Moni nanga bun markitiki—Wan fositen tori e leri wi wan sani

TAPU 7 april 1630, fo sipi di ben abi sowan fo hondro sma na ini, komoto fu Ingrisikondre go na Amerkankondre. Furu fu den sma disi ben kisi hei skoroleri. Trawan ben de gudu bisnisman. Sonwan fu den ben de memre fu na asamblei srefi. Na ekonomia fu Ingrisikondre no ben e drai bun, èn na Orloku di feti Dritenti yari langa (1618-1648), meki taki a situwâsi disi kon moro ogri srefi. Sobun, aladi den sma disi no ben sabi san ben o miti den, toku den gowe libi den oso, den bisnis, nanga den famiri, èn den go na wan tra kondre fu suku okasi fu kan abi wan moro bun libi.

Ma a grupu bisnisman disi di ben e howpu fu feni wan moro bun libi, no ben abi a marki nomo fu kisi wini fu ibri okasi. Den ben de fayafaya Puriteinsma di ben lowe gowe fu di sma ben e frufolgu den fu a bribi fu den ede. * A trutru marki di den ben abi, na fu seti wan libimakandra pe sma e hori densrefi na den wet fu Gado, èn pe den nanga den bakapikin fu den ben o libi wan gudu libi sondro fu drai baka gi Bijbel markitiki. Syatu baka di den sma disi doro na ini Salem, Massachusetts, den teki wan pikin pisi gron abra di ben de krosibei fu wan syoro. Den kari a nyun tanpe fu den Boston.

A ben muilek gi den gudusma fu libi akruderi bun markitiki

John Winthrop, a fesiman èn tiriman fu a grupu disi, du ala san a man fu gi ala sma na ini a nyun tanpe disi, a deki-ati fu kon gudu èn fu du bun sani gi a libimakandra. A ben wani taki den sma ben musu abi moni èn taki den ben musu hori densrefi tu na bun markitiki. Ma soleki fa a sori, dan a ben muilek gi den gudusma fu libi akruderi bun markitiki. Fu di John Winthrop ben fruwakti taki problema ben o kon, meki a fruteri den sma na ini a libimakandra finifini fa den leki sma di abi frede gi Gado, musu si den gudu di den abi.

Neleki fa a ben de nanga tra Puritein fesiman, na so Winthrop ben e bribi taki a no de wan fowtu sani te wan sma e suku fu kon gudu. A ben feni taki, a moro prenspari reide fu san ede sma abi gudu, na fu yepi trawan. Sobun, o moro wan sma ben gudu, o moro a ben o man du bun sani gi trawan. „Wan fu den sani di ben gi den Puriteinsma moro bigi broko-ede, na a gudu libi di den ben abi”, na so historia skrifiman Patricia O’Toole e taki. „A gudu libi di  den ben abi, ben de wan buweisi taki Gado e blesi den, ma na a srefi ten a libi dati ben kan meki den kisi heimemre makriki, wan sani di den ben e si leki sondu . . . èn a ben kan meki den du tra sortu sondu.”

Fu di Winthrop ben sabi taki wan gudu libi ben kan meki sma du sondu, meki a gi den sma fu a libimakandra deki-ati fu no feti tumusi baka gudu. Ma a no ben teki langa, di den sma na ini a libimakandra ben angri fu kon gudu, èn disi meki taki den no ben de klariklari fu hori densrefi na den markitiki fu Gado, èn fu sori lobi gi makandra, soleki fa Winthrop ben e dwengi den fu du. Den sma di no ben e agri nanga a denki fu Winthrop bigin krutu en, fu di den ben feni taki a e bemui tumusi na ini den afersi fu den. Sonwan fu den sma bigin opo densrefi teige Winthrop, fu di den ben wani poti tra sma di ben musu yepi fu tiri a grupu. Trawan baka, teki a bosroiti fu froisi go na Connecticut di ben de krosibei, so taki den ben kan suku wini gi densrefi drape.

„Den okasi di ben de fu du bisnis, a gudu libi di sma ben kan kon abi, èn a demokrasia tiri di den ben wani, ben de den moro prenspari sani na ini a libi fu den Puriteinsma na ini Massachusetts. Ala den sma disi ben e suku wini gi densrefi nomo, sondro fu sori lespeki gi a denki di Winthrop ben abi fu gebroiki gudu fu a bun fu a libimakandra”, na so O’Toole e taki. Na ini 1649, Winthrop dede pikinmoro sondro wán kopro sensi srefi. A ben abi 61 yari. Aladi sma na ini a bruya libimakandra dati ben man pasa den muilek ten, toku Winthrop noiti no si a kontru fu a prakseri fu en.

Te now ete sma e suku fu abi wan moro bun libi

A no John Winthrop wawan ben abi a prakseri fu wan moro bun grontapu. Ibri yari hondro dusundusun sma fu Afrika, zuid-owstu Asia, Owstu Europa, nanga Latijns-Amerika, e froisi go na tra kondre fu di den e howpu fu feni wan moro bun libi drape. Sonwan fu den e froisi fu di den e kisi deki-ati fu den hondrohondro nyun buku di e kon na doro ibri yari, sosrefi fu konmakandra pe sma e taki nanga makandra fu problema, èn fu bodoi tapu Internet di e sori sma fa den kan kon gudu. A de krin fu si taki te now ete furu sma e feti fu abi moro moni, aladi den e howpu taki den no sa abi fu drai baka gi bun markitiki.

Fu taki en leti, den sani dati no tyari bun bakapisi kon gi sma. A de so furu tron taki den wan di e suku fu kon gudu, e drai baka gi den bun markitiki fu den, èn son leisi den e du dati tu nanga a bribi di den abi na ini Gado, fu di gudu e kon tron a moro prenspari sani gi den. Fu dati ede, yu abi leti fu aksi yusrefi: „Wan sma kan de wan trutru Kresten, aladi a gudu? Oiti wan libimakandra sa de pe sma e tan hori densrefi na den hei markitiki fu Gado, aladi den gudu?” Bijbel e gi piki tapu den aksi dati, soleki fa wi sa si na ini na artikel di e kon.

[Futuwortu]

[Sma di abi a reti fu a prenki na tapu bladzijde 3]

Boats: The Complete Encyclopedia of Illustration/J. G. Heck; Winthrop: Brown Brothers