Sma „fu ala den tongo” e yere a bun nyunsu

„Tin man fu ala den tongo di e taki na ini den kondre [sa taki]: ’Wi wani go nanga unu, fu di wi yere taki Gado de nanga unu.’”​—SAKARIA 8:23.

1. Fa Yehovah ben sorgu gi a yoisti okasi fu bigin preiki gi sma na ini difrenti tongo èn na ini difrenti kondre fu grontapu?

WAN moro betre okasi no ben kan de. A ben de a ten fu a Pinksterfesa fu 33 G.T. Wan tu wiki na fesi, wan bigi grupu Dyu èn tra sma di ben teki a Dyu bribi, komoto na sowan 15 difrenti kontren fu a Gran Kownukondre Rome, fu hori a Paskafesa na ini Yerusalem. Na a dei dati, dusundusun fu den sma disi yere fa mansma nanga umasma di kisi santa yeye, ben e meki a bun nyunsu bekènti na ini furu fu den tongo di sma ben e taki na ini a gran kownukondre. Ma disi leisi a no ben de so taki den sma no ben man frustan makandra soleki fa a ben de na ini a ten fu Babel, ma den ben e frustan den tori di den ben e yere (Tori fu den Apostel 2:1-12). Na a okasi dati, a Kresten gemeente ben seti, èn wan wroko ben bigin fu gi leri na sma na heri grontapu na ini difrenti tongo. A wroko disi e go doro te na ini a ten disi.

2. Fa den disipel fu Yesus ben meki den sma fu difrenti kondre di ben e arki den, „fruwondru” na a dei fu a Pinksterfesa na ini a yari 33 G.T.?

² A kan taki den disipel fu Yesus ben man taki a Grikitongo di sma ben gwenti taki na a ten dati. Den ben e taki Hebrewtongo tu, a tongo di sma ben e taki na a tempel. Ma na a dei fu a Pinksterfesa, den sma di ben de drape èn di ben kon fu difrenti kondre, ben e „fruwondru” fu yere fa den disipel ben e taki a tongo fu den. San ben de a bakapisi? Den tumusi prenspari waarheid di den sma ben e yere na ini den eigi tongo, ben naki den ati. Na a kaba fu a dei, a pikin grupu fu disipel ben tron wan bigi grupu fu moro leki 3000 sma!​—Tori fu den Apostel 2:37-42.

3, 4. Fa a du kon taki den disipel ben man preiki gi moro sma, baka di den froisi gowe fu Yerusalem, Yudea, nanga Galilea?

³ Syatu baka a prenspari dei dati, den Kresten na ini Yerusalem kisi hebi frufolgu, èn „den wan di ben lowe go na ala sei, waka a heri kondre fu preiki a bun nyunsu” (Tori fu den Apostel 8:1-4). Fu eksempre, na ini Tori fu den Apostel kapitel 8 wi e leisi fu Filipus. A kan taki a preikiman disi ben e taki a Grikitongo. Filipus ben e preiki gi den Samariasma. A ben preiki sosrefi gi wan lantiman fu Etiopia di ben gi yesi na a boskopu fu Krestes.​—Tori fu den Apostel 6:1-5; 8:5-13, 26-40; 21:8, 9.

⁴ Di den Kresten froisi gowe fu Yerusalem, Yudea, nanga Galilea fu suku wan presi pe den ben kan seti den libi baka, dan den ben e miti sma di ben abi wan tra kulturu èn di ben e taki wan tra tongo. Kande wan tu fu den Kresten disi ben e gi kotoigi soso na Dyu. Ma a disipel Lukas e fruteri: „Wan tu man fu Siprus nanga Sireine ben de na den mindri, èn di den man disi doro na Antiokia, dan den bigin taki nanga den sma di ben e taki Grikitongo, èn den fruteri den a bun nyunsu fu Masra Yesus.”​—Tori fu den Apostel 11:19-21.

