Now na a ten fu handri

„O langa unu sa tan tingatinga na tapu tu difrenti prakseri?”​—1 KOWNU 18:21.

1. Fu san ede a ten fu wi de heri tra fasi leki a ten di pasa?

YU E bribi taki Yehovah na a wan-enkri tru Gado? Yu e bribi tu taki Bijbel profeititori e sori taki wi e libi na ini „den lasti dei” fu na ogri sistema fu Satan? (2 Timoteyus 3:1) Efu yu e bribi den sani disi, dan a no de fu taki dati yu e agri taki now na a ten fu handri. Noiti ete na ini a historia fu libisma so furu sma kan lasi den libi, leki na ini a ten disi.

2. San ben e pasa na ini a tin-lo kownukondre fu Israel, di Kownu Akab ben e tiri?

² Na ini a di fu tin yarihondro b.G.T., a nâsi Israel ben musu teki wan bosroiti di ben seryusu srefisrefi. Suma den ben o dini? Iseibel, a heiden wefi fu Kownu Akab, ben gi a kownu deki-ati fu meki a tin-lo kownukondre Israel anbegi Bâal. Sma ben e bribi taki Bâal ben de wan gado di ben kan gi den alen èn taki a ben kan blesi a gronwroko fu den. A kan taki furu fu den sma di ben e anbegi Bâal, ben e trowe bosi gi den popki fu a gado fu den, noso den ben e kindi gi en. Fu meki Bâal blesi a gronwroko èn fu a blesi den meti fu den, dan den anbegiman fu en ben abi seks nanga den huru-uma di ben e wroko na ini a tempel. Den ben abi a gwenti tu fu kotikoti densrefi nanga nefi, fu meki brudu lon na den skin.​—1 Kownu 18:28.

3. San ben de a bakapisi di a pipel fu Gado go anbegi Bâal?

³ Sowan 7000 Israelsma ben weigri fu teki prati na a falsi anbegi dati pe sma ben e du afkodrei, hurudu, nanga ogridu (1 Kownu 19:18). Den ben tan getrow na a frubontu di den ben meki nanga Yehovah Gado, èn na fu dati ede den ben kisi frufolgu. Fu eksempre, na Uma-kownu Iseibel ben kiri furu fu den profeiti fu Yehovah (1 Kownu 18:4, 13). Fu di a situwâsi ben de so muilek, meki furu fu den Israelsma ben e pruberi fu plisi Yehovah, ma na a srefi ten den ben wani plisi Bâal tu. Ma te wan Israelsma ben drai baka gi Yehovah fu go dini wan falsi gado, dan fu taki en leti, sowan sma ben fadon komoto na bribi. Yehovah ben pramisi den Israelsma taki a ben o blesi den efu den ben o lobi en èn efu den ben o gi yesi na den komando fu en. Ma a ben warskow den taki efu den no ben o „dini en wawan”, dan den ben o kisi pori.​—Deuteronomium 5:6-10; 28:15, 63.

4. San ben o pasa na mindri Kresten, soleki fa Yesus nanga den apostel fu en ben taki na fesi? Fa a sani disi kon tru?

 ⁴ A srefi sani e pasa nanga Krestenhèit na ini a ten disi. Sma di e go na kerki e taki dati den na Kresten, ma den fesadei fu den, a fasi fa den e tyari densrefi, èn den leri fu den, no e kruderi nanga san Bijbel e leri wi. Den kerki tiriman fu Krestenhèit e teki fesi fu frufolgu Yehovah Kotoigi, neleki fa Iseibel ben frufolgu Gado pipel na ini owruten. Someni yari kaba, den kerki tiriman fu Krestenhèit e horibaka gi orloku tu, èn fu dati ede den de frantwortu gi a dede fu milyunmilyun memre fu a kerki. Fu di den e horibaka gi grontapu tirimakti na so wan fasi, meki Bijbel e taki dati den e du hurudu na yeye fasi (Openbaring 18:2, 3). Boiti dati, Krestenhèit e gi pasi moro nanga moro taki sma e du hurudu, èn srefi den kerki tiriman e libi na so wan fasi. Yesus Krestes nanga den apostel fu en ben taki na fesi dati a ten disi ben o kon pe furu sma ben o fadon komoto na bribi (Mateyus 13:36-43; Tori fu den Apostel 20:29, 30; 2 Petrus 2:1, 2). San o pasa te fu kaba nanga den moro leki wán milyard sma di e horibaka gi Krestenhèit? Èn sortu frantwortu tru anbegiman fu Yehovah abi na den sma disi èn na ala tra sma di meki taki falsi bribi kori den? Wi e kisi krin piki tapu den aksi disi te wi e ondrosuku den span sani di pasa, èn di meki taki sma ’puru Bâal fu Israel’.​—2 Kownu 10:28.

