Aksi fu leisiman

Na ark fu a frubontu ben abi soso den tu plata ston na ini, noso tra sani ben de na ini tu?

Na a ten di Salomo ben gi a tempel abra na Gado na ini 1026 b.G.T., dan „noti ben de na ini na ark; na soso den tu plata ston di Moses ben gi den na Horeb, di Yehovah ben meki wan frubontu nanga den manpikin fu Israel di den komoto fu Egepte” (2 Kroniki 5:10). Ma disi no ben de so ala ten.

„Na ini a di fu dri mun baka di den manpikin fu Israel komoto fu a kondre Egepte”, den go na ini a gran sabana fu Sinai (Exodus 19:1, 2). Baka dati, Moses go na tapu a Sinaibergi èn a kisi den tu plata ston pe a Wet ben skrifi na tapu. A e fruteri: „Ne mi drai èn mi saka fu a bergi èn mi poti den plata ston na ini na ark di mi ben meki, so taki den ben kan tan drape, neleki fa Yehovah ben komanderi mi fu du” (Deuteronomium 10:5). A sani di Yehovah ben taigi Moses fu meki ben de wan ark, noso wan kisi. Den plata ston pe a Wet ben skrifi na tapu, ben musu tan fu wan syatu pisi ten nomo na ini a kisi disi (Deuteronomium 10:1). Na ark fu a frubontu ben kaba meki na a kaba fu a yari 1513 b.G.T.

Syatu baka di den Israelsma kon fri fu Egepte, den bigin krutukrutu fu nyanyan. Sobun, Yehovah gi den mana (Exodus 12:17, 18; 16:1-5). Na a ten dati Moses gi Aron na komando: „Teki wan kroiki èn poti wan heri gomer mana na ini èn poti dati na fesi Yehovah leki wan sani di unu musu kibri na ini ala den geslakti fu unu.” A tori e taki: „Soleki fa Yehovah ben taigi Moses fu du, na so Aron poti en na fesi a Kotoigi [wan presi fu kibri prenspari dokumenti] leki wan sani di musu kibri” (Exodus 16:33, 34). Aladi a de seiker taki Aron ben poti mana na ini wan kroiki na a ten dati, toku a no ben kan poti en ete na fesi a Kotoigi. A ben musu wakti teleki Moses ben meki na Ark èn ben poti den plata ston na ini.

Soleki fa a ben kon na krin kaba, dan na ark fu a frubontu ben meki lati na ini a yari 1513 b.G.T. Wan heri pisi ten baka dati, di Korak nanga tra sma ben opo densrefi teige Gado, dan Moses poti a tiki fu Aron na ini na ark tu. Na apostel Paulus ben taki fu „na ark fu a frubontu . . . , èn na ini na ark yu ben abi wan gowtu kroiki di ben abi mana na ini, nanga a tiki fu Aron di ben bigin meki bromki, èn sosrefi den plata ston fu a frubontu”.—Hebrewsma 9:4.

A mana ben de wan seti fu Gado gi den Israelsma di den ben waka 40 yari langa na ini a gran sabana. Den no ben e kisi a mana moro di „den bigin nyan wan tu sani di ben gro na ini a kondre” di Gado ben pramisi den (Yosua 5:11, 12). A poti di Moses ben poti a tiki fu Aron na ini na ark fu a frubontu, ben abi wan marki, namku a ben de wan warskow gi a geslakti di ben opo densrefi teige Gado. Disi e sori taki a tiki ben tan drape pikinmoro a heri pisi ten di den waka na ini a gran sabana. Soleki fa a sori, dan wan pisi ten baka di Israel go na ini a Pramisi Kondre, bifo Salomo ben gi a tempel abra na Gado, dan den puru a tiki fu Aron èn a gowtu kroiki nanga mana na ini na ark fu a frubontu.