Kakafutu gi Satan, èn a sa lon gowe!

„Saka unsrefi na ondro Gado; ma kakafutu gi Didibri, èn a sa lon gowe fu unu.”—YAKOBUS 4:7.

1, 2. (a) Sortu fasi di Didibri abi, e kon na krin na ini den wortu di skrifi na ini Yesaya kapitel 14? (b) Sortu aksi wi sa go luku?

DIDIBRI na a moro heimemre sma di de. A heimemre fu Didibri e kon na krin na ini den sani di Yesaya, a profeiti fu Gado, ben taki. Moro leki wán hondro yari bifo Babilon ben tron wan bigi grontapumakti, Yesaya ben taki na fesi dati a pipel fu Yehovah ben o taki den wortu disi teige „a kownu fu Babilon”: „Yu taki na ini yu ati: ’Mi sa opo go na hemel. Mi sa opo a kownusturu fu mi kon hei moro den stari fu Gado [den kownu di komoto fu a famirilin fu David] . . . Mi sa meki misrefi gersi a Moro Heiwan’” (Yesaya 14:3, 4, 12-15; Numeri 24:17). A heimemre di „a kownu fu Babilon” ben abi, ben de a srefi leki di fu Satan, „a gado fu a grontapu sistema disi” (2 Korentesma 4:4). Ma a heimemre fu Satan sa kon na wan kaba, neleki fa a kownukondre Babilon ben kon na wan kaba na wan syen fasi.

² Ma solanga Didibri de ete, wi kan aksi wisrefi: Wi musu frede Satan? Fu san ede a e meki sma frufolgu Kresten? Fa wi kan sorgu taki Didibri no wini wi?

Wi musu frede Didibri?

3, 4. Fu san ede den salfu Kresten nanga den wan di e horibaka gi den, no e frede Didibri?

³ Den wortu fu Yesus Krestes de trutru wan deki-ati gi salfu Kresten. A ben taki: „No frede a pina di o miti yu. Luku! Didibri o tan trowe sonwan fu unu na ini strafu-oso, so taki unu kan kisi tesi dorodoro èn so taki unu kan nyan pina tin dei langa. Tan getrow srefi te na dede, dan mi o pai yu nanga libi” (Openbaring 2:10). Den salfuwan nanga den kompe fu den di abi a howpu fu kisi têgo libi na grontapu, no e frede Didibri. Den no gebore nanga a deki-ati disi. A deki-ati disi e kon fu di den abi bigi lespeki gi Gado èn fu di den e ’suku kibri na ini a skaduw fu den frei fu en’.—Psalm 34:9; 36:7.

⁴ Den fosi disipel fu Yesus Krestes ben de sondro frede, èn awinsi fa den ben e pina, toku den tan getrow te na dede. Den no ben frede gi den sani di Satan ben kan du nanga den, fu di den ben sabi taki noiti Yehovah e gowe libi den wan di e tan getrow na en. Na ini a ten disi, den salfu Kresten èn den wan di e horibaka gi den dorodoro, abi a fasti bosroiti tu fu tan getrow na Gado, awinsi den e kisi  hebi frufolgu. Ma na apostel Paulus ben taki dati Didibri man tyari dede kon gi sma. A sani dati no musu meki wi frede?

5. San wi e leri fu Hebrewsma 2:14, 15?

⁵ Paulus ben taki dati Yesus ’ben tron libisma’, so taki „nanga a dede fu en a ben kan meki Didibri, a wan di man kiri sma, kon tron noti. Na so fasi a ben kan fri ala sma di ben de na ini katibo den heri libi langa, fu di den ben frede dede” (Hebrewsma 2:14, 15). Satan, „a wan di man kiri sma”, ben kon abi krakti tapu Yudas Iskariot èn baka dati a gebroiki den Dyu fesiman nanga den Romesma fu kiri Yesus (Lukas 22:3; Yohanes 13:26, 27). Ma fu di Yesus dede leki wan srakti-ofrandi, meki a sondu libisma famiri kan kon fri fu a makti fu Satan, èn den abi na okasi now fu kisi têgo libi.—Yohanes 3:16.

