Wan trutru gudu libi na ini a nyun grontapu fu Gado

DAVID, * wan Kresten masra di abi pikin, ben froisi go na Amerkankondre, fu di a ben de seiker taki disi ben de fu a bun fu en, nanga en osofamiri. Aladi a no ben wani libi en wefi nanga en pikin na baka, toku a ben de seiker taki en heri osofamiri ben o abi wan bun libi efu a ben abi moro moni. We, di wan tu famiriman fu en na ini New York gi en wan kari fu kon drape, dan a go, èn syatu baka dati a feni wan wroko.

Ma baka wan pisi ten, David no ben de so seiker moro efu a ben teki wan bun bosroiti. Now a no ben abi so furu ten moro gi yeye afersi. A ben kon so fara srefi, taki pikinmoro a lasi bribi na ini Gado. Na di a du wan sani di no fiti, ne a kon frustan na ini sortu situwâsi a de trutru. Fu di a ben e suku nomo fu meki furu moni, meki safrisafri a no ben e poti prakseri moro na den sani di prenspari  trutru gi en. A ben abi fu kenki wan tu sani.

Neleki David, ibri yari furu sma e gowe fu a pôti kondre pe den e libi, èn den e froisi go na tra kondre fu di den e howpu taki drape den kan abi wan moro bun libi. Ma a de wan sari sani taki furu tron disi e meki den go na baka na yeye fasi. Son sma aksi densrefi disi: ’Wan Kresten kan gudu na ini Gado ai, aladi a e suku fu abi moro moni?’ Pôpi skrifiman nanga kerki fesiman e taki dati a sani dati kan. Ma soleki fa David nanga tra sma ondrofeni, dan a muilek fu abi wan gudu libi èn fu libi akruderi den markitiki fu Gado na a srefi ten.—Lukas 18:24.

Moni a no wan takru sani

A no de fu taki dati moni na wan sani di libisma srefi meki. Neleki fa a de nanga furu tra sani di sma meki, na so moni srefi a no wan takru sani. Iya, moni na wan sani nomo di sma kan gebroiki fu bai sani, noso fu pai gi sani. Sobun, te sma e gebroiki moni na a yoisti fasi, dan a de wan bun sani. Fu eksempre, Bijbel srefi e taki dati „moni e kibri sma”, èn a e kibri sma spesrutu gi den problema di den kan kisi leki bakapisi fu pôtifasi (Preikiman 7:12). Ma gi son sma a gersi leki „moni e lusu ala problema”.—Preikiman 10:19, New International Version.

Den Buku fu Bijbel e sori taki a no bun kwetikweti te wan sma lesi, èn a e gi wi deki-ati fu wroko tranga. Wi musu sorgu gi wi osofamiri, èn efu pikinso moni tan abra, dan wi „kan prati wan sani nanga sma di de na nowtu” (Efeisesma 4:28; 1 Timoteyus 5:8). Boiti dati, Bijbel no e leri wi fu tan farawe fu moni fu di a no bun, ma a e gi wi deki-ati fu prisiri nanga den sani di wi abi. Bijbel e taigi wi fu „teki a pisi di de fu wi” èn fu prisiri nanga den sani di wi kon abi fu di wi wroko gi dati (Preikiman 5:18-20). Fu taki en leti, Bijbel abi wan tu eksempre fu getrow man nanga uma di ben gudu.

Getrow man di ben gudu

Abraham, wan getrow futuboi fu Gado, ben kon abi ipi-ipi meti di a ben e kweki, a ben abi furu solfru nanga gowtu, èn a ben abi hondrohondro futuboi (Genesis 12:5; 13:2, 6, 7). A regtfardiki man Yob ben gudu srefisrefi tu, fu di a ben abi bun furu meti, futuboi, gowtu, nanga solfru (Yob 1:3; 42:11, 12). Den man disi ben o gudu srefi efu den ben e libi na ini a ten disi, ma den ben gudu tu na ini Gado ai.

Na apostel Paulus e taki dati Abraham na „a papa fu ala sma di abi bribi”. Abraham no ben gridi, èn a no ben lobi den gudu fu en pasa marki (Romesma 4:11; Genesis 13:9; 18:1-8). Gado srefi ben taki tu dati Yob na wan man „di de sondro fowtu èn di de opregti” (Yob 1:8). Ala ten a ben de klariklari fu yepi pôtisma nanga mofinawan (Yob 29:12-16). Abraham nanga Yob ben e poti den frutrow na ini Gado, na presi fu frutrow tapu den gudu fu den.—Genesis 14:22-24; Yob 1:21, 22; Romesma 4:9-12.

