Yu e bribi taki Didibri de trutru?

DEN Buku fu Bijbel e sori taki Didibri na wan trutru sma. Libisma no man si Didibri, neleki fa den no man si Gado. „Gado na wan Yeye”, na so Bijbel e taki (Yohanes 4:24). Didibri na wan yeye tu. Ma tra fasi leki a Mekiman, Didibri ben abi wan bigin.

Langa ten bifo Yehovah Gado meki libisma, a ben meki bun furu yeye (Yob 38:4, 7). Bijbel e kari den yeye disi engel (Hebrewsma 1:13, 14). Alamala ben de volmaakti di Gado meki den; nowan fu den ben de wan didibri, èn nowan fu den ben ogri. Ma fa Didibri du kon dan? A wortu „didibri” wani taki „ogri-ati leiman”, sobun a e sori go na wan sma di e fruteri ogri-ati lei fu trawan. A wortu „Satan” wani taki „Gensman”, noso feanti. Neleki fa wan opregti man e meki ensrefi tron wan fufuruman fu di a e go fufuru, na so wan fu den volmaakti yeye manpikin fu Gado meki ensrefi tron Satan Didibri fu di a takru prakseri fu en meki taki a go du ogri. Bijbel e sori fa wan sma kan meki ensrefi kon ogri: „Ibri sma e kisi tesi fu di en eigi lostu e hari en èn e kori en. Dan te a lostu kon lepi, a e tyari sondu kon; te a sondu du kaba, dan dati e tyari dede kon.”​—Yakobus 1:14, 15.

Fu taki en leti, na dati pasa. Na engel di ben o opo ensrefi teige Gado, ben e luku finifini fa Yehovah Gado ben meki a fosi man nanga uma, Adam nanga Eva. A ben sabi taki Yehovah ben gi Adam nanga Eva a komando fu meki grontapu kon furu nanga regtfardikisma di ben o anbegi a Mekiman (Genesis 1:28). Na engel disi ben si taki a ben kan kisi grani nanga makti. Bigi-ai meki taki a ben e angri fu kisi a reti di a Mekiman wawan abi, namku a reti fu libisma anbegi en. Na presi fu kakafutu gi so wan takru lostu, a yeye manpikin disi fu Gado tan kweki a lostu disi, teleki a taki wan lei, èn baka dati a opo ensrefi teige Gado. Luku san a ben du.

Na engel disi di opo ensrefi teige Gado, gebroiki wan sneki fu taki nanga a fosi uma, Eva. A sneki aksi Eva: „A de so trutru, taki Gado ben taki dati unu no musu nyan fu ibri bon fu a  dyari?” Di Eva taigi en sortu komando Gado ben gi den èn sortu strafu den ben o kisi efu den no ben o gi yesi na dati, dan a sneki taki: „Un no sa dede kwetikweti. Bika Gado sabi taki na a dei di unu e nyan fu [a bon di de na mindrisei fu a dyari], un ai sa kon opo trutru èn dan unu sa de leki Gado, fu di unu sa sabi bun nanga ogri” (Genesis 3:1-5). Satan ben wani sori taki Gado no ben fruteri Adam nanga Eva tru tori. A ben wani sori taki Eva ben o kon de leki Gado te a ben o nyan fu a froktu fu a bon, èn taki Eva ben o abi a reti fu bosroiti gi ensrefi san bun èn san ogri. Dati ben de a fosi lei. Fu di na engel dati ben taki a lei disi, meki a tron wan ogri-ati leiman. A kon tron sosrefi wan feanti fu Gado. Fu dati ede Bijbel e kari a feanti disi fu Gado, „a fosi sneki, a wan di den e kari Didibri nanga Satan”.—Openbaring 12:9.

„De na ai”

Di Didibri lei gi Eva, dan ala sani waka soifri soleki fa a ben abi na prakseri. Bijbel e taki: „Ne na uma ben si taki a bon ben bun fu nyan èn taki a ben de wan sani di den ai ben angri fu si, iya, a bon ben wiki a lostu fu luku en. Na so a ben teki a froktu fu en èn ben nyan fu en. Baka dati a ben gi wan pisi na a masra fu en, di a ben de na en, èn a ben bigin nyan” (Genesis 3:6). Eva ben e bribi Satan èn a ben trangayesi Gado. A ben man meki Adam trangayesi a wet fu Gado tu. Na so fasi, Didibri meki taki a fosi man nanga uma opo densrefi teige Gado. Sensi a ten dati, Satan abi krakti tapu den afersi fu libisma, aladi den no man si en. Fu san ede a e du dati? Fu di a wani taki libisma drai baka gi Gado, so taki den anbegi en (Mateyus 4:8, 9). Fu dati ede Bijbel abi leti fu warskow wi taki: „Tan nanga krin frustan, de na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.”—1 Petrus 5:8.

