Gado e tyari sani na ini hemel èn sani na grontapu kon makandra
Gado e tyari sani na ini hemel èn sani na grontapu kon makandra
’A e plisi Gado èn a feni en bun fu tyari ala sani kon makandra baka na ondro Krestes, namku den sani di de na ini hemel nanga den sani di de na grontapu.’—EFEISESMA 1:9, 10.
1. San Yehovah abi na prakseri gi hemel nanga grontapu?
VREDE na hemel nanga grontapu! Dati na a tumusi moi sani di Yehovah, „a Gado fu vrede”, abi na prakseri (Hebrewsma 13:20). A ben meki na apostel Paulus skrifi taki a ’e plisi En èn a feni en bun’ „fu tyari ala sani kon makandra baka na ondro Krestes, namku den sani di de na ini hemel nanga den sani di de na grontapu” (Efeisesma 1:9, 10). San a wortu di vertaal leki ’tyari kon makandra baka’ na ini a tekst disi e sori trutru? J. B. Lightfoot, sabiman fu kerkitori, e taki: „Den wortu disi abi fu du nanga a wánfasi di o de na hemel nanga grontapu, pe nowan sani o de moro di e tyari bruya kon, ma pe Krestes sa de a moro prenspari sma, èn pe ala sani sa waka soleki fa en wani. Sondu, dede, sari, takru bakapisi, nanga pina, no sa de moro.”
„Den sani di de na ini hemel”
2. Suma na „den sani di de na ini hemel”, di musu tyari kon makandra?
2 Na apostel Petrus ben taki syatu fu a tumusi moi howpu di tru Kresten abi. A ben skrifi: „Wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan” (2 Petrus 3:13). Den „nyun hemel” di Gado pramisi na ini a vers disi, na a nyun tirimakti, namku a Mesias Kownukondre. „Den sani di de na ini hemel”, di Paulus ben taki fu den na ini a brifi di a ben skrifi gi den Kresten na ini Efeise, musu tyari kon makandra „na ondro Krestes”. Den sani dati na a pikin grupu libisma di Gado teki fu tiri makandra nanga Krestes na ini hemel (1 Petrus 1:3, 4). Den 144.000 salfu Kresten disi „bai puru fu grontapu”, iya, den „bai puru na mindri libisma” fu kisi a srefi gudu leki Krestes, namku fu tiri makandra nanga en na ini a hemel Kownukondre fu en.—Openbaring 5:9, 10; 14:3, 4; 2 Korentesma 1:21; Efeisesma 1:11; 3:6.
3. Fu san ede wi kan taki dati den salfuwan ’teki presi na ini hemel’, awansi den de na grontapu ete?
3 Salfu Kresten e gebore baka nanga yepi fu santa yeye, so taki den kan tron yeye manpikin fu Yehovah (Yohanes 1:12, 13; 3:5-7). Fu di Yehovah teki den leki en „manpikin”, meki den e tron brada fu Yesus (Romesma 8:15; Efeisesma 1:5). Fu dati ede, Bijbel e taki dati den ’kisi wan opobaka èn taki den alamala teki presi na ini hemel fu di den de wán nanga Krestes Yesus’, awansi den de na grontapu ete (Efeisesma 1:3; 2:6). Den e kisi a hei posisi disi leki yeye, fu di ’a santa yeye di Gado pramisi den, poti na den tapu leki wan marki. A santa yeye disi na wan dyaranti taki den o kisi wan gudu’ di poti na wan sei gi den na ini hemel (Efeisesma 1:13, 14; Kolosesma 1:5). Sobun, disi na „den sani di de na ini hemel”, èn Yehovah ben bosroiti na fesi kaba omeni sma ben musu tyari kon makandra.
Gado e bigin tyari sani kon makandra
4. O ten Gado bigin tyari „den sani di de na ini hemel” kon makandra, èn fa a du disi?
4 Soleki fa Yehovah ben abi na prakseri nanga a „tiri” fu en, dan „den sani di de na ini hemel” ben musu bigin tyari kon makandra „na a kaba fu a reti ten” (Efeisesma 1:10). A ten dati ben doro na ini 33 G.T., di den Dyu ben hori a Pinksterfesa. Na a dei dati, den apostel, èn sosrefi wan grupu disipel, namku mansma nanga umasma, ben salfu nanga santa yeye (Tori fu den Apostel 1:13-15; 2:1-4). Disi ben de a buweisi taki a nyun frubontu ben kon abi krakti, èn taki a Kresten gemeente nanga a nyun Israel na yeye fasi, noso „na Israel fu Gado”, ben seti.—Galasiasma 6:16; Hebrewsma 9:15; 12:23, 24.
