A fasi fa bun o wini ogri

Kownu David ben de wan bun man. A ben lobi Gado nanga en heri ati, a ben lobi retidu, èn a ben e broko en ede nanga den mofinawan. Ma a srefi bun kownu disi du sutadu nanga a wefi fu wan fu den man di ben de getrow na en. Batseiba, a wefi fu a futuboi disi, ben kon de nanga bere fu David. Baka di David kon sabi a tori, a seti sani so taki sma ben kan kiri a masra fu na uma disi. Ne David trow nanga Batseiba fu di a no ben wani sma fu sabi sortu ogri a ben du. —2 Samuel 11:1-27.

A DE krin fu si taki libisma man du furu bun sani. Ma fu san ede den e du so furu ogri dan? Bijbel e sori san na wan tu prenspari sani di e meki taki sma e du ogri. A e sori sosrefi fa Gado o puru ogri fu têgo nanga yepi fu Krestes Yesus.

A firi di libisma abi fu du ogri

Kownu David srefi ben sori san na wan fu den sani di e meki taki sma e du ogri. Baka di a kon na krin sortu ogri David du, a ben de klariklari fu tyari a frantwortu fu ala den sani dati. Nanga sari na ini en ati, a skrifi: „Luku! Nanga sondu mi mama ben meki mi nanga furu pen, èn na ini sondu mi mama kon de nanga bere fu mi” (Psalm 51:5). Noiti Gado ben wani taki mama ben o meki pikin di ben o sondu. Ma di Eva, èn bakaten Adam, bosroiti fu opo densrefi teige Gado, dan den no ben man meki pikin moro di no abi sondu (Romesma 5:12). Di moro nanga moro sondu libisma bigin kon, dan a ben kon de krin fu si taki „den firi di libisma abi na ini den ati, takru fu sensi den yongu yari fu den”.—Genesis 8:21.

Efu wan sma no e meki muiti fu basi a firi di a abi fu du ogri, dan dati kan meki taki a sa du ’hurudu, taki a sa kisi feantifasi, taki a sa abi kesekese nanga trawan, taki a sa dyarusu tapu trawan,  a sa abi faya-ati, a sa abi trobi nanga sma, pratifasi sa de na mindri en nanga trawan, a sa kon nanga falsi leri, a sa abi bigi-ai’, èn a sa du tra sani di no fiti èn di Bijbel e kari ’den sondu di libisma e du’ (Galasiasma 5:19-21). Fu di Kownu David no ben kakafutu gi a swakifasi fu en, meki a du hurudu, èn leki bakapisi fu dati wan lo problema opo kon (2 Samuel 12:1-12). A ben kan kakafutu gi a firi fu en di no ben fiti. Ma na presi fu dati, a tan prakseri a tranga lostu di a ben abi gi Batseiba, èn na so a meki a wán fowtu baka a trawan. A sani disi e kruderi nanga san Yakobus ben taki bakaten, namku taki: „Ibri sma e kisi tesi fu di en eigi lostu e hari en èn e kori en. Dan te a lostu kon lepi, a e tyari sondu kon; te a sondu du kaba, dan dati e tyari dede kon.”—Yakobus 1:14, 15.

Den sani di kari na ini na artikel fosi a wan disi, soleki a kiri di sma kiri ipi-ipi trawan, a didon di sma didon nanga tranga na trawan, èn a fufuru di trawan e go furufuru sma sani na wan ogri-ati fasi, e sori sortu tumusi ogri-ati sani kan pasa te sma e gi pasi taki den takru lostu fu den abi krakti tapu san den e du.

Sma kan du ogri te den no abi soifri sabi

Na eksempre fu na apostel Paulus e sori san na a di fu tu sani di e meki taki sma e du ogri. Na a ten di Paulus dede, sma ben sabi en leki wan safri-ati man di abi switifasi. A ben de klariklari fu gi ensrefi fu dini den Kresten brada nanga sisa fu en (1 Tesalonikasma 2:7-9). Ma bifo a ten dati, di sma ben sabi en leki Saulus, a ben ’e tapu skreki gi den disipel èn a ben de nomonomo fu kiri’ a srefi grupu fu sma disi di a ben e dini bakaten (Tori fu den Apostel 9:1, 2). Fu san ede Paulus ben feni en bun taki sma ben e du ogri nanga den fosi Kresten, èn fu san ede ensrefi ben du den ogri dati tu? „Fu di mi no ben sabi san mi ben e du”, na so a e taki (1 Timoteyus 1:13). Iya, bifo a ten dati Paulus ben „de fayafaya fu dini Gado, ma [a] no ben abi soifri sabi”.—Romesma 10:2.

