Wi sa kisi kibri te wi e suku regtfardikifasi
Wi sa kisi kibri te wi e suku regtfardikifasi
’Fu dati ede, tan suku a regtfardikifasi fu Gado fosi.’—MATEYUS 6:33.
1, 2. Sortu bosroiti wan yongu Kresten uma ben teki, èn fu san ede a teki a bosroiti dati?
NA INI Asia, wan yongu Kresten uma ben e wroko leki sekretarsi na wan lanti kantoro. A ben e du en wroko heri bun, a ben de fruku na wroko, èn a no ben lesi-lesi. Ma fu di den no ben teki en leki fasti wrokoman ete, meki den ben o luku now fa a ben du en wroko. A basi fu na afdeling ben taigi a yongu uma taki a ben kan tan wroko drape èn taki a ben o kisi wan moro hei posisi srefi, efu a ben o hori nanga en. A yongu uma weigri fu du dati krinkrin, aladi dati ben o meki taki a lasi en wroko.
2 A de so taki a yongu Kresten uma dati handri na wan don fasi? Nôno, a ben du soifri san Yesus ben taki: ’Fu dati ede, tan suku a regtfardikifasi fu Gado fosi’ (Mateyus 6:33). A ben moro prenspari gi en fu hori ensrefi na regtfardiki markitiki, na presi fu du hurudu soso fu kisi wan hei posisi.—1 Korentesma 6:18.
O prenspari regtfardikifasi de
3. San a wani taki fu de regtfardiki?
3 Wan regtfardiki sma ala ten e tyari ensrefi na wan fasi di fiti, èn a no e kori trawan. Na ini Bijbel, a Griki wortu èn a Hebrew wortu e sori taki so wan sma „e du san reti” noso taki a de „opregti”. A no e suku fu hori ensrefi na en eigi markitiki (Lukas 16:15). A e suku fu de opregti, fu di a e hori ensrefi na den markitiki fu Yehovah. So wan sma e suku a regtfardikifasi fu Gado.—Romesma 1:17; 3:21.
4. Fu san ede regtfardikifasi prenspari gi wan Kresten?
4 Fu san ede regtfardikifasi de prenspari? Fu di Yehovah, a „regtfardiki Gado”, e blesi den anbegiman fu en te den e handri na wan regtfardiki fasi (Psalm 4:1; Odo 2:20-22; Habakuk 1:13). Iniwan sma di no e handri na wan regtfardiki fasi, no kan abi wan krosibei matifasi nanga en (Odo 15:8). Dati meki, na apostel Paulus ben gi Timoteyus a deki-ati: „Wai pasi gi den lostu di yongusma abi, ma du muiti fu de regtfardiki.” Boiti dati, a ben musu du muiti fu kisi tra tumusi prenspari fasi tu (2 Timoteyus 2:22). Dati meki, di Paulus ben kari den difrenti sani di Gado gi wi fu feti na yeye fasi, a ben taki sosrefi fu ’regtfardikifasi di wi musu weri leki wan sani di musu kibri a borsu’.—Efeisesma 6:14.
5. Fa libisma di no de volmaakti kan suku regtfardikifasi?
5 A no de fu taki dati nowan libisma de regtfardiki dorodoro. Leki bakapikin fu Adam, wi alamala e sondu; wi e gebore leki sma di no de regtfardiki. Toku, Yesus ben taki dati wi musu suku regtfardikifasi. Fa dati kan? A kan, fu di Yesus gi en volmaakti libi leki wan lusu-paiman gi wi. Efu wi e sori bribi na ini na ofrandi dati, dan Yehovah de klariklari fu gi wi pardon fu den sondu fu wi (Mateyus 20:28; Yohanes 3:16; Romesma 5:8, 9, 12, 18). Sobun, te wi e kon sabi den regtfardiki markitiki fu Yehovah èn te wi e du ala muiti fu du san wi e leri, aladi wi e begi Gado fu yepi wi fu basi den swakifasi fu wi, dan a o feni na anbegi fu wi bun (Psalm 1:6; Romesma 7:19-25; Openbaring 7:9, 14). Dati e trowstu wi trutru!
