Wi musu tron preikiman di man fiti densrefi na difrenti situwâsi
Wi musu tron preikiman di man fiti densrefi na difrenti situwâsi
„Mi tron ala sani gi ala sortu sma, so taki mi kan du iniwan sani di de fanowdu fu frulusu awinsi wan tu sma nomo.”—1 KORENTESMA 9:22.
1, 2. (a) Fu san ede wi kan taki dati na apostel Paulus ben de wan bun preikiman? (b) San Paulus taki fu sori fa a ben e denki fu a wroko di a kisi?
A BEN de wan man di ben man taki makriki nanga bigi koniman, ma sosrefi nanga sma di no ben kisi hei skoroleri. A ben man overtoigi heiheisma fu Rome, ma a ben man overtoigi pôti Frigiasma sosrefi. Den brifi fu en ben de wan deki-ati gi Grikisma di ben abi den eigi denki fu sani, ma sosrefi gi Dyu di ben e hori nomonomo na den gwenti fu den. A ben e taki-go-taki-kon na wan fasi di ben de krin fu frustan, ma den sani di a ben e taki ben naki sma ati tu. Ala ten a ben e suku fu taki fu sani di sma ben sabi, so taki a ben man yepi sonwan fu den fu bribi na ini Krestes.—Tori fu den Apostel 20:21.
2 A man disi ben de na apostel Paulus, èn a no de fu taki dati a ben de wan bun preikiman di ben man fiti ensrefi na difrenti situwâsi (1 Timoteyus 1:12). Yesus ben gi en a wroko fu „fruteri den trakondre sma, den kownu, èn den manpikin fu Israel, fu a nen fu [Krestes]” (Tori fu den Apostel 9:15). Fa a ben e prakseri fu a wroko disi? A ben taki: „Mi tron ala sani gi ala sortu sma, so taki mi kan du iniwan sani di de fanowdu fu frulusu awinsi wan tu sma nomo. Ma mi e du ala sani fu a bun nyunsu ede, so taki mi kan prati en nanga trawan” (1 Korentesma 9:19-23). Fa na eksempre fu Paulus kan yepi wi fu preiki moro bun èn fu gi sma leri na wan moro bun fasi?
Wan man di kenki en libi, e klari wan muilek wroko
3. Sortu denki Paulus ben abi fu Kresten bifo a drai en libi?
3 Na ala ten Paulus ben de wan sma di ben abi langa-pasensi, di ben e broko en ede nanga sma, èn di ben fiti fu du a wroko di a kisi? Kwetikweti! Fu di Saulus (soleki fa sma ben kari Paulus fosi) ben feni nomonomo taki a bribi fu en ben de a moro bunwan, meki a ben e frufolgu den bakaman fu Krestes na wan ogri-ati fasi. Di a ben de wan yonkuman, a ben feni en bun taki sma kiri Stefanus. Bakaten, na ogri-ati man disi ben e du ala muiti fu feni den Kresten fu poti den na strafu-oso (Tori fu den Apostel 7:58; 8:1, 3; 1 Timoteyus 1:13). A ben tan ’tapu skreki gi den disipel fu Masra’. Fu di a no ben nofo gi en fu frufolgu den bribiman na ini Yerusalem wawan, meki a bigin frufolgu den bribiman te na Damaskus, na a noordsei fu Yerusalem.—Tori fu den Apostel 9:1, 2.
4. Sortu kenki Paulus ben musu tyari kon, so taki a ben kan du a wroko di a ben kisi fu du?
4 A kan taki a moro bigi reide fu san ede Paulus ben abi bita-ati gi a Kresten bribi, na fu di a ben denki taki den Kresten ben o pori a Dyu bribi. A ben bribi taki den ben o moksi a Dyu bribi nanga den leri fu trakondre sma. Bika te yu luku en bun, Paulus ben de „wan Fariseiman”; a nen disi wani taki „wan sma di poti aparti” (Tori fu den Apostel 23:6). Prakseri fa Paulus skreki di a yere taki Gado teki en fu prati a bun nyunsu fu Krestes gi den srefi sma di a no ben lobi, iya, gi den sma di no ben de Dyu! (Tori fu den Apostel 22:14, 15; 26:16-18) Fu taki en leti, den Fariseiman ben e weigri fu nyan srefi nanga sma di den ben si leki sondari! (Lukas 7:36-39) A no de fu taki dati Paulus ben musu meki muiti fu kenki a fasi fa a ben e denki, èn a ben musu kisi a srefi denki leki Gado di wani taki ala sortu sma musu kisi frulusu.—Galasiasma 1:13-17.
