O tranga yu e frutrow tapu Gado?
O tranga yu e frutrow tapu Gado?
’Fu dati ede, tan suku a kownukondre fosi.’—MATEYUS 6:33.
1, 2. Fa wan yonguman ben handri di a ben abi wan problema nanga a wroko fu en? Fu san ede a handri na a fasi dati?
WAN yonguman ben wani gi moro yepi na ini a gemeente fu en. Ma a grontapuwroko fu en ben meki taki a no ben man go na den konmakandra doronomo. Fa a lusu a problema? We, a seti en libi tra fasi, a libi a wroko fu en, èn baka wan pisi ten a feni wan tra wroko di ben e meki taki a man du den frantwortu fu en na ini a Kresten gemeente. Now a no e frudini so furu leki fosi, ma a man sorgu ete gi na osofamiri fu en èn a gemeente man gebroiki en moro bun.
2 Yu e frustan fu san ede a yonkuman dati handri na so wan fasi? Yu denki taki yu ben o du a srefi sani efu yu ben de na ini a srefi situwâsi? A moi fu si taki furu Kresten du a srefi sani. A fasi fa den handri e sori taki den e frutrow na ini a pramisi fu Yesus, di ben taki: „Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu” (Mateyus 6:33). Na presi taki den e frutrow tapu a grontapu disi, den e frutrow tapu Yehovah di sa meki sani waka bun gi den.—Odo 3:23, 26.
3. Fu san ede son sma e aksi densrefi efu a de wan koni sani na ini a ten disi fu poti Gado Kownukondre na a fosi presi?
3 Fu di wi e libi na ini muilek ten, meki son sma kan aksi densrefi efu a yonguman dati teki wan koni bosroiti. Na ini a ten disi, son sma pôti srefisrefi, aladi trawan gudu pasa marki. Furu sma di e libi na ini pôti kondre no ben o draidrai fu teki iniwan okasi di den kisi fu kan libi wan moro bun libi. Na a tra sei, furu sma di e libi na ini gudu kondre e ondrofeni taki a no makriki fu tan libi leki fa den ben gwenti, aladi na ekonomia e kon moro takru; wroko no de fu feni so makriki, èn wrokobasi wani taki den wrokoman musu wroko moro langa èn moro tranga. Fu di a e kon moro hebi fu wroko moni, meki son sma e aksi densrefi: ’A de wan koni sani ete fu suku a Kownukondre fosi?’ Fu piki na aksi disi, dan a bun fu luku nanga sortu sma Yesus ben e taki.
„No broko un ede moro”
4, 5. Fa Yesus ben sori fu san ede a pipel fu Gado no ben musu broko den ede tumusi nanga den sani di den abi fanowdu ibri dei?
4 Yesus ben de na ini Galilea, èn a ben e taki nanga wan bigi ipi sma di ben komoto na difrenti presi (Mateyus 4:25). A kan taki wan tu gudusma ben de drape. Ma a sori leki moro furu fu den sma drape ben pôti. Toku Yesus ben gi den a deki-ati fu no si gudu leki a moro prenspari sani, ma fu suku wan sani di moro warti, namku gudu na yeye fasi (Mateyus 6:19-21, 24). A ben taki: „No broko un ede moro nanga un libi, iya, nanga san unu o nyan noso san unu o dringi noso san unu o weri na un skin. A libi prenspari moro leki nyanyan èn a skin prenspari moro leki krosi, a no so?”—Mateyus 6:25.
5 Kande furu fu den sma di ben e arki en, ben prakseri taki den no ben o man gebroiki den rai di Yesus gi den. Den ben sabi taki efu den no ben o wroko tranga, na osofamiri fu den ben o pina. Ma Yesus ben taigi den fu poti prakseri na den fowru. Ibri dei den fowru musu suku nyanyan nanga wan tanpresi, ma toku Yehovah e sorgu gi den. Yesus ben memre den sosrefi fa Yehovah e sorgu gi den bromki, èn taki Salomo di ben abi someni glori no ben weri so moi leki den. Efu Yehovah e sorgu gi den fowru èn gi den bromki, dan a no de fu taki dati a sa sorgu gi wi tu, a no so? (Mateyus 6:26-30) Soleki fa Yesus ben taki, dan wi libi (sili) nanga wi skin de moro prenspari leki a nyanyan di wi e bai fu tan na libi èn den krosi di wi e weri fu tapu wi skin. Efu wi e gebroiki ala wi krakti nanga wi ten fu suku nyanyan nanga krosi, so taki wi no man du so furu gi Yehovah, dan wi no e libi soleki fa wi musu libi.—Preikiman 12:13.
