Wi abi a Mesias fanowdu?

KANDE yu e aksi yusrefi: „Wi abi a Mesias fanowdu?” Iya, yu ben o abi leti fu aksi yusrefi efu a Mesias ben o abi krakti na yu tapu trutru.

Son sma di yu e lespeki kande, ben o gi yu a dyaranti taki a piki tapu na aksi disi de krin, namku: Yu abi a Mesias fanowdu trutru, neleki fa ala tra sma abi en fanowdu. Wan sabiman fu Dyu wet, di ben e libi na ini a fosi yarihondro, ben skrifi disi fu a Mesias: „Awinsi o furu den pramisi fu Gado de, den tron Iya nanga yepi fu en.” Na so fasi a sori o prenspari a Mesias de, bika nanga yepi fu en, a Mekiman fu wi o blesi ala den nâsi fu grontapu (2 Korentesma 1:20). A Mesias de so prenspari taki pikinmoro ala Bijbel profeititori e taki fu a kon di a ben o kon, èn fu a libi fu en na grontapu. Na ini wan buku di milyunmilyun sma gebroiki na ini den 70 yari di pasa, Henry H. Halley fruklari: „Na Owru Testamenti skrifi so taki sma ben kan fruwakti a kon fu a Mesias, èn so taki den ben kan sreka sani gi a ten dati.” Ma a de fanowdu taki a Mesias kon? Fu san ede yu musu poti prakseri na a tori disi?

A wortu „Mesias” trutru wani taki „Salfuwan”, èn a de a srefi leki a wortu „Krestes” di furu sma sabi. A Sma disi, di wan buku e kari „a moro prenspari frulusuman”, ben musu kon, fu di den fosi libisma, Adam nanga Eva, ben handri na wan fasi di e sori taki den no abi lespeki (Encyclopædia Britannica, 1970 Edition). Gado ben meki den leki volmaakti libisma, èn den ben abi a tumusi moi howpu fu libi fu têgo na ini wan Paradijs, ma den lasi a howpu dati. Wan engel di opo ensrefi teige Gado èn di sma kon sabi bakaten leki Satan Didibri, ben taki dati a Mekiman fu den ben poti tumusi furu wet gi den. Na engel disi ben taki tu dati sani ben o waka moro bun gi den efu den ben o bosroiti gi densrefi san bun èn san ogri.—Genesis 3:1-5.

Satan ben kori Eva, èn Eva bribi a lei dati. Ma soleki fa a sori, dan Adam ben feni en moro prenspari fu de nanga en wefi, leki fu de loyaal na Gado. Fu dati ede, a horibaka gi Didibri di ben gi sma deki-ati fu opo densrefi teige Gado (Genesis 3:6; 1 Timoteyus 2:14). Den sani di den du, meki taki den lasi a howpu di den ben abi fu libi fu têgo na ini wan paradijs. San ben de moro ogri, na taki den gi sondu na den pikin fu den di ben musu gebore ete. Leki bakapisi fu a sondu dati, dede kon.—Romesma 5:12.

Wantewante a Mekiman fu wi, Yehovah, bosroiti na sortu fasi a ben o tyari wan kaba kon na den takru sani di ben o pasa fu di sma ben opo densrefi teige en. A ben o meki sani kon bun baka nanga yepi fu wan bosroiti di ben o tron wan pisi fu a Wet fu Moses, namku a pai di wan sma musu pai a srefi waarde gi wan sani di lasi noso pori (Deuteronomium 19:21; 1 Yohanes 3:8). Now den bakapikin fu Adam nanga Eva no  ben abi nowan howpu moro. Fu dati ede, sani ben musu fu waka akruderi a wet dati efu oiti iniwan fu den ben o wani kisi têgo libi na ini wan paradijs na grontapu, soleki fa a Mekiman ben abi na prakseri gi a libisma famiri. A sani disi e tyari wi kon na a tori fu a Mesias.

Di Yehovah Gado krutu Didibri, dan A taki a fosi Bijbel profeititori disi: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na yu ede èn yu sa masi en na en bakafutu” (Genesis 3:15). Wan Bijbel sabiman e taki dati „den wortu disi na den fosiwan na ini den Buku fu Bijbel, di e sori taki wan Mesias ben o kon”. Wan tra sabiman ben taki dati Gado gebroiki a Mesias fu „tyari wan kaba kon na a takru situwâsi di kon de fu di den fosi libisma sondu”, èn dati sa tyari blesi kon tu gi a libisma famiri.—Hebrewsma 2:14, 15.

Ma kande yu e si taki na ini a ten disi a libisma famiri no e kisi blesi kwetikweti. Na presi fu dati, libisma no abi nowan howpu. Fu dati ede, wan buku e taki dati „furu Dyu e wakti ete fu a Mesias kon”, fu „tyari wan kaba kon na ala den ogri di e pasa, èn fu wini den feanti fu a pipel” (The World Book Encyclopedia). Ma Bijbel e taki dati a Mesias kon kaba. Buweisi de di e sori taki wi kan bribi den sani di skrifi na ini Bijbel? Na artikel di e kon now sa gi piki tapu na aksi dati.