Den sma na ini den farawe foto fu Bolifia e yere a bun nyunsu
Den sma na ini den farawe foto fu Bolifia e yere a bun nyunsu
WI DE nanga sowan 20 sma na sekanti, èn wi de fayafaya fu go na den dorpu na tapusei fu a liba, pe wi sa tan heri dei. Wi de na a futu fu na Andesbergi, pe a Beniliba e miti den bigi kontren fu na Amazoneliba pe bergi no de. A presi disi moi srefisrefi.
Ma wi no go drape fu koiri. Wan tu fu unu na sma fu a kontren disi, trawan kon fu farawe foto fu tan dyaso na ini Rurrenabaque. A presi disi na wan moi pikin foto pe yu abi bon di e gi bromki, sosrefi oso nanga tasi-daki. Wanwan leisi, soso bromfiets di sma e rèi leki taxi e pasa na strati. Fu san ede wi e go drape?
San wi e si dyaso, na wan bun eksempre fu den sani di e pasa na ini furu tra pisi fu Bolifia. Yehovah Kotoigi fu den foto na ini Bolifia, èn fu tra kondre e tyari a bun nyunsu fu Gado en Kownukondre go na den moro pikin foto.—Mateyus 24:14.
Bolifia na wan kondre di de na mindrisei fu Zuid-Amerika. A kondre bigi tu leisi moro leki Fransikondre, ma a nomru fu sma di e tan drape na pikinmoro a di fu tin pisi fu a nomru fu sma di e tan na ini Fransikondre. Furu fu den sma fu Bolifia e libi na ini foto, noso na ini kontren pe sma e diki gron nanga masyin fu suku gowtu noso tra warti sani. Den foto disi kan de bun hei na tapu den bergi, noso den kan de na mindrisei fu den lagipresi pe sma e prani gron. Na ini den kontren pe bergi no de èn pe a de moro waran, yu musu pasa bun bigi busi fosi, fu man doro den foto.
Na ini den yari na mindri 1950 nanga
1970, deki-ati zendeling soleki Betty Jackson, Elsie Meynberg, Pamela Moseley, nanga Charlotte Tomaschafsky, ben e teki fesi na ini a preikiwroko na ini den farawe foto. Den leri opregtisma a waarheid fu Bijbel, èn den yepi fu seti pikin gemeente. Na ini den yari na mindri 1980 nanga 2000, a nomru fu Yehovah Kotoigi kon tron siksi leisi so furu leki san a ben de fosi, èn dati pasa moro furu na ini den foto. Now gemeente de na ini ibri kontren fu den foto. Yu kan feni den na ini den gudu distrikt pe sma e wroko na ini den hei kantorogebow, pe sma e tan na ini moi oso, èn pe sma e bai sani na ini bigi wenkri. Ma gemeente de tu na ini den bakabini pe sma e libi na ini pikin kampu di meki fu tokotoko, pe sma e seri sani na strati, èn pe den e weri krosi di abi furu kloru èn di e sori fu sortu lo den de. San den Kotoigi kan du fu yepi moro sma na ini den farawe presi fu kon leri sabi Yehovah?Den e gowe libi a switi libi fu foto
Na ini den twenti yari di pasa, wan lo sma na ini Bolifia froisi go tan na tra presi. Furu sma di ben e tan na ini den foto pe sma e diki gron fu feni gowtu noso tra warti sani, èn sosrefi sma di ben e tan na den boiti presi, froisi go tan na ini den foto. A de wan freimde sani te sma e froisi komoto fu a foto fu go tan na ini den dorpu. Furu dorpu abi wán telefon nomo, èn den abi stroom wan tu yuru nomo wan dei. Den Kotoigi di e libi na ini den pikin foto disi kan si tra Kotoigi soso na den kongres di e hori wán leisi wan yari. Boiti dati, den Kotoigi musu pai bun furu moni fu go na den kongres disi, ogri kan miti den na pasi, èn den weri srefisrefi te den doro drape. Soso lagiskoro de na ini den dorpu drape. We dan, fu san ede wan tu Kotoigi fu Yehovah e gowe libi a foto fu go tan na ini den dorpu?