Si sani na wan yoisti fasi
6. (a) Sortu frantwortu Kresten abi? (b) Na ini suma Kresten e frutrow dorodoro?
6 A tru taki Yesus no ben gi den sma di ben e arki en, deki-ati fu tapu nanga a wroko fu den èn fu sidon wakti teleki Gado feni wan fasi fu sorgu gi na osofamiri fu den. Srefi den fowru musu suku nyanyan gi densrefi èn gi den pikin fu den. Sobun, bakaman fu Krestes ben musu wroko efu den ben wani nyanyan. Den ben musu sorgu gi den sani di na osofamiri fu den ben abi fanowdu. Kresten di ben e wroko leki futuboi èn leki srafu, ben musu wroko tranga gi a masra fu den (2 Tesalonikasma 3:10-12; 1 Timoteyus 5:8; 1 Petrus 2:18). Furu tron, na apostel Paulus ben e meki èn seri tenti fu man sorgu gi ensrefi (Tori fu den Apostel 18:1-4; 1 Tesalonikasma 2:9). Toku den Kresten dati no ben e fruwakti taki a grontapuwroko fu den ben o gi den a dyaranti taki sani ben o waka bun nanga den. Den ben e frutrow tapu Yehovah. Leki bakapisi fu dati, den ben abi wan korostu firi di trawan no ben abi. A psalm skrifiman ben taki: „Den wan di e frutrow tapu Yehovah, de leki Sionbergi di nowan sma kan meki a degedege, ma di e tan te ten di no skotu.”—Psalm 125:1.
7. Sortu denki wan sma kan abi te a no e frutrow tapu Yehovah dorodoro?
7 Iniwan sma di no e frutrow tapu Yehovah dorodoro, sa prakseri tra fasi fu a tori disi. Furu sma e si gudu leki a moro prenspari sani di kan meki taki sani waka bun na ini den libi. Dati meki papa nanga mama e gi den pikin fu den deki-ati fu teki hei skoroleri so langa leki den man. Nanga dati, papa nanga mama e howpu taki den pikin sa feni wan wroko pe den kan kisi moro moni. A de wan sari sani taki son Kresten osofamiri ondrofeni furu takru bakapisi fu di den poti furu prakseri na hei skoroleri. Leki bakapisi fu dati, den pikin fu den tapu fu poti yeye afersi na a fosi presi èn den bigin feti baka gudu.
8. Fa Kresten e prakseri fu a grontapuwroko fu den, èn fu yeye afersi?
8 Dati meki Kresten di e handri nanga koni, sabi taki a rai fu Yesus no ben fiti gi a fosi yari hondro wawan, ma sosrefi gi a ten disi. Fu dati ede, den e pruberi fu fiti a rai disi na ini den libi. Awinsi den musu wroko omeni yuru langa fu man sorgu gi na osofamiri fu den soleki fa Bijbel e taki, toku noiti den sa meki taki a grontapuwroko fu den tapu den fu poti prakseri na yeye afersi di de moro prenspari.—Preikiman 7:12.
„Noiti un musu broko un ede”
9. Sortu dyaranti Yesus e gi den wan di e frutrow tapu Yehovah dorodoro?
9 Na ini a Bergitaki fu en, Yesus gi den sma di ben e arki en, a deki-ati: „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Bika ala den sani disi na san den grontapusma e feti fu kisi. Bika un Tata na hemel sabi taki unu abi ala den sani disi fanowdu” (Mateyus 6:31, 32). Den wortu disi e gi wi deki-ati trutru! Efu wi e frutrow tapu Yehovah dorodoro, dan ala ten a sa horibaka gi wi. Ma den wortu fu Yesus e memre wi na wan prenspari sani tu. Den e memre wi taki efu wi e „feti fu kisi” gudu, dan wi abi a srefi denki leki „den grontapusma”, sma di no de tru Kresten.