5. Fa wi kan waka baka na eksempre fu Paulus te wi e du a diniwroko fu wi?
5 Kande wi musu du a srefi sani tu. Fu di moro nanga moro trakondre sma di e taki wan tra tongo e kon libi na ini a kontren fu wi, meki wi musu tan du muiti fu ondrosuku a fasi fa wi e denki, èn wi musu Efeisesma 4:22-24). Kande wi no sabi, ma a presi pe wi kweki èn a leri di wi kisi abi krakti na wi tapu. Disi kan meki taki wi e kisi wan fowtu denki fu tra sma, èn taki wi no man fiti wisrefi so makriki na trawan. Efu wi wani feni sma di de leki skapu èn efu wi wani yepi den, dan wi musu basi den firi dati (Romesma 15:7). Dati na san Paulus ben du. A teki a muilek wroko disi na en tapu fu miti moro sma na ini a diniwroko fu en. Lobi meki taki Paulus kweki wan tu fasi di ben de fanowdu fu gi sma leri na wan bun fasi, èn a bun fu waka baka na eksempre fu en. Iya, te wi o ondrosuku a diniwroko fu na ’apostel di ben musu preiki gi den trakondre sma’, dan wi o si taki a ben e poti prakseri na den sani di den sma ben abi fanowdu, a ben e fiti ensrefi na difrenti situwâsi, èn a ben sabi fa fu preiki èn gi leri na ala sortu sma. *—Romesma 11:13.
sorgu taki wi no e denki takru fu trakondre sma (Wan preikiman di ben e fiti ensrefi na difrenti situwâsi
6. Fa Paulus sori taki a ben e hori na prakseri sortu bribi èn sortu gwenti den arkiman fu en ben abi, èn san ben de a bakapisi?
6 Paulus ben e hori na prakseri sortu bribi èn sortu gwenti den arkiman fu en ben abi. Di Paulus ben e taki nanga Kownu Agrepa II, dan a ben sabi taki a kownu ben „sabi sortu gwenti nanga kesekese den Dyu abi”. Paulus ben sabi san Agrepa ben e bribi, èn a ben gebroiki dati na wan koni fasi fu taki nanga a kownu disi fu sani di a ben frustan bun. A krin fasi fa Paulus taki-go-taki-kon èn den buweisi di a tyari kon na fesi, ben meki taki Agrepa taki: „Efu mi no e luku bun, dan dyonsro yu o overtoigi mi ete fu tron wan Kresten.”—Tori fu den Apostel 26:2, 3, 27, 28.
7. Fa Paulus sori taki a ben man fiti ensrefi na difrenti situwâsi, di a ben e preiki gi wan grupu sma na ini Listra?
7 Paulus ben man fiti ensrefi na difrenti situwâsi tu. Luku san a ben taki fu tapu wan grupu sma na ini Tori fu den Apostel 14:14-18, dan Paulus ben sori go na den difrenti sani di Gado meki èn den bogobogo winimarki di den ben kisi fu den sani dati, fu buweisi den Likaoniasma taki a tru Gado na a Moro Heiwan. Disi ben makriki gi den fu frustan, èn soleki fa a sori, a ben man „tapu den sma fu no tyari ofrandi” gi Paulus nanga Barnabas.
a foto Listra fu no anbegi en nanga Barnabas leki gado. Son sma e taki dati den sma disi di ben e taki a Likaoniatongo, no ben kisi furu skoroleri èn taki den ben e poti furu prakseri na wan lo kruktubribi. Soleki fa wi kan leisi na ini8. Na sortu fasi Paulus sori taki a ben man fiti ensrefi, aladi a ben e atibron son leisi?
8 A no de fu taki dati Paulus no ben de volmaakti, èn son leisi sani ben meki Paulus kisi atibron. Fu eksempre, wan leisi sma ben gi Paulus syen èn den ben naki en sondro taki a ben du wan ogri. Ne Paulus bigin taki grofu nanga wan Dyu di ben nen Ananias. Ma di sma taigi Paulus taki a ben afrontu a gran priester, dan wantewante a aksi pardon fu di a no ben sabi taki a ben de a gran priester (Tori fu den Apostel 23:1-5). Di a ben de na ini Ateine, dan na ini a bigin a ben „ atibron pikinso di a si taki a foto ben lai nanga kruktugado”. Ma di Paulus hori en takimakandra na tapu a Mars-bergi, dan a no ben sori taki a ben e atibron. Na presi fu dati, a go na den presi pe den sma fu Ateine ben lobi hori takimakandra, èn a taki nanga den fu sani di den ben sabi. Fu eksempre, a ben sori go na wan altari pe den ben skrifi na tapu: „Gi wan Gado di wi no sabi”. Boiti dati, a ben gebroiki wortu sosrefi fu wan fu den puwema skrifiman fu den.—Tori fu den Apostel 17:16-28.