Wan Gado di abi wan boskopu gi ala sortu sma

5. Fa wi kan si na a fasi fa a bun nyunsu e preiki, taki Yehovah lobi ala sortu sma?

⁵ Den sortu sani dati ben e kruderi nanga a fasi fa Gado de, bika Gado lobi ala sortu sma; a no lobi a wan sma moro a trawan. Baka di Yehovah yepi na apostel Petrus fu kisi a yoisti denki fu trakondre sma, dan nanga furu warderi  Petrus ben taki: „Mi e si trutru taki Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun” (Tori fu den Apostel 10:34, 35; Psalm 145:9). Na apostel Paulus, di ben e frufolgu Kresten fosi, ben taki dati Gado „wani taki ala sortu sma musu kisi frulusu”. Na a fasi dati a sori krin taki Gado lobi ala sortu sma (1 Timoteyus 2:4). A de krin fu si taki a Mekiman lobi ala sortu sma, fu di mansma nanga umasma, sma fu ala ras, sma fu ala kondre, èn sma di e taki difrenti tongo, kan kisi a howpu di a Kownukondre e gi.

6, 7. Sortu Bijbel profeititori ben taki dati sma fu difrenti tongo ben o yere a bun nyunsu?

⁶ Hondrohondro yari na fesi, Bijbel ben taki dati moro sma na heri grontapu ben o yere a bun nyunsu. Soleki fa a profeititori fu Danièl e sori, dan ’Yesus ben kisi tirimakti nanga wartifasi nanga wan kownukondre, so taki den pipel, den grupu fu ala kondre nanga tongo, iya, den alamala ben sa dini en’ (Danièl 7:14). A tijdschrift disi e kon na doro na ini 151 tongo na heri grontapu, fu yu kan leisi fu a Kownukondre fu Yehovah, èn dati e sori kaba taki a Bijbel profeititori dati e kon tru.

⁷ Bijbel ben taki dati wan ten ben o kon taki sma fu difrenti tongo ben o yere a nyunsu di e gi libi. Sakaria ben taki na fesi fa furu sma ben o wani kon na ini a tru anbegi: „Na ini a ten dati a sa de so taki tin man fu ala den tongo di e taki na ini den kondre, fu tru o grabu hori a mofokanti fu a krosi fu wan man di de wan Dyu, èn taki: ’Wi wani go nanga unu, fu di wi yere taki Gado de nanga unu’” (Sakaria 8:23; Galasiasma 6:16). Èn na apostel Yohanes ben fruteri san a ben si na ini wan fisyun: „Mi si wan bigi ipi sma di nowan sma ben man teri; den ben komoto fu ala kondre, lo, pipel, nanga tongo, èn den ben tanapu na fesi a kownusturu èn na fesi a Pikin Skapu” (Openbaring 7:9). A no de fu taki dati wi si den profeititori disi kon tru!

 Preiki a bun nyunsu gi ala sortu sma

8. Sortu situwâsi na ini a ten disi e meki taki wi musu tyari kenki kon na a fasi fa wi e gi kotoigi?

⁸ Na ini a ten disi, moro nanga moro sma e froisi go na tra presi. Fu di furu kondre e wroko makandra now, meki a kon moro makriki gi son sma fu froisi go na wan tra kondre. Ipi-ipi sma di e libi na ini kontren pe orloku de èn pe a no e go bun na ekonomia sei, froisi go na presi pe na ekonomia de moro bun, èn pe den kan seti wan bun libi na materia sei. Na ini furu kondre, yu kon abi difrenti grupu fu sma di e taki wan tra tongo, fu di den froisi go drape, noso den lowe komoto fu den eigi kondre. Fu eksempre, na ini Finland, sma e taki moro leki 120 tongo. Na ini Australia, sma e taki moro leki 200 tongo. Na ini wán foto nomo fu Amerkankondre, namku a foto San Diego, sma e taki moro leki 100 tongo!