5. Fu san ede Yehovah seti wan nyun „pipel” fu teki a presi fu a trutru nâsi Israel?
5 A Wetfrubontu di Gado ben meki nanga a pipel fu Israel, no ben tyari „wan kownukondre fu priester èn wan santa pipel” kon di ben o dini fu têgo na ini hemel (Exodus 19:5, 6). Yesus ben taigi den kerki fesiman fu den Dyu: „Den sa puru a kownukondre fu Gado na un anu èn den sa gi en na wan pipel di e meki den froktu fu a kownukondre” (Mateyus 21:43). A pipel dati, namku Israel na yeye fasi, na den salfu Kresten di de na ini a nyun frubontu. Na ini a brifi fu en, na apostel Petrus ben taigi den wan disi: „Unu na ’wan spesrutu grupu fu sma di Gado teki, iya, wan grupu fu priester di o tiri leki kownu, wan santa pipel, wan pipel di de wan spesrutu gudu, so taki unu ben sa fruteri ala sma fu den kefalek moi fasi’ fu a sma di kari unu komoto na ini a dungru fu kon na ini en tumusi moi leti. Bika fosi, unu no ben de wan pipel, ma now unu na a pipel fu Gado” (1 Petrus 2:9, 10). A frubontu di Yehovah ben sroto nanga a trutru nâsi Israel, no ben abi krakti moro (Hebrewsma 8:7-13). Soleki fa Yesus ben taki na fesi, dan den Israelsma ben lasi a grani di den ben abi fu tiri na ini a Mesias Kownukondre, èn Gado gi a grani dati na den 144.000 memre fu na Israel na yeye fasi.—Openbaring 7:4-8.
Yesus e sroto wan Kownukondre frubontu nanga den
6, 7. Sortu spesrutu frubontu Yesus sroto nanga den brada fu en di Gado teki leki En manpikin, èn san disi wan taki gi den?
6 Na a neti di Yesus taigi den getrow apostel fu en fu tan memre a dede fu en, a taki: „Unu na den wan di tan nanga mi di mi ben kisi tesi; mi e meki wan frubontu nanga unu, neleki fa mi Tata meki wan frubontu nanga mi gi wan kownukondre, so taki unu kan nyan èn dringi na mi tafra na ini mi kownukondre, èn so taki unu kan sidon na tapu kownusturu fu krutu den twarfu lo fu Israel” (Lukas 22:28-30). Dyaso Yesus e taki fu wan spesrutu frubontu di a ben sroto nanga den 144.000 brada fu en, noso den wan di Yehovah teki leki En manpikin. Den sma disi ben o tan „getrow srefi te na dede” èn den ben o „wini a strei”.—Openbaring 2:10; 3:21.
7 Den sma fu a pikin grupu disi no e howpu srefisrefi moro fu libi fu têgo na grontapu leki sma di abi wan skin nanga brudu. Den sa tiri makandra nanga Krestes na ini hemel, èn den sa sidon na tapu kownusturu fu krutu a libisma famiri (Openbaring 20:4, 6). Meki wi go poti prakseri now na tra bijbeltekst di abi fu du soso nanga den salfuwan disi, èn di e sori fu san ede den „tra skapu” no e gebroiki a brede nanga a win na a Memrefesa.—Yohanes 10:16.
8. San den salfuwan e sori te den e nyan a brede? (Luku a faki na tapu bladzijde 23.)
8 Den salfuwan sa pina neleki fa Krestes ben pina, èn den de klariklari fu dede neleki en. Paulus di ben de wan fu den salfuwan disi, ben taki dati a de klariklari fu du iniwan sani di de fanowdu, so taki a kan ’abi wan bun matifasi nanga Krestes, so taki a kan kon sabi Krestes èn a krakti di na opobaka fu en abi, èn so taki a kan pina leki fa en ben pina’. Iya, Paulus ben de klariklari fu „dede leki fa [Krestes] dede” (Filipisma 3:8, 10). Furu salfu Kresten kisi pina, neleki ’fa sma ben pina Yesus, san ben abi leki bakapisi taki a dede’.—2 Korentesma 4:10.
