Sneisi na ini Meksikow e kisi yepi

„TIN man fu ala den tongo di sma e taki na ini den kondre, fu tru o grabu hori a mofokanti fu a krosi fu wan man di de wan Dyu, èn taki: ’Wi wani go nanga unu, fu di wi yere taki Gado de nanga unu’” (Sakaria 8:23). Tide na a dei, a moi profeititori disi e kon tru na heri grontapu. Sma „fu ala den tongo di sma e taki na ini den kondre” e grabu den krosi hori fu den Israelsma na yeye fasi, fu di den wani anbegi Yehovah Gado. Yehovah Kotoigi e angri fu kon sabi fa a profeititori disi o kon tru. Dati meki furu fu den e leri wan tra tongo fu man teki prati na a preikiwroko di e du na heri grontapu.

Na so a de tu nanga Yehovah Kotoigi na ini Meksikow. Na ini Meksikow, sowan 30.000 sma e taki Sneisitongo. Na ini 2003, tinafeifi fu den sma disi ben kon na a Memrefesa fu a dede fu Krestes, di ben hori na ini Meksikow City. Na so den Kotoigi na ini Meksikow kon si taki na ini a kondre fu den, sma di e taki Sneisitongo wani kon sabi moro fu a bun nyunsu. Fu man abi moro preikiman fu yepi den sma disi di e taki Sneisitongo, meki sani seti so taki den Kotoigi fu Meksikow kisi leri dri mun langa fa fu abi takimakandra na wan makriki fasi na ini Mandarijntongo (wan fasi fa sma e taki Sneisitongo). Ala nanga ala, 25 Kotoigi kisi a leri disi. Di den studenti kisi den papira, dan wan heiman fu a libimakandra fu den sma di e taki Mandarijntongo na ini Meksikow City, ben de drape tu. A sani disi sori taki a leri di den Kotoigi kisi, na wan bigi sani gi den sma di e taki Sneisitongo. Wan Sneisi organisâsi fu a foto dati gi dri fu den studenti na okasi fu go na trakondre fu leri taki Sneisitongo moro bun.

Den studenti ben musu taki wantewante nanga trawan na a fasi fa den leri dati. Te den studenti ben leri wan tu prenspari wortu, dan den ben e bigin preiki wantewante na ini Sneisitongo na ini a bisnis kontren fu Meksikow City. Den fayafaya studenti opo 21 bijbelstudie. A publikâsi di yepi den trutru, na a Sneisitongo brochure San Gado e aksi foe wi?, di abi a Pinyin na ini, namku a Sneisitongo di skrifi na ini den letter fu na alfabet di wi gwenti fu gebroiki.

Ma fa den Kotoigi di kisi leri na ini Sneisitongo no so langa ete, ben man hori bijbelstudie na ini a tongo dati? Na a bigin den ben man taki soso: „Qing Du [Grantangi leisi disi]”, ne den ben e sori a sma wan paragraaf, èn baka dati den ben e sori en na aksi. Baka te na ososma leisi a paragraaf èn a gi piki na ini Sneisitongo, dan den studenti ben e taki: „Shei shei [Grantangi]” èn sosrefi „Hen Hao [Heri bun]”.

Na so den bigin wan bijbelstudie nanga wan uma di ben taki dati en na wan Kresten. Baka di na uma studeri dri leisi, dan a Kotoigi aksi ensrefi efu na uma ben frustan trutru san a ben e  leri. Sobun, a Kotoigi tyari wan brada di e taki Sneisitongo, go na a bijbelstudie. Di a brada aksi na uma efu a abi wan sani fu aksi, dan na uma taki: „A de so taki mi musu man swen fu man teki dopu?”

Heri esi wan Gemeente Bukustudie seti, èn sowan neigi sma di e taki Sneisitongo, makandra nanga 23 Kotoigi fu Meksikow ben e kon na a bukustudie disi. Wan fu den sma di ben e kon tu, na wan Sneisi datra di ben kisi a Spanyorotongo Waktitoren nanga Ontwaakt! fu wan fu den sikisma di a ben yepi. Fu di a datra disi no ben e leisi Spanyorotongo, meki a aksi wan sma fu vertaal wan tu sani fu a tijdschrift gi en. Di a kon frustan taki den tijdschrift ben e taki fu Bijbel, dan a aksi a siki sma di ben gi en den tijdschrift, efu a ben kan kisi den na ini Sneisitongo. A sisa disi tyari den tijdschrift gi en, èn sani ben seti so taki a bijkantoro fu Yehovah Kotoigi na ini Meksikow, sorgu taki wan Kotoigi di e taki Sneisitongo, go na a datra. A datra en mama di e libi na ini China, ben abi wan Bijbel, èn a datra ben lobi fu leisi en. Di a ben o go na Meksikow, dan en mama taigi en fu tan leisi Bijbel go doro. Fu dati ede a ben e begi so taki wan sma ben kan yepi en fu kon sabi moro fu a Gado di Bijbel e taki fu en. A datra disi ben prisiri, èn a taki: „Gado gi piki tapu den begi fu mi!”

Wan Sneisi osofamiri ben e kon tu na a bukustudie. Na osofamiri disi ben e yuru wan oso fu wan uma fu Meksikow, èn na uma disi ben e studeri Bijbel nanga Yehovah Kotoigi. Aladi a Sneisi osofamiri disi no ben e frustan Spanyorotongo so bun, toku den ben e kon sidon tu na a studie. Baka wan pisi ten, na osofamiri aksi a Kotoigi di ben e hori a studie, efu a ben abi publikâsi na ini Sneisitongo. A no teki langa di na osofamiri disi bigin studeri Bijbel na ini Sneisitongo. Fosi yu denki, na osofamiri taki dati den wani go preiki gi den kondreman fu den, èn taki den wani gi den libi abra na Yehovah.

A no de fu taki dati a muilek fu leri taki Sneisitongo. Ma soleki fa wi si na ini den ondrofenitori di wi ben luku kaba, dan sma na ini Meksikow di e taki tra tongo, èn sosrefi sma di e taki Sneisitongo, e kisi yepi fu Yehovah Gado, fu kon leri sabi a wani fu en. Na dati e pasa tu nanga sma na tra presi fu grontapu.

[Prenki na tapu bladzijde 17]

Wan grupu sma di e leri taki Sneisitongo, na ini Meksikow City

[Prenki na tapu bladzijde 18]

Wan Kotoigi fu Meksikow e hori wan bijbelstudie na ini Sneisitongo

[Prenki na tapu bladzijde 18]

Kotoigi e preiki oso fu oso na ini Sneisitongo, na ini Meksikow City