9. Fa wi musu denki fu sma na ini wi kontren di e taki wan tra tongo?

⁹ A de so taki wi leki Kresten preikiman e si a taki di den sortu sma disi e taki wan tra tongo, leki wan sani di e tapu wi fu preiki gi den? Kwetikweti! Na presi fu dati, wi e si disi leki wan moi okasi fu preiki gi moro sma; den de leki ’gron di abi nyanyan di lepi kaba fu koti’ (Yohanes 4:35). Wi e meki muiti fu yepi sma di sabi taki den de na nowtu na yeye fasi, awinsi fu sortu kondre den komoto, noso awinsi sortu tongo den e taki (Mateyus 5:3). A bakapisi fu dati, na taki ibri yari wan bigi grupu fu sma fu ’ala tongo’ e tron disipel fu Krestes (Openbaring 14:6). Fu eksempre, sensi augustus 2004 a preikiwroko na ini Doisrikondre e du na ini sowan 40 tongo. Na a srefi ten, a bun nyunsu na ini Australia ben e preiki na ini pikinmoro 30 tongo, aladi sowan tin yari pasa, a ben e preiki na ini 18 tongo nomo. Na ini Grikikondre, Yehovah Kotoigi e preiki gi sma na ini pikinmoro 20 difrenti tongo. Sowan 80 procent fu Yehovah Kotoigi e taki wan tra tongo boiti Ingrisitongo, a tongo di sma e gebroiki na ala sei fu grontapu.

10. Sortu frantwortu ibri preikiman abi te den e suku fu meki disipel fu sma fu „ala kondre”?

¹⁰ Iya, Yesus ben gi a komando fu „go na sma fu ala kondre èn meki den tron disipel”, èn na dati e pasa trutru! (Mateyus 28:19) Yehovah Kotoigi teki a wroko disi na den tapu, èn den e du en fayafaya na ini 235 kondre, aladi den e prati  publikâsi na ini moro leki 400 tongo. Na organisâsi fu Yehovah e sorgu gi den sani di de fanowdu fu man preiki gi sma, ma ibri Kownukondre preikiman musu suku okasi fu prati a Bijbel boskopu gi „ala sortu sma” na ini a tongo di den e frustan moro bun (Yohanes 1:7). Fu di den alamala e span anu makandra fu du a wroko disi, meki milyunmilyun sma di e taki difrenti tongo man kisi wini fu a bun nyunsu (Romesma 10:14, 15). Iya, ibriwan fu wi abi wan tumusi prenspari frantwortu!

Du ala san de fanowdu fu du a wroko

11, 12. (a) Sortu tyalensi wi abi, èn fa a santa yeye e yepi wi? (b) Fu san ede nofo tron a moro bun fu preiki gi sma na ini den eigi tongo?

¹¹ Na ini a ten disi, furu Kownukondre preikiman ben o breiti fu leri wan tra tongo, ma den no kan fruwakti taki a yeye fu Gado sa meki den taki wan tra tongo na wan wondru fasi (1 Korentesma 13:8). A e teki furu muiti fu leri wan tra tongo. A kan taki srefi den wan di man taki wan tra tongo, musu kenki a denki fu den èn a fasi fa den e preiki, fu di den sma di e taki a tongo dati abi tra gwenti nanga tra kulturu. Disi de fanowdu, fu kan meki a Bijbel boskopu hari a prakseri fu den sma. Wan tra sani, na taki furu tron den sma di froisi kon fu wan tra kondre no so langa pasa, e syensyen pikinso. Fu dati ede, wi musu du furu muiti fu kon frustan fa den sma disi e denki.

¹² Awansi fa no fa, a santa yeye e wroko ete na mindri den futuboi fu Yehovah, di e meki furu muiti fu yepi sma di e taki wan tra tongo (Lukas 11:13). Na presi taki a yeye e meki wi taki wan tra tongo na wan wondru fasi, a kan meki taki wi e angri moro fu taki nanga sma di no e taki a tongo fu wi (Psalm 143:10). Te wi e preiki, noso te wi e leri sma a Bijbel boskopu na ini wan tongo di den no sabi, dan a kan taki den o man frustan san wi e taki. Ma efu wi wani doro na ati fu den wan di e arki wi, dan furu tron a moro bun fu taki nanga den na ini den eigi tongo, bika dati na a tongo di sa naki den ati trutru èn di sa pusu den fu handri.​—Lukas 24:32.