De regtfardiki na ini wan grontapu di no de regtfardiki
6. Fu san ede grontapu ben de wan ogri presi fu libi gi den fosi Kresten?
6 Den disipel fu Yesus ben kisi a komando fu de kotoigi fu en „te na den moro farawe presi fu grontapu”. Ma disi no ben o de wan makriki sani (Tori fu den Apostel 1:8). A heri kontren pe den ben musu wroko ben „de na ini a makti fu na ogriwan”, Satan (1 Yohanes 5:19). Grontapu ben kon furu nanga a takru denki fu en di a e panya go na ala sei, èn a denki dati ben kan abi krakti tapu Kresten tu (Efeisesma 2:2). Gi den Kresten disi, grontapu ben de wan ogri presi fu libi. Soso te den ben o suku a regtfardikifasi fu Gado fosi, dan den ben o man horidoro sondro fu lasi a soifri retifasi fu den. Furu fu den fosi Kresten ben horidoro, ma wan tu fu den ben gowe libi „a pasi fu regtfardikifasi”.—Odo 12:28; 2 Timoteyus 4:10.
7. Sortu frantwortu Kresten abi, di e meki taki den musu kakafutu gi sani di kan pori den frustan?
7 A de so taki a grontapu kon moro bun gi Kresten na ini a ten disi? Kwetikweti! Na ini a ten disi a kon moro ogri srefi. Boiti dati, Satan ben trowe kon na grontapu èn na wan ogri-ati fasi a e feti nanga den salfu Kresten, „den pikin fu na uma di ben tan abra; na den e du san den komando fu Gado e taki èn den kisi a wroko fu kotoigi fu Yesus” (Openbaring 12:12, 17). Satan wani du ogri sosrefi nanga iniwan sma di e horibaka gi „den pikin fu na uma”. Ma toku, Kresten no man kibri gi grontapu. Aladi den no de wan pisi fu grontapu, toku den musu libi na ini (Yohanes 17:15, 16). Èn den musu preiki na ini grontapu fu suku sma di wani arki a boskopu fu den èn fu gi den leri so taki den kan tron disipel fu Krestes (Mateyus 24:14; 28:19, 20). Sobun, fu di Kresten no man wai pasi krinkrin gi den sani fu a grontapu disi di kan pori den frustan, meki den musu kakafutu gi den. Meki wi poti prakseri now na fo fu den sani dati.
Luku bun nanga hurudu
8. Fu san ede den Israelsma bigin dini den gado fu den Moabsma?
8 Na a kaba fu den 40 yari di den Israelsma tan na ini a gran sabana, wan bigi ipi fu den gowe libi a pasi fu regtfardikifasi. Furu leisi den ben si fa Yehovah du wondru fu frulusu den, èn a no ben o teki langa fosi den ben o go na ini a Pramisi Kondre. Ma na a prenspari pisi ten dati, den bigin dini den gado fu den Moabsma. Fu san ede? Fu di den brokokindi gi „a lostu fu a skin” (1 Yohanes 2:16). Bijbel e taki: „Den sma bigin du hurudu nanga den umapikin fu Moab.”—Numeri 25:1.
9, 10. Sortu situwâsi na ini a ten disi e meki taki a de tumusi prenspari fu hori na prakseri taki den takru lostu fu a skin kan pori wan sma frustan?
9 A sani di pasa nanga den Israelsma, e sori fa den takru lostu fu a skin kan pori den wan di no de na ai. Wi musu leri fu na eksempre dati, spesrutu fu di furu sma na ini a ten disi no e si hurudu leki wan fowtu sani (1 Korentesma 10:6, 8). Wan raportu fu Amerkankondre e taki: „Teleki den yari fosi 1970, a wet fu Amerkankondre ben sori taki sma di no ben trow, no ben mag libi nanga makandra. Now, a tron wan aladei sani. Moro leki afu fu den sma di e trow fosi tron, libi nanga makandra kaba bifo den trow.” A gwenti dati, èn sosrefi tra takru gwenti di sma abi, no de fu si na ini wán kondre nomo. Den de fu si na heri grontapu, èn a de wan sari sani taki son Kresten teki den gwenti dati abra, èn taki den gowe libi a Kresten gemeente na a fasi dati.—1 Korentesma 5:11.