„Mi ben abi na okasi fu studeri go moro fara so taki mi ben kan feni wan bun wroko na ini a foto La Paz”, na so Luis ben taki no so langa pasa. „Ma ala ten mi papa nanga mama ben e sori mi taki a moro bun wroko, na fu meki disipel. Sobun, mi leri pikinso fa fu du bow-wroko. Di mi ben de nanga fakansi na ini Rurrenabaque, dan mi si taki den sma drape ben e angri fu yere a bun nyunsu. Di mi si a pikin grupu fu brada di ben de drape, dan mi ben feni taki mi musu kon yepi nanga a wroko. Now mi e studeri Bijbel nanga 12 sma. Fu gi wan eksempre, mi e studeri nanga wan yonkuman nanga en wefi, èn den abi fo pikin. A ben gwenti fu dringi furu sopi, èn a ben e dòbel. Ma a tapu nanga ala den sani dati èn a bigin fruteri den mati fu en san a e leri fu Yehovah. Ala ten a e sreka a les na fesi. Te a musu go na busi dri noso fo dei fu go kapu udu, dan a e firi fruferi fu di a no kan teki prati na Kresten afersi. Te mi e si ala den sma disi na den Kresten konmakandra, dan mi feni taki a no fu soso mi gowe libi a foto fu kon dyaso.”
Juana na wan uma di e kweki en pikin, en
wawan. „Fosi, mi ben e krin oso gi wan sma na ini La Paz”, na so a e taki. „Di a boi fu mi ben pikin, dan mi go wroko leki furuten preikiman na ini a foto. Di mi go wan leisi na Rurrenabaque, dan mi kon si omeni moro mi ben kan du, te mi ben o froisi go drape. Sobun, wi froisi kon dyaso, èn mi feni wan wroko fu krin oso gi sma. Na a bigin, mi no ben man nanga a faya weer èn nanga den maskita. Ma now wi de dyaso seibi yari kaba. Mi man hori furu bijbelstudie ibri wiki, èn furu bijbelstudenti e sori warderi, fu di den e kon na den konmakandra.” Juana nanga a boi fu en na tu fu den sma di de na ini a boto fu go na tapusei fu a liba. Yu kan kon tu efu yu wani.Wi e go na tapusei fu a liba
A masyin fu a boto e bari te wi e hari go na a smara pisi fu a liba di de na mindri den bergi. Wan grupu popokai e bari fu di den no lobi taki wi de drape. A tokotoko watra di e komoto fu den bergi e meki draiwatra kon, èn a botoman e tyari a boto nanga koni pasa a tranga watra. Na wan ten fu neigi yuru mamanten, wi e saka na wan pikin dorpu. Drape wi e miti wan owruman fu a Rurrenabaque Gemeente, èn a e sori wi pe wi musu preiki.
Den sma fu a dorpu e gi wi wan switikon na ini a kowrupe fu wan bon, noso na inisei fu wan oso di meki fu bambutiki èn di abi wan tasi-daki. A no teki langa srefi di wi miti wan yongu trowpaar di e masi ken na ini wan sortu udu baki di sma fu drape meki. A watra fu a ken e lon go na ini wan kopro beki. Bakaten den o bori a watra disi teleki a kon tron malasi di den o seri na wowoyo. Den sma e kari wi kon na ini den oso èn den e aksi wi furu sani fu Bijbel.
Wi e tan hari go na tapusei fu a liba, èn wi e preiki na ibri dorpu. Furu sma e prisiri fu yere san Bijbel e taki fu a kaba di sa kon na siki nanga dede (Yesaya 25:8; 33:24). Na ini a kontren disi pe datrayepi no de fu feni so makriki, furu osofamiri lasi wan pikin na ini dede, èn a sani dati gi den bun furu sari. Den sma disi na gronman noso fisiman di pikinmoro no man sorgu densrefi nanga den sani di den e prani noso e fanga, èn a tranga libi fu den no e gi den a dyaranti taki sani sa tan waka bun nanga den. Sobun, furu fu den lobi fu yere a pramisi di Gado e gi na Psalm 72, taki wan tirimakti o kon di sa tyari wan kaba kon na pôtifasi. Ma yu denki taki den sma di e libi na den farawe presi disi èn di wani kon sabi moro, ben o meki muiti fu go na den Kresten konmakandra? Nanga a tori dati Eric nanga Vicky ben e broko den ede. Den na furuten dinari na ini Santa Rosa, èn a e teki sowan dri yuru fu doro a presi dati di de na ini a kontren fu na Amazoneliba.
Den wan di wani sabi moro o kon?