13, 14. (a) San e pusu son preikiman fu preiki gi sma di e taki wan tra tongo? (b) Fa den e sori taki den no e prakseri densrefi nomo?

¹³ Furu Kownukondre preikiman bigin preiki gi sma di e taki wan tra tongo, fu di den si fa den sma e teki a waarheid fu Bijbel. Trawan e kisi moro deki-ati fu du a diniwroko fu den fayafaya te den musu du wan sani di de wan tyalensi gi den, noso te den musu leri fu du wan tra moi sani. „Furu fu den sma di e komoto fu Owstu-Europa e angri fu kon sabi a waarheid”, na so wan bijkantoro fu Yehovah Kotoigi na a zuidsei fu Europa e taki. A e gi furu prisiri fu yepi den sma disi di e gi yesi na a bun nyunsu!​—Yesaya 55:1, 2.

¹⁴ Ma efu wi wani abi bun bakapisi na ini a wroko disi, dan wi musu horidoro èn wi musu de klariklari fu du sani sondro fu prakseri wisrefi nomo (Psalm 110:3). Fu eksempre, wan tu Kotoigi osofamiri na ini Yapan gowe libi den bigi foto pe den ben abi den moi oso, fu go tan na farawe presi, soso fu kan studeri Bijbel nanga grupu Sneisi di kon libi na ini a kondre. Na a west-sei sesyoro fu Amerkankondre, preikiman e rèi wán yuru te go miti tu yuru langa fu go studeri Bijbel nanga sma di e taki a Filipinotongo. Na ini Noorwegen, wan trowpaar e studeri nanga wan osofamiri fu Afganistan. A trowpaar disi e gebroiki a San Gado e aksi foe wi? * brochure na ini Ingrisitongo nanga a Noorwegentongo. Na osofamiri e leisi den paragraaf na ini Persiatongo di gersi Daritongo, a tongo di den e taki na  ini a mamakondre fu den. Den e taki nanga makandra na ini Ingrisitongo nanga Noorwegentongo. Te preikiman lobi fu du sani sondro fu prakseri densrefi nomo, èn te den e fiti densrefi na a situwâsi fu tra sma, dan den e kisi furu blesi te trakondre sma e gi yesi na a bun nyunsu. *

15. Fa wi alamala kan abi wan prati na a wroko fu preiki gi sma di e taki wan tra tongo?

¹⁵ Yu denki taki yu kan abi wan prati na a wroko disi fu preiki gi sma di e taki difrenti tongo? Fu san ede yu no e bigin luku sortu tra tongo sma gwenti taki na ini a kontren fu yu? Baka dati yu kan waka nanga wan tu traktaat noso brochure na ini den tongo dati. A pikin buku Goed nieuws voor mensen uit alle landen (Bun nyunsu gi sma fu ala nâsi), di kon na doro na ini 2004, yepi furu preikiman kaba fu prati a Kownukondre howpu na ini furu tra tongo na wan fasi di makriki fu frustan èn di e gi sma deki-ati.​—Luku na artikel „Goed nieuws voor mensen uit alle landen”, na tapu bladzijde 32.