10 Boiti dati, a gersi leki na ala sei yu kan si noso yere sani di e gi sma deki-ati fu du hurudu. Kino nanga telefisi programa e meki a gersi leki a no fowtu srefisrefi te yonguwan abi seks bifo den trow. Sma e taki fu a homo-sekslibi leki na wan bun sani. Moro nanga moro sani de fu si di e sori finifini fa sma e abi seks nanga makandra. Prenki di e sori krinkrin fa sma e abi seks, de fu si makriki tapu Internet. Fu eksempre, wan koranti skrifiman ben fruteri taki di en manpikin fu seibi yari ben komoto na skoro wan dei, a ben kon fruteri nanga ala prisiri taki wan skoromati fu en ben feni wan website di e sori fa sososkin uma e abi seks. A papa skreki srefisrefi, ma someni tra yonguwan de di si den sortu sani disi, èn di no fruteri a papa nanga mama fu den. Boiti dati, omeni papa nanga mama sabi sortu game den pikin fu den e prei? Furu game di sma lobi fu prei, e sori morsu seks tori, èn sosrefi afkodrei nanga ogridu.
11. Fa memre fu na osofamiri kan kibri densrefi gi a grontapu disi di lai hurudu?
11 Fa wan osofamiri kan kakafutu gi ala den pori sani di sma kan luku na ini a ten disi? Den kan du disi te den e suku a regtfardikifasi fu Gado fosi, fu di den e weigri fu moksi nanga iniwan sani di abi fu du nanga hurudu (2 Korentesma 6:14; Efeisesma 5:3). Papa nanga mama di e luku bun san den pikin fu den e du, e leri den pikin fu abi dipi lobi gi Yehovah èn gi den regtfardiki wet fu en. Na so fasi den e yepi den pikin fu kisi a krakti fu wai pasi gi seks tori na ini buku, na ini game, èn na ini kino, èn sosrefi gi tra sani di no de regtfardiki èn di kan de wan tesi gi wi.—Deuteronomium 6:4-9. *
Luku bun fu no teki sani abra di sma na ini a libimakandra e du
12. Sortu problema ben opo kon na ini a fosi yarihondro?
12 Di Paulus ben de na ini Listra, na ini Pikin Asia, a ben dresi wan man na wan wondru fasi. A Bijbel tori e taki: „Di den ipi-ipi sma si san Paulus du, dan den bari taki na ini Likaoniatongo: ’Den gado kon tron libisma èn den saka kon na grontapu!’ Ne den bigin kari Barnabas Zeus, ma Paulus den kari Hermes, fu di na en ben teki fesi te den ben e taki” (Tori fu den Apostel 14:11, 12). Bakaten, den srefi sma dati ben wani kiri Paulus nanga Barnabas (Tori fu den Apostel 14:19). A de krin taki makriki den sma dati ben e teki sani abra fu trawan na ini a libimakandra. A gersi leki di wan tu fu den sma fu a kontren drape ben tron Kresten, den no ben tapu nanga den kruktu denki fu den. Na ini a brifi di Paulus seni gi den Kresten fu Kolose, a ben warskow den fu no „anbegi den engel”.—Kolosesma 2:18.
13. Gi sortu gwenti wan Kresten musu wai pasi, èn fa a kan kisi a krakti fu du dati?
13 Na ini a ten disi, tru Kresten musu wai pasi tu gi sani di furu sma na ini a libimakandra gwenti fu du èn di komoto fu kerkileri di no e kruderi nanga Kresten gronprakseri. Fu eksempre na ini son kondre, furu sani di sma na ini a libimakandra gwenti du te wan beibi gebore èn te wan sma dede, abi fu du nanga a lei taki wan yeye de na ini wi di e libi go doro te wi dede (Preikiman 9:5, 10). Na ini son kondre, sma abi a gwenti fu koti wan pisi puru fu a syenpresi fu pikin meisje. * A takru gwenti disi no de fanowdu kwetikweti èn a no e kruderi nanga a lobi-ati fasi fa Kresten papa nanga mama musu kweki den pikin fu den (Deuteronomium 6:6, 7; Efeisesma 6:4). Fa Kresten kan sorgu taki den no e teki son gwenti abra fu sma na ini a libimakandra, èn fa den kan tapu nanga den gwenti dati? We, den musu frutrow tapu Yehovah dorodoro (Psalm 31:6). Te wan sma e taki nanga en heri ati „yu na mi kibripresi nanga mi fortresi, mi Gado di mi sa frutrow”, dan Gado di de regtfardiki sa gi en krakti èn a sa sorgu gi en.—Psalm 91:2; Odo 29:25.
