Prisiriten di fiti èn di e gi krakti baka
Prisiriten di fiti èn di e gi krakti baka
„Awansi unu e nyan noso unu e dringi, noso awansi san unu e du, du ala sani fu gi Gado glori.”—1 KORENTESMA 10:31.
1, 2. Fu san ede wi kan taki dati sani di e gi wi prisiri, na „presenti fu Gado”, ma sortu krin warskow Bijbel e gi wi?
A NO fowtu fu wani du sani di e meki wi prisiri. Wi koloku Gado, Yehovah, wani taki wi musu prisiri fu a libi, èn a e gi wi furu sani di kan meki wi firi prisiri (1 Timoteyus 1:11; 6:17). Koni Kownu Salomo ben skrifi: „Mi kon sabi taki no wan sani moro bun . . . leki fu prisiri . . . èn so srefi taki ibriwan sma musu nyan èn dringi trutru èn si a bun fu ala en tranga wroko. A de a presenti fu Gado.”—Preikiman 3:12, 13.
2 A e gi trutru prisiri te wan sma e teki ten fu luku den bakapisi fu a bun wroko fu en, spesrutu te a abi switi demakandra nanga famiriman noso mati. Wi kan taki dati a de wan „presenti fu Gado”. Ma a no fu di a Mekiman gi wi bogobogo sani, meki wi musu abi prisiri pasa marki. Bijbel e krutu a dringi di sma e dringi sopi te fu drungu, a nyan di sma e nyan pasa marki, a du di sma e du hurudu, èn Bijbel e warskow wi taki sma di e du den sortu sani disi „no sa kisi a kownukondre fu Gado”.—1 Korentesma 6:9, 10; Odo 23:20, 21; 1 Petrus 4:1-4.
3. San o yepi wi fu tan na ai na yeye fasi èn fu hori a bigi dei fu Yehovah na prakseri?
3 Na ini den muilek lasti dei disi, a kon moro hebi srefisrefi gi Kresten fu handri nanga koni na ini wan ogri grontapu, sondro fu teki den gwenti fu en abra (Yohanes 17:15, 16). Soleki fa Bijbel taki na fesi, dan sma na ini a ten disi ben o „lobi prisiri na presi taki den lobi Gado”, èn dati ben o meki taki den ’no poti prakseri’ na den buweisi di e sori taki a „bigi banawtu” de heri krosibei (2 Timoteyus 3:4, 5; Mateyus 24:21, 37-39). Yesus ben warskow den bakaman fu en: „Poti prakseri na unsrefi taki noiti un ati e kon hebi fu di unu e nyan pasa marki, noso fu di unu e dringi tumusi furu, noso fu di unu e broko un ede nanga den sorgu fu na aladei libi, so taki a dei dati no e kon na un tapu wantronso leki wan trapu” (Lukas 21:34, 35). Leki futuboi fu Gado, wi abi a fasti bosroiti fu gi yesi na a warskow fu Yesus. Wi no de leki sma fu na ogri grontapu disi, ma wi e meki muiti fu tan na ai na yeye fasi èn fu tan hori a bigi dei fu Yehovah na prakseri.—Sefanya 3:8; Lukas 21:36.
4. (a) Fu san ede a muilek fu kan abi prisiriten di fiti? (b) Sortu rai di skrifi na ini Efeisesma 5:15, 16 wi wani fiti na ini wi libi?
4 A no makriki fu wai pasi gi den takru gwenti fu grontapu, fu di Didibri meki taki den gwenti disi e hari wi, èn a meki taki den de na ala sei. A e kon moro muilek srefi te wi wani abi prisiriten. Furu fu den sani di de fu feni na ini grontapu, seti na so wan fasi taki den e wiki den „lostu fu a skin” (1 Petrus 2:11). Furu presi de pe sma kan go luku, noso arki sani di no fiti, ma nanga yepi fu telefisi, na Internet, nanga video, den sani disi kan kon te na ini wi oso srefi. Fu dati ede, Gado Wortu e gi Kresten a koni rai disi: „Luku bun taki unu no e waka leki don sma, ma taki unu e waka leki koni sma; fu man du disi, un musu gebroiki ibri okasi bun, bika den dei ogri” (Efeisesma 5:15, 16). Soso te wi e du soifri soleki fa a rai disi e taki, dan wi o man hori wisrefi fu no go luku noso arki sani di no bun gi wi, èn fu no poti tumusi furu prakseri na den sani dati. Iya, den sortu sani disi kan pori sosrefi wi matifasi nanga Yehovah, èn te fu kaba wi kan kisi pori!—Yakobus 1:14, 15.