„Lobi a trakondre sma”

16. Fa brada di abi frantwortu kan sori taki den de klariklari fu yepi trakondre sma di e taki wan tra tongo?

¹⁶ Awinsi wi no e leri wan tra tongo, toku wi alamala kan yepi trakondre sma na ini a kontren fu wi fu kon sabi san Bijbel e taki. Yehovah ben taigi a pipel fu en fu ’lobi trakondre sma di e tan na den mindri’ (Deuteronomium 10:18, 19). Fu eksempre, na ini wan bigi foto fu Noord-Amerika, yu abi feifi gemeente di e hori konmakandra na ini wán Kownukondre zaal. Neleki fa a de nanga furu zaal, dan ibri yari den gemeente e kenki den konmakandra dei. Dati ben o meki den konmakandra fu a Sneisi gemeente skoifi go na wan moro lati ten tapu sonde. Ma disi ben o meki taki furu fu den Sneisi di froisi kon na ini a kondre èn di ben e wroko na nyanyan-presi, no ben o man go na den konmakandra. Den owruman fu den tra gemeente ben de klariklari fu seti sani so, taki a Sneisi konmakandra ben kan hori na wan moro fruku ten tapu sonde.

17. Fa wi musu feni en te son brada nanga sisa bosroiti fu froisi fu go yepi wan grupu di e taki wan tra tongo?

¹⁷ Lobi-ati opziener e prèise lepi brada nanga sisa di abi ondrofeni, di wani froisi fu go yepi den grupu di e taki wan tra tongo. A kan taki a gemeente sa misi den brada nanga sisa disi di de bun Bijbel leriman, ma den opziener abi a srefi denki leki den owruman fu Listra nanga Ikonium. Den owruman disi no ben tapu Timoteyus fu gowe nanga Paulus, aladi Timoteyus ben de wan bigi yepi na ini a gemeente fu den (Tori fu den Apostel 16:1-4). Den wan di e teki fesi na ini a preikiwroko, no e tapu fu preiki gi trakondre sma, soso fu di den sma dati abi tra gwenti nanga tra fasi fu denki. Na presi fu dati, den e suku fu abi wan bun banti nanga den difrenti sma disi, so taki den kan prati a bun nyunsu nanga den.​—1 Korentesma 9:22, 23.

18. Sortu bigi okasi opo gi wi alamala?

¹⁸ Soleki fa Bijbel ben taki na fesi, dan a bun nyunsu e preiki na ini „ala den tongo di e taki na ini den kondre”. A moi fu si taki moro sma di e taki wan tra tongo abi na okasi fu kon na ini a tru anbegi. Dusundusun preikiman di sabi fa fu preiki na ini difrenti situwâsi, teki na okasi fu du a bigi wroko disi (1 Korentesma 16:9). Ma soleki fa a tra artikel o sori, dan wi musu du tra sani tu efu wi wan yepi den sma na ini den sortu kontren dati.

[Futuwortu]

Yu kan tyari disi kon na krin?

• Fa wi kan sori taki wi lobi ala sortu sma, neleki fa Yehovah lobi ala sortu sma?

• Fa wi musu denki fu den sma na ini a kontren fu wi, di no e taki a tongo fu wi?

• Fu san ede a moro bun fu preiki gi sma na ini den eigi tongo?

• Fa wi kan sori taki wi e broko wi ede nanga den trakondre sma na ini a kontren fu wi?

[Aksi fu a tori disi]

[Karta/​Prenki na tapu bladzijde 23]

(Efu yu wani si pe den sani disi skrifi, luku a tijdschrift)

Rome

KREITA

ASIA

FRIGIA

PAMFILIA

PONTUS

KAPADOSIA

MESOPOTAMIA

MEDIA

PARTIA

ELAM

ARABIA

LIBIA

EGEPTE

YUDEA

Yerusalem

[Den libi nanga se]

Mindrikondre Se

Blaka Se

Redi Se

Persia Se

[Prenki]

Na a Pinksterfesa fu 33 G.T., sma di ben komoto fu 15 kontren na ini a Gran Kownukondre Rome, ben yere a bun nyunsu na ini den eigi tongo

[Prenki na tapu bladzijde 24]

Furu trakondre sma e gi yesi na a waarheid fu Bijbel

[Prenki na tapu bladzijde 25]

Den wortu ’Kownukondre zaal’ na ini feifi difrenti tongo