„Wan wortu di taki na a yoisti ten, bun srefisrefi!”

NA WAN fu den bigi konmakandra fu Yehovah Kotoigi, Kim ben e du ala muiti fu arki èn fu skrifi wan tu prenspari sani, aladi a ben e pruberi fu meki en umapikin fu tu nanga afu yari, tan sidon pî. Na a kaba fu a programa, wan Kresten sisa di ben e sidon na den sei, drai luku Kim, èn nanga en heri ati a prèise Kim nanga en masra fu a muiti di den ben e meki nanga na umapikin fu den, aladi den lezing ben e hori. A fasi fa a sisa prèise Kim, ben meki Kim prisiri so te, taki te now ete, baka someni yari, a e taki: „Te mi weri srefisrefi, spesrutu na den konmakandra, dan mi e prakseri san a sisa ben taki. Te now ete, den switi wortu fu en e gi mi deki-ati fu tan kweki wi umapikin na wan bun fasi.” Iya, wortu di taki na a yoisti ten, kan meki wan sma firi bun. Bijbel e taki: „Wan wortu di taki na a yoisti ten, bun srefisrefi!”—Odo 15:23.

Ma a kan de wan muilek sani gi sonwan fu wi fu prèise trawan. Son leisi disi de so, fu di wi sabi taki wisrefi abi fowtu. Wan Kresten e taki: „A e meki mi firi moro nanga moro taki mi abi fowtu. O moro mi e prèise sma, o moro mi e firi leki mi no warti noti.” Tra sani di kan meki taki son sma no e prèise trawan na te den e syensyen, te den e firi leki den no warti, noso te den e frede taki sma o denki takru fu den. Boiti dati, efu sma noiti no prèise wi di wi ben e gro kon bigi, dan a kan muilek gi wi fu prèise trawan.

Toku, wi sabi taki te wan sma e prèise wan trawan, dan a sma di e prèise a trawan, èn sosrefi a sma di e kisi prèise e firi switi. Fu dati ede wi musu du muiti fu prèise sma na a yoisti ten (Odo 3:27). Ma sortu bun bakapisi e kon te wi e prèise trawan? Meki wi luku syatu san na wan tu fu den.

Bun bakapisi

Fu prèise wan sma na a yoisti ten, kan meki taki a sma e firi taki a warti trutru. „Te sma e prèise mi, dan mi e firi taki den e si mi leki wan warti sma, èn taki den e frutrow mi”, na so Elaine, wan Kresten wefi, e taki. Iya, efu wan sma e firi taki a no warti èn trawan e prèise en, dan a sma dati kan kisi deki-ati fu kakafutu gi problema, èn dati o meki taki a sa kisi prisiri. Spesrutu yonguwan e kisi wini te sma e prèise den te den du wan bun sani. Wan tini di e firi brokosaka ten na ten fu di a e denki takru fu ensrefi, taki: „Ala ten mi e pruberi fu plisi Yehovah, ma son tron mi e firi taki awinsi san mi du, a no bun nofo. Te wan sma e prèise mi, dan mi e firi bun trutru.” Iya, a de trutru soleki fa wan odo fu Bijbel taki: „Leki gowtu apra ini solfru kerfu wroko wan wortu de, di taki na a yoisti ten.”—Odo 25:11.

Wan sma kan kisi deki-ati fu opo du wan sani, te trawan e prèise en. Wan furuten dinari taki: „Te sma e prèise mi, dan dati e gi mi deki-ati fu wroko moro tranga èn moro bun na ini mi diniwroko.” Wan mama di abi tu pikin kon si taki te den trawan na ini a gemeente e prèise den pikin fu di den pikin gi piki na den konmakandra, dan den pikin wani gi moro piki. Iya, te sma e prèise yonguwan, dan disi kan meki taki den yonguwan o du moro muiti fu libi leki Kresten. Fu taki en leti, wi alamala wani abi na overtoigi taki trawan e warderi wi èn taki wi warti trutru. A grontapu disi kan weri wi skin èn a kan meki wi firi leki wan hebi de na wi tapu. Wan Kresten owruman e  taki: „Son tron te mi e firi brokosaka èn wan sma e prèise mi, dan a de leki mi e kisi piki tapu den begi fu mi.” Elaine di e firi a srefi fasi tu, e taki: „Son tron te trawan e prèise mi, dan mi e si dati leki wan fasi fa Yehovah e sori taki a feni mi bun.”