5. Sortu sani e gi wi trutru krakti baka?
5 Fu di Kresten abi furu fu du, meki wi kan frustan taki wanwan leisi den wani abi prisiriten. Fu taki en leti, Preikiman 3:4 e taki dati ’wan ten de fu lafu’ èn „wan ten fu dyompodyompo”. Sobun, Bijbel no e taki dati prisiriten na lasi ten. Ma prisiriten musu meki wi firi bun baka, a no musu meki wi go na baka na yeye fasi, noso tapu wi fu du yeye afersi. Lepi Kresten ondrofeni taki a e gi moro prisiri te den e gi sani na tra sma. Den e poti a wani fu Yehovah na a fosi presi na ini den libi èn den e ’kisi trutru krakti baka’, fu di den teki a tyatyari fu Krestes na den tapu.—Mateyus 11:29, 30; Tori fu den Apostel 20:35.
Fa wi kan sabi sortu prisiriten fiti gi wan Kresten
6, 7. San kan yepi yu fu kon sabi sortu prisiriten fiti èn sortuwan no fiti?
6 Fa wi kan kon sabi sortu prisiriten fiti gi wan Kresten? Papa nanga mama e yepi den pikin fu den fu kon sabi sortu prisiriten fiti, èn owruman e gi yepi te a de fanowdu. Ma fu taki en leti, a no sma musu kon taigi wi sortu buku, sortu kino wi musu luku, san wi musu prei tapu computer, fa wi musu dansi, noso sortu poku wi musu arki. Wi musu man bosroiti gi wisrefi. Paulus ben taki dati „lepi sma . . . leri fa fu gebroiki den frustan fu man si sani krin, so taki den kan sabi san bun èn san no bun” (Hebrewsma 5:14; 1 Korentesma 14:20). Na ini Bijbel wi kan feni moro gronprakseri di kan tiri wi na ini na afersi disi. Te yu e studeri a Wortu fu Gado, dan yu sa kisi wan konsensi di e wroko bun. Efu yu e arki a konsensi fu yu, dan dati sa de wan yepi gi yu.—1 Timoteyus 1:19.
7 Yesus ben taki dati „sma sa kon sabi wan bon na den froktu fu en” (Mateyus 12:33). Efu prisiriten e meki taki wi bigin lobi ogridu, hurudu, noso bonu, dan wi musu tan fara fu dati. A no ben o fiti tu fu meki prisiri na wan fasi di kan meki yu lasi yu libi, noso na wan fasi di kan gi yu mankeri. A no bun tu fu abi prisiriten di kan meki wi kisi problema na ekonomia sei, noso prisiriten di kan meki wi lasi-ati, noso iniwan prisiriten di kan meki trawan naki futu. Na apostel Paulus ben warskow wi taki, efu wi du wan sani di e trobi a konsensi fu wi brada nanga sisa, dan wi e sondu. Paulus ben skrifi: „Efu unu e sondu teige un brada na a fasi dati, èn efu unu e du sani di e trobi a konsensi fu den, dan unu e sondu teige Krestes. Fu dati ede, efu nyanyan e meki mi brada fadon, dan noiti moro mi sa nyan meti, so taki mi no sa meki mi brada fadon.”—1 Korentesma 8:12, 13.
8. San kan pasa nanga wi te wi e prei sani tapu computer èn te wi e luku felem?
8 Wenkri e seri bun furu felem nanga sani di yu kan prei tapu computer. Sonwan fu den sani disi no ogri èn den kan meki sma firi switi, ma moro nanga moro den sortu felem nanga preisani disi e sori sani di Bijbel e krutu. Fu taki en leti, a kan abi takru bakapisi te wan sma e prei sani tapu computer pe a musu gi sma bigi mankeri, pe a musu kiri sma, noso pe a musu du sani di no fiti kwetikweti! Yehovah e tegu gi sma di „lobi ogri di e du nanga tranga” (Psalm 11:5; Odo 3:31; Kolosesma 3:5, 6). Efu a sani di yu e prei e meki yu kisi bigi-ai, e meki taki yu bigin atibron esi-esi, e weri yu, noso e meki yu lasi furu ten, dan luku bun taki a sani disi no pori yu yeyefasi, èn no draidrai fu tyari kenki kon.—Mateyus 18:8, 9.
