Aksi fu leisiman
Aksi fu leisiman
A tru taki Genesis 44:5 e sori taki Yosef, wan getrow futuboi fu Yehovah, gebroiki wan spesrutu solfru kan fu du lukuman-wroko?
Reide no de fu bribi taki Yosef ben e du lukuman-wroko na wan noso tra fasi.
Bijbel e sori fa Yosef ben e denki trutru fu towfruwroko di e meki sma kon sabi a tamara. Wan pisi ten na fesi, di sma ben aksi Yosef fu fruklari a dren fu Farao, dan ibri tron baka a ben taki dati na soso Gado kan „meki bekènti” san o pasa. Leki bakapisi fu dati, Farao srefi ben kon bribi taki a no lukuman-wroko, ma na a Gado fu Yosef, iya, a tru Gado, ben meki taki Yosef ben sabi sani fu a tamara finifini (Genesis 41:16, 25, 28, 32, 39). Na ini a Wet di Moses kisi bakaten, Yehovah ben taki dati sma no mag du towfruwroko, noso lukuman-wroko. Na a fasi disi a ben sori taki na En wawan man taki na fesi san o pasa.—Deuteronomium 18:10-12.
Ma fu san ede Yosef meki en futuboi taki dati a ben e gebroiki wan solfru kan fu ’du lukuman-wroko na wan koni fasi’? * (Genesis 44:5) Wi musu luku na ini sortu situwâsi Yosef ben de di a taki den sani disi.
Fu di wan hebi angriten ben de, meki den brada fu Yosef go na Egepte fu bai nyanyan. Wan tu yari na fesi, den srefi brada disi ben seri Yosef leki srafu. Now, sondro fu den sabi, den ben suku yepi na den eigi brada di ben de a sma di abi a frantwortu fu prati nyanyan na Egepte. Yosef no ben taigi den suma na en. Na presi fu dati, a bosroiti fu tesi den. A fiti taki Yosef ben wani luku efu den brada fu en ben abi berow trutru. A ben wani si tu efu den ben lobi den brada Benyamin nanga den papa Yakob, di ben lobi Benyamin trutru. Fu dati ede, Yosef kori den fu kon sabi den sani disi.—Genesis 41:55–44:3.
Yosef ben komanderi wan fu den futuboi fu en fu furu den saka fu en brada nanga nyanyan, fu poti a moni di den ben pai na ini den saka fu den, èn fu poti a solfru kan fu Yosef na ini a saka fu Benyamin. Na a heri pisi ten dati, Yosef ben e tyari ensrefi leki wan prenspari man fu wan heiden kondre. A ben kenki ensrefi, a ben e du èn taki leki wan prenspari man, so taki den brada fu en no ben o sabi taki na en.
Di Yosef go miti den brada fu en, dan a ben e kori den ete di a aksi den: „Yu no sabi taki wan man leki mi kan koti luku na wan koni fasi?” (Genesis 44:15) Sobun, soleki fa a sori, dan Yosef gebroiki a kan soso fu di a ben e kori den brada fu en. A no ben gebroiki a kan fu du lukuman-wroko, neleki fa Benyamin no ben fufuru a kan kwetikweti.
[Futuwortu]
^ paragraaf 5 Wan buku di F. C. Cook sreka, e taki fu den owruten gwenti disi: „Sma ben du lukuman-wroko fu di den ben e trowe gowtu, solfru, noso diriston na ini wan kan watra, dan den ben luku fa den ben de na ini a watra; noso sma ben e luku na ini a watra neleki fa den ben e luku wan spikri.” (The Holy Bible, With an Explanatory and Critical Commentary). A Bijbel ondrosukuman Christopher Wordsworth e taki: „Son leisi a kan ben furu nanga watra, èn sma ben koti luku fu di den ben e luku a fasi fa a son ben e skèin na tapu a watra na ini a kan.”