel disi, te yu luku a takru situwâsi di den ben de na ini na yeye fasi? Kwetikweti! Hosea e taigi a trangayesi pipel taki Yehovah sa „memre a fowtu fu den” èn „a sa poti prakseri na den sondu fu den” (Hosea 9:9). A no sa abi sari-ati nanga den kwetikweti!
9. San den wortu fu Hosea e leri wi fu berow, èn fu sari-ati?
9 Te wi e leisi den sani di Hosea taki, dan san wi e leri fu berow èn fu sari-ati? Na eksempre fu den Israelsma di no ben de getrow de wan warskow gi wi, èn a e leri wi taki efu wi wani meki Yehovah abi sari-ati nanga wi, dan wi musu sori taki wi abi trutru berow. Fa wi kan sori a berow disi? Wi no kan kori Yehovah nanga watra-ai, noso nanga wortu. Den sani di wi e du, e sori efu wi abi trutru berow. Efu wan sma di e du ogri wani taki Gado abi sari-ati nanga en, dan a musu tapu krinkrin nanga den ogri di a e du, èn a musu hori ensrefi na den hei markitiki fu a moro bun anbegi fu Yehovah.
Srakti-ofrandi wawan no e plisi Yehovah
10, 11. Soleki fa a de fu si na a pipel Israel, dan fu san ede srakti-ofrandi wawan no e plisi Yehovah?
10 Kon meki wi go taki now fu a di fu tu sani di wi kan leri èn di kan yepi wi fu waka nanga Yehovah. A di fu tu sani na disi: Ofrandi wawan no e plisi Gado. Hosea 6:6 e taki: „A no ofrandi mi [Yehovah] feni bun, ma na lobi bun-ati; èn a sabi fu Gado na presi fu bron-ofrandi.” Luku taki Yehovah e prisiri te wan sma abi bun-ati èn te a de loyaal. Den na eigifasi di de na ini na ati fu sma. A e prisiri tu nanga wan sma di abi sabi fu en. Ma kande yu e aksi yusrefi: ’Ma fu san ede a vers disi e taki dati Yehovah no e feni „ofrandi” nanga „bron-ofrandi” bun? Na den sani dati a Wet fu Moses ben aksi fu den Israelsma, a no so?’
11 A Wet ben aksi fu den Israelsma taki den ben musu gi en srakti-ofrandi nanga ofrandi, ma den sma di ben e libi na a ten fu Hosea ben abi wan seryusu problema. Soleki fa a sori, dan den Israelsma ben gi den sortu ofrandi disi soso fu di den ben si en leki wan plekti, èn fu di den ben wani sori sma nomo taki den de getrow na Gado. Ma na a srefi ten, den ben e du sondu. Den sondu fu den ben sori taki den no ben de loyaal trutru. Den ben sori tu taki den no ben wani a sabi fu Gado, fu di den no ben gebroiki a sabi dati na ini den libi. Efu a pipel no ben abi wan krin ati èn den no ben e suku fu libi na a yoisti fasi, dan sortu waarde den srakti-ofrandi fu den ben o abi? Yehovah Gado ben atibron nanga den srakti-ofrandi fu den.
12. Sortu warskow Hosea 6:6 e gi sma di e libi na ini a ten disi?
12 Den sani di Hosea taki, na wan warskow gi furu sma di e go na kerki na ini a ten disi. Den e denki taki te den e du den kerkigwenti fu den, dati den e gi ofrandi na Gado. Ma na anbegi fu den no abi nowan krakti tapu a fasi fa den e tyari densrefi ibri dei. Wi kan taki dati den sma disi e plisi Gado trutru, te den ati no e pusu den fu teki soifri sabi fu en? Den e plisi Gado te den no e gebroiki a sabi dati fu wai pasi gi ogridu? No meki nowan sma denki taki na soso den sani di a e du na ini na anbegi fu en, e plisi Gado. Yehovah no e prisiri nanga sma di denki taki a sa feni den bun te den du nomo neleki den e anbegi en, na presi fu du trutru san en Wortu e taki.—2 Timoteyus 3:5.