9. Sortu skin a brede fu a Memrefesa e prenki?
9 Di Yesus ben e seti a Memrefesa, a taki: „Disi e prenki mi skin” (Markus 14:22). A ben e taki fu en trutru skin, di heri esi sma ben o fon teleki a kon lai nanga brudu. Brede sondro srudeki ben e prenki a skin dati heri bun. Fu san ede? Fu di Bijbel son leisi e agersi srudeki nanga sondu, noso ogri (Mateyus 16:4, 11, 12; 1 Korentesma 5:6-8). Yesus ben de volmaakti, èn a libisma skin fu en no ben abi sondu. A ben o gi a volmaakti skin dati leki wan ofrandi di ben o meki wi kon bun baka nanga Gado (Hebrewsma 7:26; 1 Yohanes 2:2). Te a ben o du disi, dan a ben o tyari wini kon gi ala getrow Kresten di abi a howpu fu libi na ini hemel, èn gi den wan di abi a howpu fu libi fu têgo na tapu wan paradijs grontapu.—Yohanes 6:51.
10. Na sortu fasi den wan di e dringi a win na a Memrefesa, ’e kisi wini fu a brudu fu Krestes’?
10 Disi na san Paulus ben skrifi fu a win di den salfu Kresten e dringi na a Memrefesa: „A no de so, taki a kan di Yesus blesi èn di wi sosrefi e blesi, e meki taki wi kisi wini fu a brudu fu Krestes?” (1 Korentesma 10:16). Na sortu fasi den wan di e dringi a win ’e kisi wini fu a brudu fu Krestes’? A no de so kwetikweti taki den e pai a lusu-paiman makandra nanga Krestes, bika sosrefi den musu kisi frulusu fu sondu. Fu di den e bribi taki a brudu fu Krestes kan frulusu den, meki Gado e gi den pardon fu den sondu fu den, èn A e fruklari den regtfardiki so taki den kan libi na ini hemel (Romesma 5:8, 9; Titus 3:4-7). Nanga yepi fu a brudu fu Krestes, Gado „santa” den 144.000 sma disi di o kisi wan gudu makandra nanga Krestes. A poti den aparti, èn a krin den fu sondu so taki den kan tron „santawan” (Hebrewsma 10:29; Danièl 7:18, 27; Efeisesma 2:19). Iya, nanga a brudu fu en, Krestes „bai sma gi Gado, komopo fu ibri lo, tongo, pipel, nanga kondre; [a] meki den tron wan kownukondre èn [a] meki den tron priester gi wi Gado, èn den o tiri grontapu leki kownu”.—Openbaring 5:9, 10.
11. San den salfuwan e sori te den e dringi a win na a Memrefesa?
11 Di Yesus seti a Memrefesa, dan a ben gi den getrow apostel fu en a kan win, èn a taki: „Un alamala musu dringi en; bika disi e prenki mi ’brudu fu a frubontu’, di o kanti trowe gi furu sma, so taki den kan kisi pardon fu sondu” (Mateyus 26:27, 28). A Wetfrubontu di Gado ben sroto nanga a nâsi Israel, ben kon abi krakti nanga yepi fu a brudu fu bokoboko nanga mankaw, èn na so a nyun frubontu di Yehovah sroto nanga na Israel na yeye fasi kon abi krakti tu nanga yepi fu a brudu fu Yesus. A sani disi pasa na a Pinksterfesa fu 33 G.T. (Exodus 24:5-8; Lukas 22:20; Hebrewsma 9:14, 15). Te den salfuwan e dringi a win di e prenki a „brudu fu a frubontu”, dan den e sori nanga dati taki Gado teki den na ini a nyun frubontu, èn taki den e kisi wini fu dati.