Eric nanga Vicky komoto fu a distrikt California di de na Amerkankondre, èn den pasa 12 yari kaba na ini Bolifia. Wan opziener di e reis, ben gi den a rai fu froisi go na Santa Rosa. „Soso tu telefon ben de na ini a foto, èn Internet no ben de tu”, na so Vicky e taki. „Bun furu busimeti de drape. Furu tron wi e si bigi kaiman, struisvogel (wan bigi sortu fowru), nanga bigi sneki te wi e go nanga bromfiets na den farawe presi. Ma a sani di e hari wi prakseri moro srefi leki den meti, na den sma drape. Wi e studeri Bijbel nanga a famiri Vacas, wan yongu trowpaar di abi fo nyofi pikin. Den e tan sowan 26 kilometer dorosei fu a foto. Fosi, a papa ben de wan drunguman, ma now a no de dati moro. Ibri wiki a e tyari en heri osofamiri nanga en pikin sisa kon na a Kownukondre zaal. A e tyari en wefi nanga a beibi fu den na tapu baka fu a baisigri fu en. A pikin fu en di abi neigi yari e tyari en pikin sisa na tapu a tra baisigri, èn a wan di abi aiti yari e rèi en eigi baisigri. A e teki dri yuru fosi den doro na a zaal.” Na osofamiri lobi Yehovah trutru, èn den e du ala san den man fu abi demakandra nanga a gemeente.
Na ini tin na aiti mun nomo, dri fu den bijbelstudie doro den markitiki fu teki dopu, èn sowan 25 fu den e kon na a nyun Kownukondre zaal na ini Santa Rosa. Aladi wan lo sma wani studeri Bijbel, toku furu fu den abi wan lo problema di den musu lusu fosi fu man dini Yehovah.
A problema fu trow akruderi wet
Marina nanga Osni na zendeling di e dini na ini wan farawe foto krosibei fu a lanki na mindri Bolifia nanga Brasyonkondre. Den e fruteri taki furu sma drape no e si a trowlibi leki wan sani di musu tan fu têgo. Den e kenki patna doronomo. „A sani disi na wan problema di e tapu sma fu go na fesi na yeye fasi”, na so Osni e taki. „Te sma wani tron tru Kresten, dan den musu du wan lo sani fosi, èn den musu pai wan lo moni tu. Son sma musu bosroiti nanga sortuwan fu den patna den wani libi go doro, èn baka dati den musu go trow akruderi wet. Awansi fa a no fa, a trow di sma musu trow akruderi wet, na wan Bijbel markitiki, èn son sma wroko bun tranga fu kon feni a moni di den ben abi fanowdu fu man trow akruderi wet.”—Romesma 13:1, 2; Hebrewsma 13:4.
Marina e fruteri na ondrofenitori fu Norberto. „A ben e libi nanga difrenti uma fosi a go libi nanga wan uma di ben e baka brede. Na uma disi ben yongu sowan 35 yari moro en, èn a ben abi wan boi di Norberto teki leki en manpikin, akruderi wet. Di a boi bigin gro kon bigi, dan Norberto ben wani de wan moro bun eksempre gi en. Sobun, di wan Kotoigi kon na a bakri fu aksi sma efu den ben wani studeri Bijbel sondro taki den ben abi fu pai, dan Norberto teki wan bijbelstudie, aladi a no ben man leisi èn aladi a ben abi 70 yari. Di Norberto nanga en patna kon sabi san Yehovah wani, dan den trow akruderi wet, èn bakaten den teki dopu. A boi kon tron wan Kresten tini di e tyari ensrefi na wan frantwortu fasi, èn dati na soifri san Norberto ben wani. Norberto leri leisi, èn a hori lezing srefi na den gemeente konmakandra. Aladi a swaki srefisrefi fu di a owru, toku a de wan fayafaya preikiman fu a bun nyunsu.”
Yehovah en yeye e gi sma krakti
Yesus taigi den fosi bakaman fu en: „Yu sa kisi krakti te a santa yeye kon na un tapu, èn unu sa de kotoigi fu mi . . . te na den moro farawe presi fu grontapu” (Tori fu den Apostel 1:8). A e gi deki-ati trutru fu si fa a yeye fu Gado e meki Kresten man nanga uma froisi go na farawe presi! Fu gi wan eksempre, na ini 2004, sowan 30 fayafaya Kresten bosroiti fu go dini wan pisi ten leki pionier na farawe kontren. Den e warderi na eksempre fu sowan 180 trakondre sma di kon na Bolifia fu dini leki pionier, leki kringopziener, leki sma di e wroko na Bethel, noso leki zendeling. Den 17.000 Kownukondre preikiman na ini Bolifia e hori sowan 22.000 oso-bijbelstudie nanga sma di wani sabi moro fu Bijbel.
A e gi ala den brada disi bun furu prisiri fu sabi taki a yeye fu Yehovah e tiri den. Fu gi wan eksempre, Robert nanga Kathy agri fu go dini leki zendeling na ini Camiri. A foto disi de na ini wan kontren di lai nanga bergi di tapu nanga busibusi, èn a de krosibei fu wan liba. Ala ten a muilek gi sma fu doro drape. „A gersi taki wi kon na a yoisti ten”, na so Robert e taki. „Na ini tu yari ten, sowan 40 sma tron preikiman fu a bun nyunsu.”