13. Sortu ofrandi wi e gi, ma san wi musu hori na prakseri fu a fasi fa Yehovah e si den ofrandi disi?
13 Leki tru Kresten, wi e hori na prakseri taki ofrandi wawan no e plisi Gado. A tru taki wi no e gi Yehovah meti leki srakti-ofrandi. Ma toku wi e „gi Gado wan srakti-ofrandi fu prèise ala ten, namku den froktu fu a mofo di e meki en nen bekènti na trawan” (Hebrewsma 13:15). A de tumusi prenspari taki wi no e tron leki den ogri Israelsma na ini a ten fu Hosea; èn wi no musu denki taki te wi e gi Gado yeye ofrandi, dan dati sa tapu den ogri di wi du. Luku na eksempre fu wan yonguwan di ben du hurudu na wan kibri fasi. A ben taki bakaten: „Mi ben du moro na ini a preikiwroko, fu di mi ben denki taki disi ben o tapu na ogri di mi ben e du.” Dati na san den trangayesi Israelsma ben pruberi fu du tu. Ma soso te wi e prèise Yehovah nanga wan krin ati èn te wi e tyari wisrefi na wan fasi di Gado feni bun, a sa prisiri nanga dati.
A e hati Yehovah te den anbegiman fu en gowe libi En
14. San a profeititori fu Hosea e taki fu den firi fu Gado?
14 A di fu dri sani di wi e leri fu Hosea kapitel 6 te nanga 9 abi fu du nanga a fasi fa Yehovah e firi te den anbegiman fu en e drai baka gi en. Gado kan atibron, ma na a tra sei a abi safu-ati tu. A e prisiri èn abi sari-ati nanga den sma di abi berow fu den sondu fu den. Ma te en pipel no abi berow, dan a e handri na wan seryusu fasi, iya, a e strafu den. Fu di Gado wani taki sani e go bun nanga wi, meki a e prisiri te wi e waka nanga en na wan getrow fasi. Psalm 149:4 e taki dati „Yehovah e prisiri nanga a pipel fu en”. Ma fa Gado e firi te den futuboi fu en no de getrow?
15. Fa son Israelsma ben e handri, soleki fa Hosea 6:7 e sori?
15 Yehovah ben taki fu den Israelsma di no ben de getrow: „Densrefi, neleki libisma na grontapu, no lespeki a frubontu. Na drape den handri na wan bedrigi fasi nanga mi” (Hosea 6:7). A Hebrew wortu di vertaal nanga „handri na wan bedrigi fasi”, wani taki tu „handri na wan triki fasi, a handri di wan sma no e handri na wan getrow fasi”. Na ini Maleaki 2:10-16, den e gebroiki a srefi Hebrew wortu fu taki fu den Israelsma di no ben tyari densrefi na wan getrow fasi na ini a fasi fa den ben handri nanga a trowpatna fu den. Wan buku e taki dati a wortu di den gebroiki na ini Hosea 6:7 „e prenki wan trowlibi èn a e sori den fasi di trowpatna musu abi na ini a trowlibi dati . . . A situwâsi disi e sori taki a wan patna hati den firi fu a tra patna di lobi en.”
16, 17. (a) Fa Israel ben handri nanga a frubontu di Gado ben abi nanga den? (b) San wi musu hori na prakseri te wi e du sani?
16 Yehovah ben si Israel leki en agersi wefi fu di a ben abi wan frubontu nanga a pipel. Sobun, di en pipel no ben hori densrefi na a frubontu dati, dan a ben de leki den ben du sutadu. Gado ben de leki wan getrow masra, ma en pipel ben gowe libi en!
17 Fa a de nanga wi? Gado e prisiri te wi e waka nanga en, ma a e sari te wi no e waka nanga en. A bun fu hori na prakseri taki „Gado na lobi”, èn taki den sani di wi e du, abi krakti na en tapu (1 Yohanes 4:16). Efu wi e tan du ogri, dan wi kan hati Yehovah èn wi no sa prisiri en kwetikweti. Te wi e hori disi na prakseri, dan a kan kibri wi fu no fadon gi tesi.
San wi musu du fu meki sani waka bun gi wi
18, 19. Sortu gronprakseri wi e si na ini Hosea 8:7, èn sortu bakapisi a gronprakseri disi ben abi gi den Israelsma?