12. O ten wi kan taki dati den salfuwan dopu na ini a dede fu Krestes?
12 Den salfuwan musu hori ete wan tra sani na prakseri. Yesus ben taigi den getrow disipel fu en: „Unu o dringi san mi e dringi, èn unu o teki a dopu di mi e teki” (Markus 10:38, 39). Bakaten, na apostel Paulus ben taki dati Kresten ben o „dopu na ini a dede fu [Krestes]” (Romesma 6:3). Den salfuwan musu de klariklari fu nyan bun furu pina. A dede fu den e sori taki den no e howpu srefisrefi moro fu libi fu têgo na grontapu. Te den salfu Kresten disi dede na wan getrow fasi èn e kisi wan opobaka leki yeye fu ’tiri leki kownu’ makandra nanga Krestes na ini hemel, dan fosi wi kan taki dati den dopu na ini a dede fu Krestes.—2 Timoteyus 2:10-12; Romesma 6:5; 1 Korentesma 15:42-44, 50.
Den e gebroiki a brede nanga a win
13. Fu san ede den sma di abi a howpu fu libi na grontapu, no e gebroiki a brede nanga a win na a Memrefesa, ma fu san ede den e go na a Memrefesa?
13 Ala den sani disi di wi luku didyonsro, abi fu du nanga a gebroiki di sma e gebroiki a brede nanga a win na a Memrefesa. Dati meki a de krin taki den wan di abi a howpu fu libi na grontapu, no kan gebroiki a brede nanga a win. Den wan di abi a howpu fu libi na grontapu, e frustan taki den no de salfu memre fu a skin fu Krestes, èn den no de na ini a nyun frubontu di Yehovah sroto nanga den wan di sa tiri makandra nanga Yesus Krestes. Fu di „a kan” e prenki a nyun frubontu, meki soso den wan di de na ini a nyun frubontu kan gebroiki a brede nanga a win. Den wan di abi a howpu fu kisi têgo libi leki volmaakti libisma na grontapu ondro a tiri fu a Kownukondre, no dopu na ini a dede fu Krestes, èn den no kisi a kari fu tiri makandra nanga en na ini hemel. Efu den ben o gebroiki a brede nanga a win, dan dati no ben o fiti. Fu dati ede, den no e gebroiki a brede nanga a win, ma den e go na a Memrefesa leki sma di de drape fu poti ala den prakseri na san e pasa na a okasi dati. Den de nanga tangi na ati gi ala san Yehovah du gi den nanga yepi fu en Manpikin, èn wán fu den sani disi na a pardon di den e kisi fu den sondu fu den, nanga yepi fu a brudu fu Krestes.
14. Fa den salfuwan e kisi krakti na yeye fasi te den e gebroiki a brede nanga a win?
14 Heri esi, ala den memre fu a pikin grupu salfu Kresten di sa tiri makandra nanga Krestes na ini hemel, sa tyari kon na wán. Den salfuwan e kisi krakti na yeye fasi, fu di den e gebroiki a brede nanga a win na a Memrefesa, èn den sa tan du disi te na a kaba fu den libi na grontapu. Fu di den na memre fu a skin fu Krestes, meki den e firi taki den de na ini wánfasi nanga tra salfu Kresten. A gebroiki di den e gebroiki a brede nanga a win di e prenki a skin nanga a brudu fu Yesus, e memre den na a frantwortu di den abi fu tan getrow te na dede.—2 Petrus 1:10, 11.
Gado e tyari „sani di de na grontapu” kon makandra
15. Suma na den sma di Gado tyari kon na wan fu horibaka gi den salfu Kresten?
15 A grupu fu „tra skapu” di no de fu a „pikin ipi” èn di abi a howpu fu libi fu têgo na grontapu, e kon moro bigi èn sensi den yari baka 1935, a grupu disi e horibaka gi den salfuwan (Yohanes 10:16; Lukas 12:32; Sakaria 8:23). Den sma disi tron loyaal mati fu den brada fu Krestes, èn den e yepi den heri bun fu preiki „a bun nyunsu disi fu a kownukondre”, leki wan kotoigi gi sma fu ala kondre (Mateyus 24:14; 25:40). Fu di den e du dati, meki den abi na okasi fu tron sma di Krestes sa feni bun te a o kon fu krutu ala pipel. A sa si den leki en „skapu”, èn a sa poti den na en „reti-anusei” (Mateyus 25:33-36, 46). Fu di den e poti bribi na ini a brudu fu Krestes, meki den sa de a „bigi ipi” di o pasa „a bigi banawtu” libilibi.—Openbaring 7:9-14.