Fa fu abi prisiriten na wan fasi di fiti
9, 10. San na wan tu moi sani di sma kan du fu abi prisiriten di fiti?
9 Son leisi, Kresten e aksi densrefi: „Sortu prisiriten bun gi mi? Someni fu den sani di de na ini grontapu, no e kruderi nanga Bijbel gronprakseri.” Yu kan abi a dyaranti taki yu kan feni prisiriten di sa meki yu firi bun, ma yu musu meki muiti fu feni dati. Yu musu seti sani bun na fesi, èn spesrutu papa nanga mama musu du dati. Furu sma abi prisiriten di fiti, makandra nanga na osofamiri, èn nanga brada nanga sisa na ini a gemeente. Te unu e teki un ten fu nyan nanga makandra, aladi unu e taki fu sani di unu ondrofeni a dei dati, noso fu wan Bijbel penti, dan dati kan meki unu firi bun èn a kan gi unu deki-ati. Unu kan seti sani fu go na wan presi pe unu kan sidon nyan na dorosei, prei bal noso tra sani, noso unu kan go koiri na wan moi presi. Den sortu prisiriten disi kan switi èn den kan tyari wini kon gi wi.
10 Wan owruman nanga en wefi di kweki dri pikin e taki: „Sensi pikin-nengreten, den pikin fu wi ben kan bosroiti tu pe wi ben o go koiri. Son leisi, wi ben e gi ibriwan fu den pikin na okasi fu kari wan mati fu den kon nanga wi, èn dati ben e meki den abi moro prisiri. Wi e memre ete wan tu prenspari sani di wi ben du nanga den pikin fu wi. Son tron, wi ben e kari famiriman nanga mati fu wi na ini a gemeente, fu kon na wi oso. Wi ben e bori sani na tapu a dyari fu wi èn wi ben e prei difrenti sani nanga makandra. Son leisi wi ben e rèi go nanga wagi na den bergi, noso wi ben e waka nanga futu. Wi ben e gebroiki den sortu okasi dati fu leri wan sani fu den sani di Yehovah meki.”
11, 12. (a) San na wan tu sani di yu kan du nanga trawan, te yu e seti sani wanwan leisi fu abi prisiriten? (b) Sortu prisiri demakandra ben de okasi di furu sma no sa frigiti?
11 Efu yu de yu wawan noso efu yu abi wan osofamiri, dan yu denki taki yu ben sa man gi tra sma wan kari te yu e seti sani wanwan leisi fu abi prisiriten? Son sma, soleki sisa di no abi masra, noso osofamiri pe a papa noso a mama nomo de, abi deki-ati fanowdu (Lukas 14:12-14). Kande yu kan kari sma kon di de nyun na ini a gemeente, ma yu musu luku bun taki yu no kari sma di ben o de takru kompe gi trawan (2 Timoteyus 2:20, 21). Efu wan owru sma, noso wan sma di siki, no man komoto na oso, dan kande yu kan seti sani fu tyari wan sani di yu nanga a sma kan sidon nyan makandra.—Hebrewsma 13:1, 2.
12 Na demakandra pe sma e nyan wan pikin sani nanga makandra, pe sma e arki fa trawan e fruteri fa den tron Kresten, èn pe den yere san yepi den fu tan getrow na Gado, na okasi di furu sma no sa frigiti noiti. Unu kan bigin taki fu Bijbel tori, di ala sma na ini a grupu, èn sosrefi den pikin-nengre, kan taki fu den. Den sortu takimakandra disi kan de moi okasi fu gi makandra deki-ati, èn nowan sma musu firi syen, noso firi leki a no bun nofo fu abi wan prati na a takimakandra.
