Kresnetiten​—San a wani taki trutru gi sma?

GI MILYUNMILYUN sma, Kresnetiten nanga Nyun-Yari na wan ten fu de nanga famiriman èn nanga mati, iya, wan ten fu kon makandra nanga lobiwan. Furu tra sma e si den dei disi leki wan ten fu memre taki Yesus Krestes ben gebore, èn fu prakseri san a du so taki libisma kan kisi frulusu. Tra fasi leki na ini tra kondre, a ben de so fosi taki sma na ini Rosiakondre no ben mag hori Kresneti. Aladi den memre fu na Orthodox Kerki fu Rosiakondre ben e hori Kresneti hondrohondro yari langa na wan fri fasi, toku den no ben mag du dati wan heri pisi ten na ini a di fu 20 yarihondro. San ben tyari a kenki dati kon?

Syatu baka a revo fu den Communist Bolsjewieksma, den tiriman fu a Sovyet-Unie bigin du ala san den man fu dwengi den sma fu den kondre drape fu no bribi moro na ini Gado. Den no ben agri kwetikweti nanga Kresnetiten, noso nanga den sani di sma ben e du fu memre a ten di Krestes gebore. Lanti bigin leri sma taki den no musu hori Kresneti nanga a Nyun-Yarifesa. Den sori krin sosrefi taki den no ben feni den sani bun di sma ben e gebroiki na den fesadei disi. Dati ben de sani soleki a Kresnetibon, nanga Ded Moroz, noso Granpapa Vorst, a sma di den Rosiasma e si leki Santa Claus (a kerstman).

Na ini 1935, wan kenki kon di meki taki den Rosiasma bigin si den fesadei disi na wan heri tra fasi. Den Sovyet kondre ben bigin baka fu gebroiki den sani soleki Granpapa Vorst, nanga a Kresnetibon, èn den bigin hori a Nyun-Yarifesa baka. Ma now sani ben de heri tra fasi. Soleki fa sma ben taki, Granpapa Vorst no ben o tyari kado kon na Kresnetiten, ma na a dei te sma ben e hori a Nyun-Yarifesa. Den no ben o gebroiki wan Kresnetibon tu. Now sma ben o gebroiki wan Nyun-Yaribon! Sobun den kondre fu a Sovyet-Unie ben kon si sani heri tra fasi. Fu taki en leti, a Nyun-Yarifesa kon na ini a presi fu Kresneti.

Kresnetiten kon tron wan grontapu fesa di no ben abi noti fu du nanga Krestes, èn na so lanti ben wani en. Sma no ben e moi a Nyun Yaribon nanga sani di abi fu du nanga Krestes, ma nanga grontapu sani di ben e sori fa a Sovyet-Unie ben go na fesi. Wan koranti fu Rosiakondre e fruklari: „Te yu e luku den sani di sma e gebroiki fu moi a Nyun-Yaribon, dan yu kan kon sabi fa sani waka na ini den yari di sma ben e seti sani fu meki a libimakandra tron wan Communist libimakandra. Boiti den pikin konikoni, slinger, nanga den lontu brede di sma ben gwenti meki fu moi den bon, sma meki sani sosrefi di ben gersi grasi nefi, amra, nanga traktor. Bakaten sma bigin gebroiki sani soleki pikin popki fu man di e wroko na ondrogron fu suku gowtu noso tra sani, èn fu sma di e frei raket go na tra planeiti. Boiti dati, sma gebroiki prei sani di gersi olipompu, raket, nanga pikin wagi di sma e gebroiki na tapu a mun” (Vokrug Sveta (Around the World)).

Fa a de nanga Kresneti srefi? A no de fu taki dati sma no ben e si a dei disi moro leki wan fesadei. Na presi fu dati, lanti fu a Sovyet-Unie meki a dei disi kon tron wan wrokodei. Den sma di ben wani hori a Kresneti fesa ben kan du dati, ma den ben musu luku bun taki trawan no ben e kon sabi fu dati, bika den ben kan kisi problema nanga lanti. Iya, na ini a di fu 20 yarihondro, den sma na ini Rosiakondre bigin si den fesadei tra fasi. Den no ben e si den leki kerki fesa moro, ma leki grontapu fesa.