10. Di wan yonguman aksi Yesus rai, dan san Yesus du fu tyari kon na krin san a yonguman disi ben lobi moro?
10 Na wán okasi, wan yonguman di ben abi furu gudu, aksi Yesus san a musu du fu kisi têgo libi. Yesus ben memre en na den markitiki di skrifi na ini a Wet di sma ben musu hori na ini a ten dati. A yonguman ben gi Yesus a dyaranti: „Mi du ala den sani disi; ma san mi no e du ete?” Kande son sma ben e denki taki a piki di Yesus ben gi a yonkuman, no ben de wan koni rai. Yesus ben taki: „Efu yu wani de volmaakti, dan go seri den sani di yu abi èn prati a moni gi den pôtisma, dan yu sa kisi wan gudu na hemel; kon nanga mi èn tron wan bakaman fu mi” (Mateyus 19:16-21). A yonguman ben firi sari èn a waka gowe, fu di a no ben wani lasi den gudu fu en. Awansi o furu a ben lobi Yehovah, toku a ben lobi den gudu fu en moro.
11, 12. (a) Sortu seryusu warskow di abi fu du nanga gudu, Yesus ben gi? (b) Fa den sani di wan sma abi, kan tapu en fu dini Yehovah?
11 A sani dati di ben pasa, ben pusu Yesus fu taki wan sani di nowan sma ben fruwakti: „A o muilek gi wan guduman fu go na ini a kownukondre fu hemel. . . . A moro makriki gi wan kameili fu pasa na ini wan nanai-olo, leki gi wan guduman fu go na ini a kownukondre fu Gado” (Mateyus 19:23, 24). A de so taki Yesus ben wani sori taki nowan gudusma ben o go na ini a Kownukondre? Nôno, fu di a ben taki moro fara: „Gado man du ala sani” (Mateyus 19:25, 26). Iya, nanga Yehovah yepi, wan tu gudusma na ini a ten dati ben tron salfu Kresten (1 Timoteyus 6:17). Ma toku, a no fu soso Yesus ben taki dati a o muilek gi wan guduman fu go na ini a Kownukondre fu hemel. Den wortu dati ben de wan warskow.
12 Efu wan sma bigin lobi den gudu fu en so furu taki a no man tan sondro den, dan dati kan tapu en fu dini Yehovah nanga en heri ati. Disi kan pasa nanga wan sma di gudu kaba, ma sosrefi nanga wan sma „di wani kon gudu nomonomo” (1 Timoteyus 6:9, 10). Te wan sma e frutrow tumusi furu tapu materia sani, dan dati kan meki taki a sma no poti prakseri so furu moro na den sani di a abi fanowdu na yeye fasi (Mateyus 5:3). Leki bakapisi fu dati, a kan bigin firi leki a no abi Yehovah fanowdu moro (Deuteronomium 6:10-12). Kande a e bigin fruwakti taki a musu kisi spesrutu grani na ini a gemeente (Yakobus 2:1-4). Èn a kan bigin poti furu prakseri na den gudu fu en, na presi fu dini Yehovah.
Kon kisi wan yoisti fasi fu si sani
13. Sortu fowtu denki den Kresten na ini Laodisea ben abi?
13 Na ini a fosi yarihondro wan grupu sma ben de di ben abi wan fowtu denki fu den gudu di den ben abi. A grupu sma dati ben de a gemeente Laodisea. Yesus ben taigi den: „Yu e taki: ’Mi na wan guduman, mi abi wan lo gudu kaba, mi no abi notinoti fanowdu’, ma yu no sabi taki yu na wan mofinasma, taki sma e firi sari gi yu, taki yu pôti, taki yu breni èn taki yu de nanga sososkin.” A no a gudu fu den Kresten fu Laodisea ben meki taki den kon swaki na yeye fasi. Ma na fu di den ben e frutrow tapu gudu, na presi fu frutrow tapu Yehovah. A bakapisi ben de taki den ben broko-kowru, èn heri-esi Yesus ben o ’spiti den puru na ini en mofo’.—Openbaring 3:14-17.
