Suma na den engel?

A KOWNU fu wan makti kownukondre no man bribi san a e si. Dri man di kisi dedestrafu musu bron na ini wan faya onfu, ma den e kisi kibri èn nowan sani e pasa nanga den! Suma kibri den? A kownu srefi e taigi den dri man disi di kisi kibri: „Blesi fu [a Gado fu unu], di ben seni en engel èn di ben frulusu en futuboi di ben frutrow na en tapu” (Danièl 3:28). Moro leki tu dusun yari pasa, a tiriman disi fu Babilon ben si fa wan engel ben kibri sma. Milyunmilyun sma na ini a ten di pasa ben e bribi taki engel de trutru. Furu sma na ini a ten disi e bribi taki engel de trutru, ma a no dati wawan, den e bribi tu taki engel abi krakti tapu den libi. Suma na den engel, èn pe den komoto?

Soleki fa Bijbel e sori, dan engel na yeye neleki fa Gado srefi na wan Yeye (Psalm 104:4; Yohanes 4:24). Wan bigi grupu fu milyunmilyun engel de (Openbaring 5:11). Èn den alamala „tranga srefisrefi” (Psalm 103:20). Engel de leki libisma fu di den abi den eigi fasi èn fu di den man teki den eigi bosroiti. Ma dati no wani taki dati den engel ben de libisma fosi. Fu taki en leti, Gado ben meki engel langa ten bifo a meki libisma, iya srefi bifo a meki grontapu. Di Gado „seti a fondamenti fu grontapu”, na so Bijbel e taki, dan „ala den mamanten stari [den engel] makandra ben bari fu prisiri, èn ala den manpikin fu Gado ben bigin bari fu di den ben breiti srefisrefi” (Yob 38:4, 7). Fu di na Gado meki den engel, meki den na manpikin fu Gado.

Fu san ede Gado meki engel? A de so taki den ben abi krakti na tapu a libi fu libisma na ini a ten di pasa? Den abi krakti na tapu a libi fu wi na ini a ten disi? A de so taki a man di engel man teki den eigi bosroiti, meki taki sonwan fu den tron feanti fu Gado fu di den waka baka Satan Didibri? Bijbel e gi yoisti piki tapu den aksi disi.