A lobi di Gado ben abi gi a tranga-ede pipel fu en

5. Fa Yehovah ben sori na wan lobi-ati fasi taki a ben e broko en ede nanga a tranga-ede pipel fu en?

⁵ Yehovah Gado no e prisiri fu strafu den wan di e drai baka gi en. Leki wan lobi-ati Papa, a wani trutru taki den ogriwan e sori berow èn taki den drai kon baka na en (Esekièl 18:32; 2 Petrus 3:9). Leki buweisi fu disi, Yehovah ben seni furu profeiti na ini a ten fu Akab nanga Iseibel, fu go warskow a pipel fu En gi den ogri di ben o miti den fu di den ben e anbegi Bâal. Wan fu den profeiti disi ben de Elia. Gado ben taki na fesi taki wan bigi dreiten ben o kon.  Baka a dreiten dati Elia ben taigi Kownu Akab fu kari den Israelsma nanga den profeiti fu Bâal kon na wán na tapu Karmelbergi.​—1 Kownu 18:1, 19.

6, 7. (a) Fa Elia ben sori den Israelsma san ben de a moro prenspari sani di ben meki taki den fadon komoto na bribi? (b) San den profeiti fu Bâal ben du? (c) San Elia ben du?

⁶ Den ben kon makandra na a presi pe wan altari fu Yehovah ben de, ma di sma ben „broko puru” kande fu plisi Iseibel (1 Kownu 18:30). A ben de wan sari sani taki den Israelsma di ben de drape no ben kan taki krin efu na Yehovah noso Bâal ben abi a makti fu gi den na alen di den ben abi fanowdu trutru. Sowan 450 profeiti fu Bâal ben de drape, aladi Elia ben de a wan-enkri profeiti fu Yehovah. Fu di Elia ben wani sori a pipel san ben de a moro prenspari sani di ben meki taki den fadon komoto na bribi, meki a aksi den: „O langa unu sa tan tingatinga na tapu tu difrenti prakseri?” Baka dati, a taki moro krin nanga den. A taigi den: „Efu Yehovah na a tru Gado, dan go waka na en baka; ma efu a de Bâal, dan go waka na en baka.” Elia ben wani gi den Israelsma di ben e tweifri, deki-ati fu dini Yehovah wawan. Dati meki a taigi den fu du wan spesrutu sani di ben o sori suma na a tru Gado. Den ben o srakti tu mankaw leki ofrandi; a wán gi Yehovah, èn a trawan gi Bâal. A Gado di ben o bron a srakti-ofrandi fu en nanga faya, ben o sori fu de a tru Gado. Den profeiti fu Bâal ben sreka na ofrandi fu den, èn furu yuru langa den ben e bari: „O Bâal, piki wi!” Di Elia bigin meki spotu nanga den, den bigin koti densrefi teleki brudu bigin lon na den skin, èn den bigin bari moro tranga srefi. Ma Bâal no ben piki den.—1 Kownu 18:21, 26-29.

⁷ Now Elia ben kisi na okasi fu sreka na ofrandi fu en. A fosi sani di a du ben de taki a meki na altari fu Yehovah kon bun baka èn a poti den pisi meti fu a yongu mankaw na tapu na altari. Baka dati, a ben taigi sma fu lai watra na ini fo bigi watrakan èn fu kanti a watra tapu na ofrandi. Den ben du disi dri leisi, teleki a gotro lontu na altari ben kon furu nanga watra. Ne Elia begi: „O Yehovah, a Gado fu Abraham, Isak, nanga Israel, meki sma kon sabi tide taki yu na Gado na ini Israel, taki mi na yu futuboi èn taki na fu yu wortu ede meki mi du ala den sani disi. Piki mi, o Yehovah, piki mi, so taki a pipel disi kan sabi taki yu, Yehovah, na a tru Gado èn yusrefi tyari na ati fu den kon baka.”—1 Kownu 18:30-37.