Te sma e prèise wi, dan wi e firi taki den lobi wi. Te wi e prèise makandra nanga wi heri ati, dan dati e sori taki wi abi makandra na prakseri, wi e firi switi, wi no e frede, èn wi e lespeki makandra. Disi e sori taki wi abi trutru lobi nanga warderi gi wi Kresten brada nanga sisa. Josie di de wan mama, e taki: „Fosi, mi osofamiri ben e gens mi fu di mi no ben abi a srefi bribi leki den. Na a ten dati, mi ben e kisi deki-ati te lepi brada nanga sisa ben e prèise mi, èn disi ben tranga a bosroiti di mi ben abi fu horidoro.” Fu tru, „wi na pisi fu a srefi skin èn wi de fu makandra”.—Efeisesma 4:25.

Te wi wani prèise trawan, dan dati o yepi wi fu si a bun sei fu den. Wi o luku sortu bun fasi den abi, èn wi no o luku den swakifasi fu den. Wan Kresten owruman di nen David, taki: „Te wi e warderi san trawan e du, dan dati o yepi wi fu prèise den moro furu.” Te wi e hori na prakseri taki Yehovah nanga en Manpikin gwenti prèise sondu libisma, dan dati o meki taki wi sa wani du a srefi tu.—Mateyus 25:21-23; 1 Korentesma 4:5.

Den wan di warti fu wi prèise den

Fu di Yehovah Gado na wi Mekiman, meki en na a fosi sma di wi musu prèise (Openbaring 4:11). Aladi a no abi wi fanowdu fu firi bun, noso fu gi en deki-ati, toku a de so taki te wi e prèise Yehovah fu den kefalek sani di a du èn fu a lobi bun-ati fu en, dan a e kon krosibei fu wi èn wi e tron mati fu en. Te wi e prèise  Gado, dan dati e meki tu taki wi o si wisrefi na a yoisti fasi èn wi no o denki tumusi furu fu wisrefi, noso fu den sani di wi e du, bika wi o frustan taki na Yehovah e meki sani waka bun gi wi (Yeremia 9:23, 24). Yehovah e gi ala sma na okasi fu kisi têgo libi, èn dati na ete wan tra reide fu san ede wi musu prèise en (Openbaring 21:3, 4). Kownu David fu owruten ben e angri fu „prèise a nen fu Gado” èn fu „gi en glori nanga tangi” (Psalm 69:30). Meki wi angri fu prèise Gado tu.

Tra anbegiman fu Yehovah warti fu wi prèise den soleki fa a fiti. Te wi e prèise den, dan wi e gi yesi na a komando fu Gado, namku fu ’poti prakseri na makandra, so taki wi kan gi makandra deki-ati fu abi lobi èn fu du bun wroko’ (Hebrewsma 10:24). Na apostel Paulus na wan moi eksempre fu wan sma di ben e du disi. A ben skrifi a gemeente na ini Rome: „Na a fosi presi, nanga yepi fu Yesus Krestes mi e taki mi Gado tangi fu un alamala, fu di sma na heri grontapu e taki fu a bribi fu unu” (Romesma 1:8). Na apostel Yohanes sosrefi ben prèise en Kresten brada Gayus, fu di a ben de wan heri moi eksempre fu wan sma di „e waka na ini a waarheid”.—3 Yohanes 1-4.

Na ini a ten disi, wi abi a moi okasi fu sori warderi te wan Kresten brada noso sisa e tyari ensrefi na wan fasi di e fiti wan Kresten trutru, sosrefi te a abi wan prati na wan konmakandra di a sreka bun na fesi, noso te a e gi wan moi piki. Te wan pikin e du ala muiti fu feni den bijbeltekst di kari na den gemeente konmakandra, dan wi kan prèise en tu. Elaine, fu suma wi ben fruteri kaba, e taki: „Wi alamala abi difrenti moi fasi. Te wi e si sortu bun wan trawan e du èn wi e taki fu dati, dan wi e sori taki wi e warderi den difrenti moi fasi di a pipel fu Gado abi.”

Na ini na osofamiri

Fa a de nanga a prèise di wi e prèise den sma na ini wi osofamiri? Te wan masra nanga en wefi wani taki den sma na ini na osofamiri  firi bun èn taki sani e waka bun gi den na skin fasi èn na yeye fasi, dan den musu gebroiki furu ten èn den musu du furu muiti; sosrefi den musu poti furu prakseri na a osofamiri na wan lobi-ati fasi. A no de fu taki dati den musu prèise makandra, èn den pikin musu prèise den tu (Efeisesma 5:33). Fu eksempre, Gado Wortu e taki fu wan bun wefi: „Den manpikin fu en opo tanapu èn den prèise en koloku; en eiginari e opo tanapu, èn a e prèise en.”—Odo 31:10, 28.