Sobun, Bijbel e sori krin taki Didibri na wan trutru sma, aladi wi no man si en. Iya, a de wan engel di kon kruka èn di e du ogri! A fosi prenspari sani di wi musu du fu tan na ai, na fu frustan krin taki Didibri de trutru. Ma wi musu du moro efu wi wani tan nanga krin frustan èn efu wi wani tan na ai. A de prenspari tu fu sabi den ’triki’ fu Satan èn na sortu fasi a e kori sma (2 Korentesma 2:11). San na den triki fu en? Èn fa wi kan kakafutu gi den triki fu en?

Didibri e gebroiki a firi di libisma abi fu anbegi Gado

Sensi di Gado meki libisma, Didibri e luku den finifini. A sabi fa libisma de; a sabi san den abi fanowdu, san den lobi, èn a sabi san den wani. Satan sabi heri bun taki libisma meki nanga a firi fu anbegi wan sani, èn na wan koni fasi a gebroiki a firi disi fu kori libisma. Fa a e du dati? A e meki sma bribi falsi leri di abi fu du nanga Gado (Yohanes 8:44). Furu leri di abi fu du nanga Gado no e kruderi nanga makandra èn den e bruya sma. Yu sabi suma e kisi wini fu a sani disi? Fu di den leri disi no e kruderi nanga makandra, meki wi kan frustan taki alamala no kan de tru. Sobun, yu no denki taki a kan dati furu fu den leri disi meki fu doro wán spesrutu marki? Yu no denki taki Satan e gebroiki den spesrutu fu kori sma? Fu taki en leti, Bijbel e kari en „a gado fu a grontapu sistema disi”, di e breni sma frustan.—2 Korentesma 4:4.

Te wan sma sabi a waarheid fu Gado, dan dati kan kibri en so taki den falsi leri no kori en. Bijbel e agersi a waarheid fu Gado Wortu nanga a banti di wan srudati fu owruten ben e weri fu kibri en mindribere (Efeisesma 6:14). Te yu e teki sabi fu Bijbel èn te yu e du soifri soleki fa a e taki, dan neleki wan banti na yu  mindribere, a Wortu fu Gado sa kibri yu so taki falsi leri nanga fowtu denki no kori yu.

A firi di libisma abi taki den musu anbegi Gado, meki taki den go ondrosuku sani di den no sabi. Disi kan meki taki den fadon na ini ete wan fu den trapu fu Satan. Fu di Satan sabi taki libisma abi a firi fu wani sabi sani nomonomo, meki a e gebroiki sani soleki afkodrei fu kori furu fu den, so taki a kan abi krakti na den tapu. Neleki fa wan ontiman e gebroiki difrenti sortu nyanyan fu hari den meti di a e onti, na so Satan e gebroiki difrenti sortu sani fu hari sma na heri grontapu so taki a kan abi krakti na den tapu. Fu eksempre, a kan gebroiki lukuman-wroko, a luku di sma e luku den stari fu si san o pasa, bonuwroko, a luku di sma e luku na ini na anu fu trawan fu kon sabi fa den libi o waka, èn tofruwroko.—Lefitikus 19:31; Psalm 119:110.

San yu kan du so taki Satan no kori yu nanga afkodrei? Deuteronomium 18:10-12 e taki: „Nowan sma musu de na un mindri di e meki en manpikin, noso en umapikin pasa na ini faya, nowan sma di e koti luku, wan sma di e du bonu noso wan sma di e suku marki fu sabi san o pasa, noso wan towfruman, èn nowan sma di e taki mofo fu wisi wan tra sma, noso wan sma di e suku rai na wrokoman fu den ogri yeye, noso na sma di e du lukuman-wroko, noso iniwan sma di e aksi sani na den dedewan. Bika iniwan sma di e du den sani disi, na wan tegu sani gi Yehovah, èn na fu den tegu sani disi ede Yehovah yu Gado e yagi den komoto na un fesi.”

A rai di Bijbel e gi, de krin: No abi noti fu du nanga afkodrei. San yu kan du efu yu e du afkodrei na wan noso tra fasi, ma yu wani tapu nanga dati now? Yu kan teki na eksempre fu den fosi Kresten di ben e libi na ini a foto Efeise. Di den teki „a wortu fu Yehovah”, dan „bun furu fu den sma di ben e du bonuwroko tyari den buku fu den kon na wán èn den bron den na fesi ala sma”, na so Bijbel e taki. Den buku dati ben diri. Den ben warti 50.000 pisi solfru moni (Tori fu den Apostel 19:19, 20). Ma toku, den Kresten na ini Efeise no draidrai fu pori den buku dati.

