’Preiki fu meki den strafuman kon fri’

NA A bigin fu en diniwroko, Yesus ben taki dati wan pisi fu a wroko di a ben musu du, ben de fu ’preiki fu meki den strafuman kon fri’ (Lukas 4:18). Tru Kresten di e teki na eksempre fu a Masra fu den, e preiki a Kownukondre bun nyunsu gi „ala sortu sma”, èn na so fasi den e puru den sma disi na ini katibo na yeye fasi, èn den e yepi den sosrefi fu libi wan moro bun libi.​—1 Timoteyus 2:4.

Na ini a ten disi, tru Kresten e preiki tu gi trutru strafuman, namku sma di de na strafu-oso fu di den du difrenti sortu ogri, èn den sma disi e si en leki wan prenspari sani kon fri na yeye fasi. Yu sa prisiri fu leisi den moi tori disi di e taki fu a preikiwroko di Yehovah Kotoigi e du na ini strafu-oso na Ukraini èn na tra kondre na ini Europa.

Dyonki e tron Kresten

Serhii *, di abi 38 yari, de na strafu-oso 20 yari langa kaba. A kaba en skoro srefi na ini strafu-oso. A e taki: „Furu yari pasa, mi kisi strafu fu di mi kiri wan sma, èn te now ete mi abi fu koti strafu. Na ini strafu-oso mi ben e du ogri-ati sani èn mi ben e tapu skreki gi trawan, èn fu dati ede den tra strafuman ben e frede mi.” A ben firi bun fu di a ben e du den sani disi? Nôno. Furu yari langa Serhii ben de wan dyonki, a ben e dringi sopi, èn a ben e smoko tabaka.

Ne wan tra strafuman fruteri en den tru tori fu Bijbel. A ben de neleki wan leti ben skèin na ini a dungru. Baka wan tu mun, Serhii tapu fu gebroiki drugs, sopi, nanga tabaka, a tron wan preikiman fu a bun nyunsu, èn a teki dopu. Now a abi furu fu du na ini a strafu-oso, fu di a e dini leki wan furuten dinari fu Yehovah. A yepi seibi strafuman fu kenki den libi, èn den tron yeye brada fu en. Siksi fu den man disi komoto na strafu-oso, ma Serhii de na strafu ete. A no e atibron taki a de drape ete, fu di a breiti taki a kan yepi trawan fu kon fri na yeye fasi.​—Tori fu den Apostel 20:35.

Wan fu den sma di Serhii ben studeri nanga en na strafu-oso, na Victor di ben e seri drugs fosi, èn di ben de wan dyonki. Baka di Victor komoto na strafu, a tan go na fesi na yeye fasi, èn te fu kaba a go na a Dinariskoro na ini Ukraini. Now a e dini leki spesrutu pionier na ini Moldafia. Victor e taki: „Mi bigin smoko di mi ben abi 8 yari, mi bigin dringi sopi di mi ben abi 12 yari, èn mi bigin gebroiki drugs di mi ben abi 14 yari. Mi ben wani  kenki mi libi, ma ala leisi te mi ben pruberi fu du dati, sani no ben e waka bun. Ne na ini 1995, di mi nanga mi wefi bosroiti fu froisi gowe fu den takru mati di wi ben abi, dan wan siki-ede man dyuku mi wefi kiri. Mi no ben abi nowan howpu moro na ini mi libi. ’Pe mi wefi de now? San e pasa nanga wan sma te a dede?’ Mi ben e tan aksi misrefi den sani disi, ma mi no ben man feni nowan piki. Mi ben e gebroiki moro nanga moro drugs fu frigiti den sani di miti mi. Skowtu grabu mi fu di mi ben e seri drugs, èn mi kisi feifi yari strafu. Na strafu-oso, Serhii yepi mi fu feni piki tapu den aksi di mi ben abi. Furu leisi mi pruberi fu tapu nanga drugs, ma now fosi sani ben e waka bun fu di Bijbel yepi mi. A Wortu fu Gado abi krakti trutru!”​—Hebrewsma 4:12.