Den pikin sosrefi musu kisi prèise. A de wan sari taki son papa nanga mama e taigi den pikin ibri tron baka san den e fruwakti fu den, ma nofo tron den no e prèise den pikin te den pikin du muiti fu sori lespeki èn fu gi yesi (Lukas 3:22). Te sma e prèise wan pikin frukufruku kaba, dan nofo tron disi e meki a pikin firi bun, a e firi leki en na wan warti sma, èn a no e frede.

A tru taki wi abi fu du muiti efu wi wani prèise trawan, ma wi sa kisi furu wini te wi e du dati. Fu taki en leti, o moro muiti wi e du fu prèise sma te den warti fu kisi dati, o moro wi sa firi koloku.—Tori fu den Apostel 20:35.

Abi a yoisti denki te sma e prèise yu èn te yu e prèise sma

Ma a kan de wan tesi gi son sma te trawan e prèise den (Odo 27:21). Fu eksempre, wan sma di kan kisi heimemre makriki, kan bigin firi ensrefi moro hei leki trawan te sma e prèise en (Odo 16:18). Dati meki wi musu luku bun. Na apostel Paulus ben gi a moi rai disi: „Mi e taigi un alamala drape fu no denki moro fu unsrefi leki san de fanowdu, ma fu gebroiki un frustan na wan koni fasi, èn ibriwan fu unu musu du dati nanga a bribi di Gado gi unu” (Romesma 12:3). Efu wi wani yepi trawan fu no denki moro fu densrefi leki san de fanowdu, dan a de wan koni sani fu no poti tumusi furu prakseri na a koni fu den, noso na a moi fu den. Na presi fu dati, wi kan prèise den fu den bun sani di den du.

Efu wi abi a yoisti denki te wi e prèise sma, noso te sma e prèise wi, dan dati kan abi wan bun krakti na wi tapu. Fu eksempre, wi sa frustan taki na Yehovah wi musu taki tangi fu iniwan bun sani di wi du. Te sma e prèise wi, dan dati kan gi wi deki-ati tu fu tan tyari wisrefi na wan fasi di fiti.

Wi alamala abi wan moi presenti di wi kan gi trawan, namku fu prèise den nanga wi heri ati fu di den warti fu kisi dati. Te wi e prèise trawan nanga wi heri ati, dan a kan meki den firi bun, kande moro leki san wi denki srefi.

[Faki/​Prenki na tapu bladzijde 18]

Wan brifi di naki en ati

Wan opziener di e reis e memre heri bun di en nanga en wefi ben drai kon na oso baka di den ben du a preikiwroko, aladi a ben de wan bun kowru dei. A e taki: „Mi wefi ben e kowru èn a ben e firi brokosaka, ne a taigi mi taki a e firi leki a no man du a wroko disi moro. ’A ben o switi srefisrefi efu wi ben kan du furuten diniwroko na ini wán gemeente; wi ben sa man tan na wán presi nomo, èn wi ben sa man abi wi eigi bijbelstudie’, na so a taki. Mi no ben wani teki wan bosroiti wantewante, sobun mi taigi en fu wroko a wiki dati ete, dan wi ben o luku fa a ben e firi. Efu a ben wani tapu nanga a wroko disi trutru, dan wi ben o du dati. A srefi dei, wi go na a postkantoro fu teki wan brifi di ben komoto fu a bijkantoro. A brifi ben abi en nen na tapu. Na ini a brifi den ben e prèise mi wefi fu a muiti di a ben e du na ini a preikiwroko, èn sosrefi taki a ben e horidoro, aladi a kan de wan muilek sani fu sribi na ini wan tra bedi ibri wiki. A prèise di den ben prèise en, ben naki en ati so te, taki noiti moro a taki dati a wani tapu nanga a wroko di wi ben e du. Fu taki en leti, son tron te mi ben e denki fu tapu nanga a wroko, dan na en ben e gi mi deki-ati fu tan go doro.” A trowpaar disi tan du a wroko fu den sowan 40 yari langa.

[Prenki na tapu bladzijde 17]

Suma na ini yu gemeente warti fu yu prèise den?

[Prenki na tapu bladzijde 19]

Pikin e firi bun te sma lobi den èn e prèise den