16. Suma o de „den sani di de na grontapu”, èn fa ala den sma disi sa kisi na okasi fu tron „pikin fu Gado”?
16 Te ala den 144.000 tyari kon na wán, dan den engel sa lusu den „winti” di sa tyari pori kon gi na ogri sistema fu Satan na grontapu (Openbaring 7:1-4). Na a ten fu a Dusun Yari Tiri fu Krestes nanga den tra kownu-priester di sa tiri makandra nanga en, bun furu sma di sa kisi wan opobaka sa de na grontapu makandra nanga a bigi ipi (Openbaring 20:12, 13). Den sma disi sa kisi na okasi fu libi fu têgo na grontapu ondro a tiri fu a Mesias Kownu, Krestes Yesus. Na a kaba fu a Dusun Yari Tiri, ala ’den sani disi di de na grontapu’ sa kisi wan lasti tesi. Den wan di e tan getrow, sa tron „pikin fu Gado”, di sa libi fu têgo na grontapu.—Efeisesma 1:10; Romesma 8:21; Openbaring 20:7, 8.
17. Fa Yehovah sa meki a prakseri fu en kon tru?
17 Sobun, nanga yepi fu a tumusi moi „tiri” fu en, noso a koni fasi fa a e tiri sani, Yehovah sa meki a prakseri fu en kon tru. Iya, A sa „tyari ala sani kon makandra baka ondro Krestes, namku den sani di de na ini hemel, nanga den sani di de na grontapu”. Ala den yeye na ini hemel èn sosrefi den libisma na grontapu sa tyari kon makandra, èn den sa ondrofeni vrede fu di den sa prisiri fu saka densrefi ondro a tirimakti fu Yehovah, a Sma di ala ten e du san a abi na prakseri.
18. Fa den salfuwan nanga den wan di e horibaka gi den, sa kisi wini te den e go na a Memrefesa?
18 Te a pikin grupu fu den salfuwan èn den milyunmilyun tra skapu di e wroko makandra nanga den sa kon makandra tapu 12 april 2006, dan dati sa tranga a bribi fu den trutru! Den sa hori a Memrefesa fu a dede fu Krestes, soleki fa Yesus ben taigi den: „Tan du disi fu memre mi” (Lukas 22:19). Ala den sma di de na a Memrefesa musu memre san Yehovah du gi den nanga yepi fu en lobi Manpikin, Krestes Yesus.
Luku baka san wi leri
• San Yehovah abi na prakseri gi den sani di de na ini hemel nanga den sani di de na grontapu?
• Suma na „den sani di de na ini hemel”, èn fa den sani disi tyari kon na wan?
• Suma na „den sani di de na grontapu”, èn sortu howpu den abi?
[Aksi fu a tori disi]
[Fai na tapu bladzijde 23]
„A skin fu Krestes”
Na ini 1 Korentesma 10:16, 17 Paulus e taki o prenspari a brede de gi den brada fu Krestes, di salfu nanga santa yeye. A gebroiki a wortu „skin”, na wan spesrutu fasi. A ben taki: „A no de so, taki a brede di wi e broko e meki taki wi e kisi wini fu a skin fu Krestes? Fu di wán brede de, meki wi na wán skin aladi furu fu wi de, bika wi alamala e nyan fu a wán brede dati.” Te den salfu Kresten e nyan a brede na a Memrefesa, dan den e sori nanga dati taki den de na ini wánfasi nanga ala den tra salfuwan, di de leki wán skin makandra nanga Krestes di de na Edeman fu den.—Mateyus 23:10; 1 Korentesma 12:12, 13, 18.
[Prenki na tapu bladzijde 23]
Fu san ede soso den salfuwan e nyan a brede èn e dringi a win?
[Prenki na tapu bladzijde 25]
Nanga yepi fu a tiri fu Yehovah, ala den yeye na ini hemel èn sosrefi den libisma na grontapu sa kon de na ini wánfasi