Wan tra kenki na ini a ten disi

Na ini 1991, wan kaba kon na a Sovyet-Unie, èn den kondre dati kon kisi srefidensi. A sani disi meki taki den sma drape kon fri fu du moro sani soleki fa densrefi wani. Lanti fu a Sovyet-Unie no ben e tapu sma moro fu bribi na ini Gado. Na ini difrenti fu den kondre di ben kon abi den eigi tirimakti, moro furu sma no ben e anbegi Gado, èn na  ini den kondre dati Kerki nanga Lanti no ben e moksi nanga makandra. Furu sma di ben wani anbegi Gado, kon si taki den ben kan anbegi Gado now soleki fa den wani. Wan fasi fu du dati, na so den ben feni, ben de fu hori Kresneti, a fesa di ben abi fu du nanga a bribi fu den. Ma heri esi furu fu den sma dati kon si taki sani no ben e waka kwetikweti leki fa den ben fruwakti. San ben pasa?

Ibri yari, sma ben e gebroiki a fesa disi moro nanga moro fu meki moni. Iya, neleki fa a de na ini den kondre di no de na ondro a Communist tiri, na so Kresnetiten e gi bisnisman wan moi okasi fu meki moni. Wenkriman e poti Kresneti sani di sma kan gebroiki fu moi den oso, na fesisei fu a wenkri fu den, so taki ala sma kan si den sani disi. Kresneti poku fu den kondre di no de ondro a Communist tiri, de fu yere now na ini wenkri, aladi den Rosiasma no ben sabi den sani disi fosi. Sma di e seri sani e syow bigi tas nanga moimoi sani di abi fu du nanga Kresneti, èn den e seri den sani disi na ini loko di e tyari sma go na den wrokope, èn na ini bus. Disi na a situwâsi now na ini Rosiakondre na Kresnetiten.

Aladi son sma no e si en leki wan problema taki trawan abi a drei-ai fu gebroiki Kresnetiten fu meki moni, toku den sma disi srefi kande no e agri nanga wan tra takru sani di e pasa na a ten disi. Dati na a dringi di sma e dringi tumusi furu sopi, èn ala den takru sani e pasa leki bakapisi fu dati. Wan datra di e wroko na wan EHBO-afdeling fu wan ati-oso na ini Rosiakondre, ben taki: „Datra sabi taki na a Nyun-Yarifesa wan lo sma o kisi mankeri fu di trawan naki den, noso fu di den fadon. Den sabi tu taki trawan o kisi mankeri fu di sma sutu den nanga nefi, noso nanga gon. Furu fu den sani disi e pasa fu di famiriman e feti nanga makandra, fu di drunguman e feti nanga makandra, èn fu di sma e rèi kon naki den oto.” Wan sabiman di abi bigi frantwortu na wan afdeling fu a Heiskoro fu Sabidensi na ini Rosiakondre, ben taki: „A nomru fu sma di e dede fu di den dringi tumusi furu sopi, e kren. A nomru disi ben hei srefisrefi na ini a yari 2000. A nomru fu sma di kiri densrefi èn a nomru fu sma di kiri trawan, e kren tu.”

A sari fu taki dati wan tra sani de ete di e meki taki sma na ini Rosiakondre e tyari densrefi na wan moro ogri fasi na a ten fu den fesadei. Na fesisei fu a koranti Izvestiya, den wortu „Den Rosiasma e hori Kresneti tu leisi wán yari”, ben skrifi nanga bigi letter na tapusei fu wan artikel. Na artikel disi ben taki: „Pikinmoro wán fu ibri tin Rosiasma e hori Kresneti tu leisi wán yari. A kantoro di e ondrosuku fa sma na ini a kondre e denki fu spesrutu tori (ROMIR), ben ondrosuku a tori dati. A kantoro sori taki 8 procent fu den sma di ben teki prati na a ondrosuku, e taki dati den e hori Kresneti tapu 25 december fu a Lomsu Kresneti kalender, èn sosrefi tapu 7 yanuari, soleki fa a gwenti de na ini a Orthodox bribi . . . A de krin fu si taki son sma no e si Kresneti leki wan ten fu poti prakseri na Krestes, ma taki den e si en leki wan okasi fu hori fesa.” *

 A fasi fa sma e hori Kresneti nanga Nyun-Yari, e gi grani trutru na Krestes?

A de krin fu si taki na a ten fu Kresneti nanga Nyun-Yari, furu sma no e tyari densrefi na wan fasi di fiti. Awansi fa a sani disi fruferi, toku son sma feni taki den musu memre den dei disi fu sori lespeki gi Gado nanga Krestes. A de wan bun sani te sma wani plisi Gado. Ma Gado nanga Krestes breiti trutru nanga Kresnetiten? Luku san na a rutu fu a fesa disi.