Wan drunguman di e dòbel e arki a bun nyunsu
Furu sma fu a foto no man bribi fa den sma di e studeri Bijbel kon kenki. Fu gi wan eksempre, sowan feifi yari pasa, dan wan dei wan drunguman di nen Ariel ben e didon drungudrungu na ini en bedi. A ben de wan pôpi man fu di a ben gwenti fu dòbel, ma toku a ben e broko en ede nomo nanga den someni paiman di a ben abi, nanga a trowlibi fu en di no ben e waka bun, èn nanga den umapikin fu en di a no ben e sorgu bun. A ben e sidon na prakseri-broki, di wan Kotoigi fu Yehovah, di ben e wroko oso fu oso, kon na en. Ariel arki bun di a brada ben e fruteri en sani fu Bijbel. A no langa na baka, Ariel ben e didon baka na ini en bedi fu leisi fu wan koloku osofamiri-libi, fu Paradijs, èn fu a dini di sma musu dini Gado. Bakaten a ben wani wan bijbelstudie.
Na a ten di den zendeling kon na ini Camiri, dan Ariel en wefi, Arminda, ben e studeri Bijbel tu. Ma Arminda no ben e du dati fayafaya. „Mi sa pruberi fu du iniwan sani di de fanowdu fu meki a tapu fu dringi sopi”, na so a ben taki. „Ma mi e tweifri efu dati sa yepi. Yepi no de gi a man disi.” Ma aladi Arminda no ben fruwakti dati, toku a bijbelstudie ben e hari en prakseri trutru. Na ini wán yari nomo, a teki dopu èn a ben e gi kotoigi na den famiriman fu en. A no teki langa di wan tu fu den famiriman fu en gi den libi abra na Yehovah.
Ma a ben muilek gi Ariel fu tapu fu dringi sopi, fu smoko, èn fu dòbel. A bigi kenki kon di a kari ala den mati fu en kon na a Memrefesa fu a dede fu Yesus. A ben teki a bosroiti disi: „Den wan di no e kon, mi no o bumui moro nanga den. Mi sa studeri Bijbel nanga den wan di e kon.” A bigin dri bijbelstudie na a fasi dati. Srefi bifo Ariel tron wan memre fu a gemeente, a studeri Bijbel nanga wan famiriman fu en di go na fesi èn di teki dopu tapu a srefi dei leki Ariel. Arminda e taki: „A de neleki na Ariel fu fosi no de moro.”
Robert e taki: „A lasti leisi di mi teri, dan 24 famiriman fu en ben e kon na den konmakandra doronomo. Tin fu den teki dopu, èn aiti trawan na preikiman di no teki dopu ete. Sma si fa den famiriman disi e tyari densrefi na wan heri tra fasi, èn sonwan fu den sma bigin studeri Bijbel tu, èn den e kon na den gemeente konmakandra. A nomru fu sma di e kon na den konmakandra, kren fu 100 go miti 190. Mi nanga Kathy e hori sowan 30 bijbelstudie, èn den alamala e kon na den konmakandra. Wi breiti taki wi de dyaso.”
San e pasa na den farawe foto fu Bolifia na noti ete te yu e teki dati gersi nanga a nomru sma di e tyari kon na wán na heri grontapu, soleki fa dati skrifi na Openbaring 7. A kapitel disi e taki dati den wan di sa pasa a bigi banawtu libilibi sa tyari kon na wán na „a dei fu Masra” (Openbaring 1:10; 7:9-14). Sensi libisma de, noiti bifo a pasa taki milyunmilyun sma fu ala nâsi e anbegi a wan-enkri tru Gado na ini wánfasi. Disi na wan tumusi moi buweisi taki heri esi den pramisi fu Gado sa kon tru!
[Prenki na tapu bladzijde 9]
Betty Jackson
[Prenki na tapu bladzijde 9]
Elsie Meynberg
[Prenki na tapu bladzijde 9]
Pamela Moseley
[Prenki na tapu bladzijde 9]
Charlotte Tomaschafsky, na a reti-anusei
[Prenki na tapu bladzijde 10]
Eric nanga Vicky kon dini pe moro Kownukondre preikiman de fanowdu
[Prenki na tapu bladzijde 10]
Ibri wiki a famiri Vaca e rèi baisigri dri yuru langa fu go na a Kownukondre zaal
[Prenki na tapu bladzijde 11]
Sma fu a dorpu krosibei fu a Beniliba e kaka den yesi arki a bun nyunsu
[Prenki na tapu bladzijde 12]
Robert nanga Kathy e dini leki zendeling na ini Camiri