Bita-ati ogriman e kenki

Vasyl noiti no gebroiki drugs, ma toku a koti strafu. „Mi trutru ben lobi fu du wan sortu boks sport pe sma mag skopu èn naki kofu”, na so a e taki. „Mi ben oefen fu feti na so wan fasi taki sma no ben e kisi mankeri.” Na so Vasyl ben e feti te a ben e ròs sma. „Dri leisi mi koti strafu, èn a sani disi meki taki mi wefi broko trow nanga mi. A lasti leisi di mi koti strafu feifi yari, dan mi bigin leisi den publikâsi fu Yehovah Kotoigi. Aladi a sani disi gi mi deki-ati fu leisi Bijbel, toku mi ben e tan du san mi lobi trutru, namku naki kofu èn skopu sma na ini wan feti.

Ma baka di mi leisi Bijbel siksi mun langa, mi bigin firi tra fasi. Te mi ben wini wan feti, a no ben switi so gi mi leki fosi. Na so mi bigin poti prakseri na a fasi fa mi ben e libi, èn Yesaya 2:4 yepi mi fu kon si sani na a yoisti fasi. Mi kon si taki efu mi no ben e kenki a fasi fa mi ben e denki, dan mi ben o tan na strafu mi heri libi langa. Sobun mi trowe ala den sani di mi ben e gebroiki fu feti, èn mi bigin du muiti fu kenki den fasi fu mi. A no ben makriki, ma fu di mi ben e denki dipi fu sani, èn fu di mi ben e begi, meki safrisafri mi doro so fara taki mi ben man tapu nanga a takru gwenti di mi ben abi. Son leisi, mi ben e begi Yehovah nanga watra-ai fu gi mi krakti fu no feti moro. Te fu kaba mi ben man tapu nanga a gwenti dati.

Baka di mi komoto na strafu, mi go baka na mi osofamiri. Now mi e wroko na wan presi pe sma e diki ston-krofaya. Na so fasi, mi abi nofo ten fu teki prati na a preikiwroko makandra nanga mi wefi, èn mi abi nofo ten tu fu du den frantwortu di mi abi na ini a gemeente.”

Mykola nanga den mati fu en ben go fufuru na wan tu bangi na ini Ukraini. Na so a du kon taki a  kisi tin yari strafu. Bifo a koti strafu, a go wán leisi nomo na kerki, èn dati ben de fu luku fa a kan go fufuru drape. Sani no ben waka soleki fa a ben denki, ma fu a wán leisi dati di Mykola go na kerki, a kon kisi a denki taki Bijbel lai nanga soso soi tori di abi fu du nanga Orthodox priester, kandra, nanga kerki fesadei. A e taki: „Mi no sabi fu san ede, ma mi bigin leisi Bijbel. Mi fruwondru fu kon si taki Bijbel de heri tra fasi leki fa mi ben denki!” A aksi fu studeri Bijbel, èn a teki dopu na ini 1999. Te yu e luku en now, yu no sa wani bribi taki a man disi di abi sakafasi èn di de wan dinari ini a diniwroko, ben de wan ogri-ati man fosi di ben e go nanga gon fu go fufuru na bangi!

Vladimir ben kisi dedestrafu. Di a ben e wakti fu den kiri en, dan a begi Gado, èn a pramisi fu dini En efu a ben mag tan na libi. Na a ten dati, lantiwet kon kenki, èn a no ben abi dedestrafu moro, ma a ben musu koti strafu en heri libi langa. Fu di Vladimir ben wani hori ensrefi na a pramisi fu en, meki a bigin suku a tru bribi. A bigin teki leri fu Bijbel na a Adventist Kerki, èn a du dati nanga yepi fu brifi. Bakaten a kisi wan diploma, ma en ati no ben sidon ete.