Neleki Paulus, furu opregtisma du ogri fu di den no abi nofo soifri sabi fu a wani fu Gado. Fu eksempre, Yesus ben warskow den bakaman fu en: „A yuru o doro te ibri sma di kiri unu, o prakseri taki a du wan santa wroko gi Gado” (Yohanes 16:2). Den disiten Kotoigi fu Yehovah e ondrofeni taki den sani disi di Yesus ben taki de tru. Na ini furu kondre, sma frufolgu den èn sma kiri den sosrefi, aladi den sma disi e taki dati den e dini Gado. A no de fu taki dati te sma abi so wan faya di no de akruderi soifri sabi, dan dati no e plisi a tru Gado.—1 Tesalonikasma 1:6.

A sma di meki taki ogri bigin

Yesus ben sori san na a moro prenspari sani di meki taki ogri de. Disi na san a taigi den kerki fesiman di ben wani kiri en nomonomo: „Unu na fu un tata Didibri èn unu wani du den sani di un tata wani. Di a bigin waka en eigi pasi, a ben de wan kiriman” (Yohanes 8:44). Na Satan kori Adam nanga Eva fu opo densrefi teige Gado, fu di a ben denki ensrefi nomo. A opo di sma ben opo densrefi teige Gado tyari sondu kon, èn na so fasi dede kon tapu a heri libisma famiri.

Te wi e luku san Satan ben du nanga Yob, dan wi e si krin taki a wani kiri sma. Di Yehovah gi en pasi fu tesi na soifri retifasi fu Yob, dan  toku Satan en ati no ben sidon di a pori ala den gudu fu Yob. A meki tu taki den tin pikin fu Yob dede (Yob 1:9-19). Na ini a yarihondro di pasa, a libisma famiri ondrofeni moro nanga moro ogri, fu di libisma no volmaakti, fu di den no abi soifri sabi, èn fu di Satan abi moro krakti tapu den sani di libisma e du. Bijbel e tyari kon na krin taki Didibri ben ’fringi go na grontapu èn taki den engel fu en fringi go na grontapu makandra nanga en’. A srefi profeititori dati ben taki soifri na fesi taki na fu di Satan musu tan na grontapu, meki dati wani taki „helu fu grontapu”, moro leki iniwan ten bifo. Aladi a de so taki Satan no man dwengi sma fu du ogri, toku a sabi heri bun fa fu „kori sma na heri grontapu”.—Openbaring 12:9, 12.

A sani di o meki taki libisma no abi a firi moro fu du ogri

Fu man puru ogri dorodoro na ini a libisma libimakandra, dan a no musu de so moro taki libisma abi a firi fu du ogri, den musu kon abi soifri sabi, èn Satan no musu abi krakti moro na den tapu. Na a fosi presi, san o meki taki libisma no abi a firi moro na ini en ati fu du sondu?

Nowan enkri datra di e koti sma, èn nowan dresi di libisma meki kan puru a firi disi na ini wi ati. Ma Yehovah Gado sreka wan sani di sa puru a sondu di libisma kisi, èn ala sma di wani a sani disi kan kisi en. Na apostel Yohanes ben skrifi: „A brudu fu Yesus . . . e krin wi fu ala sondu” (1 Yohanes 1:7). Di a volmaakti man Yesus ben de klariklari fu gi en libi leki ofrandi, dan a „tyari den sondu fu wi na ini en eigi skin di a dede na a postu, so taki wi no ben sa abi noti fu du moro nanga sondu, èn wi ben sa libi na wan regtfardiki fasi” (1 Petrus 2:24). A dede di Yesus dede leki wan srakti-ofrandi, meki taki a puru den bakapisi fu na ogri di Adam du. Paulus e taki dati Krestes Yesus tron „wan lusu-paiman fu pai gi ala sma” (1 Timoteyus 2:6). Iya, a dede fu Krestes meki taki a heri libisma famiri man kisi baka san Adam ben lasi, namku volmaakti libi.

Ma kande yu sa aksi: ’Efu a dede di Yesus dede sowan 2000 yari pasa, meki taki libisma man kon de volmaakti baka, dan fu san ede ogri de ete, èn fu san ede libisma e dede ete?’ Te wi feni wan piki tapu den aksi dati, dan dati kan tyari wan kaba kon na a di fu tu sani di e meki taki ogri de, namku a sabi di libisma no sabi soifri san Gado abi na prakseri.

Soifri sabi e meki sma du bun

Te wan opregti sma e kisi soifri sabi fu den sani di Yehovah nanga Yesus e du now fu puru ogri, dan dati kan yepi en fu no feni en bun te sma e du ogri, soso fu di a no abi soifri sabi. Boiti dati, a sa man wai pasi gi san de moro ogri, namku fu tron wan sma di e „feti nanga Gado srefi” (Tori fu den Apostel 5:38, 39). Yehovah Gado de klariklari fu frigiti den fowtu di sma meki na ini a ten di pasa, fu di den no ben sabi taki na ogri den ben e du. Disi na san apostel Paulus ben taki na ini Ateine: „Gado no e prakseri a ten moro di sma ben du den sani disi fu di den no ben sabi; ma a e taigi ala libisma now taki den musu abi berow. Bika a poti wan dei pe a o gi wan man a wroko fu krutu ala sma na grontapu na wan regtfardiki fasi, èn na opobaka fu en na wan dyaranti gi ala sma.”—Tori fu den Apostel 17:30, 31.

