Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fu san ede wi kan agersi a fosi sondu, namku a trangayesi di Adam ben trangayesi Gado, nanga wan famiri-siki?

Sondu de leki wan siki, fu di Adam gi den pikin fu en sondu. Na so wi kisi a fowtu, noso a sondu fu Adam, neleki fa son pikin e kisi wan siki fu den papa nanga mama.​—15/8, bladzijde 5.

• San na den moro prenspari sani di e meki taki moro nanga moro ogridu de na ini a ten disi?

Satan e pruberi fu meki sma drai baka gi Yehovah fu di a e du sani fu meki den tron sma di lobi fu du ogri nanga tranga. Wan tu fu den sani di a e gebroiki fu man du dati, na felem, poku, nanga computer game di e gi sma deki-ati fu prei sani di lai nanga ogridu, èn fu kiri trawan na wan tumusi ogri-ati fasi. Den ogri-ati sani di sma e du na ini felem, e meki taki furu ogridu de.​—1/9, bladzijde 29.

• Suma ben de Pontius Pilatus?

A ben de wan Romesma di no ben de so hei leki den heihei famiri di ben e tiri a kondre, èn a kan taki a ben de na ini a legre. Na ini 26 G.T., Kèiser Tiberius fu Rome ben poti Pilatus leki tiriman fu a foto Yudea. Di Yesus ben de na fesi krutu, dan Pilatus arki den kragi di den Dyu fesiman ben abi. Fu di Pilatus ben wani plisi den ipi-ipi sma, meki a gi sma primisi fu kiri Yesus.​—15/9, bladzijde 10-12.

• San na „a marki” di skrifi na ini Mateyus 24:3?

A marki disi abi fu du nanga difrenti sani, èn ala den sani disi makandra e sori taki wan spesrutu sani o pasa. A marki abi fu du nanga orloku, angriten, pestsiki, nanga gronseki, èn den sani disi ben o yepi den bakaman fu Yesus fu kon si taki a ten dati na a „denoya” fu en, èn sosrefi „a kaba fu a grontapu sistema disi”.​—1/10, bladzijde 4, 5.

• San ben de a Diaspora, èn sortu kontren abi fu du nanga dati?

A Diaspora abi fu du nanga den Dyu di ben e libi dorosei fu Palestina. Na ini a fosi yarihondro, moro furu fu den Dyu ben e libi na Siria, Pikin Asia, Babilon, nanga Egepte, èn moro pikin libimakandra fu den sma disi ben de na ini den kondre fu Europa di ben de wan pisi fu a Gran Kownukondre Rome.​—15/10, bladzijde 12.

• Wan Kresten kan tan hori wan bun konsensi efu a e teki wan wroko pe a musu tyari wan gon noso wan tra fetisani?

Wan sma musu bosroiti gi ensrefi efu a wani du wan grontapuwroko pe a musu tyari wan gon noso wan tra fetisani. Ma wan sma di e du so wan wroko kan kisi brudu-paiman na en tapu te a musu gebroiki a gon noso a fetisani, èn kan kisi mankeri noso lasi en libi fu di wan sma wani du en wan ogri baka. Wan Kresten di e du wan wroko pe a musu tyari wan gon noso wan tra fetisani, no man kisi spesrutu grani na ini a gemeente (1 Timoteyus 3:3, 10).​—1/11, bladzijde 31.

• Fu di a wortu „Armagedon” e komoto fu a wortu „Megidobergi”, dan disi wani taki dati Armagedon o feti na tapu wan bergi na Mindri-Owstusei?

Nôno. A Megidobergi no de trutru, ma soso wan pikin bergi de krosibei fu wan opo presi na ini Israel. Ala „den kownu fu grontapu, nanga den legre fu den” furu tumusi fu man kon na wán na a kontren dati. A bigi feti fu Gado sa feti na heri grontapu, èn a sa tyari wan kaba kon na ala den feti na grontapu (Openbaring 16:14, 16; 19:19; Psalm 46:8, 9).​—1/12, bladzijde 4-7.