Satan e gebroiki den swakifasi fu libisma

Wan volmaakti engel kon tron Satan Didibri fu di a ben angri fu kisi wan hei posisi. A meki sosrefi taki Eva kisi bigimemre èn Eva ben wani de neleki Gado tu. Na ini a ten disi, Satan abi krakti tapu furu sma fu di a e meki taki den kisi bigimemre. Fu eksempre, son sma e denki taki a ras fu den, noso a kondre fu den, bun moro di fu tra sma. Disi e difrenti trutru fu san Bijbel e leri wi! (Tori fu den Apostel 10:34, 35) Bijbel e taki krin: „Fu wán sma nomo [Gado] meki ala tra sma.”—Tori fu den Apostel 17:26.

Wan bun fasi fa wan sma kan sorgu taki Satan no meki taki a kisi bigimemre, na fu abi sakafasi. Bijbel e frumane wi „fu no denki moro fu [wisrefi] leki san de fanowdu” (Romesma  12:3). „Gado no lobi sma di abi heimemre”, na so Bijbel e taki, „ma a e sori no-frudini bun-ati na sma di abi sakafasi” (Yakobus 4:6). Wan bun fasi fa yu kan kakafutu gi den triki fu Satan, na fu sori taki yu abi sakafasi èn sosrefi tra fasi di Gado feni bun.

Fu di Satan sabi taki libisma kan brokokindi makriki gi lostu fu a sondu skin, meki a no o draidrai fu gebroiki dati fu doro a marki fu en. Di Yehovah Gado meki libisma, a ben wani taki den abi prisiri na ini a libi. Te sma e meki prisiri na wan fasi di Gado feni bun, dan den sa de koloku trutru. Ma Satan e kori sma fu meki prisiri na wan fasi di no fiti (1 Korentesma 6:9, 10). A moro bun fu poti prakseri na sani di krin èn di Gado feni bun (Filipisma 4:8). Disi sa yepi yu fu basi den prakseri nanga den firi fu yu.

Tan kakafutu gi Didibri

Yu man kakafutu gi Didibri? Iya, yu man du dati. Bijbel e gi wi a dyaranti: „Kakafutu gi Didibri, èn a sa lon gowe fu unu” (Yakobus 4:7). Ma awinsi yu e kakafutu gi Satan, toku a no sa gi abra wantewante èn a no sa tapu fu gens yu te yu e teki sabi fu Gado. Nôno, Didibri sa pruberi baka fu kori yu „na wan moro bun ten” (Lukas 4:13). Ma yu no abi fu frede Didibri. Efu yu e tan kakafutu gi en, dan a no o man meki yu drai baka gi a tru Gado.

Ma fu man kakafutu gi Didibri, yu musu kon sabi suma na en èn fa a e bedrigi sma, èn yu musu kon sabi tu fa yu kan kibri yusrefi gi den triki fu en. Wán yoisti presi nomo de pe yu kan feni a sabi dati, èn dati de na ini Gado Wortu, Bijbel. Sobun, tan abi a fasti bosroiti fu studeri Gado Wortu, èn fu du den sani di yu leri. Yehovah Kotoigi na ini a birti fu yu sa breiti fu yepi yu studeri Gado Wortu na wan ten di fiti gi yu, èn yu no abi fu pai gi dati. Grantangi, no draidrai fu meki kontakti nanga den, noso fu skrifi den sma di tyari a tijdschrift disi kon na doro.

Te yu e studeri Bijbel, dan yu musu hori na prakseri taki Satan kan meki sma gens yu, noso frufolgu yu, fu di a wani tapu yu fu kon leri sabi a waarheid fu Gado Wortu. Kande wan tu lobiwan fu yu o atibron na yu tapu fu di yu e studeri Bijbel. A kan taki den e du disi fu di den no sabi sortu moi tru tori de fu feni na ini Bijbel. Trawan kan bigin spotu yu. Ma Gado ben o breiti efu yu ben o brokokindi gi den tesi dati? We, Didibri wani taki yu lasi ati, so taki yu tapu fu teki sabi fu a tru Gado. Ma no meki Satan wini (Mateyus 10:34-39). Yu no abi nowan frantwortu na en. Na Yehovah gi yu libi. Sobun, abi a fasti bosroiti fu kakafutu gi Didibri, èn fu ’prisiri Yehovah en ati’.—Odo 27:11.

[Prenki na tapu bladzijde 6]

Den wan di ben tron Kresten, ben bron den afkodrei buku fu den

[Prenki na tapu bladzijde 7]

Teki a fasti bosroiti fu studeri Bijbel