13. Fa Yesus nanga Paulus gi wi a moro bun eksempre na ini a fasi fa a ben gi sma wan switikon èn na ini a fasi fa a ben e handri te tra sma ben e gi en wan kari fu go na den oso?
13 Yesus gi wi a moro bun eksempre na ini a fasi fa a ben gi sma wan switikon èn na ini a fasi fa a ben e handri te tra sma ben e gi en wan kari fu go na den oso. Ala ten a ben e gebroiki den okasi dati fu prati yeye gudu nanga trawan (Lukas 5:27-39; 10:42; 19:1-10; 24:28-32). Den fosi disipel fu en ben waka baka na eksempre fu en (Tori fu den Apostel 2:46, 47). Na apostel Paulus ben skrifi: „Mi e angri fu si unu fu kan gi unu wan presenti na yeye fasi, so taki unu kan tanapu kánkan; ma a moro betre srefi taki wi e gi makandra deki-ati, fu di ibriwan e kisi deki-ati fu a bribi fu a trawan, iya, a bribi fu unu nanga a di fu mi” (Romesma 1:11, 12). Na a srefi fasi, wi musu man gi trawan deki-ati te wi abi prisiri demakandra.—Romesma 12:13; 15:1, 2.
Sani di wi musu hori na prakseri èn di wi musu luku bun nanga den
14. Fu san ede a moro bun fu no kari tumusi furu sma?
14 A moro bun fu no kari tumusi furu sma. Te furu sma de dan a moro muilek fu sorgu taki ala sani e waka bun. Na wan momenti te den no abi fu du yeye sani, son osofamiri kan go na wan presi pe den kan sidon nyan na dorosei, noso den kan prei wan sani sondro fu poti tumusi furu krakti tapu a wini di wan sma musu wini. Te wan tu owruman, dinari ini a diniwroko, noso tra lepi sma de na wan prisiri demakandra, dan dati kan meki taki sani waka moro bun, èn dati kan meki taki den sma di de drape kisi moro deki-ati.
15. Fu san ede wi musu sorgu taki ala sani e waka bun, te wi e kari sma kon na wi oso?
15 Den wan di e seti sani fu abi prisiri demakandra, ala ten musu sorgu taki lepi sma de di kan luku taki ala sani waka bun. Kon meki wi taki dati yu lobi fu kari sma kon na yu oso. Yu no ben o firi fruferi te yu kon yere taki wan sma di kon na yu oso naki futu, kande fu di yu no poti prakseri na wan sani? Luku a gronprakseri di kari na ini Deuteronomium 22:8. Wan Israelsma di ben meki wan nyun oso, ben musu meki wan pikin skotu gi a daki fu en oso, pe furu tron sma ben e abi prisiri demakandra nanga fisitiman. Fu san ede a ben musu du dati? „So taki yu no tyari brudu-paiman kon na tapu yu oso, fu di wan sma di e fadon, ben sa kan fadon komoto na a daki.” Na a srefi fasi, te yu wani taki sani waka bun nanga den sma di kon na yu oso fu abi prisiri demakandra, dan yu musu sorgu taki den no kisi mankeri èn taki sani no pasa di o meki den naki futu. Dati no wani taki dati yu abi fu poti ala sortu wet di no de fanowdu.
16. San wan sma musu hori na prakseri te a o prati sopi na wan prisiri demakandra?
16 Efu yu o prati sopi na wan prisiri demakandra, dan yu musu du dati nanga koni. Furu Kresten bosroiti fu prati sopi soso te densrefi kan si san den fisitiman fu den e kisi fu dringi, noso omeni den e dringi. Yu no musu meki nowan sani pasa di sa meki trawan naki futu, noso di sa meki taki sma dringi pasa marki (Efeisesma 5:18, 19). Difrenti sani de fu san ede son fisitiman bosroiti fu tan fara fu sopi. Na ini furu kondre, lanti poti wet di e sori omeni yari wan sma musu abi fu kan dringi sopi, èn Kresten sa gi yesi na den wet fu lanti awansi a gersi leki den wet disi hebi tumusi.—Romesma 13:5.
17. (a) Fu san ede wan sma musu luku bun sortu poku a e drai na wan prisiri demakandra? (b) Fa sma kan sorgu taki den e dansi na wan fasi di fiti?
