Wan tiri di Gado seti fu du san a abi na prakseri

„[Gado] e du ala sani soleki fa a wani.”—EFEISESMA 1:11.

1. Fu san ede ala den gemeente fu Yehovah Kotoigi sa kon makandra tapu 12 april 2006?

NA MOFONETI fu dridewroko 12 april 2006, sowan 16 milyun sma sa kon makandra fu hori a Memrefesa. Na ibriwan fu den presi pe den sma disi sa kon makandra, wan tafra sa de pe brede sondro srudeki èn sosrefi wan grasi nanga redi win de na tapu. A brede e prenki a skin fu Krestes, èn a redi win e prenki a brudu fu en. A neti dati, wan brada o hori wan lezing pe a e fruklari fu san ede wi e memre a dede fu Yesus. Na a kaba fu a lezing, wan tu brada sa meki a brede nanga a win pasa ala den sma di de na a konmakandra. Na ini wan tu gemeente fu Yehovah Kotoigi yu sa abi wán, noso moro sma di sa nyan a brede èn dringi a win. Ma nofo tron a de so taki nowan sma di de na a konmakandra sa nyan a brede èn dringi a win. Fu san ede a de so taki wan tu Kresten nomo, namku den wan di abi a howpu fu go na hemel, e gebroiki a brede nanga a win, aladi furu fu den tra Kresten di abi a howpu fu libi fu têgo na grontapu, no e gebroiki den sani disi?

2, 3. (a) Fa Yehovah bigin meki sani, soleki fa a ben abi na prakseri? (b) Fu san ede Yehovah meki grontapu nanga libisma?

² Yehovah na wan Gado di abi wan marki na prakseri. Fu man doro a marki fu en, a „e du ala sani soleki fa a wani” (Efeisesma 1:11). Na a fosi presi, a meki a wan-enkri gebore Manpikin fu en (Yohanes 1:1, 14; Openbaring 3:14). Baka dati, Yehovah gebroiki a Manpikin disi fu meki yeye manpikin, èn te fu kaba a meki hemel, sosrefi grontapu nanga den libisma na tapu.—Yob 38:4, 7; Psalm 103:19-21; Yohanes 1:2, 3; Kolosesma 1:15, 16.

³ Furu kerki fu Krestenhèit e leri sma taki Gado meki grontapu leki wan presi pe a kan luku efu libisma e doro den markitiki fu tron wan fu den yeye manpikin na ini hemel. Ma di Yehovah meki grontapu, dan a no ben abi dati na prakseri. A meki grontapu fu di a abi wan spesrutu marki na prakseri, namku fu meki „sma libi na tapu” (Yesaya 45:18). Gado meki grontapu gi libisma, èn a meki libisma fu tan na grontapu (Psalm 115:16). Te fu kaba a heri grontapu ben musu tron wan paradijs, èn a ben musu lai nanga regtfardiki libisma di ben o wroko na tapu, èn di ben o sorgu gi en. Noiti Gado pramisi den fosi tu libisma taki den ben o go na hemel te fu kaba.—Genesis 1:26-28; 2:7, 8, 15.

Satan pruberi fu gens Yehovah fu no doro a marki fu en

4. Fa Satan krutu a fasi fa Yehovah e tiri, leti na a bigin fu a libisma historia?

⁴ Wan fu den yeye manpikin fu Gado ben opo ensrefi teige Yehovah èn a ben abi a fasti bosroiti fu gens Yehovah fu no doro a marki fu en. Na so fasi, a yeye manpikin disi gebroiki a friwani di Gado gi en, na wan fowtu fasi. A pori a vrede di sma e ondrofeni te den e saka densrefi na wan lobi-ati fasi ondro a tirimakti fu Yehovah. Satan kisi a fosi man nanga uma so fara taki den teki a bosroiti fu libi sondro a tiri fu Gado (Genesis 3: 1-6). Satan no taki dati Yehovah no abi makti, ma a krutu a fasi fa Yehovah e tiri, sobun a krutu a reti di A abi fu tiri. Na so fasi, a prenspari aksi opo kon, namku efu Yehovah abi a reti fu tiri. A sani disi pasa dyaso na grontapu, leti na a bigin fu a libisma historia.