6, 7. Na sortu fasi wi kan taki dati Satan abi a makti fu meki sma lasi den libi?

⁶ Na sortu fasi wi kan taki dati Didibri abi a makti fu kiri sma? We, sensi di Satan bigin du ogri, den lei fu en nanga a tiri fu en tyari dede kon gi libisma. Disi de so fu di Adam ben sondu èn na so fasi a tyari sondu nanga dede kon gi a heri libisma famiri (Romesma 5:12). Boiti dati, den futuboi fu Satan na grontapu frufolgu den anbegiman fu Yehovah, èn son leisi den kiri den anbegiman disi srefi, neleki fa den ben kiri Yesus Krestes.

⁷ Ma toku, wi no musu denki taki Didibri kan kiri iniwan sma di a wani. Gado e kibri den wan di de fu En, èn noiti a sa gi pasi taki Satan kiri ala tru anbegiman na grontapu (Romesma 14:8). A tru taki Yehovah e gi pasi taki ala den futuboi fu en e kisi frufolgu, èn son leisi a e gi pasi taki Didibri e du ogri nanga wan tu fu den. Ma den Buku fu Bijbel e sori taki den wan di nen skrifi ’na ini a buku fu Gado’, noso den wan di a e memre, abi a howpu fu kisi wan opobaka. Èn Didibri no man du noti fu meki taki den no kisi wan opobaka!—Maleaki 3:16; Yohanes 5:28, 29; Tori fu den Apostel 24:15.

Fu san ede Satan e frufolgu wi?

8. Fu san ede Didibri e frufolgu den futuboi fu Gado?

⁸ Efu wi de loyaal futuboi fu Gado, dan a no de fu taki dati Didibri o wani meki sma frufolgu wi, fu di a abi wan spesrutu marki na prakseri. A marki fu en na fu meki wi du sani di no e kruderi nanga a bribi fu wi. Wi abi wan warti matifasi nanga wi hemel Tata, èn Satan e angri fu pori a matifasi dati. A sani disi no musu fruwondru wi. Na ini Eden, Yehovah ben taki na fesi dati feantifasi ben o de na mindri na agersi „uma” fu Yehovah nanga a „sneki”, èn na mindri den „siri” fu den tu disi (Genesis 3:14, 15). Den Buku fu Bijbel e  taki dati Didibri na „a fosi sneki”, èn den e tyari kon na krin taki en ten syatu èn taki a abi bigi atibron (Openbaring 12:9, 12). Fu di feantifasi de ete na mindri den tu „siri”, meki den wan di e dini Yehovah na wan getrow fasi, kan fruwakti taki den sa kisi frufolgu (2 Timoteyus 3:12). Yu sabi trutru fu san ede Satan e frufolgu wi?

9, 10. Sortu strei Didibri bigin, èn san disi abi fu du nanga a fasi fa libisma musu tyari densrefi?

⁹ Didibri ben wani sori taki Gado no abi a reti fu de a Moro Heiwan fu hemel nanga grontapu. Wan tra sani di abi fu du nanga a strei disi, na taki a ben wani sori taki libisma no ben o tan getrow na a Mekiman fu den. Satan ben frufolgu na opregti man Yob. Fu san ede? Fu di a ben wani taki Yob drai baka gi Yehovah. Na a ten dati, Didibri ben gebroiki a wefi fu Yob èn den dri ’trowstuman di ben de leki wan hebi’, fu pori a bribi fu Yob. Soleki fa a Bijbel buku Yob e sori, dan Didibri tyalensi Gado fu di a taki dati nowan libisma ben o tan getrow na En efu Satan ben kisi na okasi fu tesi den. Ma Yob ben hori en soifri retifasi, èn na so fasi a sori taki Satan na wan leiman (Yob 1:8–2:9; 16:2; 27:5; 31:6). Na ini a ten disi, Didibri e frufolgu den Kotoigi fu Yehovah fu di a wani pori a soifri retifasi fu den èn fu di a wani sori taki a ben abi leti di a tyalensi Gado.