14. Fu san ede den Hebrew Kresten ben warti fu kisi prèise fu Paulus?
14 Na a tra sei, Paulus ben prèise den Hebrew Kresten fu a fasi fa den ben e handri den tra leisi di den ben kisi frufolgu. A ben taki: „Unu ben firi gi den sma di ben de na strafu-oso èn unu ben e prisiri awansi sma ben e fufuru den sani fu unu, fu di unu sabi taki unu abi wan moro betre gudu di e tan fu ala ten” (Hebrewsma 10:34). Di den Kresten dati lasi den gudu fu den, den no ben firi brokosaka. Den ben tan abi prisiri fu di den ben tan hori na a moro warti sani di den ben abi, namku „wan moro betre gudu di e tan fu ala ten”. Yesus ben fruteri wan agersitori fu wan seriman di ben seri ala san a ben abi fu bai wán diri peri. Neleki a seriman dati, na so den Hebrew Kresten ben abi a fasti bosroiti fu no lasi a Kownukondre howpu, awinsi san ben e pasa (Mateyus 13:45, 46). Dati na trutru wan moi fasi fu denki!
15. Fa wan Kresten uma na ini Liberia poti Kownukondre afersi na a fosi presi?
15 Na ini a ten disi, furu Kresten leri fu denki na so wan moi fasi tu. Fu eksempre, na ini Liberia, wan yongu Kresten uma ben kisi na okasi fu go studeri na universiteit. Na ini a kondre dati, sma ben o si disi leki wan okasi fu seti wan bun libi. Ma a yongu uma disi ben de wan pionier, noso wan furuten preikiman, èn a ben kisi wan kari fu dini leki spesrutu pionier wan pisi ten. A ben bosroiti fu suku a Kownukondre fosi, èn a tan na ini a furuten diniwroko. A bigin nanga a spesrutu pionierwroko, èn na ini wan pisi ten fu dri mun a opo 21 bijbelstudie. A yongu sisa disi èn sosrefi dusundusun trawan di e handri neleki en, e suku a Kownukondre fosi, srefi te den musu lasi son sani di ben sa kan meki den kisi winimarki na materia sei. Fa den kan tan abi a denki disi aladi den e libi na ini wan grontapu pe sma lobi gudu? Den kweki wan tu moi fasi. Meki wi poti prakseri na wan tu fu den fasi disi.
16, 17. (a) Fu san ede a de prenspari fu abi sakafasi efu wi wani frutrow tapu Yehovah? (b) Fu san ede wi musu kon abi a frutrow taki Gado sa du san a pramisi?
16 Sakafasi: Bijbel e taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti. No kon koni na ini yu eigi ai” (Odo 3:5-7). Son leisi wan sma kan denki taki a e handri na wan koni fasi, ma dati na a fasi fa a o handri te a frutrow tapu en eigi frustan (Yeremia 17:9). Ma wan opregti Kresten e meki Yehovah tiri en (Psalm 48:14). A e sori sakafasi èn e suku rai na Yehovah ’na ini ala san a e du’, awinsi disi abi fu du nanga skoroleri, grontapuwroko, prisiriten, noso iniwan tra sani.—Psalm 73:24.
17 Abi a frutrow taki Yehovah sa du san a pramisi: Paulus ben taki: „A sma di e anbegi Gado musu bribi taki a de trutru èn taki a sa pai den sma di e suku en fayafaya” (Hebrewsma 11:6). Wan sma di no e frutrow taki Yehovah man du san a pramisi, o wani „gebroiki den sani fu grontapu dorodoro” (1 Korentesma 7:31). Na a tra sei, efu wi abi wan tranga bribi, wi sa abi a fasti bosroiti fu suku a Kownukondre fosi. Fa wi kan kon kisi wan tranga bribi? Wi kan kisi wan tranga bribi, te wi e begi komoto fu wi ati èn te wi e studeri doronomo. Na so fasi wi e kon krosibei na Yehovah (Psalm 1:1-3; Filipisma 4:6, 7; Yakobus 4:8). Neleki Kownu David, wi kan begi: „Tapu yu mi poti mi frutrow, o Yehovah. Mi taki: ’Yu na mi Gado.’ Yu bun dorodoro!”—Psalm 31:14, 19.