Wan tra eksempre na Kownu Salomo. Leki a sma di ben abi a reti fu sidon na tapu a kownusturu fu Gado na ini Yerusalem, Salomo no ben kisi koni wawan fu Gado, ma a ben kisi gudu nanga  glori pasa marki tu (1 Kownu 3:4-14). Pikinmoro en heri libi langa a ben de getrow na Gado. Ma bakaten, Salomo en ’ati no ben de nanga Yehovah dorodoro’ (1 Kownu 11:1-8). Te yu luku en bun, dan den sari sani di a ondrofeni e sori san na wan tu fu den trapu fu wan gudu libi. Luku wan tu fu den trapu disi.

Den trapu fu wan gudu libi

A moro bigi fowtu di wan sma kan meki, na taki a e kon lobi moni, èn sosrefi den sani di a kan bai nanga moni. Wan gudu libi e meki taki son sma e angri so te fu abi sani, taki noiti den abi nofo. Di Salomo bigin tiri, dan a kon si a fasi disi na trawan. A ben skrifi: „Wan sma di lobi solfru nomo, no sa de tevrede nanga solfru, èn a sma di lobi gudu no sa de tevrede nanga a moni di a e meki. Disi tu de fu soso” (Preikiman 5:10). Yesus nanga Paulus ben warskow Kresten gi a lobi disi di e kori sma.—Markus 4:18, 19; 2 Timoteyus 3:2.

Te moni e tron a moro prenspari sani gi wi, na presi taki wi e si en leki wan sani nomo di wi kan gebroiki fu doro spesrutu marki, dan wi e kisi fu du moro makriki nanga tesi di kan meki taki wi no hori wisrefi moro na bun markitiki. Iya, wi sa lei, wi sa fufuru, èn wi sa tori trawan moro makriki. Yudas Iskariot, wan fu den apostel fu Krestes, ben tori en masra gi 30 pisi solfru moni nomo (Markus 14:11; Yohanes 12:6). Son sma kon lobi moni so kefalek taki den e anbegi moni na presi fu Gado srefi (1 Timoteyus 6:10). Fu dati ede, noiti Kresten musu kori densrefi te den e ondrosuku san na a trutru reide fu san ede den wani meki moro moni.—Hebrewsma 13:5.

A feti di sma e feti fu kon gudu kan meki taki den e kisi fu du nanga tra sortu trapu di no de fu si wantewante. A fosiwan na taki te wan sma abi tumusi furu gudu, dan dati kan meki taki a e frutrow tapu ensrefi nomo. Na a sani disi Yesus sori sma di a ben taki fu „a bedrigifasi fu gudu” (Mateyus 13:22). A Bijbel skrifiman Yakobus ben warskow Kresten tu fu no frigiti Gado srefi te den e du bisnis (Yakobus 4:13-16). Fu di a de so taki moni e gi sma a firi taki den no abi trawan fanowdu, meki den wan di abi furu moni musu luku bun doronomo taki den no e poti den frutrow tapu a moni fu den, na presi fu frutrow tapu Gado.—Odo 30:7-9; Tori fu den Apostel 8:18-24.

A di fu tu trapu, na san David, di wi ben kari na a bigin fu na artikel, ben ondrofeni, namku taki te wan sma e suku fu kon gudu, dan dati e teki so furu fu en ten nanga krakti, taki te fu kaba a no abi ten moro gi yeye afersi (Lukas 12:13-21). A de so tu taki gudusma musu dwengi densrefi doronomo fu no gebroiki a moni fu den soso fu meki prisiri, noso fu suku den eigi wini nomo.

A de so taki a gi di Salomo ben gi pasi taki a gudu libi fu en puru en prakseri na san ben de moro prenspari, na wan fu den sani di meki taki a go na baka na yeye fasi? (Lukas 21:34) A ben sabi taki a wet fu Gado e sori krin taki a pipel fu en no ben mag trow nanga trakondre sma. Ma toku a ben kon so fara taki te fu kaba a ben abi pikinmoro wán dusun uma (Deuteronomium 7:3). Fu di a ben wani plisi den trakondre uma fu en, meki a pruberi fu moksi na anbegi fu en nanga a di fu den, soso fu du den wan bun. Soleki fa wi ben si kaba, dan safrisafri a pasa taki Salomo no ben e dini Yehovah moro nanga en heri ati.