8. Fa Gado ben gi piki tapu a begi fu Elia, èn fa a profeiti ben handri baka dati?

⁸ A tru Gado ben gi piki tapu a begi fu Elia èn a seni faya komoto fu hemel di bron na ofrandi èn a heri altari. A faya dati ben drei a watra srefi di ben de na ini a gotro lontu na altari! Prakseri  sortu krakti dati ben abi tapu den Israelsma. „Wantewante den ben fadon na tapu den fesi èn ben taki: ’Yehovah, na a tru Gado! Yehovah na a tru Gado!’” Baka dati, Elia du wan tra tumusi prenspari sani. A gi den Israelsma a komando: „Grabu den profeiti fu Bâal! No meki nowan fu den lowe!” Ne den kiri ala den 450 profeiti fu Bâal na a futu fu Karmelbergi.​—1 Kownu 18:38-40.

9. Fa den tru anbegiman ben kisi tesi bakaten?

⁹ Na a srefi prenspari dei dati, Yehovah ben meki alen fadon na ini a kondre, fu a fosi leisi na ini dri nanga afu yari! (Yakobus 5:17, 18) A no de fu taki dati den Israelsma ben abi furu fu fruteri di den drai go baka na den oso; Yehovah ben buweisi taki en na a tru Gado. Ma den anbegiman fu Bâal no ben tapu. Iseibel ben tan frufolgu den futuboi fu Yehovah (1 Kownu 19:1, 2; 21:11-16). Sobun, a pipel fu Gado ben kisi tesi baka tapu a soifri retifasi fu den. Den ben o sori taki den e dini Yehovah wawan te a dei fu en ben o doro fu krutu den anbegiman fu Bâal?

Handri nownowde

10. (a) San salfu Kresten du na ini a ten disi? (b) San a wani taki fu gi yesi na a komando di skrifi na ini Openbaring 18:4?

¹⁰ Na ini a ten fu wi, salfu Kresten du wan wroko neleki a di fu Elia. Nanga yepi fu a preikiwroko èn nanga yepi fu buku di den prati, den warskow sma fu ala nâsi fu abi noti fu du nanga falsi bribi. Den no warskow sma di de fu Krestenhèit wawan, ma sosrefi sma di abi tra bribi. Leki bakapisi fu dati, milyunmilyun sma handri wantewante èn den puru den nen na falsi bribi. Den gi den libi abra na Yehovah èn den tron dopu disipel fu Yesus Krestes. Iya, den ben gi yesi na a seryusu warskow di Gado gi fu falsi anbegi: „Komoto drape, mi pipel, efu unu no wani abi prati nanga en na den sondu fu en èn efu unu no wani taki den rampu fu en kon na un tapu tu.”​—Openbaring 18:4.

11. San wan sma musu du efu a wani taki Yehovah feni en bun?

¹¹ Milyunmilyun tra sma de di lobi a Bijbel boskopu di Yehovah Kotoigi e prati, ma den no sabi ete san den musu du. Wan tu fu den sma disi e kon na den Kresten konmakandra son leisi, soleki a Memrefesa noso den e kon arki wan tu lezing na a distrikt kongres. Wi e gi ala den sma disi a deki-ati fu poti bun prakseri na den wortu fu Elia, di taki: „O langa unu sa tan sondro fu teki wan bosroiti?” (1 Kownu 18:21, New English Bible) Na presi fu draidrai, den musu teki wan fasti bosroiti nownowde èn den musu wroko tranga na densrefi fu tron anbegiman fu Yehovah di gi densrefi abra na en, èn di teki dopu. Efu den no du dati, dan den kan lasi a blesi fu kisi têgo libi!​—2 Tesalonikasma 1:6-9.

12. Na ini sortu muilek situwâsi son dopu Kresten poti densrefi, èn san den musu du?

¹² A de wan sari sani taki wan tu dopu Kresten no e preiki ibri mun moro, èn taki sonwan tapu nanga a diniwroko fu den (Hebrewsma 10:23-25; 13:15, 16). Trawan lasi a faya di den ben abi fu di den frede frufolgu, fu di den e broko den ede nanga na aladei libi, fu di den e feti baka gudu, noso fu di den e suku nomo fu du den sani di den lobi. Yesus ben warskow den bakaman fu en taki den srefi sani disi ben kan meki taki sonwan fu den ben o naki futu, taki den ben o lasi bribi krinkrin, èn taki den ben o fadon na ini trapu (Mateyus 10:28-33; 13:20-22; Lukas 12:22-31; 21:34-36). Na presi fu „tingatinga na tapu tu difrenti prakseri” fu taki en so, den wan disi musu kon „de nanga faya, èn abi berow”, fu di den e teki a fasti bosroiti fu libi soleki fa den ben pramisi di den gi densrefi abra na Gado.​—Openbaring 3:15-19.