5. San Satan ben taki tu fu a getrowfasi fu den wan di e dini Gado, èn a getrowfasi fu suma moro de na ini a tori?

⁵ Boiti taki Satan krutu a reti di Gado abi fu tiri libisma nanga den yeye manpikin fu En, a meki ete wan aksi opo kon na ini den dei fu Yob. Satan meki sma tweifri na a getrowfasi fu den wan di e saka densrefi ondro Yehovah, èn di e dini En. Satan ben feni taki den e du disi fu di den wani kisi wini nomo gi densrefi, èn a ben feni tu taki den no ben o tan getrow na Gado te den ben o kisi tesi (Yob 1:7-11; 2:4, 5). Aladi Satan ben taki den sani dati fu wan libisma futuboi fu Yehovah, toku disi ben abi fu du sosrefi nanga den yeye manpikin fu Gado, iya, srefi nanga a wan-enkri gebore Manpikin fu Yehovah.

6. Fa Yehovah sori taki a e du san a abi na prakseri èn taki a e handri akruderi a nen fu en ala ten?

⁶ Fu di Yehovah ala ten e du san a abi na prakseri èn ala ten e handri akruderi a nen fu en, meki ensrefi tron wan Profeiti nanga wan Frulusuman. * A ben taigi Satan: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na yu ede èn yu sa masi en na en bakafutu” (Genesis 3:15). Nanga yepi fu a Siri fu na „uma” fu en, noso a pisi fu en organisâsi na hemel, Yehovah ben o sori efu den sani di Satan ben taki de tru, èn a ben o gi den bakapikin fu Adam howpu fu kisi frulusu nanga têgo libi.—Romesma 5:21; Galasiasma 4:26, 31.

„A santa kibritori di abi fu du nanga a wani fu en”

7. San Yehovah abi na prakseri fu du, soleki fa a meki na apostel Paulus tyari kon na krin?

⁷ Na ini a brifi di Paulus skrifi gi den Kresten na ini Efeise, a ben fruklari na wan moi fasi fa Yehovah e tiri sani fu du san a abi na prakseri. Paulus ben skrifi: „A meki wi kon sabi san na a santa kibritori di abi fu du nanga a wani fu en. A santa kibritori disi e plisi Gado èn a feni en bun; a teki a bosroiti fu du disi, fu di a wani seti wan tiri na a kaba fu a reti ten, èn a tiri disi musu tyari ala sani kon makandra baka na ondro Krestes, namku den sani di de na ini hemel nanga den sani di de na grontapu. Iya, na ondro a tiri fu en ala sani kon makandra” (Efeisesma 1:9, 10). A tumusi moi sani di Yehovah abi na prakseri fu du, na fu tyari wánfasi kon na mindri den engel nanga den libisma di e saka densrefi na wan lobi-ati fasi ondro a tiri fu en (Openbaring 4:11). Na so fasi a nen fu en o kon santa, sma o si krin taki Satan na wan leiman, èn a wani fu Gado o pasa „na grontapu soleki fa a e pasa na hemel”.—Mateyus 6:10.

8. San a wortu „tiri” wani taki?

⁸ Nanga yepi fu „wan tiri”, Yehovah ben o du a sani disi di ’e plisi en èn di a feni bun’, iya, a ben o du san a abi na prakseri. Paulus  gebroiki wan wortu di wani taki trutru „tiri fu na osofamiri”. A no abi fu du nanga wan tirimakti, neleki a Mesias Kownukondre, ma nanga wan fasi fa sma e tiri sani. * A tumusi moi fasi fa Yehovah ben o tiri sani fu meki a prakseri fu en kon tru, ben abi fu du nanga wan „santa kibritori” di safrisafri ben o tyari kon na krin bakaten.—Efeisesma 1:10; 3:9.