Ma baka di Vladimir leisi A Waktitoren nanga Ontwaakt! di ben de na ini a bibliotheek fu a strafu-oso, dan a skrifi go na a bijkantoro fu Yehovah Kotoigi na ini Ukraini fu aksi den efu wan sma kan kon na en. Di den brada fu a kontren drape go na en, dan Vladimir ben e si ensrefi kaba leki wan Kotoigi, èn a ben e preiki na ini a strafu-oso. A kisi yepi fu doro den markitiki fu tron wan Kownukondre preikiman. Di na artikel disi skrifi, dan Vladimir nanga seibi tra preikiman na ini a strafu-oso dati ben e wakti fu teki dopu. Ma den abi wan problema. Fu di strafuman di musu koti strafu den heri libi langa musu tan na ini wán kamra nanga trawan di abi a srefi bribi leki den, meki Vladimir de na ini wán strafu-oso kamra nanga Kotoigi wawan. We, gi suma den kan preiki dan? Den e preiki a bun nyunsu gi den waktiman fu a strafu-oso, èn den e preiki tu nanga yepi fu brifi di den e seni gi sma.

Nazar ben froisi fu Ukraini go na a Tyekia Republiek, èn drape a tron wan memre fu wan grupu fufuruman. A sani disi meki taki a ben musu koti strafu dri nanga afu yari langa. Di a ben de na strafu, dan a ben feni en bun taki Yehovah Kotoigi fu a foto Karlovy Vary, kon na en. A leri sabi a waarheid, èn a kenki en libi dorodoro. Di wan fu den waktiman si fa Nazar kon kenki, dan a taigi den tra man di ben de na ini a srefi strafu-oso kamra leki Nazar, taki: „Mi ben o breiti efu un alamala ben de leki a man dati fu Ukraini, bika dan mi ben kan go du wan tra wroko.” Wan tra waktiman ben taki: „Den Yehovah Kotoigi sabi heri bun fa fu yepi sma fu kenki den libi. Wan sma di e kon na strafu-oso leki wan ogriman, e komoto na strafu-oso leki wan bun man.” Now Nazar de baka na oso. A leri fu du temrewroko, èn a trow. Now en nanga en wefi de na ini a furuten diniwroko. A de nanga tangi na ati trutru taki den Kotoigi kon na en na a strafu-oso!

Prenspari sma e taki bun fu a wroko fu Yehovah Kotoigi

A no strafuman wawan de nanga tangi gi san Yehovah Kotoigi e du. Miroslaw Kowalski, wan man di e taki gi wan fu den strafu-oso na ini Polen, ben taki: „Wi e warderi en trutru taki den e kon. Wan tu sari sani pasa nanga sonwan fu den strafuman. Kande noiti sma no handri nanga den na wan warti fasi. . . . A yepi [di Yehovah Kotoigi] e gi, na wan trutru warti sani fu di wi no abi nofo wrokoman nanga leriman di kan yepi den strafuman.”

A man di abi a frantwortu na wan tra strafu-oso na ini Polen ben skrifi go na a bijkantoro, fu aksi den Kotoigi efu den kan kon moro leisi na a strafu-oso fu en. Fu san ede? A e taki: „Te den [Kotoigi] e kon drape moro leisi, dan den strafuman kan kisi yepi fu leri fa fu handri na wan yoisti fasi nanga tra sma, èn dati kan meki taki den no e atibron so esi moro nanga makandra.”

Wan koranti na Ukraini ben skrifi wan tori fu wan strafuman di ben brokosaka srefisrefi, èn di ben wani kiri ensrefi. Ma a strafuman disi kisi yepi fu Yehovah Kotoigi. „Now a man disi e firi moro bun”, na so a tori e taki. „A e hori ensrefi na den wet fu a strafu-oso, èn a de wan eksempre gi tra strafuman.”

Sma abi winimarki srefi baka te den komoto na strafu-oso

A wroko di Yehovah Kotoigi e du, no e tyari wini gi sma soso te den na strafu-oso. Den sma e  tan abi winimarki srefi baka te den komoto na strafu. Wan tu yari kaba, tu Kresten, Brigitte nanga Renate, e yepi uma di komoto na strafu. Wan koranti na ini Doisrikondre e taki fu den tu uma disi: „Den e yepi uma sowan dri te go miti feifi mun langa, baka te den komoto na strafu, èn den e gi den uma disi deki-ati fu feni wan marki na ini den libi. . . . A wroko di den e du, na fu luku efu sma di komoto na strafu e tyari densrefi na wan yoisti fasi na ini a libimakandra. . . . Den abi wan bun wrokomakandra sosrefi nanga den wrokoman fu a strafu-oso” (Main-Echo Aschaffenburg). Fu di den sisa yepi trawan na so wan switi fasi, meki wan tu sma di komoto na strafu, gi den libi abra na Yehovah.

