Den prisiri na ati fu den papa nanga mama

„MI MANPIKIN, efu yu ati kon koni, mi ati sa prisiri, iya, di fu mi” (Odo 23:15). Iya, Kresten papa nanga mama e prisiri te den pikin fu den kisi a koni fu Gado. Tapu satra 10 september 2005, wan internationaal grupu fu 6859 sma ben kon na a programa di ben hori na a kaba fu a di fu 119 klas fu a Waktitoren Bijbelskoro Gilead. Ala sma ben e prisiri trutru, spesrutu den papa nanga mama fu den 56 studenti di ben klari a skoro.

David Walker, di de wan memre fu a Bethelfamiri na Amerkankondre wan langa ten kaba, opo a programa nanga wan fayafaya begi. Baka dati a fesiman David Splane, wan memre fu a Tiri Skin fu Yehovah Kotoigi, bigin nanga a programa èn a taigi den papa nanga mama: „Wi musu prèise unu trutru. Na a fasi fa unu kweki den manpikin nanga umapikin fu unu, meki taki den teki a bosroiti fu tron zendeling.” Kande den papa nanga mama ben e broko den ede nanga san ben o pasa nanga den manpikin nanga umapikin fu den, fu di den pikin fu den ben de fu go na farawe presi. Ma Brada Splane gi den papa nanga mama a dyaranti taki den no ben abi fu broko den ede. A taki: „No broko un ede nanga den pikin fu unu. Yehovah man sorgu den moro bun leki fa unu man du dati.” Baka dati a taki: „Prakseri den bun sani di un manpikin nanga umapikin o du. Fosi tron na ini den libi, den sma di e pina, o kisi trutru trowstu.”

Fa den kan tan prisiri na ati fu tra sma

Baka dati, a fesiman kari a nen fu fo takiman. A fosiwan ben de Ralph Walls fu a Bijkantoro Komte fu Amerkankondre, èn a ben hori a lezing di nen „Tan na ai.” A ben sori taki a moro ogri te wan sma breni na yeye fasi, leki te a breni trutru. A fosi yarihondro gemeente na ini Laodisea ben kon breni na yeye fasi. Den Kresten fu a gemeente dati ben kon breni, ma den ben kisi yepi. Toku a moro bun ala ten fu no kon breni na a fasi disi, ma fu tan na ai na yeye fasi (Openbaring 3:14-18). A takiman ben taki tu: „Un musu tan na ai, èn un musu si den man di abi frantwortu na ini a gemeente, neleki fa Yehovah e si den.” Den studenti no musu broko den ede tumusi te problema de na ini a gemeente. Masra Yesus Krestes sabi ala den sani disi. A sa sorgu taki problema sa kisi wan lusu na a yoisti ten.

Baka dati, Samuel Herd fu a Tiri Skin gi piki tapu na aksi „Unu de srekasreka?” Neleki te wan sma di o go na wan farawe presi e tyari krosi di a abi fanowdu, na so den studenti musu tron sma di kisi nyun fasi. Den musu abi sari-ati neleki fa Yesus ben abi sari-ati. Di wan gwasiman taigi Yesus: „Efu yu wani nomo, yu kan meki mi kon krin”, dan Yesus taigi en: „Mi wani. Kon krin” (Markus 1:40-42). Baka dati a takiman taki: „Efu unu wani yepi sma trutru, dan unu sa suku fasi fu du disi.” Filipisma 2:3 e taigi Kresten taki den musu si ’trawan moro hei leki densrefi’.  Brada Herd ben taki: „A moro prenspari fu abi sakafasi leki fu abi sabi. Den sma di unu o miti na ini a preikiwroko, èn den brada nanga sisa fu unu na ini a gemeente sa kisi furu wini fu a sabi fu unu, ma soso te unu abi sakafasi.” A lasti sani di a taki, na taki efu den studenti e tan du muiti fu abi Kresten lobi, dan den o de srekasreka fu go na den kondre pe den o dini leki zendeling, èn den kan de seiker taki den o abi bun bakapisi.—Kolosesma 3:14.

Baka dati Mark Noumair, wan fu den leriman fu a Gileadskoro, ben o hori a lezing di nen „Unu sa tan abi a firi disi?”, èn den arkiman ben wani sabi san na a lezing disi. „A firi disi” abi fu du nanga a de di wi musu de nanga tangi taki Yehovah abi bunfasi. Psalm 103:2 e taki: „Blesi Yehovah, o mi sili, èn no frigiti ala den sani di a e du.” Den Israelsma no ben abi warderi gi a mana di ben e hori den na libi, ma den ben kari en „a tegu brede” (Numeri 21:5). Na a srefi mana den ben kisi a heri pisi ten dati, ma baka wan pisi ten den no ben abi warderi moro gi a mana disi. A leriman ben taki: „Efu unu e frigiti san Yehovah du èn unu e kon si a zendingwroko leki wan aladei sani, dan disi sa abi krakti na tapu a fasi fa unu e si a wroko di Yehovah gi unu fu du.” Psalm 103:4 e taki dati Yehovah e ’gi unu lobi bun-ati’. Den studenti o si a lobi bun-ati fu Yehovah na ini a nyun gemeente fu den.