9. Fa Paulus sori taki a ben sabi fa fu preiki gi difrenti sortu sma?
9 Awinsi na ini sortu situwâsi Paulus ben de èn awinsi sortu sma a ben e miti, a ben sabi heri bun fa fu preiki gi den. A ben hori na prakseri taki a kulturu fu den arkiman fu en èn a presi pe den ben kweki, ben abi krakti tapu a fasi fa den ben e denki. Di a skrifi den Kresten na ini Rome, dan a ben sabi heri bun taki den ben e libi na ini a mamafoto fu a moro bigi tirimakti fu a ten dati. Wan prenspari penti di Paulus kari na ini a brifi di a ben skrifi gi den Kresten na ini Rome, ben abi fu du nanga a krakti di Krestes abi fu puru den takru bakapisi di a sondu fu Adam abi tapu sma. A ben taki nanga den Kresten na ini Rome èn den wan di ben de nanga den, na wan fasi di ben abi krakti tapu na ati fu den.—Romesma 1:4; 5:14, 15.
10, 11. Fa Paulus ben e fiti den agersitori fu en na a situwâsi fu den arkiman fu en? (Luku a futuwortu sosrefi.)
10 San Paulus ben e du te a ben wani fruklari dipi Bijbel waarheid gi den arkiman fu en? Te na apostel ben musu fruklari yeye afersi di ben muilek fu frustan, dan na wan koni fasi a ben e gebroiki agersitori fu aladei sani di den arkiman ben man frustan makriki. Fu eksempre, Paulus ben sabi taki den sma na ini Rome ben sabi a srafu-bisnis di ben de na ini a Gran Kownukondre Rome. Te yu luku en bun, dan furu fu den sma di a ben seni brifi gi, ben de srafu. Fu dati ede, Paulus ben gebroiki a srafu-libi leki wan agersitori fu poti krakti tapu a takimakandra fu en di ben abi fu du nanga a bosroiti di wan sma kan teki fu de wan srafu fu sondu, noso fu de wan srafu fu regtfardikifasi.—Romesma 6:16-20.
11 Wan buku e taki dati ’na ini Rome, wan sma di ben abi wan srafu ben kan fri a srafu dati sondro taki a srafu abi fu pai. Noso a srafu ben kan pai en masra, fu kon fri. Wan srafu ben kan kon fri tu efu den ben gi en abra na wan gado’. Wan srafu di kon fri ben kan tan wroko gi a masra fu en, aladi a masra e pai en gi a wroko di a e du. Soleki fa a sori, dan Paulus ben taki fu a seti disi di a ben e skrifi fu a bosroiti di wan sma kan teki fu gi yesi na iniwan masra di a wani, namku sondu noso regtfardikifasi. Den Kresten na ini Rome no ben de srafu fu sondu moro, ma Gado ben tron a masra fu den now. Den ben de fri fu dini Gado, ma efu den ben wani, den ben kan teki a bosroiti ete fu de wan srafu fu sondu, a fosi masra fu den. A makriki agersitori fu wan sani di sma ben sabi, ben o meki den Kresten na ini Rome aksi densrefi: ’Sortu masra mi e dini?’ *
San wi e leri fu na eksempre fu Paulus
12, 13. (a) Sortu muiti wi musu meki na ini a ten disi efu wi wani doro na ati fu den difrenti sortu sma di e arki wi? (b) San yu e du fu abi bun bakapisi na ini a preikiwroko te yu e miti sma di abi difrenti kulturu nanga gwenti?
12 Neleki Paulus, wi musu poti prakseri na san a sma abi fanowdu, wi musu fiti wisrefi na ini difrenti situwâsi, èn wi musu kon abi a koni fu man preiki gi ala sortu sma, so taki wi kan doro na ati fu den. Fu man yepi den arkiman fu wi fu kon frustan a bun nyunsu, dan wi wani du moro leki fu taki frafra nanga den sma, noso fu taki soso fu san wi sreka na fesi, noso fu libi wan Bijbel publikâsi na baka nomo. Wi musu meki muiti fu kon sabi san den sma abi fanowdu èn nanga san den e broko den ede, sosrefi san den lobi èn san den no lobi, noso san e meki den frede èn sortu fowtu denki den abi fu trawan. Aladi a sani disi e teki furu ten nanga muiti, toku Kownukondre preikiman na heri grontapu de klariklari fu du dati. Fu eksempre, a bijkantoro fu Yehovah Kotoigi na ini Hongaria e taki: „Den brada nanga sisa e lespeki den gwenti fu den trakondre sma èn sosrefi a fasi fa den e libi. Den no e fruwakti taki den sma dati o fiti densrefi na den gwenti fu a kondre.” Kotoigi na tra presi e meki muiti fu du a srefi sani.