9. Fa Yehovah tyari kon na krin safrisafri san na a santa kibritori di abi fu du nanga a wani fu en?

⁹ Na ini Eden, Yehovah ben pramisi taki a Siri ben o kon, èn nanga yepi fu wan tu frubontu A tyari kon na krin safrisafri fa den sani di a ben abi na prakseri fu du nanga a Siri dati, ben o kon tru. A frubontu di Yehovah sroto nanga Abraham ben sori taki a pramisi Siri ben o kon na grontapu, èn taki a ben o de wan bakapikin fu Abraham. Nanga yepi fu a Siri dati, „ala pipel fu grontapu” ben o blesi densrefi. Te yu luku en bun, dan a frubontu dati ben sori tu taki trawan ben o horibaka gi a prenspari pisi fu a siri (Genesis 22:17, 18). A Wetfrubontu di Yehovah ben sroto nanga a nâsi Israel, ben sori taki A ben abi na prakseri fu seti „wan kownukondre fu priester” (Exodus 19:5, 6). A frubontu di Gado ben sroto nanga David ben sori taki a Siri ben o de Edeman fu wan Kownukondre fu ala ten (2 Samuel 7:12, 13; Psalm 89:3, 4). Baka di a Wetfrubontu tiri den Dyu teleki a Mesias doro, dan Yehovah tyari tra sani kon na krin di abi fu du nanga a prakseri fu en (Galasiasma 3:19, 24). Den libisma di ben o horibaka gi a moro prenspari pisi fu a siri, ben o tron a „kownukondre fu priester” di Gado ben taki dati a ben o seti, èn A ben o sroto „wan nyun frubontu” nanga den. Den wan disi ben o tron a nyun „Israel”, noso na  Israel na yeye fasi.—Yeremia 31:31-34; Hebrewsma 8:7-9. *

10, 11. (a) Fa Yehovah tyari kon na krin suma ben o de a pramisi Siri? (b) Fu san ede a wan-enkri gebore Manpikin fu Gado ben kon na grontapu?

¹⁰ A ten ben doro gi a Siri fu kon na grontapu, so taki den sani di Gado ben abi na prakseri ben kan kon tru. Yehovah seni na engel Gabrièl fu taigi Maria taki a ben o kisi wan manpikin di ben musu kisi a nen Yesus. Na engel ben taigi en: „A o abi biginen èn den o kari en a Manpikin fu a Moro Heiwan; Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba” (Lukas 1:32, 33). Na so a ben kon na krin suma ben de a pramisi Siri.—Galasiasma 3:16; 4:4.

¹¹ A wan-enkri gebore Manpikin fu Yehovah ben o kon na grontapu fu kisi tesi dorodoro. A fasi fa Yesus ben o tyari ensrefi, ben o sori efu den sani di Satan ben taki, ben de tru. A ben o tan getrow na en Tata? Disi ben abi fu du nanga wan santa kibritori. Bakaten, na apostel Paulus fruklari san Yesus ben o du. A ben skrifi: „A santa kibritori di abi fu du nanga a dini di wi musu dini Gado na wan getrow fasi bigi fu tru: ’A ben sori ensrefi na ini libisma skin; di a ben de wan yeye, Gado ben fruklari taki a de regtfardiki; a ben sori ensrefi na den engel, den ben preiki fu en na den trakondre sma, sma na grontapu ben bribi en, èn a ben opo go na hemel nanga glori’” (1 Timoteyus 3:16). Iya, fu di Yesus hori en soifri retifasi te na dede, meki a sori krin taki Satan na wan leiman. Ma tra finifini tori di abi fu du nanga a santa kibritori, no ben kon na krin ete.

„A santa kibritori fu Gado kownukondre”

12, 13. (a) San na wan fu den sani di abi fu du nanga „a santa kibritori fu Gado kownukondre”? (b) San Yehovah ben musu du fu man teki wan pikin grupu libisma fu go na ini hemel?

