Aksi fu leisiman

Di na apostel Paulus ben skrifi taki umasma musu „tan tiri na ini den gemeente”, dan san a ben wani taki nanga dati?

Paulus ben skrifi a Kresten gemeente na ini Korente: „Soleki fa a de na ini ala den gemeente fu den santawan, na so den umasma musu tan tiri na ini den gemeente, bika den no abi primisi fu taki” (1 Korentesma 14:33, 34). Fu man frustan den wortu disi na a yoisti fasi, dan a bun fu luku fu san ede Paulus ben gi a rai disi.

Na ini 1 Korentesma kapitel 14, Paulus ben taki fu sani di ben abi fu du nanga den konmakandra fu a Kresten gemeente. A ben fruteri fu sortu sani den ben musu taki na den konmakandra disi, èn a ben gi rai fa den konmakandra ben musu hori (1 Korentesma 14:1-6, 26-34). Moro fara, a ben sori san na a marki fu den Kresten konmakandra, namku, ’fu meki a gemeente kisi tranga’.—1 Korentesma 14:4, 5, 12, 26.

Dri leisi, Paulus gi a rai na ini 1 Korentesma kapitel 14 fu „tan tiri”. Ibri leisi, Paulus ben taki nanga wan tra grupu na ini a gemeente, ma na ala den okasi dati a ben gi a rai disi fu di a ben wani taki „ala sani pasa na wan fasi di fiti èn soleki fa sani seti”.—1 Korentesma 14:40.

A fosi leisi, Paulus ben taki: „Efu sma de di e taki na ini tra tongo, dan meki tu noso dri sma nomo du dati, èn den musu taki wan-fru-wan; èn meki wan sma fruklari den sani di den e taki. Ma efu nowan sma de di man fruklari den sani di den e taki, dan meki den tan tiri na ini a gemeente, èn meki den taki ini densrefi èn nanga Gado” (1 Korentesma 14:27, 28). Disi no ben wani taki dati den sma disi no ben mag taki noiti na den konmakandra. Nôno. Ma son leisi a ben o bun gi den fu tan tiri. Memre taki a marki fu den gemeente konmakandra na fu tranga makandra, èn disi no ben o man pasa efu den sma ben o taki wan tongo di trawan no man frustan.

A di fu tu leisi, Paulus ben taki: „Meki tu noso dri profeiti taki, èn meki den trawan luku efu den e frustan san den sani dati wani taki. Ma efu Gado e tyari wan sani kon na krin gi wan trawan di e sidon drape, dan a fosiwan musu tan tiri.” Disi no ben wani taki dati a fosi profeiti no ben mag taki moro na den konmakandra.  Nôno. Ma son leisi a ben musu tan tiri. Na so a sma di kisi a boskopu fu Gado ben kan tyari sani kon na krin gi a gemeente, èn na so fasi den ben kan doro a marki fu den konmakandra, namku fu ’gi ala sma deki-ati’.—1 Korentesma 14:26, 29-31.

A di fu dri leisi, Paulus ben e taki nanga Kresten umasma nomo, èn a taki: „Na so den umasma musu tan tiri na ini den gemeente, bika den no abi primisi fu taki, ma den musu saka densrefi” (1 Korentesma 14:34). Fu san ede Paulus gi den sisa a komando disi? A du dati, so taki ala sani ben kan waka na wan orga fasi na ini a gemeente. A taki: „Èn efu den wani sabi wan sani, dan meki den aksi den eigi masra a sani dati na oso, bika a de wan syen sani gi wan umasma fu taki na ini wan gemeente.”—1 Korentesma 14:35.

Kande son sisa ben e krutu den sani di den ben yere na ini a gemeente. A rai fu Paulus ben yepi sisa fu no kisi so wan takru fasi fu denki, èn fu saka densrefi na a posisi di Yehovah gi den, spesrutu na ondro a masra fu den (1 Korentesma 11:3). Boiti dati, te sisa ben o tan tiri, dan na so fasi den ben o sori taki den no ben suku fu kon tron leriman na ini a gemeente. Di Paulus skrifi Timoteyus, dan a sori taki a no ben o fiti taki wan umasma tron wan leriman na ini a gemeente. A ben taki: „Mi no e gi wan uma pasi fu gi leri, noso fu basi wan man, ma a musu tan tiri.”—1 Timoteyus 2:12.

Disi wani taki dati wan Kresten uma no mag taki na den gemeente konmakandra kwetikweti? Nôno. Na ini a ten fu Paulus, a ben pasa son leisi taki kande nanga yepi fu santa yeye, Kresten uma ben begi noso taki profeititori na ini a gemeente. Na den okasi disi, den ben sori taki den ben sabi a posisi fu den, fu di den ben weri wan sani fu tapu den ede (1 Korentesma 11:5). * Boiti dati, na ini den dei fu Paulus èn sosrefi na ini a ten disi, sisa makandra nanga brada e kisi a deki-ati fu meki a howpu fu den bekènti na trawan (Hebrewsma 10:23-25). Boiti taki sisa e du disi na ini a preikiwroko, den e du dati sosrefi na den gemeente konmakandra, pe den e taki fu a howpu fu den èn pe den e gi trawan deki-ati tu. Te den e kisi na okasi, dan den e gi piki di den prakseri bun fu den fosi, èn den e teki prati na demonstrâsi na a Diniwroko Konmakandra, noso den abi wan prati na a Diniwroko-skoro.

Sobun, Kresten uma e „tan tiri” fu di den no e suku fu teki a posisi fu wan mansma fu gi tiri na ini a gemeente. Den no e poti aksi soso fu haritaki èn fu krutu den wan di abi a frantwortu fu gi leri na ini a gemeente. Te Kresten sisa e hori densrefi na a yoisti posisi fu den na ini a gemeente, dan na so fasi den e yepi fu tyari vrede kon, èn fu meki „ala sani [na den gemeente konmakandra] feni presi na wan fasi di e gi trawan tranga”.—1 Korentesma 14:26, 33.

[Futuwortu]