13 Na ini wan fu den kondre krosibei fu Owstu Asia, furu sma e broko den ede nanga a gosontu fu den, nanga a fasi fa den musu kweki pikin, èn skoroleri de wan prenspari sani gi den. Kownukondre preikiman na ini a kondre dati e suku fu poti prakseri na den tori dati, na presi fu taki fu a fasi fa grontapu e go na baka, noso fu den difrenti problema di de na ini a libimakandra. Na a srefi fasi, den preikiman na ini wan bigi foto fu Amerkankondre kon si taki sma na ini wan fu den birti fu a kontren fu den, e broko den ede nanga sani soleki krukafasi, den bun furu wagi di e tapu den pasi, nanga ogridu. Den Kotoigi abi bun bakapisi te den e gebroiki den tori disi fu bigin wan Bijbel takimakandra. Bijbel leriman di abi bun bakapisi na ini a diniwroko fu den, e sorgu taki den e tan taki fu sani di e gi howpu nanga deki-ati, awinsi fu sortu tori den e bigin taki. Den e sori krin o furu winimarki sma e kisi te den e fiti Bijbel gronprakseri na ini den libi now, èn sortu blesi Gado sa gi sma na ini a ten di e kon.—Yesaya 48:17, 18; 52:7.
14. Kari wan tu fasi fa wi kan fiti wisrefi na san sma abi fanowdu èn na a situwâsi fu den.
14 A de wan yepi tu fu bigin wi takimakandra na difrenti fasi na ini a preikiwroko, fu di a kulturu fu den sma, a skoroleri di den kisi, èn a bribi fu den, e difrenti furu. A fasi fa wi e bigin wan takimakandra nanga sma di e bribi taki wan Mekiman de, ma di no e bribi na ini Bijbel, sa difrenti fu a fasi fa wi o bigin wan takimakandra nanga sma di no e bribi na ini Gado kwetikweti. Den sani di wi sa taigi wan sma di feni taki kerkibuku na sani di sma e gebroiki 1 Yohanes 5:20.
fu panya den eigi prakseri, sa difrenti fu den sani di wi sa taigi wan sma di e bribi den sani di Bijbel e leri. Wi musu man fiti wisrefi tu te wi e taki nanga sma di kisi hei skoroleri, nanga sma di no kisi furu skoroleri, noso di no kisi skoroleri kwetikweti. Preikiman di e gi bun leri, e taki-go-taki-kon na wan fasi di fiti gi den arkiman, èn den sa gebroiki agersitori fu sani di sma sabi.—Yepi gi nyun preikiman
15, 16. Fu san ede a de prenspari fu leri nyun preikiman fu tron bun leriman?
15 Paulus no ben e suku nomo fu kon moro bun na ini a fasi fa a ben gi leri. A ben si taki a ben de prenspari fu leri tra yonguwan, soleki Timoteyus nanga Titus, fu tron bun preikiman (2 Timoteyus 2:2; 3:10, 14; Titus 1:4). Na ini a ten disi, a de trutru fanowdu tu taki trawan e kisi leri fu tron bun preikiman.
16 Na ini 1914, yu ben abi sowan 5000 Kownukondre preikiman na heri grontapu. We, na ini a ten disi sowan 5000 nyun preikiman e teki dopu ibri wiki! (Yesaya 54:2, 3; Tori fu den Apostel 11:21) Te nyunwan e bigin abi demakandra nanga a Kresten gemeente èn efu den wani abi wan prati na ini a preikiwroko, dan den musu kisi leri èn rai (Galasiasma 6:6). A de tumusi prenspari taki wi e gebroiki den difrenti fasi fa wi Masra, Yesus, ben e gi leri èn ben e yepi den disipel fu en fu tron bun leriman. *
17, 18. Fa wi kan yepi nyun preikiman fu kisi deki-ati na ini a preikiwroko?