18, 19. (a) Te wi de fayafaya na ini a diniwroko, dan fa dati kan meki wi frutrow na ini Yehovah kon moro tranga? (b) Fu san ede wan Kresten musu de klariklari fu libi son sani di a lobi?
18 De fayafaya na ini a diniwroko fu Yehovah: Paulus ben sori fu san ede wi musu wroko tranga, te wi e frutrow na ini Yehovah. A ben skrifi: „Wi wani srefisrefi taki ibriwan fu unu musu abi a srefi faya, so taki unu kan de seiker fu a howpu te na a kaba” (Hebrewsma 6:11). Efu wi abi furu fu du na ini a diniwroko fu Yehovah, dan a sa yepi wi. Ibri leisi te wi e ondrofeni taki a e yepi wi, wi e kisi wan moro tranga frutrow na ini en. Wi e tron sma di e ’tanapu kánkan, di no e degedege’ (1 Korentesma 15:58). Wi e kisi moro bribi, èn a howpu fu wi e kon moro tranga.—Efeisesma 3:16-19.
19 Wi musu de klariklari fu libi son sani di wi lobi: Aladi Paulus ben abi na okasi fu du wan wroko di ben kan meki taki a abi wan bun libi, toku a libi a sani dati fu tron wan bakaman fu Yesus. A de krin taki a teki a yoisti bosroiti, aladi son leisi a ben musu wroko tranga fu sorgu ensrefi (1 Korentesma 4:11-13). Yehovah no e pramisi wi wan guduman libi, èn son leisi den futuboi fu en e kisi furu tesi. Te wi de klariklari fu libi soso nanga den sani di wi abi fanowdu trutru èn te wi de klariklari fu libi son sani di wi lobi, dan wi e sori taki wi abi a fasti bosroiti fu dini Yehovah.—1 Timoteyus 6:6-8.
20. Fu san ede pasensi de tumusi prenspari gi wan sma di e poti Kownukondre afersi na a fosi presi?
20 Pasensi: A disipel Yakobus ben gi den Kresten brada nanga sisa fu en a deki-ati: „Fu dati ede, brada, un musu abi pasensi teleki a denoya fu Masra” (Yakobus 5:7). A no makriki fu abi pasensi na ini a grontapu disi pe sma e feti fu du omeni sortu sani. Wi wani taki sani musu pasa esi-esi. Ma Paulus e gi wi a deki-ati fu waka baka den wan „di kisi den pramisi fu di den ben abi bribi èn fu di den ben abi pasensi” (Hebrewsma 6:12). De klariklari fu wakti Yehovah. Fu tru, a de wan warti sani fu wakti a têgo libi di wi sa kisi na ini wan paradijs na grontapu!
21. (a) San wi e sori te wi e poti Kownukondre afersi na a fosi presi? (b) San wi sa go luku na ini na artikel di e kon?
21 Iya, Yesus gi wi bun rai di a taigi wi fu suku a Kownukondre fosi. Te wi e du disi, dan wi e sori taki wi e frutrow tapu Yehovah trutru, èn taki wi e frukisi fu libi na a wán-enkri fasi fa wan Kresten musu libi fu no abi takru bakapisi. Ma Yesus ben gi wi a rai tu fu tan „suku . . . [Gado] en regtfardikifasi fosi”. Na ini na artikel di e kon, wi sa si fu san ede dati de prenspari, spesrutu na ini a ten disi.
Yu kan tyari disi kon na krin?
• Fa wi musu prakseri fu materia sani, soleki fa Yesus ben gi wi deki-ati?
• San wi e leri fu na agersitori di Yesus ben fruteri fu a kameili nanga a nanai-olo?
• Sortu Kresten fasi e yepi wi fu suku Gado Kownukondre fosi?
[Aksi fu a tori disi]
[Prenki na tapu bladzijde 21]
Furu sma di yere den wortu fu Yesus, ben de pôtisma
[Prenki na tapu bladzijde 23]
A gudu yonkuman ben abi moro lobi gi den gudu fu en, leki gi Gado
[Prenki na tapu bladzijde 23]
A seriman na ini na agersitori fu Yesus, seri ala san a ben abi fu bai wán diri peri
[Prenki na tapu bladzijde 24]
Efu wi abi furu fu du na ini a diniwroko fu Yehovah, dan a sa yepi wi