Paulus srefi ben ondrofeni taki Yesus opo baka na dede, bika baka di Yesus opo baka, dan ensrefi ben taki nanga Paulus, èn a ben tapu Paulus fu frufolgu den fosi Kresten (Tori fu den Apostel 9:3-7). Wantewante di Paulus kisi soifri sabi fu den sani di Gado abi na prakseri fu du, a kenki a fasi fa a ben e libi èn a tron wan trutru bun sma akruderi na eksempre fu Krestes (1 Korentesma 11:1; Kolosesma 3:9, 10). Boiti dati, Paulus ben de fayafaya fu preiki „a bun nyunsu disi fu a kownukondre” (Mateyus 24:14). Na ini pikinmoro 2000 yari di pasa sensi Yesus dede èn opo baka, Krestes teki sma na mindri a libisma famiri, èn neleki Paulus den sa tiri makandra nanga en na ini en Kownukondre.—Openbaring 5:9, 10.

Na ini den wán hondro yari di pasa, te kon miti now, Yehovah Kotoigi du a wroko fayafaya di Yesus ben gi den fu du. A ben taigi den: „Fu  dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi komanderi unu” (Mateyus 28:19, 20). Den sma di e gi yesi na a boskopu disi abi a howpu fu libi fu têgo na grontapu ondro a tiri fu Krestes en hemel tirimakti. Yesus ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). A moro bun sani di wan sma kan du gi wan trawan, na fu yepi en fu kisi a sabi disi.

Den sma di e teki a Kownukondre bun nyunsu disi, abi fasi soleki „lobi, prisiri, vrede, langa pasensi, bun-ati, bunfasi, bribi, safri-ati, dwengi yusrefi”, aladi so furu ogri e pasa na den lontu (Galasiasma 5:22, 23). Den e teki na eksempre fu Yesus, fu di den e sorgu taki ’te wan sma du den ogri, den no e du a sma dati ogri baka’ (Romesma 12:17). Ibriwan fu den e meki muiti fu „tan du bun fu kan wini na ogri”.—Romesma 12:21; Mateyus 5:44.

A ten te ogri sa lasi a strei krinkrin

Libisma srefi noiti no sa man wini a sma di e meki taki ogri de, namku Satan Didibri. Ma heri esi Yehovah sa gebroiki Yesus fu masi Satan en ede (Genesis 3:15; Romesma 16:20). Yehovah sa sori Krestes Yesus tu taki a musu „broko ala den” politiek sistema „disi na pisipisi èn taki a musu tyari wan kaba kon na den”, bika furu fu den sistema disi meki taki someni ogri pasa na ini a historia (Danièl 2:44; Preikiman 8:9). Na a ten fu a krutudei disi di e kon, ala den sma ’di no e gi yesi na a bun nyunsu fu wi Masra Yesus, sa kisi a strafu di sa abi leki bakapisi taki den o kisi pori fu têgo’.—2 Tesalonikasma 1:8, 9; Sefanya 1:14-18.

Te Satan nanga den wan di e horibaka gi en no o de moro, dan Yesus di de na hemel, o yepi den sma di pasa a krutudei libilibi, fu meki grontapu kon de baka soleki fa a ben de na a bigin. Krestes sa gi wan opobaka tu na ala den sma di warti fu kisi na okasi fu libi na tapu wan grontapu di meki kon bun baka (Lukas 23:32, 39-43; Yohanes 5:26-29). Te a sa du dati, dan a o puru sonwan fu den bakapisi fu na ogri di e pina a libisma famiri.

Yehovah no sa dwengi sma fu gi yesi na a bun nyunsu fu Yesus. Ma a e gi sma na okasi fu teki a sabi di e meki sma kisi libi. A de tumusi prenspari taki yu e teki na okasi disi now! (Sefanya 2:2, 3) Efu yu e du dati, dan yu sa leri fa fu kakafutu gi iniwan sortu ogri di e pori yu libi. Yu sa si tu fa Krestes sa wini ogri krinkrin.—Openbaring 19:11-16; 20:1-3, 10; 21:3, 4.

[Prenki na tapu bladzijde 5]

Fu di Saulus no ben abi soifri sabi, meki a ben feni en bun taki sma ben e du ogri

[Prenki na tapu bladzijde 7]

A moro bun sani di wan sma kan du gi wan trawan, na fu yepi en fu teki a soifri sabi fu Gado