¹² Na wan fu den okasi di Yesus ben teki waka na ini Galilea fu preiki na sma, a ben sori taki a santa kibritori ben abi furu fu du nanga a Mesias Kownukondre fu en. A ben taigi den disipel fu en: „Na unu kisi a grani fu kon frustan den santa kibritori fu a kownukondre fu hemel [„Gado kownukondre”, Markus 4:11]” (Mateyus 13:11). Wan fu den sani di ben abi fu du nanga a kibritori dati, ben de taki Yehovah ben o teki wan „pikin ipi” fu 144.000 libisma di ben o de wán nanga en Manpikin leki wan pisi fu a siri, èn den ben o tiri makandra nanga en na ini hemel.—Lukas 12:32; Openbaring 14:1, 4.

¹³ Fu di Yehovah meki libisma fu libi na grontapu, meki A ben abi fu meki „nyun libisani”, so taki wan tu libisma ben kan go na hemel (2 Korentesma 5:17). Na apostel Petrus ben de wan memre fu a grupu sma di abi a tumusi aparti howpu disi fu go na hemel. Disi na san a ben skrifi: „Blesi fu a Gado èn Tata fu wi Masra Yesus Krestes, bika na fu di a abi furu sari-ati nanga wi, meki wi kon gebore nyun baka fu kan abi wan trutru howpu; a du dati nanga yepi fu na opobaka fu Yesus Krestes, so taki wi kan kisi wan gudu di no man pori, di no doti, èn di no sa lasi gowe. A gudu disi poti na wan sei na ini hemel gi unu.”—1 Petrus 1:3, 4.

14. (a) San sma di no de Dyu, ben abi fu du nanga „a santa kibritori fu Gado kownukondre”? (b) Fa a du kon taki wi man frustan den ’dipi sani disi fu Gado’?

¹⁴ Wan tra sani di abi fu du nanga a santa kibritori fu a Kownukondre di ben o tiri na ini a ten di e kon, na taki Gado ben wani taki sma di no de Dyu, ben musu de na ini a pikin grupu tu, di ben o tiri makandra nanga Krestes na ini hemel. Paulus ben fruklari a sani disi di abi fu du nanga Yehovah en „tiri”, noso a fasi fa a e tiri sani fu meki a prakseri fu en kon tru. A ben taki: „Sma fu owruten no ben kon sabi a kibritori disi, soleki fa a yeye tyari en kon na krin na ini a ten disi gi den santa apostel èn gi den profeiti fu Gado. A santa kibritori disi, na taki den trakondre sma ben o kisi a gudu tu, taki den ben o tron wan pisi fu a srefi skin, èn taki den ben o tron sma di kisi a srefi pramisi di wi kisi nanga yepi fu a bun nyunsu fu di wi de wán nanga Krestes Yesus” (Efeisesma 3:5, 6). Gado ben meki den „santa apostel” kon frustan a sani disi di abi fu du tu nanga a santa kibritori. Wi na ini a ten disi, no ben o frustan ’den  dipi sani disi fu Gado’ tu, efu wi no ben kisi yepi fu a santa yeye.—1 Korentesma 2:10; 4:1; Kolosesma 1:26, 27.

15, 16. Fu san ede Yehovah teki libisma fu tiri makandra nanga Krestes?

¹⁵ Bijbel e taki dati „den wan hondro fotenti na fo dusun sma” di e tanapu makandra nanga „a Pikin Skapu” na tapu a Sionbergi na ini hemel, „bai puru fu grontapu”. Den „bai puru na mindri libisma gi Gado èn gi a Pikin Skapu”, Krestes Yesus (Openbaring 14:1-4). Yehovah teki a fosi hemel manpikin fu en fu tron a moro prenspari pisi fu a siri di A ben pramisi na ini Eden, ma fu san ede a teki libisma fu tiri makandra nanga Krestes? Na apostel Paulus e fruklari taki ’Yehovah kari a pikin grupu disi soleki fa a ben abi na prakseri’, ’fu di na dati e plisi En èn na dati a wani’.—Romesma 8:17, 28-30; Efeisesma 1:5, 11; 2 Timoteyus 1:9.