Den eksempre disi e sori wi krin taki a rai fu Yesus tru. A ben taki: „Unu no kan dini Gado èn dini Gudu na a srefi ten” (Mateyus 6:24). Ma san wan Kresten kan du nanga den ekonomia problema di e miti furu fu wi now? Èn san de moro prenspari, sortu howpu wi abi fu kisi wan moro bun libi na ini a ten di e kon?

Wan trutru gudu libi na ini a ten di e kon

Tra fasi leki den famiri-edeman Abraham, Yob, nanga a pipel Israel, den bakaman fu Yesus kisi a komando fu ’go na sma fu ala kondre èn fu meki den tron disipel’ (Mateyus 28:19, 20). Fu gi yesi na a komando disi e teki ten nanga muiti, di wi ben kan gebroiki gi grontapu sani. Fu dati ede, a moro prenspari sani di o meki wi abi wan bun libi, na te wi e du a sani disi di Yesus taigi wi fu du: „Fu dati ede, tan suku a kownukondre [fu Gado] nanga En regtfardikifasi fosi, dan unu sa kisi ala den tra sani tu.”—Mateyus 6:33.

Pikinmoro David, di wi ben kari na a bigin fu na artikel, no ben abi en osofamiri moro, pikinmoro a lasi bribi, èn pikinmoro a banti di a ben abi nanga Gado kon pori. Ma te fu kaba a ben man seti en libi kon bun baka. Di David bigin studeri Bijbel baka, èn di a poti a diniwroko  na a moro prenspari presi na ini en libi, dan ala tra sani na ini en libi bigin waka bun, neleki fa Yesus ben pramisi. Te fu kaba a kisi wan bun banti baka nanga en wefi èn nanga den pikin fu en. A kon de koloku baka. Te now ete a e wroko tranga. Aladi a pôti libi fu en no kenki kon tron wan gudu libi, toku a leri wan tu prenspari sani fu den problema di a ondrofeni.

David kon si taki a bosroiti di a ben teki fu froisi go na Amerkankondre no ben de wan koni wan, èn now a abi a fasti bosroiti fu no meki moni e breni en moro te a musu teki bosroiti. Now a sabi taki den moro warti sani na ini a libi, namku wan lobi-ati osofamiri, bun mati, nanga wan banti nanga Gado, na sani di a no kan kisi nanga yepi fu moni (Odo 17:17; 24:27; Yesaya 55:1, 2). Iya, a hori di wi e hori wisrefi na den moro bun markitiki, warti omeni tron moro gudu (Odo 19:1; 22:1). David nanga en osofamiri abi a fasti bosroiti fu poti den yoisti sani na a fosi presi na ini den libi.—Filipisma 1:10.

Ibri leisi baka libisma no ben abi bun bakapisi di den pruberi fu seti wan libimakandra pe sma e libi trutru wan gudu libi, aladi den e tan hori densrefi na bun markitiki. Ma Gado pramisi taki en Kownukondre o meki taki wi abi bogobogo gudu nanga sani di wi abi fanowdu na yeye fasi fu man abi wan koloku libi (Psalm 72:16; Yesaya 65:21-23). Yesus ben leri taki efu wan sma wani abi wan trutru gudu libi, dan a musu sabi fosi taki a de na nowtu na yeye fasi (Mateyus 5:3). Sobun, awansi wi gudu noso pôti, te wi e poti yeye afersi na a fosi presi na ini wi libi now, dan dati na a moro bun fasi fa wi kan sreka wisrefi fu libi na ini a nyun grontapu fu Gado di o kon heri esi (1 Timoteyus 6:17-19). Na ini a grontapu dati wi sa libi na ini wan libimakandra pe sma sa gudu trutru, èn pe den sa tan hori densrefi na den hei markitiki fu Gado.

[Futuwortu]

[Prenki na tapu bladzijde 5]

Yob no ben e frutrow tapu den gudu fu en, ma tapu Gado

[Prenki na tapu bladzijde 7]

Den moro warti sani na ini a libi no de fu kisi nanga yepi fu moni