17 Den wan di e orga wan prisiri demakandra, musu sorgu taki a poku, a fasi fa sma e dansi, noso tra sani di sma kan arki èn luku, e kruderi nanga Kresten gronprakseri. A no ala sma lobi den srefi sortu poku, èn furu difrenti sortu poku de fu feni. Ma furu fu den poku fu a ten disi e gi sma deki-ati fu opo densrefi teige trawan, fu du hurudu, èn fu du ogridu. Wi musu luku bun sortu poku wi e drai. A no abi fu de poku di e prei safri, na den wan-enkri poku di bun. Ma wi musu sorgu taki wi no e drai poku di e wiki den lostu fu a skin, noso poku pe sma e singi fu sani di no fiti, èn wi no musu drai poku tumusi tranga. Te yu e gi wan sma a frantwortu fu prei poku na den sortu okasi dati, dan yu musu sorgu taki a no de wan sma di no e frustan fu san ede wi no musu prei poku tumusi tranga. A no ben o fiti gi wan Kresten fu dansi na wan fasi di no fiti, noso fu seki en mindri èn en bobi na wan fasi di e wiki seks lostu.—1 Timoteyus 2:8-10.
18. San papa nanga mama kan du fu sorgu taki den pikin fu den abi prisiri demakandra na wan fasi di fiti?
18 Kresten papa nanga mama musu sabi san sma o du na den prisiri demakandra pe den pikin fu den e go, èn furu tron a ben o de wan koni sani fu go makandra nanga den pikin. A de wan sari sani taki son papa nanga mama gi pasi taki den pikin fu den go na fesa pe sma no ben de fu luku fa sani e waka, èn pe son sma di ben de drape du hurudu, noso du wan tra sani di no fiti srefisrefi (Efeisesma 6:1-4). Srefi te pikin de fu pasa den tini yari fu den èn te den sori taki yu kan frutrow den, toku a de fanowdu ete fu yepi den fu „wai pasi gi den lostu di yongusma abi”.—2 Timoteyus 2:22.
19. Efu wi wani tan poti prakseri na den moro prenspari sani, dan san wi no musu frigiti?
19 Te sma abi prisiriten wanwan leisi, dan dati kan meki den firi bun baka èn a kan meki den abi moro prisiri na ini a libi. Yehovah no e tapu wi fu abi prisiriten, ma wi sabi heri bun taki den sani disi wawan no e yepi wi fu kibri yeye gudu na ini hemel (Mateyus 6:19-21). Yesus yepi den disipel fu en fu kon frustan taki den moro prenspari sani na ini wi libi, a no den sani di wi e nyan, e dringi, noso e weri, namku den ’sani di grontapusma e feti fu kisi’, ma na fu „tan suku a kownukondre nanga [Gado en] regtfardikifasi fosi”.—Mateyus 6:31-34.
20. Sortu bun sani getrow futuboi fu Yehovah kan fruwakti fu en leki a Sma di gi wi furu?
20 Iya, awansi wi e ’nyan noso e dringi, noso awansi san wi e du’, wi musu „du ala sani fu gi Gado glori”, aladi wi e gi tangi na a Sma di gi wi bun sani di kan meki wi prisiri na wan fasi di fiti (1 Korentesma 10:31). Na ini a Paradijs grontapu di Yehovah o tyari heri esi, wi o man prisiri fu têgo fu den sani di A sa gi wi, makandra nanga a switi demakandra di wi sa abi nanga ala sma di doro den regtfardiki markitiki fu en.—Psalm 145:16; Yesaya 25:6; 2 Korentesma 7:1.
Yu e memre disi ete?
• Fu san ede a muilek gi Kresten na ini a ten disi, fu abi prisiriten di fiti?
• San son Kresten osofamiri du fu kan abi prisiriten di e meki den firi bun?
• Te wan sma e meki prisiri na wan fasi di fiti, dan san a musu hori na prakseri, èn nanga san a musu luku bun?
[Aksi fu a tori disi]
[Prenki na tapu bladzijde 18]
Suku fu abi prisiriten di sa tyari wini kon gi yu
[Prenki na tapu bladzijde 19]
Gi sortu prisiriten Kresten e wai pasi?