¹⁶ Yehovah abi na prakseri fu krin en bigi èn santa nen, èn fu buweisi taki a abi a reti fu tiri hemel nanga grontapu. Jehovah gebroiki a tumusi koni „tiri” fu en, noso a koni fasi fa a e tiri sani, fu seni en fosi gebore Manpikin kon na grontapu, pe a kisi tesi dorodoro te na dede. Boiti dati, Yehovah bosroiti tu fu meki libisma tiri makandra nanga En Manpikin na ini a Mesias Kownukondre. Den libisma disi ben sori tu taki den tan getrow na Yehovah te na dede, fu di En na a wan di abi a reti fu tiri.—Efeisesma 1:8-12; Openbaring 2:10, 11.

17. Fu san ede wi kan breiti taki Krestes nanga den tra sma di o tiri makandra nanga en, ben de libisma bifo den go na hemel?

¹⁷ Yehovah sori a bigi lobi di a abi gi den bakapikin fu Adam, fu di a meki En Manpikin kon na grontapu, èn fu di a teki libisma fu tiri makandra nanga a Manpikin na ini a Kownukondre. Sortu wini a sani disi e tyari kon gi den tra sma di tan getrow na Yehovah sensi a ten fu Abel? Fu di libisma di no de volmaakti, gebore leki srafu fu sondu nanga dede, meki den musu kon gosontu baka na yeye fasi, èn na skin sei. Den musu tron volmaakti libisma, soleki fa Yehovah ben abi na prakseri sensi a bigin fu a libisma famiri (Romesma 5:12). A de wan trowstu trutru gi ala sma di abi a howpu fu libi fu têgo na grontapu, fu sabi taki a Kownu fu den sa sori lobi gi den èn taki a sa hori den firi fu den na prakseri, neleki fa a ben du dati nanga den disipel fu en na a ten di a ben du a diniwroko fu en na grontapu! (Mateyus 11:28, 29; Hebrewsma 2:17, 18; 4:15; 7:25, 26) A de wan bigi trowstu gi den tu, fu sabi taki den tra kownu-priester di o tiri makandra nanga Krestes na ini hemel, ben de mansma nanga umasma di abi bribi, èn di ben abi den srefi swakifasi nanga problema neleki wi!—Romesma 7:21-25.

A prakseri fu Yehovah e kon tru ala ten

18, 19. Fa a du kon taki wi man frustan moro bun san den wortu di Paulus skrifi na ini Efeisesma 1:8-11 wani taki, èn san wi sa go luku na ini na artikel di e kon?

¹⁸ Now wi man frustan moro krin san den wortu di Paulus ben skrifi gi salfu Kresten, wani taki. Wi kan leisi den wortu dati na ini Efeisesma 1:8-11. Paulus ben taki dati Yehovah ben meki den kon sabi „a santa kibritori di abi fu du nanga a wani fu en”, namku taki den ben o de ’den sma di o kisi wan gudu’ makandra nanga Krestes, èn taki Gado „ben bosroiti disi na fesi kaba soleki fa a ben abi na prakseri; en na a sma di e du ala sani soleki fa a wani”. Wi e frustan taki disi e kruderi nanga a tumusi moi fasi fa Gado e „tiri” sani fu meki a prakseri fu en kon tru. Disi e yepi wi fu frustan tu fu san ede wan tu fu den Kresten nomo di e go na a Memrefesa, e nyan a brede èn e dringi a win.

¹⁹ Na ini a tra artikel, wi sa go luku san a Memrefesa fu a dede fu Krestes wani taki gi den Kresten di abi a howpu fu go na hemel. Wi sa go luku tu fu san ede milyunmilyun trawan di abi a howpu fu libi fu têgo na grontapu musu poti bun furu prakseri na a sani di a Memrefesa e prenki.

[Futuwortu]

Luku baka san wi leri

• Fu san ede Yehovah meki grontapu, èn fu san ede a poti libisma na tapu?

• Fu san ede a wan-enkri gebore Manpikin fu Gado ben musu kisi tesi na grontapu?

• Fu san ede Yehovah teki libisma fu tiri makandra nanga Krestes?

[Aksi fu a tori disi]