Wantronso falsi bribi sa kisi pori

13. Fruteri fa a situwâsi ben de na ini Israel di sma salfu Yehu fu tron kownu.

¹³ A sani di pasa na ini Israel, sowan 18 yari baka di Yehovah sori den Israelsma na tapu Karmelbergi taki en na a tru Gado, e sori fu san ede a de prenspari fu teki wan fasti bosroiti nownowde. Na ini a pisi ten fu a diniwroko fu Elisa, a profeiti di kon baka Elia, dan a dei di Yehovah krutu na anbegi fu Bâal, ben kon na wan momenti di sma no ben fruwakti. Yoram, a manpikin fu Kownu Akab, ben e tiri na ini Israel, èn na  uma-kownu Iseibel, a mama fu Yoram, ben de na libi ete. Sondro taki sma ben sabi, Elisa seni a dinari fu en fu salfu a legre-edeman Yehu leki a nyun kownu. Na a ten dati, Yehu ben de na Ramot-Gilead na a owstusei fu a Yordanliba, e teki fesi na ini wan orloku teige den feanti fu Israel. Kownu Yoram ben de na Yisreèl na a lagi presi krosibei fu Megido, fu di a ben kisi mankeri ini wan feti.​—2 Kownu 8:29–9:4.

14, 15. Sortu wroko Yehu ben kisi fu du, èn fa a handri?

¹⁴ Disi na san Yehovah ben komanderi Yehu fu du: „Yu musu naki na oso fu Akab, yu masra, trowe, èn mi musu teki refensi gi a brudu fu den futuboi fu mi, den profeiti, nanga a brudu fu ala den futuboi fu Yehovah di dede na a anu fu Iseibel. Èn a heri oso fu Akab musu dede; . . . Den dagu sa nyan Iseibel na a pisi gron na ini Yisreèl, èn nowan sma sa beri en.”​—2 Kownu 9:7-10.

¹⁵ Yehu ben de wan man di ben handri wantewante. Sondro fu draidrai, a teki a fetiwagi fu en èn a rèi esi-esi go na Yisreèl. Wan waktiman na Yisreèl ben si taki na Yehu ben e rèi kon nanga a fetiwagi fu en, èn a go taigi Kownu Yoram. Yoram fu en sei, teki a fetiwagi fu en èn a rèi go miti a legre-edeman fu en. Di den tu man disi miti, Yoram aksi en: „Vrede de, Yehu?” Yehu piki en taki: „Sortu vrede ben kan de so langa leki den hurudu fu yu mama Iseibel nanga den furu towfruwroko fu en de ete?” Ne Yehu teki a bo fu en, èn fosi Kownu Yoram ben kan lowe, Yehu kiri en nanga wan peiri di boro pasa na ini en ati.​—2 Kownu 9:20-24.

16. (a) Sortu situwâsi ben miti den heiheiman fu Iseibel wantronso? (b) Fa den sani di Yehovah ben taki fu Iseibel, ben kon tru?

¹⁶ Sondro fu lasi ten, Yehu rèi esi-esi go na foto nanga a fetiwagi fu en. Iseibel, di ben poti ala sortu sani na en fesi fu moi ensrefi, ben de na wan fensre, e luku kon na gron. Ne a taki wan sani fu tapu skreki gi Yehu. Yehu no piki en noti, ma a aksi efu sma ben de di ben wani yepi en. A bari: „Suma de nanga mi? Suma?” Now den dinari fu Iseibel ben musu handri wantewante. Tu noso dri heiheiman di ben e wroko na ini a kownu-oso ben pusu den ede komoto fu a fensre.  Wantewante den ben musu sori gi suma den ben wani horibaka. Ne Yehu komanderi den: „Trowe en kon na gron!” Den heiheiman disi trowe Iseibel go na gron so taki a fadon na tapu a strati, pe den asi fu Yehu traputrapu en èn pe Yehu rèi tapu en nanga en fetiwagi. Na so fasi, a sma di ben gi trawan deki-ati fu anbegi Bâal, kon dede. Bifo sma kisi na okasi fu beri en, dagu nyan a meti fu en skin, neleki fa Gado ben taki na fesi.​—2 Kownu 9:30-37.