Lawrence Bowen, wan tra leriman fu a Gileadskoro, ben taki fu a tori: „Unu sa kisi blesi?” A ben taki dati den studenti fu a di fu 119 klas fu a Gileadskoro, sreka densrefi bun fu tron zendeling di abi bun bakapisi. Ma now den musu tan krosibei fu Yehovah èn den musu tan poti prakseri na a wroko di a gi den fu du. Na ini Openbaring 14:1-4 skrifi taki den 144.000 sma na „den wan di e tan waka na baka a Pikin Skapu awansi pe a e go”. A heri grupu dati e tan loyaal na Yehovah nanga en Manpikin, awansi den e kisi tesi, èn den e doro a marki fu den. „Awansi san e pasa, wi sosrefi musu tan loyaal na Yehovah èn wi musu tan poti prakseri na a wroko di a gi wi fu du”, na so a takiman ben taki. Te den studenti o du disi, dan den o si taki Yehovah sa „blesi” den.—Deuteronomium 28:2.

Den abi bun bakapisi na ini a preikiwroko

Na a pisi ten fu a skoro, den studenti ben go na ini a preikiwroko ibri satra nanga sonde. Soleki fa a sori, dan den ben abi bun bakapisi. Na a ten di a programa ben e hori, disi ben kon na krin na ini wan takimakandra nanga Wallace Liverance, a brada di abi a frantwortu fu na administrâsi fu a skoro. Den ben preiki a bun nyunsu na ini sowan tin tongo èn den ben man opo wan tu bijbelstudie. Wan trowpaar fu Gilead ben bigin wan bijbelstudie nanga wan Sneisi man. Baka di den go na en tu leisi, den aksi en fa a ben feni en fu kon sabi Yehovah. A man disi opo en Bijbel, dan a aksi den fu leisi Yohanes 17:3. A ben feni taki a ben e waka na tapu a pasi di e tyari sma go na libi.

Baka dati Anthony Morris fu a Tiri Skin, taki nanga dri brada fu den Bijkantoro Komte fu a Dominikan Republiek, Ekwador, nanga Ivoorkust. Den brada disi ben gi den studenti a dyaranti taki den Bijkantoro Komte sa breiti te den zendeling doro na a kondre fu den èn den sa yepi den fu fiti densrefi na a wroko fu den.

Baka dati Leonard Pearson fu a Bethelfamiri na Amerkankondre, taki nanga dri brada fu den Bijkantoro Komte fu a Demokrasia Republiek Kongo, Papuwa Nyun Ginea, nanga Uganda. Den brada disi gi den studenti deki-ati fu wroko tranga na ini a preikiwroko. Wan trowpaar di de zendeling 21 yari kaba na Kongo, yepi 60 sma fu gi densrefi abra na Gado èn fu teki dopu. Nownowde a trowpaar disi e hori 30 bijbelstudie èn 22 fu den bijbelstudenti fu den e go na den gemeente konmakandra. Efu someni sani de fu du na yeye fasi, dan now na wan moi ten fu dini leki zendeling.

Gi kotoigi fu di a ten disi prenspari tumusi

Gerrit Lösch fu a Tiri Skin ben hori a lasti lezing. A lezing fu en ben nen „Taki fu Gado èn gi kotoigi fu Yesus na ini a Dei fu Masra.” Den wortu „kotoigi” nanga „gi kotoigi” de fu feni 20 tron na ini Openbaring. Sobun, Yehovah e sori krin sortu wroko a pipel fu en musu du. O ten wi musu gi kotoigi na a fasi disi? Na ini „a dei fu Masra” (Openbaring 1:9, 10). A dei dati bigin na  ini 1914, a e go doro na ini a ten fu wi, èn a sa go doro ete na ini a ten di e kon. Soleki fa Openbaring 14:6, 7 e taki, dan engel e horibaka gi a wroko di sma ben o du fu taki fu Gado. Openbaring 22:17 e sori taki a fikapisi fu salfu Kresten kisi a frantwortu fu tiri a wroko di musu du fu gi kotoigi fu Yesus. Ma wi alamala musu teki na okasi fu du a moi wroko disi nownow. Na ini vers 20 skrifi taki Yesus e taki: „Mi o kon esi.” Brada Lösch ben gi ala sma drape, deki-ati: „Gi sma a kari disi: ’Kon dringi fu a watra di e gi libi èn di de fu kisi fu soso.’ Yesus e kon esi. Wi de srekasreka?”

Fred Rusk, di ben de wan leriman fu a Gileadskoro 11 yari langa, kaba a programa nanga wan begi pe a ben e taki Yehovah tangi. A begi disi naki na ati fu ala sma di ben drape. A ben de wan moi fasi fu kaba wan prisiri dei.

[Faki na tapu bladzijde 13]

WAN TU SANI FU A KLAS

A nomru fu den kondre pe den studenti komoto: 10

A nomru fu den kondre pe den studenti o go: 25

A nomru fu studenti: 56

Gemiddeld yari di den abi: 32,5

Gemiddeld yari di den de na waarheid: 16,4

Gemiddeld yari di den de na ini a furuten diniwroko: 12,1

[Prenki na tapu bladzijde 15]

A di fu 119 klas fu a Waktitoren Bijbelskoro Gilead

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.