„Fruteri wi moro!”

TAPU wan middelbaar skoro na ini a foto Nezlobnaya, Rosiakondre, wan grupu pikin na ini wan klas ben e studeri den buku fu a Rosia skrifiman Mikhail Bulgakov. Na ini wan fu den buku fu en, a skrifiman disi e wisiwasi Yesus Krestes, aladi a e sori taki Satan na wan kefalek bun sma. Baka di a skoromisi hori wan takimakandra nanga a grupu, a gi den pikin wan repetisi, noso wan papira pe den musu gi piki tapu wan tu aksi di abi fu du nanga a buku disi. Ma wan fu den studenti di nen Andrey, di abi 16 yari èn di de wan Kotoigi fu Yehovah, aksi a skoromisi na wan lespeki fasi fu no meki a repetisi disi, fu di a konsensi fu en no ben gi en pasi fu leisi den sortu buku dati. Na presi fu dati, a aksi a skoromisi efu a ben kan skrifi syatu na tapu papira fa a e prakseri fu Yesus Krestes. A skoromisi ben gi en primisi fu du dati.

Na ini a tori di a ben skrifi, Andrey fruteri taki a e lespeki a denki fu tra sma, ma a fruteri tu taki a moro bun fasi fa wan sma kan kon sabi moro fu Yesus, na fu leisi wan fu den fo Evangelietori. Te yu e du dati, „dan yu sa kon sabi moro fu a libi fu Yesus èn fu den leri fu en, soleki fa skrifi na ini buku fu sma di ben de nanga en”. Andrey ben skrifi moro fara: „Wan tra sani nanga san mi e broko mi ede, na a fasi fa a buku e taki fu Satan. Gi furu sma a kan de wan span sani fu leisi wan buku di e sori taki Satan na wan sma di du kefalek bun sani, ma gi mi a no de so.” A ben fruteri taki Satan na trutru wan makti ogri yeye di drai baka gi Gado, èn di tyari ogri, problema, nanga pina kon gi a libisma famiri. Na a kaba fu a tori di a ben skrifi, Andrey e taki: „Mi no denki taki mi o kisi wini efu mi leisi a buku disi. A no de fu taki, dati mi no abi noti teige Bulgakov. Ma mi feni taki a moro bun fu leisi Bijbel, efu mi wani kon sabi tru tori fu a libi fu Yesus Krestes.”

Fu di a skoromisi fu Andrey ben lobi den sani di a skrifi so te, meki a aksi en fu sreka ensrefi fu hori wan takimakandra fu Yesus Krestes. Andrey ben de klariklari fu du dati. Wan tra leisi di a grupu ben de na ini a klas, Andrey leisi na fesi a heri grupu san a ben skrifi. A ben fruteri fu san ede a feni taki Yesus na a moro bigi sma di oiti libi. Baka dati, a leisi wan kapitel na ini a Bijbel buku Mateyus, di e taki fu a dede fu Yesus. Fu di a ten ben pasa kaba, dan Andrey ben wani tapu nanga a takimakandra. Ma den pikin fu a klas ben begi en: „Fruteri wi moro! San pasa moro fara?” Sobun, a leisi moro fara fu a tori na ini Mateyus di e taki fu na opobaka fu Yesus.

Di Andrey ben kaba, dan den pikin fu en klas aksi en furu sani fu Yesus nanga Yehovah. „Mi ben begi Yehovah fu gi mi koni, èn a gi piki tapu a begi fu mi”, na so Andrey taki. „Mi ben man gi piki tapu ala den aksi fu den pikin!” Baka a les, Andrey gi a skoromisi fu en wan fu a buku di nen A moro bigi man di oiti ben libi *, èn a ben teki en nanga prisiri. Andrey ben taki: „A skoromisi gi mi wan hei cijfer gi a tori di mi ben skrifi èn a prèise mi fu di mi ben abi mi eigi overtoigi èn fu di mi no ben syen fu taki fu dati. A ben taki tu dati a e agri nanga wan tu fu den sani di mi e bribi.”

Andrey e prisiri taki a arki a konsensi fu en, èn taki a handri soleki fa a leri na ini Bijbel; a no leisi buku di no e gi glori na Yehovah nanga a Manpikin fu en, Yesus Krestes. A fasti bosroiti dati di a ben teki, no kibri en wawan gi falsi leri, ma a gi en wan tumusi moi okasi fu fruteri trawan fu den tumusi prenspari tru tori na ini Bijbel.

[Futuwortu]