17 Yesus no ben seni den apostel fu en go preiki sondro fu sreka den fosi. Na a fosi presi, a ben sori den krin o prenspari a de fu du a preikiwroko, èn a ben gi den deki-ati fu tan begi Gado fu yepi den. Baka dati, a ben seti dri prenspari sani fu yepi den: a ben gi den wan patna, wan kontren fu preiki, nanga wan boskopu (Mateyus 9:35-38; 10:5-7; Markus 6:7; Lukas 9:2, 6). Wi kan du a srefi sani. Te wi e yepi wi eigi pikin, wan nyun studenti, noso wan sma di no teki prati na a preikiwroko wan pisi ten, dan a ben o bun fu yepi den na a fasi disi.
18 Nyun preikiman abi furu yepi fanowdu fu kisi deki-ati fu preiki a Kownukondre boskopu. Yu denki taki yu kan yepi den fu sreka èn oefen wan makriki pristeri di sa hari sma prakseri? Te yu de na ini a preikiwroko, dan meki den luku fa yu e hori den fosi takimakandra. Yu kan waka baka na eksempre fu Gideon, di ben taigi den tra fetiman fu en: „Un musu luku san mi e du, dan un musu du a srefi sani tu” (Krutuman 7:17). Baka dati, gi a nyun preikiman na okasi fu bigin wan takimakandra. Prèise den nyun preikiman na wan switi fasi gi a muiti di den e meki. Èn te a fiti, dan fruteri den syatu san den kan du moro bun.
19. Sortu fasti bosroiti yu abi fu man „du a diniwroko fu yu dorodoro”?
19 Efu wi wani ’du a diniwroko fu wi dorodoro’, dan wi musu abi a fasti bosroiti fu fiti wisrefi te wi e taki nanga sma. Wi wani yepi nyun preikiman fu du a srefi sani. A de prenspari fu yepi trawan fu kisi a sabi fu Gado di kan frulusu den. Te wi e hori dati na prakseri, dan wi sa abi na overtoigi taki a warti fu du ala muiti fu „tron ala sani gi ala sortu sma, so taki [wi] kan du iniwan sani di de fanowdu fu frulusu awinsi wan tu sma nomo”.—2 Timoteyus 4:5; 1 Korentesma 9:22.
[Futuwortu]
^ paragraaf 5 Yu kan leisi wan tu eksempre fu a moi fasi fa Paulus ben e du en diniwroko, na ini Tori fu den Apostel 13:9, 16-42; 17:2-4; 18:1-4; 19:11-20; 20:34; Romesma 10:11-15; 2 Korentesma 6:11-13.
^ paragraaf 11 Na a srefi fasi, di Paulus ben e taki fu a banti di Gado abi nanga den „manpikin” fu en di salfu nanga santa yeye, dan a ben gebroiki wan sani di kari na ini a wet fu a Gran Kownukondre Rome. Den sma di ben e leisi den brifi fu en, ben sabi krin fu san Paulus ben e taki (Romesma 8:14-17). „Na ini Rome, sma ben abi a gwenti fu teki pikin fu kweki den, èn den Romesma ben e teki den leki famiri”, na so a buku St. Paul at Rome e taki.
^ paragraaf 16 Nownow, na ini ala gemeente fu Yehovah Kotoigi yu abi a ’Pionier e yepi trawan’-programa. Nanga yepi fu a seti disi, den furuten preikiman di abi ondrofeni èn di kisi leri, kan yepi tra preikiman di no abi so furu ondrofeni.
Yu e memre disi ete?
• Fa wi kan waka baka na eksempre fu Paulus te wi e du a diniwroko fu wi?
• Sortu kenki wi musu tyari kon kande na ini a fasi fa wi e denki?
• Fa wi kan tan tyari a boskopu fu wi na wan fasi di e gi sma deki-ati?
• San nyun preikiman abi fanowdu fu man kisi deki-ati fu preiki?
[Aksi fu a tori disi]
[Prenspari pisi na tapu bladzijde 29]
Na apostel Paulus ben e poti prakseri na sma, a ben e fiti ensrefi na den, èn a ben e wroko nanga koni te a ben e preiki èn gi sma leri
[Prenspari pisi na tapu bladzijde 31]
Yesus ben seti dri sani fu yepi den disipel fu en: a ben gi den wan patna, wan kontren fu preiki, nanga wan boskopu
[Prenki na tapu bladzijde 28]
Paulus ben abi bun bakapisi te a ben e taki nanga difrenti sortu sma, fu di a ben e fiti ensrefi na a situwâsi fu den sma
[Prenki na tapu bladzijde 30]
Bun preikiman e hori na prakseri sortu kulturu nanga gwenti den arkiman fu den abi
[Prenki na tapu bladzijde 31]
Preikiman di e fiti densrefi na difrenti situwâsi, e yepi nyun preikiman fu sreka gi a diniwroko