Fu gi wan eksempre, awansi san wan sma e denki fu a fasi fa den sma fu a Sovyet-Unie e si Kresneti, a ben o muilek fu krutu den tori di abi fu du nanga a ten di pasa, soleki fa dati skrifi na ini a buku Great Soviet Encyclopedia. A buku disi e taki: „Kresneti . . . komoto fu a gwenti di den sma fu a ten bifo Krestes ben abi fu anbegi gado di ben e ’dede èn di ben e kisi wan opobaka’. A sani dati ben de wan gwenti spesrutu fu den pipel di ben e prani gron, èn di ben e memre a ten te a gado fu den di de sosrefi wan Frulusuman, èn di e gi ala sani nyun libi, ben e ’gebore’. Den ben e du dati moro furu na ini a kowru pisi ten fu a yari, te a son ben e drai kon baka, namku na ini a pisi ten fu 21 te go miti 25 december.”

Kande a sani disi di a buku dati e sori krin, sa hari yu prakseri. A buku e taki: „Krestendom fu den fosi yarihondro no ben e leri sma fu hori Kresneti. . . . Bigin fu a mindripisi fu a di fu fo yarihondro, Krestendom teki a gwenti abra fu memre a drai di a son ben e drai kon baka na ini a kowru pisi ten fu a yari, wan sani di ben abi fu du nanga na anbegi fu Mithra, èn den meki a sani dati kon tron a Kresneti fesa. Den fosi sma di ben e hori Kresneti, ben de den sma fu den kerki libimakandra na ini Rome. Na ini a di fu tin yarihondro, Kresneti nanga a Kresten bribi, panya go na Rosiakondre pe a moksi nanga a fesa di den owruten Slafiasma ben e hori na ini a kowru pisi ten fu a yari, fu gi grani na den yeye fu den afo fu den.”

Kande yu e aksi yusrefi: ’A de so taki Gado Wortu, Bijbel, e taki dati Yesus gebore tapu 25 december?’ Fu taki en leti, Bijbel no e taki sortu dei Yesus gebore, èn boiti taki Yesus srefi no ben taki fu a tori disi, a no tru kwetikweti taki a ben taigi sma fu memre a dei dati. Ma toku Bijbel e yepi wi fu kon sabi na sortu ten fu a yari Yesus gebore.

Soleki fa na Evangelie fu Mateyus kapitel 26 nanga 27 e sori, dan sma kiri Yesus tapu 14 Nisan, lati bakadina tapu a dei fu a Dyu Paskafesa di ben bigin tapu 31 maart 33 G.T. Na Evangelie fu Lukas e sori wi taki Yesus ben abi sowan 30 yari di a teki dopu fu bigin nanga a diniwroko fu en (Lukas 3:21-23). A du a diniwroko dati dri nanga afu yari langa. Sobun, Yesus ben abi sowan 33 nanga afu yari di a dede. A ben o tron 34 yari na a ten fu 1 oktober 33 G.T. Lukas e sori taki na a ten di Yesus gebore, skapuman ben e „tan na ini den wei fu hori wakti gi den skapu fu den te neti” (Lukas 2:8). Den skapuman na ini a kontren fu Betlehem no ben de na ini den wei nanga den skapu fu den na ini a kowru pisi ten fu december, bika na a ten dati a kontren drape kowru so te, taki snew srefi kan fadon. Ma den ben kan de drape na a pisi ten fu 1 oktober, bika te wi e luku san Bijbel e taki, dan dati ben de a ten di Yesus gebore.

Ma fa a de dan nanga a Nyun-Yarifesa? Soleki fa wi si kaba, dan dati na wan fesa pe sma lobi tyari densrefi na wan fasi di no fiti kwetikweti. Aladi sma pruberi fu kenki a fesa disi kon tron wan grontapu fesa, toku a rutu fu a fesa disi no soifri tu.

 A de krin fu si taki te wi e luku den sani di e pasa na a ten fu Kresneti nanga Nyun-Yari, dan ala den sani di sma e taki fu sori taki den lobi Yesus, na soso sani. Kande yu e broko yu ede nanga a teki di sma e teki Kresnetiten fu meki moni, nanga a takru fasi fa sma e tyari densrefi na a ten disi, noso nanga den rutu fu a fesa disi di abi fu du nanga heiden gwenti di no fiti. Efu dati de so, no lasi ati. Wan yoisti fasi de fa wi kan gi Gado nanga Krestes a grani di den musu kisi, èn na a srefi ten wi kan tranga a banti nanga den famiriman fu wi tu.