No frigiti Yehovah
14. Sortu warskow Yehovah gi den Israelsma syatu bifo den go na ini a Pramisi Kondre?
14 Syatu bifo den Israelsma go na ini a Pramisi Kondre, Yehovah warskow den fu no frigiti en. A ben taki: „Luku bun taki unu no frigiti Yehovah un Gado, èn taki unu frigiti fu hori den komando, den krutu bosroiti, nanga den wet fu en di mi e komanderi unu tide; fu di mi e frede taki te unu sa nyan teleki un bere furu, èn te unu sa bow bun oso èn te unu e tan na ini den te fu kaba, te den meti fu unu kon furu, te unu solfru nanga gowtu kon furu, èn te ala san unu abi kon furu; unu kan kon kisi bigi memre, so taki unu frigiti Yehovah un Gado.”—Deuteronomium 8:11-14.
15. Fa wi kan sorgu taki wi no frigiti Yehovah?
15 Yu denki taki so wan sortu sani kan pasa na ini a ten disi tu? Iya, a sani disi kan pasa te wi no e poti den moro prenspari sani na a fosi presi na ini wi libi. Ma efu wi e suku a regtfardikifasi fu Gado fosi, dan a tru anbegi sa de a moro prenspari sani na ini wi libi. Wi sa ’gebroiki ibri okasi bun’, soleki fa Paulus gi wi deki-ati fu du, èn wi sa du wi diniwroko fayafaya fu di wi sabi taki a ten kon syatu (Kolosesma 4:5; 2 Timoteyus 4:2). Ma efu prisiriten de moro prenspari gi wi leki den konmakandra nanga a preikiwroko, dan wi kan frigiti Yehovah, fu di wi no e si en moro leki a moro prenspari sma na ini wi libi. Paulus ben taki dati na ini den lasti dei, libisma ben o „lobi prisiri na presi taki den lobi Gado” (2 Timoteyus 3:4). Opregti Kresten e ondrosuku den libi doronomo fu sorgu taki den no e teki a denki dati abra.—2 Korentesma 13:5.
Luku bun fu no kisi a firi fu wani du san yu wani
16. Sortu fowtu denki Eva nanga wan tu sma na ini a ten fu Paulus ben abi?
16 Na ini a dyari fu Eden, Satan ben man kori Eva, so taki a kisi a firi taki a no abi Gado fanowdu moro. Eva ben wani bosroiti gi ensrefi san bun èn san fowtu (Genesis 3:1-6). Na ini a fosi yarihondro, son sma na ini a gemeente fu Korente ben teki a srefi denki dati abra. Den ben denki taki den ben sabi sani moro bun leki Paulus, èn na wan spotu fasi Paulus ben kari den sma disi kefalek bun apostel.—2 Korentesma 11:3-5; 1 Timoteyus 6:3-5.
17. Fa wi kan sorgu taki wi no e kisi a firi taki wi no abi Gado fanowdu moro?
17 Na ini a grontapu disi, furu sma e ’du san densrefi wani, den abi bigimemre’, èn son Kresten teki a denki dati abra. Sonwan fu den tron gensman fu a tru anbegi (2 Timoteyus 3:4; Filipisma 3:18). Na ini afersi di abi fu du nanga a tru anbegi, a de tumusi prenspari fu meki Yehovah tiri wi èn fu wroko makandra nanga „a getrow èn koni srafu” èn nanga den gemeente owruman. Dati na wan fu den fasi fa wi kan suku regtfardikifasi, èn a e kibri wi fu no kisi a firi taki wi no abi Gado fanowdu (Mateyus 24:45-47; Psalm 25:9, 10; Yesaya 30:21). A gemeente fu den salfuwan na „wan pilari èn wan stonfutu fu a waarheid”. Yehovah seti a gemeente disi fu kibri wi èn fu tiri wi (1 Timoteyus 3:15). Te wi e frustan sortu tumusi prenspari frantwortu a gemeente abi, dan dati sa yepi wi fu ’no prakseri tumusi furu fu wisrefi’, aladi wi de klariklari fu du a regtfardiki wani fu Yehovah.—Filipisma 2:2-4; Odo 3:4-6.
