„San a persi dri-uku wani taki?”

WAN lantiman di e wroko na a ministeria fu Krutu Afersi na ini Seoul, na ini a Republiek Korea, ben skrifi: „Wan tu dei na fesi mi ben kisi wan Waktitoren fu wan fu den Kotoigi fu Yehovah.” A ben taki moro fara: „Di mi leisi a tijdschrift, dan mi kon leri fa sma ben frufolgu Yehovah Kotoigi ondro a Nazi tiri èn ondro a Communist tirimakti. Ma mi abi wan aksi. A fowtow na tapu a kafti fu a tijdschrift e sori Yehovah Kotoigi di abi wan persi dri-uku na tapu den dyakti, èn a dri-uku disi de na a kruktu-anusei fu a dyakti fu den. San a persi dri-uku disi wani taki?”

Di Doisrikondre ben de ondro a Nazi tirimakti, dan Yehovah Kotoigi no ben wani taki heil Hitler fu gi Hitler grani, èn den no ben e teki sei na ini politiek nanga srudati afersi. Fu dati ede, a Nazi tirimakti frufolgu den na wan ogri-ati fasi, fu di den poti sowan 12.000 Kotoigi na ini dungru-oso nanga strafuman kampu, pe den ben musu koti strafu wan heri pisi ten. Sowan 2000 fu den lasi den libi; hondrohondro fu den dede fu di den kisi dedestrafu.

San a persi dri-uku na tapu den strafuman krosi wani taki? Wan buku e fruklari: „Na ini den [Nazi] kampu yu ben abi difrenti grupu strafuman, èn den alamala ben weri wan spesrutu marki. Bifo na orloku, sma ben gwenti fu nai wan dri-uku poti na tapu strafuman krosi, èn a kloru ben sori fu sortu grupu den strafuman ben de. Den politiek strafuman ben abi wan redi dri-uku, Yehovah Kotoigi ben abi wan persi wan, sma di ben gwenti tanteri trawan na ini a libimakandra ben abi wan blaka wan, ogriman ben abi wan grun wan, homo-sma ben abi wan roze wan, èn blaw ben de gi trakondre sma. Boiti taki den Dyu strafuman ben weri wan geri dri-uku na tapu den krosi, den ben musu nai ete wan geri dri-uku poti na tapu a dri-uku dati, èn den ben musu poti en na so wan fasi taki a ben gersi a stari di sma ben kari a Stari fu David” (Anatomy of the SS State).

Professor John K. Roth ben skrifi na ini en buku Holocaust Politics: „Efu sma e tan hori na prakseri san a persi dri-uku wani taki, dan dati kan meki taki so wan rampu no e pasa moro, bika wi sa frustan taki wi musu tyari wisrefi na wan fasi di fiti, so taki trawan kan lespeki wi.” Yehovah Kotoigi meki wan video di wini wan prijs, èn a video disi nen Jehovah’s Getuigen — Standvastig onder nazi-terreur (Yehovah Kotoigi e kakafutu gi a Nazi tirimakti). Fu san ede yu no e aksi wan fu den Kotoigi fu Yehovah fu sori yu a video disi?