¹⁰ Te wi sabi taki Didibri e frufolgu wi fu di a wani nomonomo taki wi no tan getrow na Gado, dan dati kan yepi wi trutru fu abi deki-ati èn fu de tranga (Deuteronomium 31:6). A Gado fu wi na a Moro Hei Tiriman fu hemel nanga grontapu, èn a sa yepi wi fu tan getrow. Meki wi du muiti ala ten fu prisiri na ati fu Yehovah fu di wi e tan getrow na en. Na so fasi wi e gi en na okasi fu gi piki tapu den lei fu a bigi spotuman, Satan Didibri.—Odo 27:11.

„Frulusu wi fu na ogriwan”

11. San den wortu, „no meki wi kisi tesi” wani taki?

¹¹ A no makriki fu hori wi soifri retifasi; wi musu begi fayafaya efu wi wani tan getrow. Den wortu fu a begi di Yesus ben leri sma, de wan bigi yepi gi wi. Wan fu den sani di Yesus ben taki na ini a begi fu en, na disi: „No meki wi kisi tesi, ma frulusu wi fu na ogriwan” (Mateyus 6:13). Yehovah no e tesi wi fu du sondu (Yakobus 1:13). Ma son leisi den Buku fu Bijbel e taki leki na Yehovah e tyari tesi kon gi sma, ma fu taki en leti, dan Gado e gi pasi nomo taki tesi e miti den (Rut 1:20, 21). Sobun, te wi e begi soleki fa Yesus leri wi, dan wi e aksi Yehovah fu no meki wi brokokindi gi tesi. Èn Yehovah no sa gowe libi wi, fu di wi abi a dyaranti disi: „Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro.”—1 Korentesma 10:13.

12. Fu san ede wi musu begi: „Frulusu wi fu na ogriwan”?

¹² Baka di Yesus taki fu tesi na ini a begi di a leri sma, dan a ben taki wan sani di fiti trutru: „Frulusu wi fu na ogriwan.” Son bijbelvertaling e taki: „Frulusu wi fu ogri” (King James Version; Revised Standard Version), noso „Kibri wi gi ogri” (Contemporary English Version). Ma furu tron a de so taki na ini den Buku fu Bijbel, den wortu ’frulusu fu’ abi fu du nanga sma di e kisi frulusu fu wan trawan, èn na Evangelie fu Mateyus e sori krin taki Didibri na „a Sma di e tesi libisma” (Mateyus 4:3, 11). Sobun, a de prenspari fu begi Gado fu frulusu wi fu „na ogriwan”, Satan Didibri. A wani kori wi fu sondu teige Gado (1 Tesalonikasma 3:5). Te wi e aksi: „Frulusu wi fu na ogriwan”, dan wi e aksi  wi hemel Tata fu tiri wi èn fu yepi wi so taki Didibri no wini wi.

No meki Didibri wini yu

13, 14. Fu san ede den Kresten na ini Korente ben musu kenki a fasi fa den ben e handri nanga wan man na ini a gemeente di ben e du hurudu?

¹³ Di Paulus gi den Kresten na ini Korente deki-ati fu gi trawan pardon, dan a ben skrifi: „Efu unu gi wan sma pardon nanga un heri ati fu iniwan ogri di a du, dan mi e gi en pardon tu. Fu taki en leti, efu mi ben gi wan sma pardon nanga mi heri ati fu iniwan sani di a du, iya, efu trutru mi gi wan sma pardon fu wan sani, dan mi du dati fu unu ede na fesi Krestes. Na so fasi Satan no kan wini wi, bika wi sabi san a abi na prakseri” (2 Korentesma 2:10, 11). Didibri kan wini wi na difrenti fasi, ma fu san ede Paulus ben taki den wortu disi?