Waka baka na eksempre fu Yesus
18. Sortu moi eksempre fu Yesus wi musu teki?
18 Bijbel profeititori e taki disi fu Yesus: „Yu ben lobi regtfardikifasi, èn yu no ben lobi kruktudu kwetikweti” (Psalm 45:7; Hebrewsma 1:9). Dati na trutru wan moi eksempre gi wi! (1 Korentesma 11:1) Yesus no ben sabi den regtfardiki markitiki fu Yehovah nomo, ma a ben lobi den. Sobun, di Satan tesi en na ini a gran sabana, dan wantewante Yesus weigri fu du san Satan ben aksi en, èn a ben abi a fasti bosroiti fu no komoto fu „a pasi fu regtfardikifasi”.—Odo 8:20; Mateyus 4:3-11.
19, 20. Sortu bun bakapisi wi e kisi te wi e suku regtfardikifasi?
19 A tru taki den takru lostu fu a skin, kan tranga son leisi (Romesma 7:19, 20). Ma efu wi e si regtfardikifasi leki wan warti sani, dan disi sa gi wi a krakti fu no du san ogri (Psalm 119:165). Te wi lobi regtfardikifasi trutru, dan dati sa kibri wi te wi e kisi tesi fu du ogri (Odo 4:4-6). Hori na prakseri taki te wi e brokokindi gi tesi, wi e meki taki Satan wini. Fu tru, a moro bun fu kakafutu gi den tesi fu en èn fu meki Yehovah wini!—Odo 27:11; Yakobus 4:7, 8.
20 Fu di tru Kresten e suku regtfardikifasi, meki ala ten ’den e tyari densrefi na wan regtfardiki fasi nanga yepi fu Yesus Krestes, èn na so fasi den kan gi Gado glori nanga prèise’ (Filipisma 1:10, 11). Den tron „nyun sma di de soleki fa Gado wani, nanga trutru regtfardikifasi èn loyaalfasi” (Efeisesma 4:24). Den de fu Yehovah èn den e libi fu dini en, den no e libi fu plisi densrefi (Romesma 14:8; 1 Petrus 4:2). Na a sani disi e tiri den frustan, èn sosrefi a fasi fa den e handri. A no de fu taki dati den e meki na ati fu a hemel Tata fu den, prisiri srefisrefi!—Odo 23:24.
[Futuwortu]
^ paragraaf 11 Na ini a buku A sroto gi wan kolokoe osofamiri, papa nanga mama kan feni moi rai di kan yepi den fu kibri na osofamiri fu den gi sani di abi fu du nanga hurudu. Yehovah Kotoigi tyari a buku disi kon na doro.
^ paragraaf 13 Fosi, te sma ben e koti wan pisi puru fu a syenpresi fu wan pikin meisje, dan den ben e taki dati den ben e besnèi a pikin.
Yu kan tyari disi kon na krin?
• Fu san ede a de tumusi prenspari fu suku regtfardikifasi?
• Fa wan Kresten di no de volmaakti kan suku regtfardikifasi?
• San na wan tu sani fu grontapu gi san wan Kresten musu wai pasi?
• Fa wi e kisi kibri te wi e suku regtfardikifasi?
[Aksi fu a tori disi]
[Prenki na tapu bladzijde 26]
Gi den bakaman fu Yesus, grontapu ben de wan ogri presi fu libi
[Prenki na tapu bladzijde 27]
Pikin di e leri fu lobi Yehovah, sa abi a krakti fu wai pasi gi hurudu
[Prenki na tapu bladzijde 28]
Baka di sani ben go bun nanga den Israelsma na ini a Pramisi Kondre, dan sonwan fu den frigiti Yehovah
[Prenki na tapu bladzijde 29]
Kresten de neleki Yesus fu di den no lobi sani di no de regtfardiki