Yu de leki wan Lagani Auna bon?

NA INI wan dorpu na lanki fu Port Moresby, na ini Papuwa Nyun Ginea, tu preikiman ben e go na oso, baka di den ben du a preikiwroko. Di den ben e waka, dan den si wan moi bon. „Ai, luku wan lagani auna bon!”, a moro owruwan fu den tu preikiman taki. A drai luku a moro yongu man èn a taki: „Dati wani taki ’yari bon.’ A bon disi no de leki furu tra bon di e gro na den waran kontren na grontapu. Ibri yari a e lasi en wiwiri èn a gersi leki a dede. Ma te alen fadon, dan a e kisi ensrefi baka, a e kisi bromki èn a e sori baka fa a moi.”

Wi kan leri wan sani fu a lagani auna bon, noso a royal poinciana, noso a flamboyant bon, soleki fa wi sabi en na ini Sranan. Son sabiman e taki dati a bon disi na wan fu den feifi moro moi bon na grontapu, di e gi bromki. A bon disi e lasi en bromki nanga en wiwiri na ini dreiten, ma toku a e hori watra. Den rutu fu en tranga èn den kan gro lontu bigi ston di de dipi na ini a gron. Na so fasi, a kan tan tanapu steifi te hebi winti e wai. Fu taki en syatu, a bon disi e tan na libi na ini den moro muilek situwâsi.

A kan taki wi e kon na ini situwâsi di e meki taki wi musu sori o tranga a bribi fu wi de. San kan yepi wi fu horidoro? Neleki a lagani auna bon wi kan teki èn hori a watra fu Gado Wortu di e gi libi. Wi musu hori fasti na a ’klepston fu wi’, namku Yehovah, èn sosrefi na a organisâsi fu en (2 Samuel 22:3). Fu tru, a lagani auna bon na wan moi sani di e memre wi taki srefi na ini muilek situwâsi, wi kan tan tranga èn moi na yeye fasi, te wi e gebroiki a yepi di Yehovah sreka gi wi. Te wi e du disi, dan wi sa ’kisi san a pramisi’, sosrefi a pramisi fu têgo libi.—Hebrewsma 6:12; Openbaring 21:4.