 Wan moro bun fasi fu gi grani na Gado nanga Krestes

Bijbel e sori wi taki Yesus Krestes kon „fu gi en sili leki wan lusu-paiman fu frulusu furu sma” (Mateyus 20:28). A gi pasi taki sma kiri en, fu di a ben de klariklari fu dede gi den sondu fu wi. Kande son sma ben sa wani gi grani na Krestes, èn kande den feni taki den kan du disi na Kresnetiten. Ma soleki fa wi si, dan Kresneti nanga a Nyun-Yarifesa no abi noti fu du nanga Krestes, èn wi si taki den fesa disi rutu na ini heiden fesa. Èn awansi fa son sma lobi Kresnetiten, toku a de so taki sma e gebroiki a ten disi tu fu meki moni na ala sortu fasi. Boiti dati, wi musu agri taki na a ten fu a Kresneti fesa, sma gwenti fu tyari densrefi na wan syen fasi, èn Gado nanga Krestes no feni a sani disi bun.

San wan sma di wani plisi Gado musu du? A sma disi no musu tan hori ensrefi na libisma gwenti di kande e gi den a firi taki den de getrow na Gado, aladi den gwenti disi no e kruderi nanga Bijbel. Na presi fu dati, wan sma di de opregti o suku fu kon sabi san na a yoisti fasi fa fu gi grani na Gado nanga Krestes. San na a yoisti fasi dati, èn san wi musu du?

Krestes srefi e taigi wi: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, wan sma di de opregti trutru wani kisi soifri sabi di e sori en fa fu gi grani na Gado nanga Krestes. A sma dati no sa gebroiki a sabi disi na wan spesrutu pisi ten fu a yari nomo, ma na ini en aladei libi. Gado breiti te wan sma e du opregti muiti na a fasi disi, fu di a sani disi kan meki taki a sma dati kisi têgo libi.

Yu ben o wani fu yu osofamiri de sma di e gi trutru grani na Gado nanga Krestes na a fasi fa Bijbel e leri wi fu du dati? Yehovah Kotoigi yepi milyunmilyun famiri na heri grontapu fu kisi a prenspari sabi fu Bijbel. Nanga wi heri ati wi e gi yu a deki-ati fu taki nanga Yehovah Kotoigi na ini a kontren fu yu, noso fu gebroiki wan fu den adres di de na tapu bladzijde 2 fu a tijdschrift disi, fu skrifi go na den.

[Futuwortu]

[Faki/​Prenki na tapu bladzijde 7]

A rutu fu a Nyun-Yarifesa

Wan moniki fu na Orthodox Kerki fu Georgia e taki sondro frede san a e denki fu a tori disi

„A Nyun-Yarifesa rutu na ini wan tu heiden fesadei fu owruten Rome. A fosi dei fu yanuari ben de wan fesadei di ben abi fu du nanga a heiden gado Yanus, èn na fu a gado disi a nen fu a mun Yanuari komoto. Prenki nanga popki fu Yanus ben e sori taki a abi tu fesi, wán na fesisei èn wán na bakasei. Dati ben wani taki dati a ben e si fa sani waka na ini a ten di pasa èn fa sani e waka na ini a ten di den anbegiman fu en ben e libi na ini. Sma ben abi wan sani e taki dati iniwan sma di ben e bigin a fosi dei fu yanuari nanga prisiri èn nanga wan lo nyanyan nanga dringi, ben o de koloku a heri yari dati, èn ben o de gosontu. Na a srefi kruktubribi dati furu fu den kondreman fu wi abi di e hori a Nyun-Yarifesa . . . Na a ten fu son heiden fesadei, sma ben gwenti fu tyari ofrandi gi wan falsi gado. Na sonwan fu den dei disi, sma ben e hori fesa pe den ben e tyari densrefi na wan fasi di no fiti kwetikweti, den ben e du sutadu, nanga hurudu. Na tra fesadei, soleki a fesadei fu Yanus, sma ben e nyan èn ben e dringi tumusi furu, den ben e kon drungu, èn den ben e du ibri sortu fisti sani di wan sma ben kan du na ini den sortu situwâsi dati. Efu wi e prakseri fa wisrefi ben gwenti hori a Nyun-Yarifesa, dan wi musu agri taki wi alamala ben e teki prati na a heiden fesa disi.”​—Wan koranti fu Georgia.

[Prenki na tapu bladzijde 6]

Krestenhèit teki na anbegi fu Mitra abra

[Sma di abi a reti fu a prenki]

Museum Wiesbaden

[Prenki na tapu bladzijde 7]

Skapuman no ben de na ini den wei nanga den skapu fu den na ini a kowru pisi ten fu december