Srefi den sma di abi frantwortu na den strafu-oso e kisi wini fu a Bijbel leriwroko fu Yehovah Kotoigi. Fu eksempre, Roman ben de wan srudati ofsiri èn sosrefi wan datra di e ondrosuku fu san ede sma e handri na wan spesrutu fasi. A ben e wroko na ini wan strafu-oso na Ukraini. Di Kotoigi kon na en oso, dan a ben feni en bun taki den studeri Bijbel nanga en. Ne a kon sabi taki den Kotoigi no ben mag kon na den strafuman fu a strafu-oso pe a ben e wroko. Sobun, a aksi a sma di abi a frantwortu na a strafu-oso, efu a kan gebroiki Bijbel te a e wroko nanga den strafuman. A kisi primisi fu du dati, èn sowan tin strafuman ben wani sabi moro fu Bijbel. Roman tan go doro fu fruteri den strafuman disi den nyun sani di a leri fu Bijbel, èn a muiti di a meki ben abi heri bun bakapisi. Baka di sonwan fu den komoto na strafu, den tan go na fesi na yeye fasi, èn te fu kaba den teki dopu leki Kresten. Fu di Roman si a krakti fu Gado Wortu, meki a teki a bijbelstudie fu en moro seryusu. A komoto na ini a legre èn a go doro fu gi sma leri fu Bijbel. Now a e teki prati na a preikiwroko makandra nanga wan man di ben de na strafu fosi.

„Na Bijbel, Bijbel publikâsi, nanga bijbelstudie, e meki taki wi man tan na libi dyaso”, na so wan strafuman ben skrifi. Den wortu disi e sori krin taki na ini son strafu-oso, Bijbel publikâsi de tranga fanowdu. Wan gemeente na ini Ukraini e skrifi fu a Bijbel leriwroko di den e du na ini wan strafu-oso na ini a kontren drape: „Den sma di e wroko drape de nanga tangi gi den publikâsi di wi e tyari gi den. Ibri leisi te nyun tijdschrift e kon, wi e tyari 60 Waktitoren nanga Ontwaakt! gi den.” Wan tra gemeente skrifi: „Wi e tyari den moro prenspari publikâsi go na ala den 20 pikin bibliotheek fu wan strafu-oso. Ala nanga ala wi e tyari 20 dosu nanga publikâsi go drape.” Na ini wan fu den strafu-oso, den waktiman e poti ala den tijdschrift fu wi na wan spesrutu presi na ini a bibliotheek, so taki den strafuman kan kisi wini fu ibri nyun tijdschrift di e kon.

Na ini 2002, a bijkantoro fu Ukraini seti wan kantoro di e yepi sma di de na strafu. Te nanga now, a kantoro disi meki kontakti nanga sowan 120 strafu-oso, èn den gi difrenti gemeente a frantwortu fu wroko na den strafu-oso disi. Ibri mun a bijkantoro e kisi sowan 50 brifi fu strafuman, èn moro furu fu den strafuman e aksi fu kisi publikâsi noso bijbelstudie. A bijkantoro e seni buku, tijdschrift, nanga brochure gi den strafuman disi, te den brada fu a birti drape kan go na den.

„Tan prakseri den sma di de na strafu-oso”, na so na apostel Paulus skrifi den Kresten brada nanga sisa fu en (Hebrewsma 13:3). Paulus ben e taki fu den sma di de na strafu fu a bribi fu den ede. Na ini a ten disi, Yehovah Kotoigi e tan prakseri den wan di de na strafu-oso, den e go na den strafuman, èn den e ’preiki fu meki den strafuman kon fri’.​—Lukas 4:18.

[Futuwortu]

[Prenki na tapu bladzijde 9]

A skotu fu wan strafu-oso na ini L’viv, na Ukraini

[Prenki na tapu bladzijde 10]

Mykola

[Prenki na tapu bladzijde 10]

Vasyl nanga en wefi, Iryna

[Prenki na tapu bladzijde 10]

Victor