18 Kon meki wi go luku a di fu fo sani di wi kan leri fu a profeititori fu Hosea, namku fa wi kan abi bun bakapisi. Hosea e taki fu a don fasi fa den Israelsma ben tyari densrefi, èn a ben skrifi taki den no ben o kisi wini efu den no ben o tyari densrefi na wan getrow fasi. A e skrifi: „Na winti den e tan sai, èn wan bigi winti na san den sa koti” (Hosea 8:7). Disi na wan gronprakseri di wi musu hori bun na prakseri: San wi e du nownow, abi langalanga fu du nanga den sani di o pasa nanga wi bakaten. Fa a gronprakseri disi ben kon tru di den Israelsma no ben de getrow?
19 Na ogri di den Israelsma ben e du, ben meki taki sani no ben o waka bun gi den. Den ben o man tan go doro sondro fu abi takru bakapisi? Kwetikweti. Den no ben o man wai pasi gi strafu kwetikweti. Hosea 8:13 e taki: „A [Yehovah] sa memre a fowtu fu den èn aksi den frantwortu gi den sondu fu den.” Na ini Hosea 9:17 wi e leisi: „Mi Gado sa trowe den fu di den no ben gi yesi na en, èn den sa tron loweman na mindri den pipel.” Yehovah ben o aksi den Israelsma frantwortu gi den sondu fu den. Fu di den ben du ogri, meki den ben abi takru bakapisi tu. Gado ben strafu den na ini a yari 740 b.G.T., di den Asiriasma ben wini a tin-lo kownukondre fu Israel èn ben tyari den Israelsma gowe na ini katibo.
20. San wi e leri fu a sani di den Israelsma ben ondrofeni?
20 A sani di den Israelsma ben ondrofeni, e leri wi wan prenspari tru tori: Wi e koti san wi sai. Gado Wortu e warskow wi: „No kori unsrefi: sma no man meki spotu nanga Gado. Bika san wan sma e sai, na dati a sa koti tu” (Galasiasma 6:7). Efu wi e du ogri, dan wi sa abi takru bakapisi tu. Fu eksempre, den sma di e libi wan yayo libi, sa abi takru bakapisi. Den bakapisi no sa moi srefisrefi gi wan sma di e du ogri èn di no abi berow.
21. Fa wi kan abi bun bakapisi?
21 Ma fa wi kan abi bun bakapisi? Wi kan piki na aksi dati nanga wan makriki agersitori. Efu wan gronman wani koti aleisi, dan yu denki taki a ben o sai karu? Kwetikweti! A musu prani sani di a wani koti. Na so a de tu, taki efu wi wani abi bun bakapisi, dan wi musu du bun. Yu wani tan abi bun bakapisi? Yu wani wan prisiri libi nownowde èn a howpu fu libi fu têgo na ini a nyun grontapu fu Gado? We, efu yu wani dati, dan yu musu tan du bun, fu di yu e waka nanga Gado èn fu di yu e tan hori yusrefi na den regtfardiki markitiki fu en.
22. San wi leri na ini Hosea kapitel 6 te nanga 9?
22 Na ini Hosea kapitel 6 te nanga 9, wi leri fo sani di kan yepi wi fu waka nanga Gado. Wi leri dati (1) Nanga den sani di wan sma e du, a e sori efu a abi trutru berow; (2) srakti-ofrandi wawan no e plisi Gado; (3) a e hati Yehovah te den anbegiman fu en e drai baka gi en; èn (4) wi musu du bun sani efu wi wani abi bun bakapisi. Fa den lasti feifi kapitel fu a Bijbel buku disi kan yepi wi fu waka nanga Gado?
San yu ben sa piki?
• Fa wan sma kan sori taki a abi trutru berow?
• Fu san ede srakti-ofrandi wawan no e plisi wi hemel Tata?
• Fa Gado e firi te den anbegiman fu en e gowe libi en?
• San wi musu du efu wi wani abi bun bakapisi?
[Aksi fu a tori disi]
[Prenki na tapu bladzijde 23]
A bun-ati fu den Israelsma ben gowe leki den mamanten wolku
[Prenki na tapu bladzijde 23]
Den takru lostu fu den Israelsma ben bron leki wan onfu na ini den
[Prenki na tapu bladzijde 24]
Fu san ede Yehovah no ben wani den srakti-ofrandi fu en pipel?
[Prenki na tapu bladzijde 25]
Efu wi wani abi bun bakapisi, dan wi musu du san bun