Armagedon na a kaba fu grontapu?
Armagedon na a kaba fu grontapu?
ARMAGEDON! A de so taki a wortu disi e meki yu denki a dede di ipi-ipi sma e dede, noso a e meki yu denki taki hemel nanga grontapu o bron? Wan tu Bijbel wortu nomo de di sma gwenti gebroiki na ini na aladei libi fu den, èn „Armagedon” na wan fu den wortu disi. Sma na ala sei e gebroiki a wortu disi fu sori sortu sari sani o pasa nanga libisma. Sani di de fu si na ini felem, na tapu telefisi nanga video, meki sma denki taki „Armagedon” na wan ten pe tumusi ogri sani o pasa. A wortu disi e dangra sma èn a e meki den kisi wan lo fowtu denki. Aladi sma abi furu difrenti denki fu san a wortu disi wani taki, toku furu fu den denki disi no e kruderi nanga san Bijbel, a buku fu pe a wortu disi komoto, e leri wi fu Armagedon.
Fu di Bijbel e sori taki Armagedon abi fu du nanga ’a kaba fu grontapu’, meki a de prenspari fu kon sabi krin san a wortu disi wani taki trutru, a no so? (Mateyus 24:3, Da Bijbel na ini Sranantongo) Èn a ben o bun fu go na a rutu fu a waarheid, namku Gado Wortu, fu kon sabi san na Armagedon, èn sortu krakti a sa abi tapu yu nanga yu famiri, a no so?
Te yu e ondrosuku sani na so wan fasi, dan yu sa kon si taki Armagedon no sa meki taki grontapu e kon na wan kaba na wan ogri-ati fasi. Na presi fu dati a sa de a bigin fu wan koloku libi gi sma di e angri fu libi na ini wan regtfardiki nyun grontapu. Yu sa kon frustan a prenspari Bijbel tru tori disi krin te yu e poti prakseri na a artikel di e kon, di sa sori san Armagedon wani taki trutru.
[Faki/Prenki na tapu bladzijde 3]
SAN YU DENKI ARMAGEDON WANI TAKI?
• A kiri di ogri-ati fetisani o kiri ipi-ipi sma
• Wan bigi rampu di o pasa na ini a naturu
• A tuka di wan bigi ston di e komoto fu hemel sa kon tuka nanga grontapu
• A pori di Gado o pori ogrisma