17. A krutu di Gado tyari kon tapu Iseibel musu tranga wi bribi na ini sortu sani di o pasa na ini a ten di e kon?

¹⁷ Na a srefi fasi, na agersi huru-uma di nen „Babilon a Bigiwan” sa kisi pori na wan ogri-ati fasi. A huru-uma e prenki den falsi bribi fu a grontapu fu Satan, di bigin na ini na owruten foto Babilon. Baka te falsi anbegi kisi pori, Yehovah Gado sa poti prakseri na ala tra sma di de wan pisi fu a grontapu fu Satan. Den sma disi sa kisi pori sosrefi, so taki wan nyun grontapu kan kon pe regtfardikifasi sa de.​—Openbaring 17:3-6; 19:19-21; 21:1-4.

18. San pasa nanga den anbegiman fu Bâal na ini Israel, baka di Iseibel dede?

¹⁸ Baka di Iseibel dede, dan wantewante Kownu Yehu kiri ala den bakapikin fu Akab èn sosrefi den prenspari sma di ben e horibaka gi Akab (2 Kownu 10:11). Ma furu Israelsma di ben e anbegi Bâal ben de na ini a kondre ete. Yehu no draidrai fu sori den sma disi taki a „no e frudrage no wan strei teige Yehovah” (2 Kownu 10:16). Yehu ben du neleki en na wan anbegiman fu Bâal, èn a orga wan bigi fesa na a tempel di Akab ben bow gi Bâal na ini Samaria. Ala den anbegiman fu Bâal di ben de na ini Israel, kon na a fesa disi. Den man fu Yehu ben sroto den sma disi na ini a tempel èn den kiri alamala. A Bijbel tori e kaba nanga den wortu disi: „Na so Yehu ben wai Bâal puru fu Israel.”—2 Kownu 10:18-28.

19. Sortu moi howpu a „bigi ipi” abi di e anbegi Yehovah na wan loyaal fasi?

¹⁹ Nowan anbegiman fu Bâal ben de moro na ini Israel, fu di den ben kiri alamala. Sondro tweifri, den falsi anbegi fu a grontapu disi sosrefi sa kisi pori wantronso, èn na wan ogri-ati fasi. Gi suma yu sa horibaka na a bigi krutudei dati? Handri nownowde, èn kande yu sa kisi a grani fu de na mindri a „bigi ipi” fu sma di o pasa „a bigi banawtu” libilibi. Dan nanga prisiri yu sa man prakseri baka fu a bun bosroiti di yu teki èn yu sa prèise Gado fu di a strafu „a bigi huru-uma di pori grontapu nanga a hurudu fu en”. Makandra nanga tra tru anbegiman, yu sa agri nanga den moi wortu di engel na hemel e singi: „Prèise Yah, un pipel, bika Yehovah wi Gado, na Almaktiwan, bigin tiri leki kownu.”​—Openbaring 7:9, 10, 14; 19:1, 2, 6.

Denki dipi fu den aksi disi

• Fa Israel fu owruten ben bigin anbegi Bâal?

• San Bijbel profeititori e taki fu a fadon di furu sma ben o fadon komoto na bribi, èn fa a profeititori dati kon tru?

• Fa Yehu ben puru ala Bâal anbegi na ini a kondre?

• San wi musu du efu wi wani pasa a krutudei fu Gado libilibi?

[Aksi fu a tori disi]

[Karta na tapu bladzijde 25]

(Efu yu wani si pe den sani disi skrifi, luku a tijdschrift)

Soko

Afek

Helkat

Yokneam

Megido

Tanak

Dotan

SAMARIA

En-Dor

Sunem

Ofra

Yisreèl

Yibleam (Gat-Rimon)

Tirsa

Bet-Semes

Bet-Sean (Bet-San)

Yabes-Gilead?

Abel-Mehola

Oso fu Arbel

Ramot-Gilead

Den bergi

Karmelbergi

Taborbergi

Morei

Gilboabergi

[Den se]

Mindrikondre Se

Se fu Galilea

[Den liba]

Yordanliba

[Den peti]

Peti fu Harod

[Sma di abi a reti fu a karta]

Based on maps copyrighted by Pictorial Archive (Near Eastern History) Est. and Survey of Israel

[Prenki na tapu bladzijde 26]

Na ini a tru anbegi, a de tumusi prenspari fu abi a gwenti fu teki prati na a Kownukondre preikiwroko èn fu go na den Kresten konmakandra

[Prenki na tapu bladzijde 28, 29]

Ala sma di wani pasa a dei fu Yehovah libilibi, musu handri sondro fu draidrai, neleki fa Yehu ben du dati