¹⁴ Paulus ben piri-ai gi den Kresten na ini Korente fu di den ben gi pasi taki wan man di ben e du hurudu, tan na ini a gemeente fu den. A no de fu taki dati Satan ben breiti nanga dati, bika a gemeente ben kisi porinen fu di den ben gi pasi taki sma na den mindri e du hurudu di „srefi den trakondre sma no e du”. Te fu kaba, den ben puru na ogriman na ini a gemeente (1 Korentesma 5:1-5, 11-13). Bakaten, a man disi sori berow. Efu den Kresten na ini Korente ben o weigri fu gi pardon na a man disi èn fu teki en baka na ini a gemeente, dan Didibri ben o wini den na wan tra fasi. Na sortu fasi? Den ben o handri grofu èn den ben o sori taki den no abi sari-ati, neleki fa Satan srefi no abi sari-ati. Efu a man di ben sori berow ben o „firi sari teleki a lasi-ati” èn efu a ben o tapu fu dini Gado, dan na a fosi presi den owruman ben o abi fu gi frantwortu na Yehovah, a Gado di abi sari-ati (2 Korentesma 2:7; Yakobus 2:13; 3:1). A no de fu taki, dati nowan tru Kresten ben o wani handri na wan ogri-ati fasi, na wan grofu fasi, noso sondro sari-ati, neleki Satan.

Den fetisani fu Gado e kibri yu

15. Sortu feti wi musu feti, èn fa wi kan wini a feti disi?

¹⁵ Efu wi wani kisi frulusu fu Didibri, dan wi musu feti teige a krakti di ogri yeye kan abi na wi tapu. Efu wi wani wini den makti ogri yeye disi, dan wi musu weri ’ala den sani di Gado gi wi fu feti’ (Efeisesma 6:11-18). Wan fu den fetisani disi na ’regtfardikifasi di wi musu weri leki wan sani di musu kibri wi borsu’ (Efeisesma 6:14). Kownu Saul fu owruten Israel ben trangayesi Gado èn dati meki a lasi a santa yeye (1 Samuel 15:22, 23). Ma efu wi e du san regtfardiki èn e weri ala den fetisani di wi abi fanowdu na yeye fasi, dan wi sa abi a santa yeye fu Gado èn a sa kibri wi teige Satan nanga den ogri yeye fu en.—Odo 18:10.

16. Fa wi kan tan kibri wisrefi gi den ogri yeye?

¹⁶ Efu wi wani tan kibri wisrefi gi den ogri yeye, dan wan fu den sani di wi musu du, na taki wi musu leisi èn studeri Gado Wortu doronomo, aladi wi e nyan bun fu den publikâsi di wi e kisi fu „a getrow futuboi” (Lukas 12:42). Na so fasi wi sa furu wi frustan nanga yeye afersi di bun gi wi, soleki fa Paulus ben gi a rai: „Brada, tan prakseri ala sani di tru, ala sani di seryusu, ala sani di regtfardiki, ala sani di krin, ala sani di bun fu lobi, ala sani di sma e taki bun fu den, ala sani di Gado feni  bun èn ala sani di warti fu sma prèise den.”—Filipisma 4:8.

17. San sa yepi wi fu de bun preikiman fu a bun nyunsu?

¹⁷ Yehovah e sorgu taki wi man ’weri a bun nyunsu fu vrede leki susu na wi futu’ (Efeisesma 6:15). Te wi e teki prati na den Kresten konmakandra doronomo, dan dati e sreka wi fu meki a bun nyunsu fu Gado Kownukondre bekènti. Wi e kisi furu prisiri te wi e yepi trawan fu kon sabi a waarheid fu Gado èn fu kon fri na yeye fasi! (Yohanes 8:32) „A feti-owru fu a yeye, dati na Gado wortu”, de tumusi prenspari efu wi wani kibri wisrefi gi falsi leri èn gi ’sani di tanapu steifi’ (Efeisesma 6:17; 2 Korentesma 10:4, 5). Te wi e gebroiki Bijbel, a Wortu fu Gado, na wan koni fasi, dan dati e yepi wi fu leri trawan a waarheid, èn fu kibri wisrefi gi den triki fu Didibri.

18. Fa wi kan „tanapu kánkan gi den triki di Didibri e gebroiki fu kori sma”?

¹⁸ Di Paulus ben e taki fu den fetisani di Gado gi wi, dan a bigin nanga den wortu disi: „Meki Masra gi unu krakti, èn tranga unsrefi nanga a kefalek bigi krakti fu en. Un musu sorgu taki unu abi ala den sani di Gado gi unu fu feti, so taki unu kan tanapu kánkan gi den triki di Didibri e gebroiki fu kori sma” (Efeisesma 6:10, 11). A Griki wortu di vertaal nanga „tanapu kánkan”, e sori go na wan srudati di e hori a posisi fu en. Wi e tan tanapu kánkan na ini a feti di wi musu feti na yeye fasi, aladi Satan e gebroiki difrenti triki fu pori a wánfasi di wi abi, fu pori den leri fu wi, noso fu meki wi drai baka gi Gado. Ma te nanga now, den ogri sani di Didibri e du no abi bun bakapisi gi en, èn a no sa abi bun bakapisi noiti! *

Kakafutu gi Didibri, èn a sa lon gowe

19. San na wan sani di wi kan du fu kakafutu gi Didibri?

¹⁹ Wi kan wini a feti di wi e feti na yeye fasi teige Didibri nanga den ogri yeye di de ondro a makti fu en. Wi no abi fu frede Satan, bika a disipel Yakobus ben skrifi: „Saka unsrefi na ondro Gado; ma kakafutu gi Didibri, èn a sa lon gowe fu unu” (Yakobus 4:7). Wan sani di wi kan du fu kakafutu gi Satan nanga den ogri yeye di e horibaka gi en, na taki wi no musu abi noti fu du nanga afkodrei èn nanga tofruwroko, èn wi no musu moksi nanga den sma di e du den sani disi. Bijbel e sori krin taki futuboi fu Yehovah no musu suku marki, noso luku den stari fu kon sabi san o pasa na ini a tamara, den no musu bonu, èn den no musu du afkodrei. Efu wi abi furu fu du na ini a Kresten diniwroko èn efu wi abi wan tranga bribi, dan wi no abi fu frede taki wan sma o man wisi wi.—Numeri 23:23; Deuteronomium 18:10-12; Yesaya 47:12-15; Tori fu den Apostel 19:18-20.

20. Fa wi kan kakafutu gi Didibri?

²⁰ Wi e „kakafutu gi Didibri” te wi e hori wisrefi na Bijbel gronprakseri nanga a waarheid fu Bijbel, èn te wi e weigri krinkrin fu du san a wani. A grontapu de na ini wánfasi nanga Satan, fu di en na a gado fu grontapu (2 Korentesma 4:4). Fu dati ede, wi no e teki den fasi fu grontapu, soleki bigimemre, a prakseri di sma e prakseri densrefi nomo, hurudu, ogridu, nanga a lobi di sma abi gi gudu. Wi sabi taki Didibri ben gowe esi-esi di Yesus gebroiki bijbeltekst fu kakafutu gi den tesi fu en na ini a gran sabana (Mateyus 4:4, 7, 10, 11). Na a srefi fasi, Satan no sa wini, èn sa ’lon gowe fu wi’ te wi e saka wisrefi dorodoro na Yehovah ondro èn te wi e begi en fu di wi e frutrow na en tapu (Efeisesma 6:18). Te Yehovah Gado nanga en lobi Manpikin e horibaka gi wi, dan nowan sma o man du ogri nanga wi fu ala ten, nôno, srefi Didibri no man du dati!—Psalm 91:9-11.

[Futuwortu]

San na yu piki?

• Wi musu frede Satan Didibri?

• Fu san ede Satan e frufolgu Kresten?

• Fu san ede wi e begi Gado fu frulusu wi fu „na ogriwan”?

• Fa wi kan wini a feti di wi musu feti na yeye fasi?

[Aksi fu a tori disi]

[Prenki na tapu bladzijde 26]

Bakaman fu Krestes di ben abi deki-ati tan getrow te na dede

[Prenki na tapu bladzijde 27]

Didibri no man du noti fu meki taki den wan di Yehovah e memre, no kisi wan opobaka

[Prenki na tapu bladzijde 28]

Yu e begi Gado fu frulusu yu fu „na ogriwan”?

[Prenki na tapu bladzijde 29]

Yu e weri ’ala den sani di Gado gi wi fu feti’?